Sefer Tora en Djudeo Espanyol – Transkrivida kon letras latinas del livro por Ye’huda Sidi / VAYIKRA: 24 – VAYIKRA (1 a 5)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

24 – VAYIKRA

1

¹I yamo A’ a Moshe, i le avlo de la tyenda del plazo, dizyendo: ²avla a los ijos de Yisrael, i diles: kuando un ombre de entre vozotros ayegare ayegasyon de la kuatropea a A’, de las vakas o de las ovejas ayegaresh vuestra ayegasyon. ³Si su ayegasyon fuere alsasyon de las vakas, macho sano lo ayegara; a la puerta de la tyenda del plazo lo ayegara, para ke sea enveluntado para el delante de A’. ⁴I pondra su mano sovre la kavesa de la alsasyon; i sera enveluntada para el para azer ekspiasyon (kapara) por el, i degoyara el bezerro delante de A’; ⁵i los ijos de A’haron, los saserdotes (ko’hanim), ayegaran la sangre, i esparziran la sangre al derredor sovre el ara, ke esta a la puerta de la tyenda del plazo. ⁶I deskorchara la alsasyon, i la desmembrara por sus myembros. ⁷I los ijos de A’haron el saserdote pondran fuego sovre el ara, i ordenaran lenya sovre el fuego. ⁸I los ijos de A’haron, los saserdotes, ordenaran los myembros, la kavesa, i el sevo, sovre la lenya ke esta sovre el fuego ke esta sovre el ara. ⁹I sus entranyas i sus pyernas lavara kon agua; i el saserdote lo saumara todo en el ara, por alsasyon, ofrenda kemada de guezmo resivivle a A’.

¹⁰I si su ayegasyon fuere de las ovejas, de los karneros o de las kavras, para alsasyon, macho sano lo ayegara. ¹¹I lo degoyara al lado del ara al norte delante de A’; i los ijos de A’haron, los saserdotes, esparziran su sangre sovre el ara al derredor. ¹²I lo desmembrara por sus myembros, i su kavesa i su sevo; i el saserdote los ordenara sovre la lenya ke esta sovre el fuego, ke esta sovre el ara. ¹³I las entranyas i las pyernas lavara kon agua; i el saserdote lo ayegara todo, i lo saumara en el ara; alsasyon es, ofrenda kemada de guezmo resivivle a A’.

¹⁴I si la alsasyon para su ayegasyon a A’ fuere de aves, ayegara su ayegasyon de tortolos, i de palombinos.

¹⁵I el saserdote lo ayegara al ara, i desservigara su kavesa, i la saumara en el ara; i su sangre sera esprimida sovre la pared del ara. ¹⁶I kitara su papo kon su susyedad, i lo echara djunto al ara, al oryente, al lugar de la seniza. ¹⁷I lo fendera por sus alas, ma no lo apartara; i el saserdote lo saumara en el ara, sovre la lenya ke esta sovre el fuego; alsasyon es, ofrenda kemada de guezmo resivivle a A’.

2

¹I kuando alguno ayegare ayegasyon de prezente a A’, su ayegasyon sera semola; i vazyara sovre eya azeyte, i metera sovre eya ensensyo. ²I la traera a los ijos de A’haron, los saserdotes, i de ayi tomara su punyo yeno de su semola, i de su azeyte, kon todo su ensensyo; i el saserdote (ko’hen) saumara su membrasyon en el ara, por ofrenda kemada de guezmo resivivle a A’. ³I el sovraje del prezente sera para A’haron i para sus ijos; es koza santisima de las ofrendas kemadas de A’.

⁴I kuando ayegares ayegasyon de prezente kozida en orno, sera tortas sensenyas de semola enbueltas en azeyte, i benmuelos de sensenyas kon azeyte.

⁵I si tu ayegasyon fuere prezente kozido sovre kasuela, sera de semola enbuelta en azeyte, sensenya sera. ⁶La despedesaras en pedasos i vazyaras sovre eya azeyte; prezente es.

⁷I si tu ayegasyon fuere prezente de sarten, se ara de semola kon azeyte. ⁸I traeras a A’ el prezente ke se ara de estas kozas; i lo ayegaras al saserdote, i el lo ayegara al ara. ⁹I el saserdote levantara del prezente su membrasyon, i la saumara en el ara; es ofrenda kemada de guezmo resivivle a A’. ¹⁰I el sovraje del prezente sera para A’haron i para sus ijos; es koza santisima de las ofrendas kemadas de A’. ¹¹Ningun prezente ke ayegaresh a A’ se ara kon levadura; porke de ninguna levadura, ni de ninguna myel saumaresh ofrenda kemada a A’. ¹²Por ayegasyon de primisyas las ayegaresh a A’, ma no suvan sovre el ara por guezmo resivivle. ¹³I toda ayegasyon de tu prezente salaras kon sal; i no aras ke falte la sal del firmamyento de tu Dyo de sovre tu prezente; sovre toda ayegasyon tuya ayegaras sal.

