eSefarad Noticias del Mundo Sefaradi
Ver todos los artículos de esta sección
Ofisyos de akeyos tyempos…
por Albert Israel
Halachi
Teniya en las manos una «Filecha» grande i un «bokal» de tavla. Pasva de la kaye gritando: «Halachi, Halachi…». Akeyos tyempos las kolchas i los kavesales eran inchidos de algolon. Durante el tyempo esta algolon se aziya punyos duros i no se puediya durmir repozado. El halachi avriya las kusturas kitava el algolon i le aziya kon la filecha i el bokal: «Taka tak, taka tak,…». El algolon se «dezaziya» i se aziya blando. El halachi lo entrava aryentro de la kolcha/el kavesal i los kuziya demuevo.
Madjundju
El madjun era una almastiga espesa ke se aziya proporsyonalamente, kon 6 kupas de asukar, kupa i medya de limon, medya kupa de agua, una fruta i otras kuantas kozas ke davan kolor i savor…
Mos kayiyan la bavas solo de ver…
Kuando le pagavamos el presyo, el madjundju lo rodeava el madjun en un paliko fino i mo lo dava a chupar. Este madjun se chupava, a los menos, medya ora.
Boyadji
Akel tyempo las kalejes eran yenas de lodo i kanyo. Los kalsados kada nada se ensuzyavan. Sano ke este, el boyadji mo los alimpyava, mo los boyadeyava (pintava), mo los lustrava i no se kon ke material, mo los briyava.
Saka
Akel tyempo no aviya agua koryente en las kazas. Ni aviyan fuentes. Kaliya trayer agua del pozo o de luguar lesho, kon hammal (mira abasho). El Saka inchiya las damadjanas de teneke ke teniya en la espalda del azno i vendiya agua de puerta a puerta. En kaza la agua se inchiya a una tinaja grande. De la tinaja inchiyamoz las kanatas, kon djarriko.
En mizma manera se vendiya la leche.
Hammal
Oy tambien, alkilar un kamyonet para transferar kozas pesgadas es muy karo. Akeyos tyempos, aparte ke eran karos, si keriyas afilu, no se topavan. En sus luguar teniyamoz hammales ke moz transferavan kozas pezgadas kon un presyo muy barato…
Aguzador de kuchiyos
Kuando la karucha estava abasho era bisikleta. Kuando estava ariva era aguzador.
Change
No aviya menester de kasha de fyerro…
Turshudju
Teniya agruras de todas las zarzavates. Te lo dava en una kupa.
Albert Israel
