Muestra lingua: YEHUDA ALKALAY por Edmond Cohen

Keridos amigos, aki toparash el teksto de la emisyon de esta semanada.

Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

YEHUDA ALKALAY

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Komo a kada vez, vos akodro ke el proksimo atelye de konversasyon  de la Asosyasyon Vidas Largas se tendra el martes 22 de novyembre, de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet o Poissonnière. Vos asperamos kada vez un poko mas munchos. La ultima vez, mos komimos unas borrekitas gizadas por Carmela Izigon ke eran de se chupar los dedos. Si kuando vos dishe esto, yene keresh kedarvos en kaza, no se mas kualo dizirvos !

De kualo avlarvos oy ? Oyendo sovre internet a una conferensya de la Senyora Pilar Romeu, doktor en filolojiya semitika, transmetida por el sityo Akadem kon el titolo Apogée et décadence du judéo-espagnol (altura i kaida del djudeo-espanyol), ande diziya ke el haham Yehuda Alkalay eskrivyo en 1840 la primera ovra syonista en el mundo, i la eskrivyo en muestra lingua, me akodri ke ya vos aviya avlado de el en una emisyon ke ize ay doz anyos de esto, el 17 desyembre 2009, intitolada El nasimyento del Syonismo.

En esta emisyon, avlando de las sufriensas de los djudyos de Evropa en la mitad del diglo 19, vos diziya lo ke sige :

« Los intelektuales, i entre eyos tambyen syertos hahamim, empesan a pensar ke la solusyon para los djudyos puede solo salir de un estado djudyo, i no en kualsikyer lugar, ama en el pais de orijen del puevlo djudyo, Erets Israel.

Afillu si los hahamim en jeneral se meten kontra esta idea, pensando ke solo la venida del Mashiah podria permeter el ritorno a Tsion, los primeros pensadores del sionismo antes ke tenga este nombre son unos kuantos hahamim. En 1857, el haham Yehuda Haï Alkalaï (1798-1878) un sefaradi nasido de Sarajevo, eskrive un livro intitulado Goral la Adonaï, rogando a los djudyos de ganar su libertad sin asperar ke la liberasyon venga del Mashiah. Al kontraryo, solo la alya sera kapache de azerlo venir, asigun el. Yo ke syempre me krei ke la orijen del syonismo se topava en los djudyos ashkenazim no relijyozos, me ambezi en estudyando i meldando ke la orijen del syonismo vyene de un haham sefaradi kontinuando sovre los pasos de Yehuda Halevy, tantos anyos antes. Keridos oyentes, el syonismo no empeso kon Thedor Herzl, ama kon djente relijyoza, sefaradim de muestra parte. Kale saverlo ! »

Ansina vos avli ay dos anyos. Oy me pensi ke seriya byen de dizirvos un poko mas sovre este haham Alkalay. Si la primera ovra syonista en el mundo fue eskrita por el, i si esta ovra fue eskrita en muestra lingua el djudeo-espanyol, esto ke pokos saven, en todo kavzo yo no lo saviya, me parese mereser un poko mas ke dos o tres byervos.

Ama, me vash a dizir, i kualo azemos de Yehuda Halevi, ke eskrivyo los Shire Tsion en la Edad Medya, ke azemos  de Joseph Nassi, duke de Naxos, ke aprovo de fraguar una sivdad en Palestina ? Ke azemos de Shabetaï Tsvi, ke kijo ser el Mashiah i tomar el poder del Sultan de Turkiya para tomar atras a la Palestina ?(Entre parentezas, todos sefaradim).

No se si tyene razon, ama el istoryano Georges Bensoussan a aprovado de darmos una repuesta en un artikolo en franses intitolado : Aux origines du sionisme, du mythe à l’Histoire ( A las orijenes del syonismo, del mito a la istorya) este artikolo azyendo parte de un livro dirijido por Frederic Encel i Eric Keslassy, intitolado Comprendre le Proche Orient, une nécessité pour la République (Entender al Oryente Serkano, un menester para la Repuvlika).

Asigun Georges Bensoussan, el syonismo, movimyento nasyonal, « toma sus raises en la mitad del siglo 19. Leshos de ser una dada permanente i rekurrente de la istorya djudiya, es un movimyento istorikamente datado. No se konfunde kon el atadijo a la tyerra de Israel (Erets israel) ke el, a la kontra, es una dada permanente de la istorya djudiya. Leshos de ser konsubstansyal al djudaismo, el syonismo aparese mismo en vezes en kontra de la kara del djudaismo ortodokso. De ayi vyene el yerro de konfundir este movimyento nasyonal kon el atadijo a la tyerra de Israel, kuando este atadijo es fuerte al igual en los antisyonistos del mundo djudyo. Un yerro tambyen muy espandido …es ver en el syonismo una sola translasyon jeografika. Halbuki, si el syonismo no es solo una buelta a Sion, toda buelta a Sion, de la misma manera, no es  a kada vez syonismo ».

