SARA LA PRETA

por Eliz Gatenyo
Fuente: Ladinokomunita

 Las investigasyones, estan aklarando  la vida de los Judios de Yerushalayim ke posedavan  esklavos, en la epoka Otomana.

Izieron una investigasyon sovre la vida  i la muerte de una ijika Etiopiana, ke bivio en el sieklo 19 en Yerushalayim.

 Los estudyos ajustaron detalyos enteresantes a la kestion ¿Kualo saven la jente , sovre la vida de los Judios debasho de el mandado del Imperio Otomano?

 Al pareser ke unos de eyos merkavan i vendiyan esklavos.

 Asigun la investigasyon de Joseph B.Glass i Ruth Kark, ke aparesyo en una publikasyon  sientifika «Jerusalem Quarterly», Sara la Preta entro komo esklava a la famiya Valero de Yerushalayim.

 Eya malgrado ke fue liberada, lavoro toda su vida aya komo mosa i fue un miembro kerido de la famiya.

 Sara fue merkada de los trafikantes Arabos,  en 1879 por Hayim Aharon Valero de  Yerushalayim,  en lo ke teniya 9 anyos.

 Eya era kargada de okuparse de los 7 ijos de Valero, ke peryeron a sus madres Simha, en paryendo.

 Ruth Kark, investigadora en la Universita Ebreika,  mos eksplika ke este nombre «Sara la Preta»  le  fue  dado por la famiya,  muy posivle por su kolor.

 Kark i Glass se enkontraron en la estoria de Sara, en lo ke estaban lavorando i aziendo entrevistas  sovre la famiya Valero, ke era una de las mas renomadas famiyas  Sefaradis de Yerushalayim.

 «Lo ke es espesyal en este kavzo, no es solo ke arekojimos testimonios sovre esta esklava, ma tanbien savemos detalyos de su vida, del tiempo ke se merko, asta su muerte» disho Kark.

 Eya ajusto, ke Sara la preta es el primer kavzo dokumentado de los judíos ke posedavan esklavos en Yerushalayim Otomano.

 Asigun la tradisyon familiala de akel tiempo,  Hayim Aharon merko la ijika de los Arabos del Bazaar de la vieja sivdad. El presyo de un esklavo en la sigunda mitad del sieklo, era entre 1000 i 2200 piastres, esto aze 7 a 16 NIS (2-4 $).

 Asigun esta investigasyon, la famiya teniya al menos 2 esklavas etiopianas. Los investigadores toparon varias raises ande eskrivian la mosa preta de Hayim Aharon.

 Eya fue edukada en su kaza komo una Judia ladino avlante, i kuando estaban liberando los esklavos en el  Imperio Otomano en 1889, eya eskojo a estarse kon la famiya.

 Eya se konvertio al Judaismo i tomo el nombre Sara. Despues de esto,  la viyan en el kortijo de la Sinagoga Valero,  ke aziya orasyones i murmurava «amen».  Eya teniya la kavesa kuvierta komo una mujer sefaradi relijiosa, asigun Kark, Sara era tratada komo una madre,  i teniya el respekto de los ijikos.

 Viniendo a el nombre orijinal de Sara, Kark dize ke no puedemos ser siguros de dinguna manera. Realmente la Sinagoga de la famiya Valero, «Ohel Moshe»,  puede tener un indisyo emportante.

 Una plaka kon los nombres de los miembros de la famiya , tiene solo  un nombre ke no es Valero. Naskhi Bat Thaji ke muryo en 1969.

 «Esto me ampesa a azer pensar,  ke esta, era Sara» disho Kark. «Si es eya, esto kere dizir ke eya muryo en lo ke teniya 99 anyos».

Leer la nota original en inglés: Sarah La Preta: A Slave in Jerusalem – Joseph B. Glass and Ruth Kark publicada en Jerusalem Quarterly.