eSefarad Noticias del Mundo Sefaradi
ERENSIA -2011
En Sofia avia un enkontro
de djidios sefaradis.
Ombres, mujeres – del mundo entero,
era una disputa sobre la ERENSIA.
Mos konosimos kon djidios vizinos,
de la Makedonia, de la Serbia,
amigos topimos de la Arjentina,
en djudeo – espanyol avlimos,
la istoria de la lengua mos akodrimos
i todo lo ke kedo de la ERENSIA.
Bueno es la persona ke save lenguas.
Kada lengua es una rikeza.
Podemos avlar kada lengua
ke en los anyos ambezimos
o de los lugares ke bivimos.
Ma no devemos olvidar,
ke la lengua muestra es el EBREO
i ebreo devemos ambezar.
La lengua santa de la ley
i del puevlo muestro de Israel.
——————————————————————————
Grasia Jak Albuhayre
Livro Nº 3 – 2012
Sofia – Bulgaria
Gracia Jak Albuhaire es de Karnobat- sivdad chika en Bulgaria. Era profesora, jurnalista. Eskrive poezia i proza en bulgaro i poezia en djudeo- espanyol. Eya partisipa aktivamente en el klub “Ladino” de Sofia, Bulgaria.
