eSefarad Noticias del Mundo Sefaradi
Meldar todos los artikolos de esta seksion >>
«Komo djugavamoz?»
En munchos djugos kaliya desidar ken va empesar emprimero.
En unos djugos esto se aziya en avansando kon pasos apretados, uno verso el otro. Ken pizava al pye del otro ganava i era el primero en el djugo.
Fraza del dia: Ken pedre en djugar (kumar) gana en amor.
WSP 28.06.2020
———————————-
Yağ Satarım Bal Satarım
Yağ Satarım Bal Satarım; Sapato por detras, Duck duck goose:
Los ijikos se asentan en sirkolo. Un otro ijiko korre detras de eyos kon una rida en la mano. Ensupito mete la rida detras de uno de los asentados. El ke tyene la rida detras de el tyene de apersivirse i korrer detras del otro antes ke le tome su luguar en el sirkolo.
Fraza del dia: La mujer ermoza tyene su reynado detras de la puerta.
__
_WSP 01.07.2020
———————————-
Futbol
Este era el djugo el mas popular.
Para portyera ya abastavan dos paltos o dos piedras.
Si no aviya bala profesyonala, i no aviya, aziyamoz bala de papeles i gazetas.
Fraza del dia: Piedra i palavra no tornan atras.
—-
__
WSP 07.07.2020
———————————-
Arodear el chember/aro
Bushkavamoz chemberes abandonados en los syerkos para arodearlos en la maale entera, arondjandolos kon un palo i kudiando ke no se kaygan enbasho.
Fraza del dia: Aguas pasadas no arodean molinos.
—-
__
WSP 12.07.2020
———————————-
Arrezvalador
Los padres no teniyan paras para merkarmoz korkinet. Mozotros, lo montavamos de tavlas vyejas i rulmanes (cojinetes) abandonados. Los yokushes/abashadas eran maraviya para arrezvalar.
Fraza del dia: En kontando las paras del riko se gasta la kandela del prove.
WSP 14.07.2020
———————————-
Albert Israel, Yerushalayim
Shefe del sirkolo de konservar i promover la kultura sefaradi
