Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 23 PEKUDE (39 a 40)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

23 – PEKUDE

²¹Estas son las kuentas del tavernakulo, del tavernakulo del Testimonyo, ke fueron kontadas por dicho de Moshe, por el servisyo de los Levitas, por mano de Itamar, ijo de A’haron el saserdote. ²²I Betsalel, ijo de Uri, ijo de Hur, del trivo de Ye’huda, izo todo lo ke A’ enkomendo a Moshe: ²³i kon el O’haliav, ijo de Ahisamah, del trivo de Dan, maestro, i inventador, i rekamador en kardeno, i en purpura, i en karmezi, i en lino fino.

²⁴Todo el oro gastado en la ovra, en toda la ovra del santuvaryo, el oro del prezente, fue vente i nueve kintales, i syetesyentos i trenta siklos, segun el siklo del santuvaryo. ²⁵I la plata de los kontados de la kompanya fue syen kintales, i mil i syetesyentos i setenta i sinko siklos, segun el siklo del santuvaryo: ²⁶Un beka por kavesa, ke es medyo siklo, segun el siklo del santuvaryo, por todo el ke pasava entre los kontados de edad de vente anyos i arriva, ke fueron seshsyentos i tres mil i kinyentos i sinkuenta. ²⁷I uvo syen kintales de plata para vazyar los almirezes del santuvaryo, i los almirezes del velo; syen almirezes de los syen kintales, un kintal para kada almirez. ²⁸I de los mil i syetesyentos i setenta i sinko siklos izo ganchos para los pilares, i kuvryo sus kaveseras, i los enfasho. ²⁹I el alambre del prezente fue setenta kintales, i dos mil i kuatrosyentos siklos. ³⁰I kon el izo los almirezes de la puerta de la tyenda del plazo, i el ara de alambre, i su resha de alambre, i todos los atuendos del ara; ³¹i los almirezes de la korte al derredor, i los almirezes de la puerta de la korte, i todas las estakas de la korte al derredor.

39

¹I del kardeno, i purpura, i karmezi, izyeron panyos de servisyo para servir en el lugar santo, i izyeron los vestidos santos para A’haron, komo A’ enkomendo a Moshe.

²I izo el espaldar de oro, kardeno, i purpura, i karmezi, i lino fino torsido. ³I adelgazaron el oro en ojas, i lo kortaron en ilos, para tesherlo entre el kardeno, i entre la purpura, i entre el karmezi, i entre el lino fino, de echura de maestro. ⁴Le izyeron ombreras adjuntadas; i sus dos kavos fue adjuntado. ⁵I la sintura del espaldar, ke estava sovre el, era de lo mizmo, komo su echura, de oro, kardeno, i purpura, i karmezi, i lino fino torsido, komo A’ enkomendo a Moshe.

⁶I lavaron las pyedras de oniks rodeadas de kastones de oro, kavakadas de kavakaduras de seyo, kon los nombres de los ijos de Yisrael. ⁷I las puzo sovre las ombreras del espaldar por pyedras de membrasyon a los ijos de Yisrael, komo A’ enkomendo a Moshe.

⁸I izo el pechoral de echura de maestro, komo la echura del espaldar, de oro, kardeno, i purpura, i karmezi, i lino fino torsido. ⁹Kuadrado era; dublado izyeron el pechoral; un palmo era su longura, i un palmo su anchura, dublado. ¹⁰I inchyeron en el kuatro ordenes de pyedras, el primer orden una kornelina, un topasyo, i una ezmeralda; este era el primer orden. ¹¹I el segundo orden un karvonklo, una safira, i un diamante. ¹²I el terser orden una ligura, una agata, i un ametisto. ¹³I el kuarto orden un krisolito, un oniks, i un jaspe; rodeadas de kastones de oro en sus inchimyentos. ¹⁴I las pyedras eran segun los nombres de los ijos de Yisrael, dodje segun sus nombres, komo las kavakaduras de seyo kada una kon su nombre, segun los dodje trivos. ¹⁵I izyeron sovre el pechoral kadenitas torsidas de echura de trensas, de oro fino. ¹⁶I izyeron dos kastones de oro, i dos sortijas de oro, i puzyeron las dos sortijas sovre los dos kavos del pechoral. ¹⁷I metyereon las dos trensas de oro en las dos sortijas sovre los kavos del pechoral. ¹⁸I los dos kavos de las dos trensas metyeron en los dos kastones, i los metyeron sovre las ombreras del espaldar, a su delantera. ¹⁹I izyeron otras dos sortijas de oro, i las puzyeron sovre los dos kavos del pechoral, sovre su oriya, ke estava a la parte de adyentro del espaldar. ²⁰I izyeron otras dos sortijas de oro, i las metyeron sovre las dos ombreras del espaldar por abasho en la parte delantera, eskuentra su adjuntadura, ensima de la sintura del espaldar. ²¹I adjuntaron el pechoral kon sus sortijas a las sortijas del espaldar kon un kordon de kardeno, para ke estuvyese sovre la sintura del espaldar, i no se apartase el pechoral de sovre el espaldar, komo A’ enkomendo a Moshe.

