Sefer Tora en Djudeo Espanyol – Transkrivida kon letras latinas del livro por Ye’huda Sidi / SHEMOT: 13 SHEMOT (1 a 6)

Ver todos los capítulos publicados en esta sección

Sefer TORA NEVIIM UKETUVIM
El livro de la Ley, los Profetas, las Eskrituras
Trazladado en la lingua Espanyola
Estamperea de A. ‘H. Boyadjian
Konstantatinopla 1873

Transkrivido por Ye’huda Sidi. Febrero 2015

13 – SHEMOT

1

¹I estos son los nombres de los ijos de Yisrael, ke vinyeron a Ayifto kon Yaakov; kada uno i los de su kaza vinyeron: ²Reuven, Shimon, Levi, i Ye’huda, ³Yissahar, Zevulun, i Binyamin. ⁴Dan i Naftali, Gad, i Asher. ⁵I todas las almas ke salyeron de la anka de Yaakov fueron setenta almas. I Yosef ya estava en Ayifto. ⁶I muryo Yosef, i todos sus ermanos, i todo akel djerenansyo. ⁷I los ijos de Yisrael fruchiguaron, i kresyeron, i se muchiguaron, i se enfortesyeron muy mucho; i se inchyo la tyerra de eyos.

⁸I se levanto un rey nuevo sovre Ayifto, ke no konosia a Yosef. ⁹I disho a su puevlo: ek, el puevlo de los ijos de Yisrael es mucho i mas fuerte ke nozotros. ¹⁰Venid, nos asaventemos por el, no sea, ke se muchigue, i akonteska, ke kuando nos akaesyere gerra, el tambyen se adjunte kon nuestros enemigos, i pelee kontra nozotros, i suva de la tyerra. ¹¹I puzyeron sovre el mayorales de pecha para afriirlo kon sus lazeryas. I fraguaron a Paro sivdades de magazenes, Pitom i Ramses. ¹²Ma kuanto mas lo afriian, tanto mas se muchiguava i kresia, I se enfastyavan por kavza de los ijos de Yisrael. ¹³I los Aisyanos izyeron servir a los ijos de Yisrael kon dureza. ¹⁴I amargaron su vida kon servisyo duro, en barro, i en ladriyos, i en todo servisyo en el kampo: aun todo su servisyo ke los azian servir era kon dureza.

¹⁵I avlo el rey de Ayifto a las komadres Ebreas, de las kuales el nombre de la una era Shifra, i el nombre de la otra Pua. ¹⁶I disho: kuando partearesh a las Ebreas, i las vyeresh sovre los asyentos, si fuere ijo, entonses lo mataresh; i si fuere ija, ke biva. ¹⁷Ma las komadres temyeron al Dyo, i no izyeron komo les avlo el rey de Ayifto, sino ke abidiguavan a los ninyos. ¹⁸I el rey de Ayifto yamo a las komadres, i les disho: ¿porke izistesh esta koza, i abidiguastesh a los ninyos? ¹⁹I las komadres disheron a Paro: porke las Ebreas no son komo las mujeres Aesyanas, porke son rezyas, i paren antes ke la komadre venga a eyas. ²⁰I el Dyo izo byen a las komadres, i se muchiguo el puevlo, i se enfortesyeron mucho. ²¹I fue, por lo ke las komadres temyeron al Dyo, ke el les izo kazas. ²²I Paro enkomendo a todo su puevlo, dizyendo: todo ijo ke nasyere, lo echaresh en el rio, i toda ija abidiguaresh.

2

¹I anduvo un varon de la kaza de Levi, i tomo por mujer una ija de Levi. ²I se ensinto la mujer, i paryo un ijo; i kuando lo vido ke era ermozo, lo eskondyo tres mezes. ³I kuando no pudo eskonderlo mas, tomo para el una arka de djunko, i la kalafateo kon barro i kon pez; i puzo en eya al ninyo, i la metyo entre las kanyas sovre la oriya del rio. ⁴I se paro su ermana de leshos, para saver ke le seria echo. ⁵I desendyo la ija de Paro para lavarse al rio; i paseandose sus mosas por la oriya del rio, eya vido el arka entre las kanyas, i enbio su syerva a ke la tomara, i la avryo, i vido al ninyo; i ek, el ijiko yorava. ⁶I se apiado de el, i disho: de los ninyos de los Ebreos es este. ⁷Entonses su ermana disho a la ija de Paro: ¿ire yo i te yamare una alechedera de las Ebreas para ke te aleche al ninyo? ⁸I la ija de Paro le disho: va. I la mosa fue, i yamo a la madre del ninyo. ⁹I la ija de Paro le disho: yeva este ninyo, i alechalo para mi, i yo te dare tu paga. I la mujer tomo el ninyo, i lo alecho. ¹⁰I se engrandesyo el ninyo, i eya lo trusho a la ija de Paro, i fue a eya por ijo; i yamo su nombre Moshe, i disho: porke de las aguas lo saki.

