eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo la poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«REZULTADO DEL AYUDO»
Komo puedo saver su vida i su proveza?
Komo puedo saver su bivienta i su meza?
Vide sus manos del friyo eran deskoloradas,
Sus miradas abatidas, sus karas muy rozadas.
«Apiyadame» diziya de tono vagarozo,
Apiyada por salvar mi ninyo del dezrepozo».
Mi mirada se fikso en esta chika figura,
De sus ojos remarki su ambiertura segura.
Un dezespero viya…. su kavesa enklinada,
Pensava a su ijo kerido i mas a nada.
Le ofresi dos lagrimas kon todo mi dinero
Lavi mi alma i alivyani su dezespero.
Kuando me rekuerdo, sus bendisyones me toka,
Kreyo ke mis dezeyos son kumplidos por su boka.
La «sedaka» es emprestar al Todo Poderozo,
El mos pagara dandomos una vida kon gozo.
Haim Vitali Sadacca
Montreal
«SENTIMIENTOS DE UN PADRE»
I yo komo munchos padres so yeno de kerensya,
Kero darte un poko de mi vida i mi sensya.
Mi ambisyon, mi dezeyo es de verte en gozo,
I yeno de buena vida kon futuro ermozo..
Tu alegriya es mi fiesta, tu ansya mi dolor,
Tu sensya, tu tenida i tu glorya es mi onor.
Ansi tu posedas las bazas de toda mi vida,
Visto ke mi ansya, mi alegriya i mi diya
Son bazados a tu egzistensya i a tu yida.
En ti se kompoza mi reflo i la alma miya.
Si tengo akel chiko espanto de la muerte
Es por ke kero alkansar a en bueno verte.
Por ti me veyo en la luna i kuando en pozo,
Mi penseryo siempre en tus pasos i sin repozo.
Sos de boka dulse i kon mirada inosente,
Tu boz komo kante, das alegriya al ke siente.
Sos mi bevyenta, me das borraches kon alegriya,
Tu sos la baza de mi vida para ke yo riya.
Te djuro, la fuersa de bivir topo en ti solo,
Kon tu nombre i kon tu kerensya yo me konsolo.
Haim Vitali Sadacca
Montreal
