LA SAVOR DE PENSAR A LO KE BIVI… por Sal Amira: CANAKKALE I YO, SALAMONIKO

Ahhh mi chikez inolvidavle…

Oy es alhad i ez la primavera de 1943 en Canakkale. Oy ez el diya desidido para arekojermoz kon la comunidad en el CHINARLIK. El chinarlik ez un lugar komo un park, rodeyado de arvoles ke en turko se yaman CHINAR/platano. Allado de estoz chinarez ay un riyo ke se yama SARI YOLDAN AKAN.

En este avyerto, loz alhadez de la primavera i parte del enverano los sefaradim moz arekojemoz i azemoz piknik a la mil.. maraviyaz…

Trayemoz halis/karpetas bastanta karas para asentarmoz enbasho tambiyen el ke pudiya trayiya mezas i siyaz echas por muestro artizano,
uno de la famiya de VARON.

Mi papu YAKO viene kon su araba kon kavayoz i moz yeva al arekojimyento, a toda su famiya,…Ahhh komo yo gozo yindomoz avagar avagar kon loz pasoz del kavayo i el sonido KLIK KLIK DE SUZ PIYEZEZ…….

Ah tambiyen tenemoz una PLAJ ke la yamamoz LA MAR DE LOZ JUDYOZ ande tambiyen moz kongregamos en verano para refreskarmoz….laz mujeres visten mayoz modernoz a laz mil maraviyaz ke eran eksportadaz de Estanbol.

Mi papu YAKO tyene un yelkenli/barkito de vela de 8 metroz de largo para yevarmoz a paseyar en laz aguaz MAVIZ

…AHHHH KE ERMUZURAZ
AHHHH KE ERMUZURAZ KE ESTA VYENDO MIZ OJOS…
BEZOZ A TODOZ KE ESTAN EN MI GUERTA.

Sal Amira
CANAKKALELI, EN MIAMI USA.

Remgrasiamos a Sharope Blanko, Direktora de Sefaradimuestro ke mos envio estos eskrito de la parte de Sal Amira.

Fuente: Publicado en Sefaradimuestro – https://groups.yahoo.com/neo/groups/Sefaradimuestro