¹¹I en akeyos dias, kuando se engrandesyo Moshe, akontesyo ke salyo a sus ermanos, i vido sus lazeryas; i vido a un varon Aisyano ke aharvava a un varon Ebreo de sus ermanos. ¹²I miro por aki i por ayi, i vyendo ke no avia ninguno, mato al Aisyano, i lo eskondyo en la arena. ¹³I salyo al otro dia, i ek, dos varones Ebreos barajavan, i disho al malo: ¿porke aharvas a tu kompanyero? ¹⁴I el disho: ¿kyen te puzo a ti por mayoral i djuez sovre nozotros? ¿pensas de matarme, komo mataste al Aisyano? i Moshe temyo, i disho: por syerto la koza es savida. ¹⁵I oyo Paro esta koza, i bushko de matar a Moshe; ma Moshe fuyo de delante de Paro, i moro en la tyerra de Midyan; i se asento serka del pozo.

¹⁶I el saserdote (ko’hen) de Midyan tenia syete ijas; i venian i sakavan agua, i inchian las pilas para abevrar las ovejas de su padre. ¹⁷I los pastores vinyeron, i las echaron; ma Moshe se levanto, i las ayudo, i abevro sus ovejas. ¹⁸I kuando vinyeron a Reuel su padre, disho el: ¿porke vinistesh tan presto oy? ¹⁹I disheron: un varon Aisyano nos eskapo de mano de los pastores, i tambyen sakar sako agua para nozotros, i abevro las ovejas. ²⁰I disho a sus ijas: ¿i onde esta? ¿porke deshastesh al varon? yamadlo para ke koma pan. ²¹I agrado a Moshe de morar kon el varon; i dyo a Tsipora su ija a Moshe. ²²I le paryo un ijo, i el yamo su nombre Gershom; porke disho: pelegrino fui en tyerra estranya.

²³I akontesyo despues de akeyos muchos dias ke el rey de Ayifto muryo; i los ijos de Yisrael suspiraron por kavza de la servidumbre, i esklamaron. i su esklamasyon suvyo al Dyo por kavza de la servidumbre. ²⁴I oyo el Dyo su chemido, i el Dyo se akordo de su firmamyento kon Avra’ham, kon Yitshak, i kon Yaakov. ²⁵I miro el Dyo a los ijos de Yisrael, i el Dyo se apiado de eyos.

3

¹I Moshe apasentava las ovejas de Yitro su suegro, el saserdote de Midyan; i gio las ovejas detras del dizyerto, i vino al monte del Dyo,a Horev. ²I se le aparesyo el andjel de A’ en una flama de fuego de en medyo de una sarza. I miro, i ek, la sarza ardia en el fuego, i la sarza no se konsumia. ³I disho Moshe: me ayegare agora, i vere esta grande vista, por ke no se kema la sarza. ⁴I vyendo A’ ke se ayegava para ver, lo yamo el Dyo de en medyo de la sarza, i disho: ¡Moshe, Moshe! i el disho: ekme. ⁵I disho: no te aserkes aki, deskalsa tus sapatos de sovre tus pyes, porke el lugar en ke te estas, tyerra santa es. ⁶I disho: yo soy el Dyo de tu padre, el Dyo de Avra’ham, el Dyo de Yitshak, i el Dyo de Yaakov. I Moshe enkuvryo sus fases; porke temea de mirar al Dyo. ⁷I disho A’: ver vide la afriisyon de mi puevlo ke esta en Ayifto, i oi su esklamasyon por kavza de sus sayones; porke konosko sus dolores. ⁸I desendi para eskaparlo de mano de los Aisyanos, i para azerlo suvir de akeya tyerra a auna tyerra buena i ancha, a tyerra ke mana leche i myel; al lugar del Kenaanio, i del Hitio, i del Emorio, i del Perizio, i del Hivio, i del Yevusio. ⁹I agora, ek, la esklamasyon de los ijos de Yisrael vino a mi; i tambyen vide el apreto kon los Aisyanos los apretan. ¹⁰I agora, ven, i te enbiare a Paro, para ke sakes a mi puevlo, los ijos de Yisrael, de Ayifto.