¹⁴I kuando ayegares prezente de primisyas a A’, espigas freskas tostadas al fuego, grano tyerno majado, ayegaras por prezente de tus primisyas. ¹⁵I meteras sovre el azeyte, i pondras sovre el ensensyo; prezente es. ¹⁶I el saserdote saumara su membrasyon, parte de su grano majado. I de su azeyte, kon todo su ensensyo; es ofrenda kemada a A’.

3

¹I si su ayegasyon fuere sakrifisyo de pases, se lo ayegare de las vakas, sea macho o embra, sano lo ayegara delante de A’. ²I pondra su mano sovre la kavesa de su ayegasyon, i la degoyara a la puerta de la tyenda del plazo; i los ijos de A’haron, los saserdotes, esparziran la sangre sovre el ara al derredor. ³I ayegara del sakrifisyo de las pases. Por ofrenda kemada a A’, el sevo ke kuvre las entranyas, i todo el sevo ke esta sovre las entranyas, ⁴i los dos rinyones, i el sevo ke esta sovre eyos, ke esta sovre las ijadas, i el redanyo sovre el igado, kon los rinyones lo kitara. ⁵I los ijos de A’haron lo saumaran en el ara, sovre la alsasyon ke esta sovre la lenya ke esta sovre el fuego; es ofrenda kemada de guesmo resivivle a A’.

⁶I si de las ovejas fuere su alsasyon por sakrifisyo de pases a A’, macho o embra, sano lo ayegara. ⁷Si ayegare karnero por su alsasyon, lo ayegara delante de A’. ⁸I pondra su mano sovre la kavesa de su ayegasyon, i la degoyara delante de la tyenda del plazo; i los ijos de A’haron esparziran su sangre sovre el ara al derredor. ⁹I ayegara del sakrifisyo de las pases, por ofrenda kemada a A’, su sevo, la kola entera, djunto al espinazo la kitara, i el sevo ke kuvre las entranyas, i todo el sevo ke esta sovre las entranyas, ¹⁰i los dos rinyones, i el sevo ke esta sovre eyos, ke esta sovre las ijadas, i el redanyo sovre el igado, kon los rinyones lo kitara. ¹¹I el saserdote lo saumara en el ara; es komida de ofrenda kemada a A’.

¹²I si kavra fuere su ayegasyon, la ayegara delante de A’. ¹³I pondra su mano sovre su kavesa, i la degoyara delante de la tyenda del plazo; i los ijos de A’haron esparziran su sangre sovre el ara al derredor. ¹⁴I ayegara de eya su ayegasyon, por ofrenda kemada a A’, el sevo ke kuvre las entranyas, i todo el sevo ke esta sovre las entranyas, ¹⁵i los dos rinyones, i el sevo ke esta sovre eyos, ke esta sovre las ijadas, i el redanyo sovre el igado, kon los rinyones lo kitara. ¹⁶I el saserdote los saumara en el ara; es komida de ofrenda kemada por guezmo resivivle; todo el sevo es para A’. ¹⁷Sera fuero de syempre por vuestros djerenansyos en todas vuestras moradas: ningun sevo ni ninguna sangre komeresh.

4

¹I avlo A’ a Moshe, dizyendo: ²avla a los ijos de Yisrael, dizyendo: kuando alguno pekare por yerro en alguna de las enkomendansas de A’ ke no son de azer, i izyere alguna de eyas: ³si el saserdote untado pekare, azyendo kulpozo al puevlo, ayegara por su pekado ke peko, un toro ijo de vaka sano a A’ por sakrifisyo por pekado. ⁴I traera el toro a la puerta de la tyenda del plazo delante de A’, i pondra su mano sovre la kavesa del toro, i degoyara el toro delante de A’. ⁵I el saserdote untado tomara de la sangre del toro, i la traera a la tyenda del plazo. ⁶I el saserdote mojara su dedo en la sangre, i esteyara de la sangre syete vezes delante de A’, delante del velo del santuvaryo. ⁷I el sasedote pondra de la sangre sovre los kuernos del ara del saumeryo golorozo delante de A’, ke esta en la tyenda del plazo; i vertera toda la sangre del toro al simyento del ara de la alsasyon, ke esta a la puerta de la tyenda del plazo. ⁸I todo el sevo del toro del sakrifisyo por pekado apartara de el, el sevo ke kuvre las entranyas, i todo el sevo ke esta sovre las entranyas, ⁹i los dos rinyones, i el sevo ke esta sovre eyos, ke esta sovre las ijadas, i el redanyo sovre el igado, kon los rinyones lo kitara, ¹⁰komo se aparta del buey del sakrifisyo de las pases; i el saserdote los saumara sovre el ara de la alsasyon. ¹¹I el kuero del toro, i toda su karne, kon su kavesa, i kon sus pyernas, i sus entranyas, i su fyenda; ¹²aun todo el toro sakara afuera del real a un lugar limpyo, onde se echa la seniza, i lo kemara al fuego sovre la lenya; onde se echa la seniza sera kemado.

