Sefer Tora en Djudeo Espanyol – Transkrivida kon letras latinas del livro por Ye’huda Sidi / YE’HOSHUA (16-20)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

YE’HOSHUA

16

¹I la suerte de lo ijos de Yosef salyo dezde el Yarden Yeriho asta las aguas de Yeriho al oryente, al dizyerto ke suve de Yeriho al monte de Bet-El: ²i de Bet-El salia a Luz, i pasava al termino de Arki-Ataraot: ³i desendia al oksidente al termino de Yafleti, asta el termino de Bet-Horon la de abasho, i asta Gezer; i sus salidas eran a la mar. ⁴Ansi eredaron los ijo de Yosef, Menashe i Efrayim.

⁵I este fue el termino de los ijos de Efrayim por sus linajes: el termino de su eredad al oryente fue Atrot-Adar asta Bet-Horon la de arriva. ⁶I salia el termino a la mar a Mihmetat al norte; i rodeava el termino al oryente a Taanat-Shilo, i pasava por ayi al oryente a Yanoh: ⁷i de Yanoah desendia a Atarot i a Naarat, i enkontrava kon Yeriho, i salia al Yarden. ⁸De Tapuah andava el termino por el oksidente al arroyo de Kana, i sus salidas eran a la mar. Esta es la eredad del trivo de los ijos de Efrayim por sus linajes. ⁹I las sivdades apartadas para los ijos de Efrayim estavan entre la eredad de los ijos de Menashe, todas las sivdades i sus aldeas. ¹⁰I no desterraron al Kenaanio ke morava en Gezer; i kedo el Kenaanio entre Efrayim asta oy, i fue sodjiftado a pecha.

17

¹I uvo suerte al trivo de Menashe, porke fue primodjenito de Yosef: a Mahir primodjenito de Menashe, padre de Gilad; por lo ke fue varon de gerra tuvo Gilad i Bashan. ²I uvo suerte al resto de los ijos de Menashe por sus linajes; para los ijos de Aviezer, i para los ijos de Helek, i para los ijos de Asriel, i para los ijos de Shehem, i para los ijos de Hefer, i para los ijos de Shemida. Estos fueron los ijos machos de Menashe, ijo de Yosef, por sus linajes. ³I Tselofhad, ijo de Hefer, ijo de Gilad, ijo de Mahir, ijo de Menashe, no tuvo ijos sino ijas; i estos son los nombres de sus ijas: Mahla, i Noa, Hogla, Milka, i Tirtsa. ⁴I se ayegaron delante de Eliezer el saserdote, i delante de Ye’hoshua, ijo de Nun, i delante de los mayorales, dizyendo: A’ enkomendo a Moshe ke nos dyera eredad entre nuestros ermanos. I el les dyo eredad entre los ermanos de su padre segun el dicho de A’. ⁵I kayeron a Menashe dyez partes afuera de la tyerra de Gilad i de Bashan, ke esta de la otra parte del Yarden. ⁶Porke las ijas de Menashe eredaron eredad entre sus ijos; i la tyerra de Gilad fue al resto de los ijos de Menashe. ⁷I fue el termino de Menashe dezde Asher a Mihmetat, ke esta delante de Shehem; i andava el termino a la mano derecha a los moradores de En-Tapuh. ⁸I la tyerra de Tapuah fue de Menashe; i Tapuah ke esta al termino de Menashe, fue de los ijos de Efrayim. ⁹I desendia el termino al arroyo de Kana al sud del arroyo. Estas sivdades de Efrayim estan entre las sivdades de Menashe; i el termino de Menashe fue del norte del arroyo, i sus salidas eran a la mar. ¹⁰El sud de Efrayim, i el norte de Menashe, i la mar era su termino; i enkontravan kon Asher al norte, i kon Yissahar al oryente. ¹¹I Menashe tuvo en Yissahar i en Asher a Bet-Shaan i sus aldeas, i Yivleam i sus aldeas, i los moradores de Dor i sus aldeas, i los moradores de En-Dor i sus aldeas, i los moradores de Taanah i sus aldeas, i los moradores de Megido i sus aldeas, tres komarkas. ¹²Ma los ijos de Menashe no pudyeron desterrar a los de akeyas sivdades, sino ke el Kenaanio kijo morar en esta tyerra. ¹³I fue, ke kuando los ijos de Yisrael se enfortesyeron, izyeron al Kenaanio pechero, ma no lo desterraron del todo.