¹¹I disho Moshe al Dyo: ¿kyen soy yo para ke vaya a Paro, i para ke sake a los ijos de Yisrael de Ayifto? ¹²I el disho: syerto yo sere kontigo; i esta te sera la senyal ke yo te enbii: kuando uvyeres sakado al puevlo de Ayifto, serviresh al Dyo sovre este monte. ¹³I disho Moshe al Dyo, ek, yo vengo a los ijos de Yisrael, i les digo: el Dyo de vuestros padres me enbio a vozotros: si me disheren ¿ke es su nombre? ¿ke les dire? ¹⁴I disho el Dyo a Moshe: soy el ke soy. I disho: ansi diras a los ijos de Yisrael: el ke es me enbio a vozotros. ¹⁵I disho mas el Dyo a Moshe: ansi diras a los ijos de Yisrael: A’, el Dyo de vuestros padres, el Dyo de Avra’ham, el Dyo de Yitshak. i el Dyo de Yaakov, me enbio a vozotros; este es mi nombre para syempre, i esta es mi membrasyon por djerenansyo i djerenansyo. ¹⁶Anda, i akoje a los vyejos de Yisrael, i diles: A’, el Dyo de vuestros padres, el Dyo de Avra’ham, de Yitshak, i de Yaakov, se aparesyo a mi dizyendo: vijitar vos vijiti, i vide lo ke se aze a vozotros en Ayifto. ¹⁷I dishe: vos are suvir de la afriisyon de Ayifto a la tyerra del Kenaanio, i del Hitio, i del Emorio, i del Perizio, i del Hivio, i del Yevusio, a tyerra ke mana leche i myel. ¹⁸I eskucharan a tu boz; i vendras, tu a los vyejos de Yisrael, al rey de Ayifto, i le diresh: A’, el Dyo de los Ebreos, nos a enkotrado; i agora te rogamos ke vayamos kamino de tres dias en el dizyerto, para ke sakrifikemos a A’ nuestro Dyo. ¹⁹I yo se ke el rey de Ayifto no vos deshara ir, ni aun kon mano fuerte. ²⁰I estendere mi mano i erire a Ayifto kon todas mis maraviyas ke are en medyo de el; i despues de esto vos soltara. ²¹I dare a este puevlo grasya en los ojos de los Aisyanos; i sera, ke kuando anduvyeresh, no andaresh vazios: ²²sino ke demandara kada mujer de su vezina i de la moradera de su koza, djoyas de plata, i djoyas de oro i vestidos; i los pondresh sovre vuestros ijos, i sovre vuestras ijas, i espojaresh a Ayifto.

4

¹I respondyo Moshe i disho: ma, ek, no me kreeran, ni eskucharan a mi boz; porke diran: no se aparesyo a ti A’. ²I A’ le disho: ¿ke es esto en tu mano? i el disho: una vara. ³I disho: echala en tyerra. I la echo en tyerra, i se izo kulevro; i Moshe fuyo de delante de el. ⁴I disho A’ a Moshe: estyende tu mano, i tomalo por su kola. I estendyo su mano, i lo aferro, i se izo vara en su mano: ⁵para ke krean ke se aparesyo a ti A’, el Dyo de sus padres, el Dyo de Avra’ham, el Dyo de Yitshak, i el Dyo de Yaakov.

⁶I le disho mas A’: mete agora tu mano en to seno. I metyo su mano en su seno; i la sako, i ek, su mano era leproza, komo la nyeve. ⁷I disho: torna tu mano en tu seno. I torno su mano en su seno; i la sako de su seno, i ek, se avia tornado komo su otra karne. ⁸I sera, ke si no te kryeren , ni eskucharen a la boz de la primera senyal, kreeran a la boz de la postrera senyal. ⁹I sera, ke si no kryeren tambyen a estas dos senyales, ni eskucharen a tu boz, tomaras de las aguas del rio, i verteras en lo seko, i se aran las aguas ke tomaras del rio, se aran sangre en lo seko.

