ŞALOM a todos mis Keridos lektores por Forti Barokas (teksto i boz)

Despues de unos dos mezes de vakansas, baruh ashem mos reunimos de muevo. Atorgare ke ya me aviya eskarinyado de eskrivirvos i de tomar vuestros ermozos komplimentos. Vos oguro un invyerno kon sanedad, kon atslaha, sin sar i sin mal, kon alegriya i pas, mas ke no veyaj gerra, oyeremos notisyas buenas AMEN. SHANA TOVA U METUKA.

Komo me durmo byen tadre, las nochadas de invyerno son largas de sorte, me pasan en buskando artikolos en el komputer. En pasadas rankontri una eskrita ke me vino muy enteresante. Una mujer djudia muy famosa ma deskonosida, u byen yo no la konosiya, alora vini la konoseremos endjuntos a VİCTORYA NİNİO HAZAN

Victoria Hazan, nasyo el 15 Avril en el anyo 1896 en Turkiya en Manisa-Salihli, tresera ija de una famiya sefaradi, de padre i madre Moshe i Rivka Ninio. Eya fue una kantante i kompozitora de kantikas djudias i en mezmo tyempo tanyedora de “ud”, la alkunya “Hazan” es de su primer marido.

En el anyo 1915 se enstalo a İzmir i en el anyo 1920 emigro a New York. En 1925 se konosyo kon İsrael Hazan i se kazaron. Dospues de dyez anyos su marido muryo, eya fue ovligada de kazarse kon Joe Rosa, el mezmo djudyo sefaradi ma eya syempre konservo la alkunya Hazan.

Se konvirtyo en presidenta en United Sisterhood Benevolent Society de la Sociedad Benefica de la ermandad Unida en Bronx, Nueva York.

Dyo konsertos en la sinagoga kantando i tanyendo ud. Kompozo kantikas en turko, ladino, fransez, ebreo, grego i en armenyo

Sus kantikas fueron muy popular i resivyo miles de fanes.

Kon la ensistensya de sus oyentes, mezmo ke no teniya la posibilidad de pagar los gastes de los studyos, kon el apoyo de su marido entro al studyo i parvino a kitar un album de kantikas kompozadas por eya mezmo, en linguas Turko, en grego i en ladino. El album nombrado “TODAS MİS ESPERANSAS” fue publikado kon la ayuda de las kompaniyas “KALİPHON” i “METROPOLİTAN”.

Viktorya Hazan kompozo sus kantikas en stilos de la musika tradisyonal djudia sefaradi i de la klasika musika Turka. De sorte sus kantikas fueron akompanyadas por enstrumentos ke akompanyan la musika Turka, komo ud, kanun, violon, klarneta i darbuka.

Viktorya bivyo en Nueva York asta la fin de su vida, muryo en el 21 Novembre del anyo 1995 a la edad de 99 anyos. Eya fue enterrada en el simiteryo de Cincinnati, Ohio.