Mismo si no esto siguro ke Georges Bensoussan tyene razon en todo lo ke mos dize, una koza es sigura : muncha djente avla del syonismo sin saver en vedra lo ke es. En los refranes de Matilda Coen Sarano ke vos meldi ay dos semanas, se diziya : Muncho avlar, muncho yerrar ;poko avlar, poko yerrar. I mismo, si uno no avla del todo, nunka se yerra. Azno kayado por savyo kontado ! Bensussan, a lo manko, tyene unas ideas, i se atrive de dizirlas.  Si segimos a Bensoussan, estos todos ke vos dishe, Halevi, Nassi, Tsvi, teniyan el amor de Sion, ama no eran syonistos, no solo porke el byervo syonismo no egzistiya – esto no es importante porke de toda manera el byervo aparesyo despues de la koza –  ama sovre todo porke el syonismo fue un movimyento politiko kon ideas klaras ke empesaron de naser solo kon Alkanay.

Kale saver ke este Yehuda Alkalay nase en 1798 en la sivdad de Serajevo, en la Bosniya okupada por los Turkos, ama mansevo se va a estudyar en Yerushalaïm basho varyos hahamim, i se interessa a la Kabala. En 1825, dunke a la edad de 27 anyos, es yamado haham en la sivdadika de Semlin, ke agora se yama Zemun i es una male de Belgrade, kapitala de la Serbiya. En esta epoka, la Serbiya, ke era tambyen okupada por los Turkos,  aviya obtenido en 1818, dunke solo syete anyos antes ke venga Alkalay komo haham, despues de dos rebueltas kontra los Turkos  en 1804 i 1815, sino su independensya, a lo manko su otonomiya kon un prisipe serbo al poder.

Esto para dizirvos ke desde su manseves Alkalay se topa en medyo de revendikasyones nasyonalistas, no solo en Serbiya, ama tambyen en Gresya ande, en 1825, estamos en medyo de una gerra de independensya, i esto todo le va dar a pensar en favor de los djudyos.

En 1834, a la edad de 36 anyos, eskrive su primer papel, intitolado Shema Israel, ande dize ke los djudyos deven estableserse en la tyerra de Israel, para permeter al Mashiah de venir mas presto. Dizyendo esto, Alkalay va a la kontra de lo ke dizen los hahamim de su epoka, asigun los kuales toparse en Gola es un kastigo del Dyo, i kale asperar ke el Dyo troke su veluntad sin azer kualkyer koza. Se fundan sovre el livro del Tanah Shir ashirim, el Kantar de los Kantares, ande tres vezes se dize ke el amante no deve de espertar el amor antes del tyempo. Esto es entendido por los hahamim del tyempo de Alkalay komo keryendo dizir ke el puevlo djudyo no deve adelantar las kozas . El amor del Dyo para su puevlo aboltara kon su tyempo.

Alkalay se pelea kontra esta idea. Fundandose sovre la Kabala, el pensa ke el anyo 5600, kijo dizir 1840, va ser el anyo de la rehmisyon mesyanika del puevlo djudyo. Ama kale dizir ke Alkalay no se kontenta de argumentos relijyozos. Aki topi una syerta kontradiksyon entre los istoryanos. Asigun Ami Isseroff en el sityo internet Zionism-Israel.com, « Alkalay es puede ser el fundador del syonismo politiko ». Asigun Georges Bensoussan, en su artikolo ke ya nombri, afillu si avre el kamino al nasyonalismo djudyo, Alkalay yene se keda « antes del lado de la politika ». Entre los dos, Ilan Greilsamer, en un artikolo en la gazeta L’Arche de marso-avril 2005, eskrive ke « Alkalay es sin duda el primer pensador djudyo moderno ke izo la tranzisyon entre el mesyanismo i su konkretizasyon materyal por el ritorno de los djudyos sovre sus tyerra ».

En vedra me parese ke los tres tyenen razon en djuntos : Alkalay es un haham ke pensa komo un haham inspirado por la relijyon antes de todo, i de este punto de vista se topa mas serka de Yehuda Halevi o de Shabetaï Tsvi ke de Pinsker , Herzl o Borochov, ke ven solo la politika laika i nasyonala. Esto da razon a Bensoussan. Ama antes de estos pensadores nasyonalistas, i esto da razon a Isseroff i Greilsammer, Alkalay se preokupa de topar una solusyon praktika, dunke politika. Vamos a ver ke su idea es de arrekojer paras grasyas a la dima, i kon estas paras merkar la mayoriya de las tierras de Palestina al Sultan de Turkiya, para fraguar un pais djudyo. Estas ideas van a ser tomadas mas tadre por Herzl, i kale saver ke su papu, Simon Loeb Herzl, fue amigo kon Alkalay, i puede ser esta amistad tuvo un rolo en las ideas de Herzl 60 anyos mas despues. Es solo en 1901 ke va ser fundado el Keren Kayemet Leisrael, ke va meter en praktika las ideas de Alkalay .

