SEFARADIMUESTRO – Foro en judeo-español

SefaradiMuestro es un foro en judeo-español que existe desde hace 8 meses, con 160 miembros y 3.000 mensajes.

Sharope Blanco su creadora nos cuenta sobre él en su bello  judeo-español:

Penso ke es mi dover, a parte de ser mi plazer i mi orgulyo, de informarvos ke esto tratando de adelantar mi kultura, mi lingua i mi erensya ke una judiya, los ansestros de lakuala emigraron al Emperyo Otomano kuando fueron ekspulsados de Sefarad.

En este buto, i porke me plaze muncho eskrivir, i porke la jente fueron aregalandome i alavando lo ke eskrivo tambien, tuve el koraje de avrir un
sityo kon estas kualidades:

1……….. No moderamos los eskritos ke arresivimos porke kreyo ke los mesajes deven kedar otentikos en la mezura ke se entyenden por seguro.
 
2……….. No mos interesa si el biervo es justo o komo se dize esto i akeyo, de ke etimolojiya es el biervo, la gramatika i el vokabularyo ets.
 
3……….. No mos interesa muncho ken es ken, ken es el tiyo o la grandmama o el primo de xyz. Las  famiyas, de ande vienen, ande nasyeron, ken son sus paryentes, kuando i ande emigraron tambyen no
entra en muestra korespondensya.
 
4……….. Preferamos tokar al REPLY porke penso ke es mijor de tener toda la korespondensya de un sujeto i pueder atribuar las repuestas a los mesajes, pensando ke estos puedeser ke no fueron meldados por las personas ke ven supito un mesaj sin saver lo ke se eskrivyo antes.
 
5……….. Mos plaze a todos munchos kuentizikos, anegdotas, shakayikas para riir de todo korason porke kreyo ke riir alarga la vida i es bueno
tener alegriyas.
 
6……….. Me plaze fiestar !  Tenemos partis, aniversaryos, regalos majikos, bufets, komidas i bevientas, flores, kandelikas i gatos kuando aferro la okazyon…. A kada aniversaryo una fiesta maraviyoza virtual ! 
 
7……….  Mos enteresa todo manera de eskrito ke tiene un fondo informatiko, historiko, jeografiko, judyo, poetiko, konsernando los artes, la muzika, el mupak sefaradi i internasyonal.
 
8……….. Tenemos debatos relijyozos, etikos, filozofikos de un alto nivel, ovras maestras del grande linguisto sefaradi  Sir Rav Charles Barouh
Abraham  PhD , debatos sovre los Kriptojudios, las fiestas judiyas ets..
 
9……….. Eskrivo yo, Sharopika, un «roman feuilleton»  ALMENDRA  (47 partidas publikadas ) Todas las partidas del empesijo fina el kuarentisyeten se pueden meldar en el sityo ke kriyi por este romanso).  
El adreso de Almendra  :
http://groups.yahoo.com/group/gruposefaradimuestro/messages  (ir al empesijo kon «older»  >>>>  arriva de los mesajes). 
Aki vos traygo la vida en Smyrna (Izmir) i Konstantiniye (Istanbul)  de famiyas judiyas ke vinyeron a estas sivdades de la Sefarad kemando en estos tiempos…  Las aventuras, la historya, las entrigas, el palasyo  de Topkapi kon su splendor i la oskuritad de la  Edad Media, los amores de estos mansevos temerarios  i pasionados, una saga ke ya tiene munchos munchos  fanes ! Yo penso ke es una ermozura mizmo si es bastante roz lo ke lo aze mismo mas atraktivo !
 
10……….  No olvidar sienes de fotos en PHOTO i los archivos  de SM  en  «FILES
 
Keridos amigos…..Si keresh azer partido de muestro salon kafe i adjuntarvos a mozotros me puedesh mandar 2 biervos dizyendo ke lo keresh…O  entrar al sityo i klikar   «join this group» !   

http://groups.yahoo.com/group/Sefaradimuestro/
 
Serash resividos a brasos aviertos, kon sonrizas i alegriyas en muestros salones, los mas luksuozos del WEB !
 
Kon karinyo 
Sharope blanco

No hacen falta más palabras, solo queda ir al sitio y disfrutarlo!