eSefarad Noticias del Mundo Sefaradi
Keridos amigos i amigas.
Ke es la diferensia entre «Your Majesty» i «Royal Highness»? En el primer kavzo si tu sos un lider de un estado enkontrando a la Famiya Real Britanika ande empleas las palavras «Your Majesty» al Rey o a la Reina. En el segundo kavzo empleas las palavras «Your Royal Highness» por el resto de la Famiya Real. Ay munchos protokoles ke deven ser estudiados. antes del enkontro.
Aki tenemos el kavzo del enkontro del Presidente Amerikano «Franklin Roosvelt» i el «Rey Saudi Abdul Aziz Ibn Saud» en un barko maritimo Amerikano en el Kanal de Suez. Roosevelt se estava tornando atras de una Konferensia en Yalta kuando el Rey Saudi viajava kon su enturaje de 200 personas ke inkluian a sus mujeres, esklavas pretas, gizanderos, el azedor de kafe, el astrolog i un konsejero..Un representante de Saudi Arabia vino a dizirles ke no era posible de akomodar a 200 personas en un vapor chiko. A la fin fue desidado de tomar solamente 42 personas en un Porto de Ejipto. Avia un fanfar grande kon los tiros i los fuegos i de los 2 lados se entendian bueno. El Rey Saudi les dio unos regalos grandes komo la alfombra, vestidos de luxo, moneda, oras de oro de Suisa, sapatos de kuero ets. Roosevelt asentado en su siya de paralizado se sentia un poko flako. Se asentaron a la meza gostando la karne de kodrero kon pimientos i a la fin de la komida El Rey le demando, ke le den en retorno al gizandero para yevarlo a Saudi Arabia. El problem fue ke este gizandero era angajado en la Marina Amerikana no puedia ser liberado. La solusion puedia ser de reklamarlo de ser un Judio. En realidad el Rey no amava a los Judios. Ensima de esto Roosevelt le demando si se puedia krear un Estado Judio en Palestina? En supito el Rey se aravio i disho ke eran los Arabos ke se aharvaron kontra los Alemanes i no los Judios. «3 miliones de Judios fueron matados en Polonia». El Rey sujero ke despues de aver vaziado el pais de los Judios, oy se puedia embiar a otros 3 miliones ayi». Despues el Rey disho ke los Judios nunka avian bivido en Palestina por un tiempo largo». Ke Hutzpa de la parte del Rey de dizir todo esto? El asunto se termino kon la promesa de Roosevelt ke el nunka iva enkorajar la imigrasion a Palestina sin ke sea akseptado por los Arabos.
SALUDES A TODOS
Tradusido por Shimon Geron de Sydney
