eSefarad Noticias del Mundo Sefaradi
Ver todos los artículos de esta sección
AMOR VERDADERA
por Albert Israel
Era ayedado. Teniya mas de 80 anyos. Estava despasensyozo. Aviyan mas de 30 personas ke estavan asperando sus tornos para entrar a la kamareta del doktor. El numero ke teniya el en la mano era 57. Antes unos kuantos minutos entro a la kamareta una damma kon el numero 38. El povereto teniya de asperar otras 19 personas ke entren al doktor para ke le venga el torno suyo. Kada 10 sigundos estava mirando a la ora kon inyervos. Teniya una kara muy triste. Le demandi:
-Sinyor, parese ke no te estas konsistyendo bueno…
-No, no, es ke tengo de tomar del doktor la resefta de mis kuras ordinaryas…
-Te esto vyendo mirar a la ora, kada 10 sigundos…
-Esto muy apresurozo. Esto kedando tadre. Kada minuto es muy importante…
-Pardoname sinyor, ande tyenes de irte?
-Tengo el randevu diaryo kon mi mujer. Esta en el ospital. No kero tadrar.
-Melezina buena ke tenga, de kualo sufre?
-Tyene alzhaymer avansado. No konose a dingunos. No save lo ke esta pasando kon eya. Ya ay doz anyos ke no moz esta konosyendo ni ami, ni a muestros ijos. No save ken semoz…
-Si es esto, porke kada minuto es muy importante?
-Eya no save ken semoz mozotros ma yo se muy bueno ken es eya i kualo era por mi i por muestra famiya durante 50 anyos.
Teniya lagrimas en mis ojos i el numero 40 en mi mano. El Dyo alavado kijo ke vinyera oy aki para ambezarme una leson muy importante sovre la tema «Kualo es la amor verdadera». Se lo di a él el numero 40 i tomi de él el numero 57.