¹⁴I los ijos de Yosef avlaron a Ye’hoshua, dizyendo: ¿por ke me diste una sola suerte i una sola parte por eredad, syendo yo un puevlo grande, i ke A’ me a bendicho asta agora? ¹⁵I Ye’hoshua les disho: si eres puevlo grande, suve tu a la shara, i korte para ti ayi en la tyerra del Perizio i de los Refaim, syendo ke el monte de Efrayim es estrecho para ti. ¹⁶I los ijos de Yosef disheron: no bastara para nozotros el monte; i todos los Kenaanios ke moran en la tyerra de vaye tyenen kuatriguas de fyerro, los ke estan en Bet-Shaan i en sus aldeas, i los ke estan en el vaye de Yizreel. ¹⁷I Ye’hoshua avlo a la kaza de Yosef, a Efrayim i a Menashe, dizyendo: tu eres gran puevlo, i tyenes gran fuersa; no tendras una sola suerte. ¹⁸Ma el monte sera tuyo, porke es shara, i tu la kortaras, i seran tuyas sus salidas; porke desterraras al Kenaanio, aunke tenga kuatriguas de fyerro, i aunke sea fuerte.

18

¹I toda la kompanya de los ijos de Yisrael se adjuntaron en Shilo, i asentaron ayi la tyenda del plazo. I la tyerra fue sodjiguada delante de eyos. ²Ma avian kedado en los ijos de Yisrael syete trivos, los kuales dainda no avian resivido su eredad. ³I disho Ye’hoshua a los ijos de Yisrael: ¿asta kuando seresh deskuydados de venir a tomar posesyon de la tyerra ke vos dyo A’ el Dyo de vuestros padres? ⁴Dad de vozotros tres varones por kada trivo; i los enbiare, i se levantaran, i andaran por la tyerra, i la deskriviran segun la ereadad de eyos, i se tornaran a mi. ⁵I la espartiran en syete partes; Ye’huda estara en su termino al sud, i la kaza de Yosef estara en su termino al norte. ⁶Vozotros pues deskriviresh la tyerra en syete partes, i me traeresh la deskripsyon aki; i yo vos echare las suertes aki delante de A’ nuestro Dyo. ⁷Ma los Levitas no tyenen parte entre vozotros; porke el saserdosyo de A’ es su eredad, I Gad, i Reuven , i el medyo trivo de Menashe, ya resivyeron su eredad de la otra parte del Yarden al oryente, la kual les dyo Moshe syervo de A’. ⁸I los varones se levantaron, i se fueron; i Ye’hoshua enkomendo a los ke avian para deskrivir la tyerra, dizyendo: andad i kaminad por la tyerra, i deskrivilda, i tornad a mi, para ke yo vos eche las suertes aki delante de A’ en Shilo. ⁹I fueron los varones, i pasaron por la tyerra, i la dekrivyeron por las sivdades en syete partes en un livro; i vinyeron a Ye’hoshua al real en Shilo. ¹⁰I Yehoshua les echo las suertes en Shilo delante de A’; i ayi espartyo Ye’hoshua la tyerra a los ijos de Yisrael segun sus espartimyentos,

¹¹I suvyo la suerte del trivo de los ijos de Binyamin por sus linajes; i salyo el termino de su suerte entre los ijos de Ye’huda i los ijos de Yosef. ¹²I fue el termino de eyos al lado del norte dezde el Yarden; i suvia el termino al lado de Yeriho al norte, i suvia por el monte al oksidente; i sus salidas eran al dizyerto de Bet-Aven. ¹³I de ayi pasava el termino a Luz, por el lado de Luz al sud, ke es Bet-El; i desendia el termino a Atrot-Adar, serka del monte ke esta al sud de Bet-Horon la de abasho. ¹⁴I djirava el termino, i rodeava por el kanton del oksidente al sud, dezde el monte ke esta delante de Bet-Horon al sud; i sus salidas eran a Kiryat-Baal ke es Kiryat-Yearim, sivdad de los ijos de Ye’huda. Este era el lado del oksidente, ¹⁵I el lado del sud era dezde el kavo de Kiryat-Yaarim; i salia el termino al oksidente, i salia a la fuente de las aguas de Neftoah. ¹⁶I desendia el termino al kavo del monte ke esta delante del vaye de Ben-‘Hinom ke esta en el vaye de los Refaim al norte, i desendia al vaye de ‘Hinom al lado del Yevusio al sud, i de ayi desendia a la fuente de Rogel: ¹⁷i djirava del norte, i salia a En-Shemesh, i salia a Gelilot, ke esta enfrente de la suvida de Edumin, i desendia a la pyedra de Bo’han, ijo de Reuven: ¹⁸i pasava al lado eskuentra de Arava al norte, i desendia a Arava: ¹⁹i pasava el termino por el lado de Bet-Agala al norte; o las salidas del termino eran a la lingua del mar salado al norte, al kavo del Yarden al sud. Este era el termino del sud. ²⁰I el Yarden lo aterminava al lado del oryente. Esta fue la eredad de los ijos de Binyamin por sus terminos al derredor, segun sus linajes. ²¹I las lisvdades del trivo de los ijos de Binyamin, por sus linajes, fueron Yeriho, i Bet-Hogla, i Emek-Ketsits, ²²i Bet-Arava, i Tsemarayim, i Bet-El, ²³i Avim, i Para, i Ofra, ²⁴i Kefar-Amona, i Ofni, i Geva; dodje sivdades i sus aldeas: ²⁵Giveon, i Rama, i Beerot, ²⁶i Mitspe, i Kefira, i Motsa, ²⁷i Rekem, i Yirpeel, i Tarala, ²⁸i Tsela, i Elef, i Yevus, ke es Yerushalayim, i Givat, i Kiryat; katorze sivdades i sus aldeas. Esta es la eredad de los ijos de Binyamin.

