eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo la poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
KERO KE SONYES KON MI
Entrar a tus ondos suenyos es mi grande deseyo,
Mi orasyon es verme en ti komo yo te veyo.
A las vezes venire sin ke seya envitado
Komo si fuera un ajeno,sin ser esperado.
Si kon kadenas estara serrada tu puerta
Sin bruido entrare por el techo o tu guerta.
Asentandome sin kitar boz por no espertarte
A tu linda kara fiksar mis ojos sin tokarte.
En la oskuridad admirare tu ermozura,
En tus suenyos apresyaras mi amor sin mezura.
Sentiras el plaser de mis bezos imajinarios
Durante tu suenyo teneras plazeres varios.
Me veras feliz ma yo en realidad sin serlo
Ay tantos anyos no arivates a entenderlo.
Estos suenyos divinos se gravaran en tu sensya
Para ke bivas kon las memoryas de mi kerensya.
Las noches espera mis vinidas kon despasensya,
No es emportante mi muerte o mi egzistensya.
Haim Vitali Sadacca
Montreal
EL SILENSYO DE LA NOCHE
Un grito mudo se viya en su mirada,
Se hue ravyozo, desho su boz adorada.
El era un marido mas ke un amante,
Garnido de un korason de diamante.
Eya kulpante de kavzar este revolto,
Hue abandonada por su mal komporto.
Esta mujer en esta asolada kaza,
Se sentiya komo aryento d’una braza.
Sus ojos en la puerta medya entornada,
Kon miradas tristes de verse kastigada.
Los bezos se dekompozavan en su boka,
Deshando savor amarga ke la aloka.
Kada fin de dia kuando eskuresiya
En el mundo kedo sola le paresiya.
Keriya tener siempre su sol asendido
El era su abrigo…Techo de su nido.
Las soledades de las noches la matavan
Las alegriyas de bivir se le amatavan
En el silensyo de la noche.
En el silensyo de la noche,
Kuando todo profondamente dormiya
Aryento d’akel sielo ennuvlado viya
Ke la luna kon su klaridad s’eskondiya
Komo l’amor ke en l’alma desparesiya…
Su deseo era de bivir komo antes
Alkansar a sus alegrias i sus kantes
Olvidando los silensyos de las noches.
Haim Vitali Sadacca
Montreal
