eSefarad Noticias del Mundo Sefaradi
Ver todos los artículos de esta sección
Kindertransport (2)
En el 1/4/1933, dos mezes dospues ke Hitler entro al poder, se tomo la desizyon de azer boykot los komersyos de los djudyos. 
Tres dias antes de esta desizyon entraron los nazistos a Kaufhaus N.Israel, aretaron munchos empleyados djudyos i Wilfrid entre eyos. Los aretados pasaron una noche muy fuerte
No merkesh de los djudyos
en los bodrumes de tortura. Wilfrid empleyo sus relasyones i se libero al dia ke vyene. En seguida libero a sus empleyados. Se puede dizir ke en estos bodrumes de los nazistos se ensembraron los granikos de un kibuts muevo en Erets Israel, yamado Hazorea (el ensembrador)
Los bodrumes de tartura
Estos fueron los dias ke Wilfrid desido de dedikarse i dedikar todo su poder para ayudar a los djudyos a salir de la Almanya i a salvarsen sus vidas. El era aktivo en «Hilfsverein der Deutschen Juden» (Organizasyon de ayudo a djudyos almanos) ke se okupava de esto. Se izo aktivo tambyen en la organizasyon «Werkleute» (personas de lavoro) ke su lider espiritual era Martin Buber i ke sus miembros fondaron finalmente el kibuts Hazorea.
Ya se save ke para espiyonar en pais ajeno kale fondar relasyones kon figuras poderozas i famozas en akel pais. No se save komo ma el kapitan Francis Edward Foley, responsable a los pasaportos en el konsolato de la ingletyerra en Berlin, reusho a establizar relasyones fuertes kon Wilfrid Israel i los dos empesaron a kolaborar. I este modo lavorava «la makina»: Wilfrid dava moneda a Hubert Pollack, ke era la mano derecho de Foley. Hubert las dava estas paras a los nazistos komo rushvet. Los nazistos le davan a Hubert permisyones de salir de Almanya, Wilfrid se aderesava a Foley, le abasteniya notisyas sovre los nazistos i Foley le abastesiya pasaportos, a las vezes verdaderos i a las vezes falsos, permisyones de pasanjeros i otros dokumentos para ke los djudyos puedan salir de Almanya. Kuando no pudiya obtener dokumentos de su ambasada se aderesava a ambasadas de otros paises i obtenia permisyones de eyas. A unos mansevos les kitava sertifikates ke permetian entrar a Erets Israel.
Emprimero Wilfrid kito de la almanya a sus empyados djudyos (i kontinuo a pagarles mezadas dos anyos mas). Los havadises se espandyeron rapidamente i munchos otros djudyos empesaron a vinir i rogarle ke les ayude. La «makina» kontinuo a lavorar fin al empesijo de la gerra mondial i kaji 50,000 djudyos reusheron a salir de la Almanya en esta manera. Ma aki no se eskapa el rolo de Wilfrid.
En el empesijo, los nazistos no tenian intisyon de undir a los djudyos. Lo ke kerian era solo «alimpyar» la Almanya i la Eropa entera de djudyos. En este buto izyeron todo lo ke puedian para amargar las vidas de los djudyos i ke estos salgan del pais. El otro buto era patronear de los bienes de eyos. Los djudyos ya estavan salyendo de la Almanya ma los nazistos no estavan kontente del ritmo. Kalia arrepusharlos. Lo ke mankava era una hohenta. Este preteksto se topo kuando un mansevo djudyo, Hershel Grinshpan, mato al sekretaryo treser de la ambasada Almana en Paris. Esto era un yerro porke el mansevo keria matar al ambassador. Este kavzo ya les abasto a los Almanes para konkriar, en 9-10/11/1938, el «Kristallnacht» (Noche de Kristal) la noche de un pogrom grande (ke ya era organizado de antes) kontra los djusyos en Almanya i en Austria. Mas de kuatroshentos djudyos fueron asesinados, mas de trenta mil djudyos fueron erestados i mandados a los kampos de konsentrasyon, miles de institusyones, butikas, komersyos i kazas de djudyos fueron atakados krualmente, munchos vidros fueron rompidos, kales fueron kemados i muncho bien de djudyos fue destruido. El mundo entero estava «choqués» ma los almanos no estavan akontentados. Al dia ke vyene desidaron de tomar otrun montante de pasos kontra los djudyos. Entre eyos, se desido de arondjar a todos los elevos djudyos de las eskolas en el pais.
Esto fue un arempushamiento muy fuerte ke enfluenso a todos los djudyos en la Almanya i afuera del estado.
A kontinuar…