En 1839, Alkalay eskrive un muevo livro, intitolado Darhe Noam, en ladino carreras de fermosura, en djudeo-espanyol diriyamos kaminos agradavles ; el titolo es travado de Mishle (Proverbyos) kapitulo 3, pasuk 17 : « Darhea, darhe noam – Sus carreras, carreras de fermosura ». En este livro, ke se prezenta komo un livro de gramatika ebrea eskrito en djudeo-espanyol, (asigun, sovre este punto de la lingua, lo ke disho Pilar Romeu : malorozamente, yo no tuve tyempo de bushkar i de ver este livro) Alkalay mos dize ke la teshuva ke devemos azer, se kale entender no solo komo un retorno al Dyo, ama tambyen komo un retorno a la tyerra de Israel. Aboltar a la tyerra de Israel es un dever relijyozo. Dizyendo esto, Alkalay save ke va a la kontra de los otros hahamim, ama no troka, al kontraryo un anyo despues sale un muevo livro, el ke Pilar Romeu yama el primer livro syonisto en el mundo, tambyen eskrito en djudeo-espanyol, afillu si su titolo es en ebreo : Shelom Yerushalaïm (la paz de Yerushalaïm). Puede ser vos pensash : si el livro esta eskrito en espanyol, deke un titolo en ebreo ? Porke syempre fue ansina. El Meam Loez tyene un titolo en ebreo, esto no troka ke el livro el mismo esta eskrito en djudeo-espanyol.

La djente pensa, i yo tambyen lo pensava, ke el syonismo, a su empesijo, fue koza de ashkenazim,  ke empeso en Polonya o en Rusiya verso 1880, i ke empeso por ser un movimyento laïko.  Son tres yerros :

El syonismo, antes ke se yame syonismo, fue koza de sefaradim, el syonismo moderno empeso en 1840, antes de los ashkenazim, i empeso de ser un syonismo relijyozo antes de ser un syonismo laiko. Este syonismo relijyozo empeso antes del Rav Kook, antes del rav Kalisher, empeso kon el haham sefaradi Yehuda Alkalay, kon un livro eskrito en muestra lingua !

Esto dicho, despues de estos livros eskritos en espanyol ande Alkalay roga a los djudyos de dar la dezena parte de sus ganansya para la ovra de la buelta de los Djudyos a la tyerra  de Israel agora mismo, para azer venir el Mashiah, los livros ke va eskrivir despues, los va eskrivir en lashon, porke a entendido ke solo la lingua ebrea puediya aunir los djudyos del mundo entero.

En 1857, eskrive en ebreo Goral laAdonaï  (el gano del Senyor),  el livro del kual vos aviya avlado en mi primera emisyon. Aya tambyen aze la propozisyon de una organizasyon mundyala de los djudyos en favor de la ovra del retorno en Erets Israel. Se puede dizir ke todo lo ke se izo despues de el, ya lo aviya enkomendado.

Ama , komo Herzl muncho mas tadre, no se okupo solo de eskrivir livros, ama de fraguar el mismo esta organizasyon mundyala ke keriya, i para esto viyajo muncho, se hue a ver a los djudyos rikos i poderozos komo Crémieux o Montefiore para demandarles paras i ayudo politiko. En 1860, anyo de nasimyento de Herzl, Alcalay, ke el ya tyene 62 anyos, se aune kon Chaim Lorje, de Frankfurt, i entra en su Colonization Verein fur Palaestina, ke tyene por eskopo de estableser koloniyas agrikolas en Palestina, i tambyen, asigun lo ke meldi, en el movimyento de los Hoveve Tsion, kon el mismo eskopo.

En 1871, a la edad de 73 aynos, se va en Palestina fundar una sosyeta agrikola. El se establese por syempre en Palestina en 1874, i aya se muere en 1878, a la edad de 80 anyos, tenyendo luchado vida entera por sus ideas, afillu si el byervo syonismo va naser solo en 1891, komo lo dishe aki mismo kuando vos ize mi emisyon sovre el nasimyento del syonismo.

No tengo la pretensyon de dizirvos ke sin Alkalay, no uvyera sido syonismo. La idea de una nasyon djudiya en su tyerra la judea, la tyerra de Israel, era en el ayre, komo todos los nasyonalismos en Evropa. I kuando una koza esta en el ayre, son munchos ke la salen del ayre kaji en djuntos.

Los enshemplos son munchos : Thomas Yoing i Champollion para entender la eskritura de los Ejipsyanos ; Niepce i Daguerre para la fotografiya,  un alay de inventores antes de los ermanos Lumière para el sinema, los ermanos Wright i Clément Ader par el avyon, Edison i Charles Cros para el disko, ets.

De la misma manera, los fundadores del syonismo fueron munchos, afillu si la mayoriya de la djente konose solo a Theodor Herzl. Ama es interesante de saver ke el primer de todos, no es yo ke lo digo, son munchos istoryanos, fue Yehuda Alkalay, un haham de los Muestros, kon una ovra eskrita en djudeo-espanyol en 1840, 56 anyos antes de Der Judenstaat, de Herzl.

Kon esto me vo kedar, i vos digo al djueves ke vyene, si kyere el Dyo !

Edmond Cohen