¹³I si toda la kompanya de Yisrael yerraron, i la koza fuere enkuvyerta de los ojos de la kompanya, i uvyeren echo alguna de todas las enkomendansas de A’ ke no son de azer, i fueren kulpozos: ¹⁴kuando fuere savido el pekado ke pekaron sovre eya, la kompanya ayegaran un toro ijo de vaka por sakrifisyo por pekado, i lo traeran delante de la tyenda del plazo. ¹⁵I los vyejos de la kompanya pondran sus manos sovre la kavesa del toro delante de A’, i el toro sera degoyado delante de A’. ¹⁶I el saserdote untado traera de la sangre del toro a la tyenda del plazo. ¹⁷I el saserdote mojara su dedo en la sangre, i esteyara syete vezes delante de A’, delante del velo. ¹⁸I pondra de la sangre sovre los kuernos del ara ke esta delante de A’, ke esta en la tyenda del plazo, i vertera toda la sangre al simyento del ara de la alsasyon, ke esta a la puerta de la tyenda del plazo. ¹⁹I apartara de el todo su sevo, i lo saumara en el ara. ²⁰I ara kon el toro komo izo kon el toro del sakrifisyo por pekado, ansi ara kon el; i el saserdote ara ekspiasyon (kapara) por eyos, i les sera perdonado. ²¹I sakara el toro afuera del real, i lo kemara komo kemo el primer toro; es sakrifisyo por pekado de la kompanya.

²²Kuando mayoral pekare, i izyere por yerro alguna de toda las enkomendansas de A’ su Dyo ke no son de azer, i fuere kulpozo: ²³kuando le fuere savido su pekado en ke peko, traera su ayegasyon, un kavrito de las kavras, macho sano: ²⁴i pondra su mano sovre la kavesa del kavrito, i lo degoyara en el lugar onde se degoya la alsasyon delante de A’; es sakrifisyo por pekado. ²⁵I el saserdote tomara de la sangre del sakrifisyo por pekado kon su dedo, i pondra sovre los kuernos del ara de la alsasyon, i vertera su sangre al simyento del ara de la alsasyon. ²⁶I saumara todo su sevo en el ara, komo el sevo del sakrifisyo de las pases; i el saserdote ara ekspiasyon (kapara) por el de su pekado, i le sera perdonado.

²⁷I si alguno del puevlo de la tyerra pekare por yerro, azyendo alguna de las enkomendansas de A’ ke no son de azer, i fuere kulpozo: ²⁸kuando le fuere savido su pekado ke peko, traera su ayegasyon, una kavrita de las kavras, embra sana, por su pekado ke peko. ²⁹I pondra su mano sovre la kavesa del sakrifisyo por pekado, i degoyara el sakrifisyo por pekado en el lugar de la alsasyon. ³⁰I el saserdote tomara de su sangre kon su dedo, i pondra sovre los kuernos del ara de la alsasyon, i vertera toda su sangre al simyento del ara. ³¹I kitara todo su sevo, komo se kita el sevo de sovre el sakrifisyo de las pases; i el saserdote lo saumara en el ara por guezmo resivivle a A’; i el saserdote ara ekspiasyon por el, i le sera perdonado.

³²I si trushere karnero por su ayegasyon para sakrifisyo por pekado, embra sana la traera. ³³I pondra su mano sovre la kavesa del sakrifisyo por pekado, i la degoyara por sakrifisyo por pekado en el lugar onde se degoya la alsasyon. ³⁴I el saserdote tomara de la sangre del sakrifisyo por pekado kon su dedo, i pondra sovre los kuernos del ara de la alsasyon, i vertera toda su sangre al simyento del ara. ³⁵I kitara todo su sevo, komo se kita el sevo del karnero del sakrifisyo de las pases; i el saserdote los saumara en el ara, komo las ofrendas kemadas de A’; i el saserdote ara ekspiasyon por su pekado ke peko, i le sera perdonado.

