Avladino kon Albert Israel en Yerushalayim: Una bisikleta – Komo de padre?

Ver todos los artículos de esta sección 

Una bisikleta –  Komo de padre?
Ahmet Izgören – traduizalo (libre) por Albert Israel

Estava en la syetena klasa. Dia de Kipur. Estamoz djugando kon los amigos en la kaye. Todos los amigos tyenen bisikleta, estan kaminando kon eya. Yo no tengo bisikleta… Solo yo no tengo bisikleta… Una ves le demando de este ke me empreste la bisikleta suya, otra ves le demando del otro… Miri, esto no es vida de suportar. Todos se estan burlando de mi. Kale topar remedyo. Me fui a mi padre, averguensozo, i le demandi si me puede merkar una bisikleta. Siguro, disho mi padre, ven kon mi!

Moz estamoz indo mano kon mano. Yo esto kon mil alegrias. Los amigos me demandan, ande? I yo, kon muncha grandeza, les esto dizyendo ke moz estamoz indo a merkar bisikleta. Ensupito mi padre entra a un zarzavatchi i merka una kasha yena de limones. Mi padre nunka merka limones kon kasha, ke le afito oy? Ama dospues ya entendi. Dishe, demi para mi, agora ke vamoz a merkar bisikleta, puedemoz merkar limones kon kasha i trayerlos a kaza kon la bisikleta.

Arivimoz en medyo del chashi. Mi padre metyo la kasha enbasho i me disho:

«Ijo presyado, agora vende estos limones a la djente, kon las paras ke te van a dar merka otra una kasha de limones. Este modo vaz a kontinuar una semana. Dospues de una semana ven ande mi kon las pares ke vaz a tener en la mano i vamoz a merkar bisikleta».

Me desho aya i se fue…

Yo empesi a yorar. Komo de padre es esto? Yo, lo vo enfasar a mi padre del defter miyo!!! No kero este modo de padre!!!

Esto mauyando…

Miri, las personas me estan demandando kuanto es un limon? Echi de kavesa un presyo. Enpesaron a merkar. En una ora se eskaparon todos los limones. Me fui al zarzavatchi, le amostri las paras, me dyo medya kasha de limones. Entendi ke kale venderlos kon presyo mas alto. Este modo merki i vendi asta ke paso una semana entera. Al kavo de la semana me fui a mi padre i le «arondji» las paras a la meza… Ven kon mi disho.  

Yo esto kon el espanto ke moz vamoz a ir yene al zarzavatchi… Ama no! esta ves moz fuimoz a la butika de bisikletas. Mi padre me merko una bisikleta korolada kon todos los aksesoryos.

Anyos dospues entendi ke kon las paras ke le di a mi padre no se puediya merkar ni un pedal de bisikleta.

Ama akel diya me ambezi una lisyon grande. Para ganar pan en vida kale azer esforsoz, kale sudar, kale luchar, kale tener espirito de bataya.

Agora, kuando veygo la manseves de oy, ke los padres les merkan, los nonos les regalan, la madres les gizan, los ermanos les dan a komer kon kuchara en boka i les alimpyan la barva, digo de mi para mi:

Ande estas kerido padre ke me ambezates:

«Kezo debaldes se topa solo en trampa de ratones!!!»