eSefarad Noticias del Mundo Sefaradi
Una kolaborasyon maraviyoza de MATILDA KOEN-SARANO kon HAYIM TSUR se esta indo espandiendose mas i mas en el mundo.
SEFARADIS DE DOR EN DOR es una Komedia Muzikal nasida en Yerushalayim ke tuvo un sukseso tal ke no ay ken no oyo sovre esto.
Kon la Prezentasion de Aharon Cohen i la Entroduksion de Moshe Shaul, Sefaradis de Dor en Dor es un teatro de tres aktos. I lo mijor es ke las notas de sus kantes, de estos kantes kriados par el famozo muzisyen Hayim Tsur estan todos a la fin del livro.
En la Prezentasion Aharon Cohen dize: ‘Esta vez esto viene echo no solo por medio de los kuentos populares. Esta vez Matilda Koén-Sarano kompozo una komedia muzikal sovre la vida de los djudios sefaradis, ke deskrive tres estasiones de la vida de los djudios de Espanya. Estas tres estasiones, ke se krearon despues de sus ekspulsion de la Espanya son:
La Turkia, ke fue la primera stasion de los djudios ke salieron de la Espanya, i ke sonyaron el retorno a Sion.
La Italia, ke es la sigunda estasion, yena de sufriensa, en kamino para Erets Israel.
Erets Israel, ke es la tresera i la ultima stasion, en kamino para Erets Israel.
Moshe Shaul mos dize ke ‘SEFARADIS DE DOR EN DOR’ es una ovra ke mos da un imajen empapada de afeksion i d’eskarinyo de la istoria de una famiya sefaradi a lo largo de tres jenerasiones. Lo ke tiene de partikular es ke esto es echo en aprovechando el djenero de la ovra muzikala de teatro, kon el ayudo en kantes, la mas parte de los kualos orijinal, sovre tekstos de Matilda Koén-Sarano, i muzika de Hayim Tsur’.
Los ke Kantan son: Tami Adrian, Ofer Halaf, Yehoram Gaon, Aaron Saltiel, Ensemble Cantica, Koro Lev Hair Yerushalayim, Kohava i Yasmin Levy, Lolik, Keren Hadar, Betty Klein, Voice of the Turtle-Jay Rosenberg, Nurit Henig, Joaquim Diaz.
I ay los ke enterpretan los rolos. Unos kuantos son: Moshe Shaul, Zelda Ovadia, Dolly Burda, David Tsur, Matilda Koén-Sarano, Alegra Amado, Eliezer Papo, Shlomo Cohen, Aviva Cohen, Sara Gabay, Isaac Benabu. Se adapto a la radio por Isaac Benabu i Alegra Amado.
Se puede demandar delal adreso: SEFARADIS DE DOR EN DOR – POB.34O4O Jerushalayim 9134O Israel
Siguramente no ay menester de dezir ke esta piesa esta aziendo el torno del mundo i djugandose por aktores en teatros famozos.
Beki Bardavid
Fuente: www.sefarad.org