¹⁰I disho Moshe a A’: ¡rogo Adonay! yo no soy varon de palavras, ni de ayer, ni de anteayer, ni dezde ke tu avlas a tu syervo; porke soy pezgado de boka i pezgado de lingua. ¹¹I A’ le disho: ¿kyen puzo boka al ombre? ¿o kyen izo al mudo o al sordo, o al ke ve o al syego? ¿no lo ize yo A’? ¹²Agora pues va, i yo sere kon tu boka, i te anbezare lo ke es de avlar. ¹³I el disho: ¡rogo Adonay! enbia agora por mano del ke es de enbiar. ¹⁴I se ensendyo el fulor de A’ kontra Moshe, i disho: ¿no se yo ke A’haron el Levita tu ermano avlar avlara? i tambyen, ek , el sale a resivirte; i en vyendote, se alegrara en su korason. ¹⁵I avlaras a el, i pondras las palavras en su boka; i yo sere kon tu boka, i kon su boka, i vos anbezare lo ke tenesh de azer. ¹⁶I el avlara por ti al puevlo; i el sera a ti en lugar de boka, i tu seras a el en lugar del Dyo. ¹⁷I tomaras esta vara en tu mano, kon la kual aras las senyales.

¹⁸I se fue Moshe, i se torno a Yitro su suegro, i le disho: te rogo ke yo vaya i torne a mis ermanos ke estan en Ayifto, i vea si dainda biven. ¹⁹I Yitro disho a Moshe: va en paz. I disho A’ a Moshe en Midyan: va, tornate a Ayifto; porke son muertos todos los varones ke bushkavan tu vida. ²⁰Entonses Moshe tomo a su mujer i a sus ijos, i los izo kavayar sovre un azno, i se torno a tyerra de Ayifto. I tomo Moshe la vara del Dyo en su mano. ²¹I disho A’ a Moshe: kuando anduvyeres a tornar a Ayifto, mira ke agas delante de Paro todas las maraviyas ke yo puzi en tu mano; empero yo enduresere su korason, de modo ke no soltara al puevlo. ²²I diras a Paro: ansi dize A’: mi ijo, mi primodjenito es Yisrael. ²³I te digo: solta a mi ijo, para ke me serva, i si no kijyeres soltarlo, ek, yo matare a tu ijo, tu primodjenito.

²⁴I akontesyo en el kamino, ke A’ lo enkontro en el mezon, i bushko de matarlo. ²⁵I Tsipora tomo una navaja de pyedregal, i korto la serradura de su ijo, i la echo a sus pyes ,i disho: porke novyo de sangre eres tu a mi. ²⁶I lo desho ir. Entonses eya disho: novyo de sangre, por kavza de la sirkunsisyon.

²⁷I disho A’ a A’haron: va a resivir a Moshe al dizyerto. I se fue, i lo enkontro en el monte del Dyo, i lo bezo. ²⁸I Moshe konto a A’haron todas las palavras de A’ ke lo avia enbiado, i todas las senyales ke le avia enkomendado.

²⁹I anduvo Moshe i A’haron, i akojyeron a todos los vyejos de los ijos de Yisrael. ³⁰I avlo A’haron todas las palavras ke A’ avia avlado a Moshe, i izo las senyales a vista del puevlo. ³¹I el puevlo kreyo; i kuando oyeron ke A’ avia vijitado a los ijos de Yisrael, i ke avia visto su afriisyon, se umilyaron i se enkorvaron.

5

¹I despues vinyeron Moshe i A’haron, i disheron a Paro: ansi dize A’ el Dyo de Yisrael: solta a mi puevlo, para ke me agan fyesta en el dizyerto. ²I disho Paro: ¿kyen es A’, para ke ovedeska a su boz para soltar a Yisrael? no konosko a A’, ni tampoko soltare a Yisrael. ³I disheron: el Dyo de los Ebreos nos a enkontrado; te rogamos ke vayamos kamino de tres dias en el dizyerto, i sakrifikamos a A’ nuestro Dyo; no sea ke nos enkontre kon mortaldad o kon espada. ⁴I el rey de Ayifto les disho: Moshe i A’haron, ¿porke azesh baldar al puevlo de sus echos? andad a vuestras lazeryas. ⁵I disho Paro: ek, el puevlo de la tyerra es agora mucho, i los azesh baldar de sus lazeryas.

