eSefarad Noticias del Mundo Sefaradi
El rolo aktivo de la mujer en la vida politika es un fenomeno konosido en la istoria. Djuntos kon esto, kada vez ke se revelan informasiones a este sujeto eyas atiran muestra atension i en vezes kavzan una sierta sensasion, porke en la manera de pensar de munchos de entre mozotros el domenio del poder politiko apartiene al ombre.
Entre el siglo XVI i el empesijo del siglo XVIII, a lo manko 4-5 mujeres djudias yamadas Kira djugaron rolos importantes, grasias a sus atadijos kon la elita de las mujeres en el palasio otomano. A kavza de la identidad de sus titolo «Kira«, es probable ke se kreo una konfuzion entre siertos detalios de sus istoria. Estas istorias ke no fueron ainda aklaradas bastante mos interesan partikularmente no solo porke eran mujeres i djudias, sino tambien porke yegaron a sus altas pozisiones en un sirkolo de la sosiedad turka ke fue de los mas misteriozos i peligrozos i onde, la entriga, la kalomnia i el asasinato eran korientes: el palasio otomano.
La segunda por orden kronolojiko, i la mas famoza Kira, es Ester Handali, konosida komo Ester Kira. Su istoria fue el sujeto de un estudio de Gideon Shpigel* ke eskrivio una biografía de Ester Kira, egzaminando en mizmo tiempo el rolo de la mujer en los echos del governo otomano en akeya epoka.
Segun Galante, el biervo grego «kyra«, un titolo popular ekivalente a «sinyora», era uzado para damas distingidas i esto fue la razon ke Ester Handali es konosida komo Ester Kira.**
La estoria de Ester Kira
Ester Kira era la bivda de Eliya Handali, rabino, mediko i komersante. Kuando enbivdo eya era una mujer manseva, madre de tres kreaturas. Es probable ke el menester de mantener a su famiya la yevo a bushkar manaderos de parnasa, en desvelopando atadijos de komersio i de amistad kon las mujeres del harem en el palasio. De esta manera eya yego a ser la mrkadera djudia del harem ke abastesia ropas, djoyas i objetos presiozos; era también konsejera de ermozura, i en kavzo de menester era komadre tambien.
Ester Kira se gano la amistad de la reyna-madre Nur-Banu i de la sultana Safiye, la favorita del rey Murat III. Las relasiones entre estas dos damas i Ester eran tan serkanas ke Ester fue al mizmo tiempo sus konfidente, sus reprezentante i sus servidora afuera del palasio. Eya estava al koriente de diversos sekretos de estado i sus atadijos kon el embasador de Venezia en Estambol, i otras personalidades interesadas a obtener las favores del palasio; ansi ke, grasias a su kapachedad en el kampo del komersio, pudo enrikeserse, anchear su influensa i enfuerteser su poder.
Sovre la demanda de la sultana Safíye eya se enkargo de areglar kon el embasador de Venezia la liberasion de la mujer del governador de Aljeria, Hasan Pasha, ke avia sido kapturada por los venezianos en lo ke se topava sovre una nave turka. Grasias a su intimidad kon Safiye, Ester Kira pudo revelar al embasador de Venezia la egzistensia de una korespondensia direkta entre la reyna de Fransia Catherine de Médicis i la sultana Safiye, demandando la intervension de Safiye serka del rey Murat III, para obtener el ayudo de la flota otomana kontra la flota de Espanya, ke en akeyos tiempos estava en gerra kontra la Fransia. Kon su injeniozidad i su kapachedad eya parvino mizmo a organizar a su kuento una lotería en Venezia, privilejio ke no era akordado entonses a personas ajenas. Ester intervenia, kontra paga, para ke siertas personas resivan el dirito de rijir fermas i plantasiones agrikolas, o para ser nombradas a altos postos del governo. Al mizmo tiempo avia obtenido el dirito de kovrar las entradas de la duana i uno de sus ijos era enkargado de estampar monedas. Eya arivo ansina a arekojer una grande fortuna en moneda, djoyas i bienes imobiliares, lo ke no manko de krear a su deredor el selo i la inimistad ke fueron la kavza de su trajika fin.
Ofísieres del kuerpo militar sipahi (kavaleria), ensanyados a la vista porke Ester Kira no avia kumplido su promeso de azer nombrar uno de sus miembros al posto de komandante, la arestaron djuntos kon uno de sus ijos i los mataron kruelmente. Sus kadavres, despedasados i arastados por los perros fuereon abandonados dias enteros pudriendosen en la plasa del Ipodrom en Estambol, asta ke fueron kemados.
Esto afito durante el reyno de Mehmet III (1596 – 1603), kuando el Imperio otomano estava ajitado por una kriza ekonomika i revoltas. El preteksto de la egzekuzion de Ester Kira fue la akuzasion de aver menguado la kantidad de plata en las monedas*** kon las kualas eran pagados los salarios de los sipahis.
