eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía. Disfrutaremos en esta sección la habilidad de Haim como poeta y su dominio de la lengua ladina.
Ver todos los artículos de esta sección >>
«El Peshkador»
La pehka era mijor ofisyo en su vida,
Kon luvya i mismo kon tempesta el se iva,
El bivir dependia de esta vida dura,
Se entendia su fatiga de su figura.
Una tempesta empeso… era de largura,
Tres ninyos i su esposa eran de amargura.
Kon sus miradas le dezeavan buena suerte
En rogando a ke kalme akel ayre fuerte.
Una lampa flaka alelumbrava sus karas,
Se via sus penas de akeas ondas varas.
Sus suspiros abatian las ganas de bivir,
No ay sinyo de su buelta, Kuando va vinir?
Tempestas, relampagos, el mundo se undia,
Bruidos fuertes kon turguenos se sintia.
En la kabana un silensyo komo de luto
Rogavan de alma a ke kalme el tiempo bruto.
Ocho ojos en la ventana kon dezesperos
Lo esperavan kon sombayos verdaderos.
Supito de leshos vieron al ombre kerido,
Su kaminada kansada,komo un ferido.
Las alegrias i sus kerensyas en la alma
Lo abrasaron kon lagrimas ke no kalma.
Era entero mojado, tremblando del frio
Triste i abatido en sus karas no brio.
“Pasi oras fuertes”dizia a su espoza
Nunka me tengo rankontrado kon esta koza,
La mar estava tanto furiosa i salvaje
Ke me sinti medio bivo,medio muerto kaje.
Un sielo preto, tanto oskuro, sin luna
Un barko flako ariento de esta fortuna.
Kuando me via en el sielo,kuando en un pozo
Unas nuves teribles, un tiempo muy kuryozo.
Tuve un ayudo del Dio,unos me travaron
Sali a una isla,de murir me salvaron.
En la baraka avia fiesta komo antes,
Se sintia las rizas i sus ermozos kantes.
Hayim Vitali Sadacca
Montreal