⁶I enkomendo Paro en akel dia a los sayones del puevlo, i a sus ofisyales, dizyendo: ⁷no kontinuesh de dar paja al puevlo para azer ladriyos, komo ayer i anteayer; vayan eyos i se akojan paja. ⁸I la kuenta de los ladriyos ke azian ayer i anteayer, pondresh sovre eyos; no menguesh nada de eya; porke estan floshos; por tanto esklaman, dizyendo: vamos, sakrifikemos a nuestro Dyo. ⁹Se apezge el servisyo sovre los varones, i travajen en el; i no miren a palavras de mentira. ¹⁰I salyeron los sayones del puevlo, i sus ofisyales, i avlaron al puevlo, dizyendo: ansi dize Paro: yo no vos doy paja. ¹¹Andad vozotros, i tomadvos paja onde la toparesh; kon todo no sera menguada nada de vuestro travajo. ¹²I el puevlo se esparzyo por toda la tyerra de Ayifto para akojer koskoja en lugar de paja. ¹³I los sayones los apresuravan, dizyendo: kumplid vuestras ovras, la koza del dia en su dia, komo kuando avia paja. ¹⁴I fueron asutados los ofisyales de los ijos de Yisrael, ke los sayones de Paro avian puesto sovre eyos, i les disheron: ¿por ke no avesh kumplido vuestra kantidad en azer ladriyos ni ayer ni oy, komo antes? ¹⁵I los ofisyales de los ijos de Yisrael vinyeron, i esklamaron a Paro, dizyendo: ¿por ke azes ansi a tus syervos? ¹⁶Paja no se da a tus syervos, i nos dizen: azed ladriyos. I ek tus syervos son asutados; ma la kulpa es de tu propyo puevlo. ¹⁷I el disho: estash floshos, floshos; por tanto dizesh: vamos sakrifikemos a A’. ¹⁸Agora pues andad, travajad; i paja no vos se dara; kon todo daresh la kuenta de los ladriyos. ¹⁹I los ofisyales de los ijos de Yisrael se vyeron en mal grado, avyendoseles dicho, no menguesh nada de vuestros ladriyos, la koza del dia en su dia. ²⁰I enkontraron a Moshe i a A’haron parados a su enkuentro kuando salian de kon Paro; ²¹i les disheron: mire A’ sovre vozotros, i djuzge; porke izistesh afedeser nuestro guezmo en los ojos de Paro, i en los ojos de sus syervos, dando espada en su mano para matarnos. ²²I torno Moshe a A’, i disho: ¡Adonay! ¿por ke iziste azer mal a este puevlo? ¿para ke me enbiaste? ²³Porke dezde ke vine a Paro para avlar en tu nombre, izo mal a este puevlo; i eskapar no eskapaste a tu puevlo.

6

¹I disho A’ a Moshe, agora veras lo ke are a Paro; porke kon mano fuerte los soltara, i kon mano fuerte los desterrara de su tyerra.

Ver todos los capítulos publicados en esta sección

 ————————————————————————

About Yehuda Sidi

I was born in 1953 in Tekirdag, Turkey and grew up in Canakkale. My father Hayim Sidi served as rabbi in both Tekirdag and Cannakale. Yehuda immigrated to Israel at 1971 and has been living in Israel since then. I am a softwere engineer. I am neither a Ladino nor a Tanach scholar. Actually I have very basic knowlede in Judeo Espanyol.

A year ago I looked for a Ladino Tanach in latin characters, and eventually I ended transcribing the Ladino Tanach which was published bt the Protestant missionaries who were vet active in the Speharadic world in the 19th century. This Tanach (and other books) were very popular with the Sepharadic Jews. This Tanach was published in two volumes.

So far I have transcribed the Tora. I am now in the process of transcribing the rest of the first volume which covers Ye’hoshua, Shoftim, Shemuel Alef, Shemuel Bet, Melachim Alef and Melachim Bet. I hope to complete the transcription in a few months.

The transcription was not reviewed by the Ladino scholars. Please report the errors that you find.