Poesía: LETRA de Grasia Jak Albuhayre

Grasia Jak Albuhayire

LETRA

Te kero eskrivir una letra
una letra larga, larga
Tomo el papel blanko
lo meto en riva de la meza
y ampeso:
Chalom kirido!… i korto
Las palavras en mi
koren como huente,
se aharvan, se pelean,
kada una kere prima arivar,
no letra, a la istoria
de mi vida te kero kantar,
komo estuvi biviendo sola
i como bivo agora
si partia con ti a Israel
mas boene iva ser?
Ya se ke vaz a dezir:
– No prime, es muyi tarde…
Ya lo se, por esto no te eskrivo
i lo desho siempre para otro diya
La persona se poede ir a la luna
la agua puede korer pur otra parte,
ma lo ke paso no se torna,
no se torna la manseves.
Pur esto no te eskrivo
i lo desho
siempre para otro diya
Apropo; Algun diya
te vo eskrivir letra,
una letra larga, larga…
Algun diya…

Grasia Jak Albuhayre