19

¹I la segunda suerte salyo por Shimon, por el trivo de los ijos de Shimon segun sus linajes’ i su eredad fue entre la eredad de los ijos de Ye’huda. ²I tuvyeron en su eredad a Beer-Sheva, i Sheva, i Molada, ³i Hatsar-Shual, i Bala, i Atsem, ⁴i Eltolad, i Betul, i Horma, ⁵i Tsiklag, i Bet-Markavot, i Hatsar-Susa, ⁶i Bet-Levaot, i Sharuhen; tredje sivdades i sus aldeas: ⁷Ayin, Rimon, i Eter, i Ashan; kuatro sivdades i sus aldeas: ⁸i todas las aldeas ke estavan al derredor de estas sivdades asta Baalat-Beer-Ramat, del sud. Esta es la eredad del trivo de los ijos de Shimon por sus linajes. ⁹De la parte de los ijos de Ye’huda fue sakada la eredad de los ijos de Shimon; porke la parte de los ijos de Ye’huda era demazyada para eyos; ansi ke los ijos de Shimon eredaron su eredad entre la eredad de eyos.

¹⁰ I la tersera suerte salyo por los ijos de Zevulun segun sus linajes; i el termino de su eredad fue asta Sarid. ¹¹I su termino suvia a la mar i Marala, i enkontrava kon Dabashet, i enkontrava al arroyo ke esta delante de Yokneam: ¹²i tornava de Sarid al oryente, onde esklarese el sol, al termino de Kislot-Tavor, i salia a Dovrat, i suvia a Yafia: ¹³i de ayi pasava al oryente, al Levante, a Gat-Hefer, a Ita-Katsin, i salia a Rimon-Metoar a Nea. ¹⁴I el termino lo rodeava por el norte a Hanaton; i sus salidas eran en el vaye de Yiftah-El: ¹⁵i Katat, i Na’halal, i Shimron, i Yidala, i Bet-Lehem; dodje sivdades i sus aldeas. ¹⁶Esta es la eredad de los ijos de Zevulun por sus linajes, estas sivdades i sus aldeas.

¹⁷La kuarta suerte salyo por Yissahar, por los ijos de Yissahar segun sus linajes. ¹⁸I su termino fue a Yizreel i Kesulot, i Shunem, ¹⁹i Hafarayim, i Shion, i Anaharat, ²⁰i Rabit, i Kishyon, i Avets, ²¹i Remet, i En-Ganim, i En-Hada, i Bet-Patsets; ²²i enkontrava el termino kon Tavor, i Shatsima, i Bet-Shemesh; i las salidad se su termino eran al Yarden; dyez i sesh sivdades i sus aldeas. ²³Esta es la eredad del trivo de los ijos de Yissahar por sus linajes, las sivdades i sus aldeas.

²⁴I la kinta suerte salyo por el trivo de los ijos de Asher segun sus linajes. ²⁵I su termino fue Helkat, i Hali, i Beten, i Ahshaf, ²⁶i Almeleh, i Amad, i Mishal; i enkontrava kon Karmel al oksidente, i kon Shihor-Livnat: ²⁷i tornava a onde esklarese el sol a Bet-Dagon, i enkontrava kon Zevulun, i kon el vaye de Yiftah-El al norte de Bet-Emek, i Neiel, i salia a Kavul, a la izkyerda: ²⁸i Evron, i Rehov, i Hamon, i Kana, asta la gran Tsidon. ²⁹I de ayi tornava el termino a Rama, i asta la sivdad enkastiyada de Tsor; i tornava el termino a Hosa; i sus salidas eran a la mar dezde la komarka de Ahziva: ³⁰i Uma, i Afek, i Rehov; vente i dos sivdades i sus aldeas. ³¹Esta es la eredad del trivo de los ijos de Asher por sus linajes, estas sivdade i sus aldeas.