²²I izo el manto del espaldar de echura de teshedor, todo de kardeno, ²³kon la avertura del manto en medyo de el, komo la avertura de maya, kon un borde al derredor de la avertura, para ke no se razgara. ²⁴I izyeron sovre las aldas del manto granadas de kardeno, i purpura, i karmezi, torsido. ²⁵I izyeron kampaniyas de oro fino, i metyeron las kampaniyas entre las granadas sovre las aldas del manto al derredor, entre las granadas; ²⁶una kampaniya i una granada, una kampaniya i una granada, sovre las aldas del manto al derredor, para ministrar, komo A’ enkomendo a Moshe.

²⁷I izyeron las tongas de lino fino de echura de teshedor para A’haron, i para sus ijos; ²⁸i la toka de lino fino, i los adornos de las kofyas de lino fino, i los panyetes de lino; de lino fino torsido; ²⁹i el senyidero de lino fino torsido, i kardeno, i purpura, i karmezi, de echura de rekamador, komo A’ enkomendo a Moshe.

³⁰I izyeron el frontal de la korona santa de oro fino, i eskrivyeron sovre el eskritura, komo kavakaduras de seyo, santidad a A’. ³¹I metyeron sovre el un kordon de kardeno, para atarlo sovre la toka por ensima, komo A’ enkomendo a Moshe.

³²I se akavo todo el servisyo del tavernakulo de la tyenda dal plazo, i izyeron los ijos de Yisrael segun todo lo ke A’ enkomendo a Moshe, ansi izyeron.

³³I trusheron el tavernakulo a Moshe, la tyenda, i todos sus atuendos, sus korchetes, sus tavlas, sus serraderos, i sus pilares, i sus almirezes; ³⁴i la kuvyerta de kueros de barvezes envermejesidos, i la kuvyerta de kueros de tejones, i el velo de la mamparansa; ³⁵el arka del Testimonyo, i sus varas, i el kuvertero; ³⁶la meza, todos sus atuendos, i el pan de las fases; ³⁷la almenara limpya, sus kandeles, los kandeles de la ordenansa, i todos sus atuendos, i el azeyte de la lumbrarya; ³⁸i el ara de oro, i el azeyte de la untasyon, i el saumeryo golorozo, i la mamparansa de la puerta de la tyenda; ³⁹el ara de alambre, i su resha de alambre, sus varas, i todos sus atuendos, el agua-manil i su asyento; ⁴⁰las kortinas de la korte, sus pilares, i sus almirezes, i la mamparansa para la puerta de la korte, sus kuerdas, i sus estakas, i todos los atuendos del servisyo del tavernakulo, para la tyenda del plazo; ⁴¹los panyos del servisyo para servir en el lugar santo, i los vestidos santos para A’haron el saserdote, i los vestidos de sus ijos para servir en el saserdosyo. ⁴²Segun todo lo ke A’ enkomendo a Moshe, ansi izyeron los ijos de Yisrael todo el servisyo. ⁴³I vido Moshe toda la ovra, i ek, la avian echo komo A’ avia enkomendado, ansi la avian echo; i Moshe los bendisho.

