eSefarad Noticias del Mundo Sefaradi
Haim Vitali Sadacca, que escribió y publicó poesía en turco en sus años jóvenes, ahora compone sólo poesía en ladino, su amada lengua ancestral. Los poemas, elegidos por el propio autor, expresan las aspiraciones universales del alma humana para el amor, el afecto, la compasión, la generosidad, la paz y la armonía.
Disfrutaremos en esta sección la habilidad de Haim como poeta y su dominio de la lengua ladina.
«El Perdono De Un Padre»
Oy estava penseryozo I yeno de kanserya
Malgrado las miradas duras i su avla serya,
Su kriatura kontinuava a sus kaprichos,
Revoltandose a todos sus konsejos i dichos.
Kon grande ravya le dyo siertas dadas tokantes,
Por kalmar sus inyervos kansos, kaje alokantes.
Kon gritos altos no kijo yorar por su orgolyo,
Ma los ojos de lagrimas i kon alma de dolyo,
S’alesho de su padre kon kavesa enklinada
Un suspiro ondo d’el se sintiya …i mas nada.
El padre tuvo un negro golpe de este fakto,
Mas de karinyo no deviya tener otro pakto.
Kaliya en lugar de dadas darle su kerensya,
Porke esto era su buto, era su erensya.
El konosiendo su respekto i entelijensa
Vido ke la ravya era kon toda su egzistensya.
Los suspiros largos, el estado de bokabasho
I sus «sollozos» kon un yoro de tono muy basho,
Izo naser en l’alma del padre nuve eskura
Ke vazyo su luvya a su korason komo kura.
Verguensozo de mostrar las lagrimas komo riyo,
Yorava por su kulpa i por su ijo kerido.
Lo viya dormir kon esfuenyo de normal tono
Bezava sus karas komo demandar su perdono.
Haim Vitali Sadacca
Montreal
Montreal Not : Sollozo = Sanglot «eclater en sanglot»(French)
= hickirarak aglamak (En turc)
= sob
——————————————————————
«El Espanto De Perderte»
Tu ida es un golpe a mi korason,
Komo puedo olvidar tu disparisyon?
Tu huites mi amor i mi enspirasyon,
Mi vida, mi gozo i mi respirasyon.
Mi alma, mi sangre kon tu fuego yenas,
La noche, el dia bates en mis venas.
No se puedra mas de esto kererte
Todo lo mio keriya ofreserte.
Tus miradas son gravadas en mi tino,
Regalo de los sielos a mi destino.
Siempre bivo kon el plaser de verte
I kon el miedo un dia de perderte.
Haim Vitali Sadacca
Montreal