La ambision de Ester Kira i sus pretensiones no tenían limitos i en un sierto kavzo eya avia mizmo amenazado de uzar de su poder kontra el Bet Din Rabiniko para trokar una desizon de get en favor de una de sus amigas.
De otra parte, eya apoyo las ovras de bienfezensia de su komunidad i finanso la publikasion de livros de ley. Kuando el kuartier djudio de Estambol se avia echo siniza, en el fuego de 1569, eya ayudo a las viktimas de esta dezgrasia.
Savemos también ke eya fínanso, entre otras, la publikasion en Estambol del livro Sefer Yuhasin del famozo astrónomo i istoriador Avraam Zakut. Es posible ke sus relasiones ayudaron también a los atadijos de Gracia Mendes Nasi i de Yosef Nasi kon el palasio. Es kontado ke kuando, en segito al eskandalo provokado por una mujer djudia yevando una djoya muy valutoza, el rey Mural III avia ordenado en un momento de ravia de masakrar a los djudios del paiz, Kira uzo su enfluensa para konvenser al rey de anular su orden.
El reyno de las mujeres
Segun lo apuntimos, a lo manko kuatro mujeres djudias fueron konosidas en esta epoka kon el tilolo de Kira i se distingieron en el palasio real. Ke es la kavza ke eyas pudieron djugar un rolo tan importante? Afin de responder a esta kestion kale konoser el kuadro en el kual ovravan i las kondisones ke les ayudaron a lograr estos alkanses.
El periodo en el kual bivio Ester Kira es konosido komo el Reyno de las Mujeres. Kuando una mujer del harem paria un ijo al rey, su ambision era de ver un dia su ijo suvir al trono.
La sultana Hurrem (la famoza Roxana), favorita del rey Suleyman el Manyifiko, i despues la sultana Nur-Banu kon la sultana Safiye, yegaron a ver la realizasion de sus dezeo, ma solo despues de intrigas ke kavzaron la matansa de los otros kanditatos al trono. Esto mos eksplika la razon por la kuala, malgrado ke eran izoladas i enserradas en el palasio, sus poder puedia ser tan fuerte i efektivo.
Ansi es ke Hurrem reusho a konvenser a Suleyman, ke su ijo el mas aedado i kandidato al trono, Mustafa, sea matado. Es grasias a esta intervension ke el ijo de Hurrem, Selim II, suvio al trono despues de la muerte de Suleyman. De la mizma manera ovro probablamente la sultana Nur-Banu, kuando fueron matados los sinko ermanos de su ijo, el rey Murat III, ke segio a Selim. Le intervension de Safiye provoko despues, el mas sangriente evenimiento en las luchas de rivalidad en la dinastía otomana. Eya ovro para ke sean aogados los 19 ermanos i medio-ermanos kon mas de 20 ermanas i media-ermanas de su ijo, el rey Mehmet III, i las siete konkubinas prenyadas de su padre, el rey Murat, ke venia de murir.
En estos tiempos sinistros de la istoria, kuando la ambision del poder no konosia limitos en sus krueldad, esto era la regla del djogo. Siendo sometidas a un orden de vida enserrado, onde el kontakto kon otros ombres era defendido, estas damas, para anchear sus sirkolo de influensa tenian menester de mujeres libres i kapaches, ke puederian ovrar afuera del palasio. Al mizmo tiempo estas Kiras djugaron también, muy probablamente, un rolo de psikologo para las mujeres, oprimidas por la atmosfera de soledad, de rivalidad i del espanto en el harem, ke sintian el menester de dezbafar i de tener un apoyo moral.
——————————————————————
*Shpigel Gideon. «haYe’hudiya mi Konstantinopol, Sipura shel Ester Kira.» Mahut, Kaf, Lod, Yerushalayim, enverano 1988.
** Galante Abraham. Esther Kyra, d’après de nouveaux documents. Constantinople, 1926. Tengo personalmente konosido en Estambol una dama grega, ke uzavan yamarla Kira Eliso, en sinyo de respekto.
***En akeyos tiempos la diminusion de la kantidad de plata en las monedas avia provokado una grande deskontentes. Los djudios fueron akuzados de aver menguado el pezo de las monedas de plata, en limandolas para apoderarsen de sus polvo. Probablamente esta es la razón ke esta akuzasion fue uzada komo preteksto para el asasinato de Ester Kira. Despues de su egzekusion, los djudios del Imperio Otomano fueron sometidos a siertas restriksiones komo la ovligasion de yevar un boneto kolorado i la defensa de rijir los echos de la duana. De otra parte la sultana Safiye ensanyada por el asasinato de Ester Kira, uzo su enfluensa para ke el prinsipal responsable de este evenimiento, Halil Pasha, sea destituyido de su posto.
Gad Nassi
