eSefarad Noticias del Mundo Sefaradi
Antes unos kuantos dias, en eskarvando mis kashones i metiendo orden entre mis papeles, enkuentri un papel palido i deskoloreado sovre el kual aviya un poema sovre el Ladino, eskrito por el Senior David Fintz Altabe – (De Buena Memoria) i entitulado:
Muestro Kerido Ladino
Dizen ke es noble el Kastilyano,
I el Fransez de Paris muy arefinado.
Dulse es el Italiano,
I el Ebreo es mas santo.
El Grego es muy antiguo,
El Turko es ermoso i djusto.
Ma denguno es mas riko
Ke muestro kerido Ladino.
Fue emprestandose de todas las linguas,
Enrikesyendose kon sus palavras,
Palavras ke en el korason se enfinkan.
Palavras en ke yora i riye mi alma.
David Finz Alkabe
Ken era David F. Altabe ?
Un eskolar Amerikano Sefaradi, erudito i poeta de renombre internasyonal, espesyalizado sovre la Kultura Sefaradi i la literatura Djudeo-Espanyola.
Nasyo en 1929 en New York, de madre i padre imigrantes de Turkiya, i muryo en Tampa de Florida en 2008.
Fue nomado dos vezes Presidente de la Sosiedad Sefardi en los Estados Unidos, i Vis-Presidente de la Assosyasyon de Amigos de Turkiya en los Estados Unidos.
Tanbien ensenyo Espanyol en la Universitad Queensborough en Nueva York i fue onorado komo “Profesor Emeritus”.
Eskrivyo munchas ovras i publiko livros sovre la Istorya de los Sefaradis i espesyalmente sovre los djudios de Turkiya.
– Ken kere saver mas sovre el puede perkurar en Google o en Vikipedia.
Fani Alyon Ender
Fuente: BÜLTEN de los Turkanos de Israel – turkisrael.org.il
