eSefarad Noticias del Mundo Sefaradi
La semana pasada se avlo en LK (LadinoKomunita) sovre NILI.
Esta «Nili» fue una organizasion sekreta de eshpiones judyos ke pasava a los inglezes informasiones sovre los movimientos de la armada turka en Erets Yisrael.
Komo en kada istoria de espinaje ay i aki muchos elementos de misterio i tambien una meskla de sentimientos de amor, pasion, vilolensia i mas.
La eroina de este grupo de NILI fue Sara Aaronson ke despues ke fue arrestada por los turkos, i torturada durante 4 dias, eya no deskuriyo nada de los sekretos de NILI.
Eya topo una oportunidad de neglijensia de parte de los guardianos, i se suisido.
Esto fue en 1917.
Mucho se eskrivio, i kon mucho respekto, sovre la vida i las ovras de Sara, i muy muy poko se eskrivio sovre el fato ke Sara era kazada kon un buen djudyo yamado Avraam Haim…
Yo tambien, ¿ke tengo yo de entremeterme en la vida intima de una eroina del puevlo?
Ma de toda manera, siempre me interesa el punto «sefaradi» ke ay en kada istoria.
En el jurnal digital de BenEzer topi un testimonio chiko sovre Avram Haim, eskrito por Sara Coen-Eldar (nasida en Roschuk en 1920).
Kon la permision del editor, traduizi -para vos, amigos- lo ke eskrivio la Sra. Cohen-Eldar.
La traduksion de lo ke eskrivio Sara Cohen-Eldar (nasida en Roschuk en 13 de enero 1920), sovrina de Haim Avraam:
«Tengo el dover, komo una parientes de Haim Avraam, a testiguar lo ke yo se de el, i sovre el, antes ke me kayare, i no avra kien ke konte, al lado de sus defetos – tambien sovre unos puntos pozitivos, ke talvez no son pokos.
Haim era el behor entre kuatro ermanos: Haim. Izak, Morits (Moshe) i Moni (Solomon, Shelomo).
Haim era guerfano de padre i madre ya de la edad de 12 anyos, i se engrandesyo (kon otros dos de sus ermanos) por mano de su nono – (tio Moni Yaakov) i su nona – (tia Rivka de kaza de Covo).
En los mezes de konje uzava Haim venir a vijitar i tambien kedarse ande mi nona (ke era la ermana de su madre).
Mi nona lo yamava Anri, mi madre lo yamava Heinrich – i ansi i el tambien se konosia komo Heinrich Avraam.
Haim nasio en la aldea al borde de el norte de Bulgaria; Russe -o Roschuk- a la oriya del rio Danubio.
El termino aya el gimnazio de varones, ke desde siempre era renomado komo un buen liseo.
El partyo para Almania para kontinuar sus estudios en komercho, i en poko tiempo ya empeso sus negosios. Ma, su aldea natal i su famiya kedaron siempre serkas a su korason, i el las vijitava muy frekuentamente.
Despues de la Gerra Mondiala, kaji en 1920, el fondyo en muestra sivdad de Russe a la organizasion de «Maccabi», ke kontribuo mucho a la edukasion jimnastika de la djoventud Judia, i ansi ke todos eramos miembros-dishiplos de la Maccabi.
Despues de la fondasion de Maccabi en Roschuk, se organizaron mas sukursalas tambien en otras partes de Bulgaria en lugares ande aviya populasion Judia.
En la sala grande de jimnastika avia tambien un portreto grande de Haim Avraam kon vestimienta de jimnastika i kon una kurdela blanka-blu a lo largo de su seno, desde su ombro derecho; i sovre la kurdela – el aforismo:
«Espirito sano en kuerpo sano».
Muchos anyos despues, en muestros enkontros en su kaza en Bat-Galim (un kuartier en Haifa), me kontava Haim komo teniya de inventar los «komandos» komo «date a la buelta» o «marcha adelantre» (ke ayinda, en akeos tiempos, no egzistiyan deltodo en ebreo).»
De Roschuk i de Almania paso Haim i se instalo en Kushta (Estambol). El «mikrob» del Sionismo i sus kontaktos kon la Maccabi no lo desharon ni aya.
Kuando era yo (Sara Cohen) estudiante en la Universidad Ebrea en Yerushalayim konosi al Dr. Yisrael Aurbach, el kosfuegro de Haim (de su segunda mujer). El me konto kon tristeza ke el mizmo fue el ke kazamenteo entre Haim Avraam i Sara Aaronson.
Segun las palavras del Dr. Aurbach, syendo Haim un Sionista ardiente, no kijo kazarse kon «kualkiera» novia, i le rogo de toparle una manseva «autentika» de Erets-Yisrael.
Sara Aaronson era una.
Komo ya lo savemos, el matrimonio no reusho. Las diferensias entre los dos eran en realidad komo un abismo.
Sara, nasida en Zihron Yaakov, kresyo i bivio en una atmosfera libre; montada sovre un kavayo se paseava sola desde la koloniya asta la kosta de la mar. Kuando estava en Estambol la otomana, no fue posivle, de ninguna manera, ke eya va poder ovedeser a las restriksiones de la soledad i la modestia ke mujeres eran eksijidas de kumplir.»
Traduizido por:
Yehuda Hatsvi
Erets Yisrael.
