eSefarad Noticias del Mundo Sefaradi
por Yehuda Hatsvi
En la Megila de Ester, ke mos ayego el Dio meldar una ves mas en estos dias, meldamos antes de todo por el rey Ahashverosh.
En la gemara ay un debate si fue este rey bovo i tonto o, al kontrario, intelijente i seheludo.
Ma, lo ke es evidente i klaro komo la agua es ke Ahashverosh era un ombre ke se puede deskrivirlo en tres biervos ermozos en JudeoEspanyol: fanfaron, matamoros i fandagmeno.
Mirando aki lo ke eskrive en la Megila:
«En el treser anyo de su reinado, izo kombite a todos los
prinsipes i sus siervos………en mostrando el la rikeza
de la onra de su reino, i la gloria de la ermozura de su
grandeza, por muchos dias, siento i ochenta (180 !) dias.
I kuando se kumlpieron estos dias, izo el rey a TODO el
puevlo ke se toparon en Shoshan la kapital, desde grande
asta chiko, un konbite de siete (7) dias……….i davan
a bever en vazos de oro……..i mucho vino real segun el
poder del rey»»»
No es maraviya, entonses, ke por selebrar la salvasion de los Judyos de Shoshan, mos ordenaron muestros hahamim de bever vino.
Esto lo veo bien lojiko, segun eskrive (en Tehilim 104,15):
«Vino ke alegra el korason del ombre».
Ma, me viene kuryozo komo fue redaktado (en Masehet Megila 7.2):
«Deve la persona emborracharse en Purim asta de no apartar entre bendicho Mordehay a maldicho Aman».
A mi me parese, ke esta sentensia fue dada despues ke ya se bivyeron dos-tres vazos…
El fato es, ke segun otros savios fue dechidido ke ay de bever no mas ke asta ke tenga la persona ganas de dormir.
Nesa, ke sea!
El Shabat ke antes de Purim es dekorado kon un nombre espesial:
«Shabat Zahor» («Akodrate!»). En los kales, se meldan las ulrimas frazas del kapitolo 25 del livro de Devarim:
«Akodrate lo ke te izo (el puevlo de) Amalek en el kamino, kuando salites de Ayifto; komo te enkontro en el kamino i te korto todos los flakos detras de ti, kuando tu estavas debil i kansado».
El puevlo de Yisrael, en el dezierto, en su situasion desmizeriada, ke apenas salyo de la esklavidad, fue entonses forsado a defenderse i gerrear, kaje kon manos vazias, kontra este enemigo deskonosido.
Istorikamente, esta fue la primera gerra de los ijos de Yisrael komo puevlo.
Dunke, la Tora mos enkomenda de arrematar la membrasion de akel puevlo berbante, Amalek, de debasho de los sielos.
Despues de unos kuantos siglos de tal evento amargo, el rey Shaul gerreo kontra Amalek, kon una reushita parsiala.
Ma, ke es el atadijo a Purim?
En la Megila de Ester mos kontan ke Aman el Malo era un desendiente
del puevlo de Amalek.
De la otra parte, Mordehay i Ester eran desendientes del trivo de Benyamin, el mezmo trivo de Shaul muestro rey.
Este fato «jenealojiko», fue al pareser el ke evoko en Aman sus sentimientos diabolikos a eksterminar a todos los Judios «desde mansevo asta viejo, ninios i mujeres, en un dia, a los tredje del mes de Adar».
Kuando supo Mordehay ke salyo tal veredikto real kontra los Judyos, el imediatamente, mando a dizir a su sovrina Ester ke vayga ande el rey para rogarle i bushkar salvasion para su puevlo. Esta mision fue muy muy peligroza, ma Ester supero a su miedo personal en diziendo: «I si me depiedro – me depierdere».
(Me akodro ke una de las dichas de mi madre, en Ganeden este, era:
«Si no ay otro remedio – no temes ni tengas miedo» ).
Kon la ayuda del Dio, los kontaktos diplomatikos de Mordehay i el hen i la intelijensia de Ester – salimos en el mes de Adar de tristeza en alegria, i de limonio en dia bueno; i estos dias de Purim seran selebrados kada anyo kon gozo, para siempre.
Yine, un pensamiento me pika, personalmente, kada anyo:
En realidad, Mordehay i Ester NO lograron a anular el veredikto sataniko de ekstriminasion, firmado por el rey Ahashverosh.
Todo lo ke alkansaron tener en la mano fue un otro «firman» ke dyo a muestro puevlo la posibilidad i el derecho de defendersen.
Ansi eskrive en la Megila:
«lisensia de adjuntarse i defender sus vidas» (8,11).
Asta oy en dia, kuando se avla por los Judyos, no todo el mundo esta de akodro ke mozotros tambien meresemos al menos este derecho tan trivial.
Yehuda Hatsvi
Erets Yisrael
Para Ladinokomunita