³²La sejena suerte salyo por los ijos de Naftali, por los ijos de Naftali segun sus linajes. ³³I fue su termino dezde Helef, dezde Elon en Tsaananim, i Adami-Nekev, i Yavneel asta Lakum; i sus salidas eran al Yarden: ³⁴i de ayi tornava el termino a Aznot-Tavor, i salia de ayi a Hukok, i enkontrava kon Zevulun al sud, i enkontrava kon Asher al oksidente, i kon Ye’huda al Yarden a onde esklarese el sol. ³⁵I las sivdades enkastiyadas eran Tsidim, Tser, i Hamat, Rakat i Kineret, ³⁶i Adama, i Rama, i Hatsor, ³⁷i Kedesh, i Edrei, i En-Hatsor, ³⁸i Yiron, i Migdal-El, Horem, i Bet-Anat, i Bet-Shemesh; dyez i nueve sivdades i sus aldeas. ³⁹Esta es la eredad del trivo de los ijos de Naftali por sus linajes, las sivdades i sus aldeas.

⁴⁰La setena suerte salyo por el trivo de los ijos de Dan segun sus linajes. ⁴¹I el termino de su eredad fue Tsora, i Eshtaol, i Ir-Shemes, ⁴²i Shaalabin, i Ayalon, i Yitla, ⁴³i Elon, i Timna, i Ekron, ⁴⁴i Elteke, i Gibeton, i Baalat, ⁴⁵i Ye’hud, i Bene-Berak, i Gat-Rimon, ⁴⁶I Me-Yarkon, i Rakon, kon el termino delante de Yafo. ⁴⁷I salyo el termino de los ijos de Dan manko para eyos; i suvyeron los ijos de Dan i pelearon kon Leshem, i la prendyeron, i la iryeron a tajo de espada, i la tomaron en posesyon, i moraron en eya; i yamaron a Leshem Dan, segun el nombre de Dan su padre. ⁴⁸Esta es la eredad del trivo de los ijos de Dan por sus linajes, estas sivdades i sus aldeas.

⁴⁹I kuando akavaron de espartir la tyerra en eredad por sus terminos, dyeron los ijos de Yisrael eredad a Ye’hoshua, ijo de Nun, entre eyos. ⁵⁰Segun el dicho de A’ le dyeron la sivdad ke el demando, ke fue Timnat-Serah en el monte de Efrayim; i fraguo la sivdad i moro en eya. ⁵¹Estas son las eredades ke espartyeron por suerte en eredad Elazar el saserdote i Ye’hoshua, ijo de Nun, i las kaveseras de los padres de los trivos de los ijos de Yisrael en Shilo, delante de A’, a la puerta de la tyenda del plazo. akavaron de apartir la tyerra.

20

¹I avlo A’ a Ye’hoshua dizyendo: ²avla a los ijos de Yisrael, dizyendo: senyaladvos las sivdades de akojimyento, de las kuales yo vos avli por mano de Moshe: ³para ke se fuyga ayi el matador ke iryere a una persona por yerro, sin saver; i vos seran por akojimyento del regmidor de la sangre. ⁴I el tal fuyera a una de estas sivdades, i se prezentara a la entrada de la purta de la sivdad, i deklarara sus kavzas en oyidos de los vyejos de akeya sivdad; i eyos lo resiviran adyentro de la sivdad konsigo, i le daran lugar, para ke more kon eyos. ⁵I kuando el regmidor de la sangre persigyere detras de el, no entregaran al matador en su mano; porke iryo a su kompanyero sin saver, i no lo aborresia [1]antes. ⁶I morara en akeya sivdad asta ke este delante de la kompanya en djuisyo, asta la muerte del gran saserdote ke fuere en akeyos dias; entonses el matador tornara , i vendra a su sivdad, i a su kaza, a la sivdad de onde fuyo.

⁷I apartaron a Kedesh en Galil en el monte de Naftali, i a Shehem en el monte de Efrayim, i a Kiryat-Arba, ke es Hevron, en el monte de Ye’huda. ⁸I de la otra parte del Yarden de Yeriho, al oryente dyereon a Betser en el dizyerto en la yanura del trivo de Reuven, i a Ramot en Gilad del trivo de Gad, i a Golan en Bashan del trivo de Menashe. ⁹Estas fueron las sivdades apartadas para todos los ijos de Yisrael, i para el pelegrino ke pelegrinara entre eyos, para ke fuyira aya kualkyera ke iryera a alguna persona por yerro, i para ke no muryera por mano del regmidor de la sangre asta ke estuvyera delante de la kompanya.

[1] Ebreo: ayer i anteayer

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.