40

¹I avlo A’ a Moshe dizyendo: ²en el primer dia del mez primero levantaras el tavernakulo de la tyenda del plazo. ³I pondras ayi el arka del Testimonyo, i kuvriras el arka kon el velo. ⁴I traeras la meza, i ordenaras su ordenansa; i traeras la almenara, i ensenderas sus kandeles. ⁵I meteras el ara de oro para el saumeryo delante del arka del Testimonyo, i pondras la mampranasa de la puerta al tavernakulo. ⁶I meteras el ara de la alsasyon delante de la puerta del tavenakulo de la tyenda del plazo. ⁷I meteras el agua-manil entre la tyenda del plazo i el ara, i meteras agua en el. ⁸I pondras la korte al derredor, i meteras la mamparansa de la puerta de la korte. ⁹I tomaras el azeyte de la untasyon, i untaras el tavernakulo, i todo lo ke ay en el, i lo santifikaras kon todos sus atuendos, i sera santo. ¹⁰I untaras el ara de la alsasyon, i todos sus atuendos, i santifikaras el ara, i el ara sera santisima ¹¹I untaras el agua-manil i su asyento, i lo santifikaras. ¹²I aras ayegar a A’haron i a sus ijos a la puerta de la tyenda del plazo, i los lavaras kon agua. ¹³I aras vestir a A’haron los vestidos santos, i lo untaras, i lo santifikaras, para ke me serva en el saserdosyo. ¹⁴I aras ayegar a sus ijos, i los aras vestir las tongas. ¹⁵I los untaras komo untaste a su padre, para ke me servan en el saserdosyo; i su untasyon les sera por saserdosyo de syempre por sus djerenansyos. ¹⁶I izo Moshe segun todo lo ke A’ le enkomendo, ansi izo.

¹⁷I fue en el mez primero, en el segundo anyo, en el primer dia del mez, ke fue levantado al tavernakulo. ¹⁸I Moshe levanto el tavernakulo, i asento sus almirezes, i puzo sus tavlas, i metyo sus serraderos, i levanto sus pilares. ¹⁹I espandyo la tyenda sovre el tavenakulo, i puzo la kuvyerta de la tyenda sovre eya por ensima, komo A’ enkomendo a Moshe. ²⁰I tomo i metyo el Testimonyo en el arka, i puzo las varas sovre el arka, i metyo el kuvertero sovre el arka por ensima. ²¹I trusho el arka en el tavernakulo, i puzo el velo de la mamparansa, i kuvryo sovre el arka del Testimonyo, komo A’ enkomendo a Moshe. ²²I metyo la meza en la tyenda del plazo, al lado del tavernakulo al norte, afuera del velo. ²³I ordeno sovre eya ordenansa de pan delante de A’, komo enkomendo a Moshe. ²⁴I puzo la almenara en la tyenda del plazo, enfrente de la meza, al lado del tavernakulo al sud. ²⁵I ensendyo los kandeles delante de A’, komo A’ enkomendo a Moshe. ²⁶I puzo el ara de oro en la tyenda del plazo delante del velo. ²⁷I saumo sovre eya saumeryo golorozo, komo A’ enkomendo a Moshe. ²⁸I puzo mamparansa de la puerta del tavernakulo. ²⁹I puzo el ara de la alsasyon a la puerta del tavernakulo de la tyenda del plazo, i also sovre eya la alsasyon i el prezente, komo A’ enkomendo a Moshe. ³⁰I puzo el agua-manil entre la tyenda del plazo i el ara, i metyo en el agua para lavar. ³¹I Moshe, i A’haron, i sus ijos lavavan en el sus manos i sus pyes: ³²kuando entravan en la tyenda del plazo, i kuando se ayegavan al ara, se lavavan, komo A’ enkomendo a Moshe. ³³I levanto la korte al derredor del tavernakulo i del ara, i metyo la mamparansa de la puerta de la korte. Ansi akavo Moshe la ovra.

³⁴Entonses la nuve kuvryo la tyenda del plazo, i la onra de A’ inchyo el tavernakulo. ³⁵I Moshe no podia entrar en la tyenda del plazo, porke la nuve pozava sovre eya, i la onra de A’ inchyo el tavernakulo. ³⁶I kuando la nuve se alsava de sovre el tavernakulo, se movian los ijos de Yisrael en todas sus movidas. ³⁷Ma si no se alsava la nuve, no se movian asta el dia ke se alsava. ³⁸Porke la nuve de A’ estava sovre el tavernakulo de dia, i fuego estava de noche en el, a vista de toda la kaza de Yisrael, en todas sus movidas.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.