eSefarad Noticias del Mundo Sefaradi
En una seremonia impresyonante ke tuvo lugar en la Universidad Bar-Ilan, el 9.Desiembre.2018, 14 estudiantes de diferentes fakultades resivyeron sus bekas.
La seremonia se avrio kon las palavras del Prof. Shmuel Refael, Direktor del Instituto Slati de estudios de Ladino. Kon aplozos a la famiya Salti, «Esta es la 35en. repartisyon de bekas de la Fondasyon Salti» disho Prof. Refael i kontinuo: «Kon todos los ke resivyeron bekas fina oy, la Fondasyon se konsidera komo una grande famiya. La kontribusyon de los Djudios orijinaryos de Turkiya tiene grande parte en el desvelopamiento sea de la Fondasyon, sea de la kultura sefaradi. Mos sintimos orgolyozos kon vozotros estudiantes i vos kondiseramos komo los ambasadores de muestra kultura.»
Golan Barman, estudiante en medesina en la Universidad Tel Aviv, mos prezento un rezumen de su teza sovre los elementos ke afektan el DNA del puerpo umano. En su ermoza projeksion pudimos ver komo elementos, komo el sol o la kimoterapia, dezazen las selulas i danyan la DNA.
Matan Hakim, estudiante en Istoria del Puevlo Djudio en la Universidad Haifa, mos konto la istoria de su famiya empesando de su nono Daniel ke izo aliya en 1936 de la Bulgaria, fondyo el kibutz Ramat Hashofet i lavoro toda su vida kon devosyon al sionizmo i al Estado de Israel. Matan se inspiro de las valores de su nono kuando el topo un livriko ke era la biografia de su nono.
Enfin, pasando a la repartisyon de las bekas, 14 estudiantes en diferentes kampos de diferentes universidades resivyeron sus bekas entre los ojos admiradores de los partisipantes.
