eSefarad Noticias del Mundo Sefaradi
EL VIAJE
Diya viene, diya pasa
Kuantos amaneseres viyeron mis ojos
Al espertar de oskuros blankos…..
El esuenyo no kere entrar a mis ojos !
Mis parparos se estremesen
Kansados de los diyas kurtos
De las noches largas sin dingunos
El vaziyo inche los kantones asolados.
Demanyadas s’alegran kon los kantos
I los bruidos de alas de los pasharos
El ayre delikatamente karesa mis karas
Komo dizyendo a mi oreja dulses palavras.
Horas i horas kedo mirando
Komo la vida pasa en este mundo
De mi ventana observo mi pasado
Esta manseva blonda koryendo en riendo…
Kedo mirando los anyos ke bolaron
Komo los pasharos ke no kedaron
Akeyos ke vinyeron la primavera i se fueron..
El invierno entro !..Los friyos empesaron..
Kedo mirando del vidro afuera
Los muevos elevos indosen a la eskola
De esta, kon la fustika, ayer dayinda
Su madre ke konosiya, era kreatura…
Kedo mirando, arrimada a las almadas
Komo korye el tiempo en las kalejas..
Se troko la kolor de los otobuses….
La gente no riyen..No komen mas dulses !
Mizmo las nuvlas trokaron !
De grizo klaro se oskuresyeron !
Las luvyas eran finas, suavas
Oy aharvan las kayes, asuven a las kazas…
No esto triste de yegar a esta estasyon
El viaje kon este treno fue una satisfaksyon
A los ke konosi mostri toda mi afeksyon
Me aserki de todo i sinti tanta admirasyon…
Valyo la pena de azer este viaje
Grasyas al Di-o yegimos kon koraje !
Agora es tiempo de los rekuerdos
De kada estasyon tomi fotos i regalos…
Ayegi al tiempo de kompartir kon otros
Las ermozuras i las savores de akeyos anyos
Fueron penas duras, el bueno i amores lokos
Ma siempre kon dulsurya i kaminos derechos !
Sharope blanco
4 Oktobre, 2010
