eSefarad Noticias del Mundo Sefaradi
Ver todos los artículos de esta sección
La eniegasion del holokosto
por Albert Israel
Durante los anyos ke pasaron, desde la sigunda gerra mondial fin a oy, la eniegasion del holokosto troko munchas formas. Empesa de eniegasion direkta (no uvo este modo de koza) i termina en echar la kulpa a los viktimos, los djudyos (aktualmente, eyos mizmos eran los ke kavzaron sus muertes kon sus ovras diferentes).
Oy la eniegasion del holokosto es un delito penal kontra la ley en Israel, Fransya, Alemanya, Austria, Espanya, Belgika i Italya. En Israel la pena de violar esta ley es sinko anyos de prizion. A los paises arabos, entre eyos los lideres de los Palestinyanos, les konvyene a eniegar el holokosto. Esto, kontra las ideas ke djastifikan la fundasion del estado Israel komo repuesta al genosidio del puevlo djudyo de mano de los Almanes, en el holokosto. «Si no akontesyo el holokosto no ay dinguna djastifikasyon por el fundamyento del estado de Israel. Los djudyos tyenen de tornar a sus paises…»
En los anyos de alkavo, dospues ke pasaron las leyes kontra la eniegasyos del holokosto en diferentes paises, uvyeron djuzgos famozos kontra los eniegadores:
Robert Faurisson, eniegador del holokosto i professor de literatura fransez en la universidad de Lyon en Fransya, eskrivro ke no aviya krimatoryos de gas i ke el diaryo de Anna Frank es falso. Fue djuzgado i demisyonado de su posto en la Universidad.
Ernst Christof Friedrich Zündel, emigrante Almano en Kanada, printava livros en kaza i eniegava el holokosto. Los Kanadianos lo deportaron a Almanya. Los Almanes lo djuzgaron i lo metyeron en prezo por 5 anyos.
Bruno Gollnisch era diputado de Jean-Marie Le Pen en Fransya i professor de derecho en la universidad de Lyon. En una konferensya de prensa kesyono la verdad del holokosto. Lo djuzgaron i lo kondanaron a pagar kompensasion finansial. Ademas, la Universidad lo suspendio de su posto por 5 anyos.
Un otro kavzo konosido tomo luguar en los estadod unidos:
La profesora i la historiadora judía, Deborah Lipstadt, autora del livro «Eniegando el Holokosto», estava en medyo se su konferensya en la Universidad de Atlanta en 1994. En supito uno de los oyentes, David Irving, istoryador Britaniko i eniegador del Holokosto, interrompyo sus palavras kon gritos i se konfronto kon eya demandandole ke trayga provas a lo ke estava eskrito en su livro por la egzistensia de las kamaretas de gas i ke Adolf Hitler efektivamente ordeno la asesinasion de los judíos.
«Irving estava en Atlanta, i desido de venir a mi konferensia para provokarme i azerme miserable. Me kedi kayada, en luguar de konfrontarme kon el delantre de los elevos. Irving kontinuo a gritar. Esto era para mi un desastre…» se akodra Lipstadt.
Irving no se satisfiko kon esto. Unos kuantos anyos mas tadre yevo a Deborah i a la publikasion de su livro al djuzgo en la Ingletyerra, akuzandolas de difamasion. Irving eskojyo el korte de Ingletyerra porke a sigun la ley de ayi los akuzados son eyos ke tyenen de provar sus argumentos.
En el korte, una seria de historiadores se prezentaron i testifikaron kontra Irving.
El djuzgador, Charles Gray, se konvensyo de estos testimonios i eskrivyo un djuzgamiento largo akuzando a Irving, konfirmando los argumentos de Lipstadt en su livro i inosentandola de todas las akuzasyones de Irving. Al final el akuzador se konvertio a ser akuzado.
El 11 de noviembre de 2005, Irving fue aretado en Austria, de basho de un orden de areto de 1989, por kulpa de eniegar el Holokosto. Irving se deklaro kulpavle i el djuzgo se termino en un dia. Irving fue kondanado a tres anyos de prizion.
En 2016, salyo a los ekranes el filmo «Eniegasion» bazado al livro de Deborah Lipstadt «History on Trial (Istorya en el Djuzgo)» ke deskrive este djuzgo. Este modo moz konta Deborah:
«Durante el djuzgo estavamos pasando la ora kon la idea de azer un filmo dokumentario ke va deskrivir lo ke estamoz pasando aktualmente. Akel tiempo avia dicho ke yo keria a Meryl Streep en el rolo prinsipal. Ma la produksion se alargo mas de 15 anyos. Meryl se izo aedada. Los produktores se aderesaron a Hilary Swank. Hilary aksepto ma el padre de Hilary se enhazino i Hilary fue ovligada de aremedyarlo. Finalmente fue elegida la aktrisa ingleza, famoza, de teatro i de filmos, ganadera de los primyos «Oskar» i «Golden Globe», Rachel Hannah Weisz. Rachel tyene koneksyon personal kon el sujeto syendo ke sus djenitores se fuyeron de Hungaria dos semanas antes del empesijo de la sigunda gerra mondial i syendo ke el sujeto de holokosto se avlava muncho en kaza, en su chikes.
El filmo es muy fiel a los faktos verdaderos i amostra kualos son eniegador del holokosto, antisemitismo i rasismo.»
El trailer de este filmo se puede ver aki:
Tambien, el filmo entero lo puedesh topar en el Internet.