5

¹I kuando alguno pekare, i oyere boz de djura, i fuere testigo, o sea ke vido, o supo, si no lo denunsyare, yevara su delito. ²O alguno ke tokare kualkyer koza enkonada sea en kalavrina de animalya enkonada, o en kalavrina de kuatropea enkonada, o en kalavrina de syerpe enkonado, i si le fuere enkuvyerto, sera enkonado i kulpozo. ³O kuando tokare en enkonamyento de ombre, en kualkyer enkonamyento suyo de ke se enkona, i si le fuere enkuvyerto, ma lo supyere despues, sera kulpozo. ⁴O kuando alguno djurare, deklarando kon los lavyos de azer mal o de azer byen, en kualkyer koza ke el ombre deklarare kon djura, i si le fuere enkuvyerto, ma lo supyere despues, sera kulpozo en una de estas kozas. ⁵I sera, ke kuando fuere kulpozo en una de estas kozas, atorgara lo ke peko en eya; ⁶i traera su sakrifisyo por kulpa a A’ por su pekado ke peko, una embra del revanyo, una kordera o una kavrita de las kavras, por sakrifisyo por pekado; i el saserdote ara ekspiasyon (kapara) por el de su pekado. ⁷I si no alkansare su mano bastante para un karnero, traera por su kulpa ke peko, dos tortolos, o dos palombinos a A’; uno para sakrifisyo por pekado, i uno para alsasyon. ⁸I los traera al saserdote, el kual ayegara primero el ke es por sakrifisyo por pekado, i desservigara su kavesa de delante de su serviz, ma no la apartara. ⁹I esteyara de la sangre del sakrifisyo sovre la pared del ara; i el resto de la sangre sea esprimido al simyento del ara; es sakrifisyo por pekado. ¹⁰I del otro ara alsasyon, segun la ordenansa; i el saserdote ara ekspiasyon por el de su pekado ke peko, i le sera perdonado. ¹¹I si no alkansare su mano a dos tortolos, o a dos palombinos, el ke peko traera por su ayegasyon el dyezmo de una epa de semola por sakrifisyo por pekado; no pondra sovre eya azeyte, ni metera sovre eya ensensyo, porke es sakrifisyo por pekado. ¹²I la traera al saserdote, i el saserdote tomara de eya su punyo yeno por su membrasyon, i la saumara en el ara sovre las ofrendas kemadas de A’; es sakrifisyo por pekado. ¹³I el saserdote ara ekspiasyon por el por su pekado ke peko en una de estas kozas, i le sera perdonado; i el resto sera al saserdote, komo prezente.

¹⁴I avlo A’ a Moshe, dizyendo: ¹⁵kuando alguno falsare falsia, i pekare por yerro en las kozas santas de A’, traera por su kulpa a A’ un barvez sano del revanyo , por tu presyo de siklos de plata, segun el siklo del santuvaryo, por sakrifisyo por kulpa. ¹⁶I pagara akeyo de la koza santa en ke peko, i anyadira sovre eyo su kinto, i lo dara al saserdote; i el saserdote ara ekspiasyon por el kon el barvez del sakrifisyo por la kulpa, i le sera perdonado.

¹⁷I si alguno pekare, i izyere alguna de todas las enkomendansas de A’ ke no son de azer, aun sin saverlo, es kulpozo, i yevara su delito. ¹⁸I traera un barvez sano del revanyo por tu presyo, por sakrifisyo por kulpa, al saserdote; i el saserdote ara ekspiasyon por el por su yerro ke yerro sin saver, i le sera perdonado. ¹⁹Kulpa es: kulpar kulpo kontra A’.

²⁰I avlo A’ a Moshe. dizyendo: ²¹kuando alguno pekare, i falsare falsia kontra A’, i nyegare a su kompanyero en koza dada a guardar, o en depozito de mano, o en rovo, o si sovreforsare a su kompanyero, ²²o si uvyere topado una koza perdida, i nyegare en eya, i djurare en falso; en alguna de todas las kozas ke izyere el ombre pekando en eyas: ²³sera , ke kuando pekare, i fuere kulpozo, tornara el rovo ke rovo, o el sovreforso ke sovreforso, o la koza ke le fue dada a guardar, o la koza perdida ke topo; ²⁴i todo akeyo sovre ke uvyere djurado en falso; i lo pagara[1] por entero, i anyadira sovre eyo su kinto, i lo dara a el a kyen pertenese, en el dia de su sakrifisyo por kulpa. ²⁵I traera su sakrifisyo por kulpa a A’, un barvez sano del revanyo, por tu presyo, para sakrifisyo por kulpa, al saserdote. ²⁶I el saserdote ara ekspiasyon por el delante de A’, i le sera perdonado por kualkyer de todas las kozas ke uvyere echo, azyendose kulpozo en eya.

[1] Ebreo: en su kavdal

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.