eSefarad Noticias del Mundo Sefaradi
Amanyana djueves va ser mi ultima emisyon en direkto antes las fyestas de tishri. En julyo i agosto seran redifuzyones. Mi emisyon de djueves va ser sovre la palavra, i la dediko a mi amiga Eliz Gatenyo ke vyene de eskrivirme ke me melda “en un reflo”, lo ke me izo muncho plazer, i la rengrasyo por esto.
Saludos a todos
El program se puede sintir por Internet kada djueves a las 4 H O6 PM, ora de Paris, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
VEDRA, MINTIRA, SILENSYO, I LASHON HARA
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Oy vos tengo de azer mi ultima emisyon antes de las vakansas de verano (julyo i agosto) ande vash a oir redifuzyones.
Este alhad en la televizyon, miri la emisyon del haham Josy Eisenberg, intitolada Maudit qui médit (maldicho kyen malavla) emisyon konsagrada al Lashon ara. Kon esto i kon lo ke afito i mos izo pedrer muestro haham bashi de Fransya, pensi avlarvos oy de lo ke dize, por lo ke se, yo ke no so haham, muestra relijyon sovre la vedra, la mintira, el silensyo, i el lashon hara.
No vash a ser enkantados si muestra Tora mos dize de no enganyar al otro. No mos aze mandamyento de dizir syempre la vedra, vamos a ver mas despues ke ay vedras ke no kale dizir, si esto puede azer danyo a alguno. Lo ke mos dize la Tora (Vayikra kapitulo 25, pasuk 17) es: «Velo tonu ish et amito» (Y no enganyaredes varon a su companyero).
Los hahamim estudyaron muncho esta mitsva, i disheron ke no abasta de no enganyar a alguno. Kale azer dikat de no azerle danyo en jeneral por la palavra:
Por egzemplo, no kale yamar a una persona por un sovrenombre ke se burla de el, afillu si ya es auzado de ser yamado ansina.
No kale akodrar a un konvertido al djudaismo el tyempo ande no era de los muestros (los fransezes dizen un poko la misma koza kuando dizen ke no kale avlar de kuedra en la kaza de un enforkado…)
No kale demandar a alguno una kuestyon yuch (difisil) si ya saves ke no te va pueder arresponder porke no tyene la kapachedad, Es azerle verguensa sin menester.
No kale embiyar alguno a una persona para ke lo ayude si ya saves ke no lo va pueder ayudar.
No kale enganyar a alguno afillu si el enganyamyento no le aze dingun danyo. Por egzemplo, dizir a un goy ke le das komida kasher kuando en vedra no es kasher.
No kale vender a alguno ropa bozdeada sin dizirle ke es bozdeada, afillu si el presyo demandado de esta ropa es presyo de ropa bozdeada.
No kale kombidar a alguno para komer kuando ya saves ke no va pueder vinir.
I no kale azer komplimentos a alguno si no los pensas. (Por tanto, no pareses azerle danyo. Ama asigun mi, enganyandolo le estas arrovando su amistad).
Aki estamos solo yo i tu. Kuanto mas aze danyo la mintira sovre alguno dicha a otra persona. No vash a ser tampoko enkantados ke esto tambyen, i yo diré indimas, sea proibido por la Tora (Vayikra, kapitulo 19, pasuk 16): «Lo teleh rahil beameha» (No andes mesturero – kalomnyador – en tu pueblo). (Shemot , kapitulo 23, primer pasuk: » To tissa shema shave, al tashet yadeha im rasha liiyot ed hamas» (No rescibas oida de falsedad, no pongas tu mano con malo para seer testigo de adolme – violensa, la Tora no kyere al hamas, ke en lashon es la violensa i la injustisya).
Aki vos tengo de azer una remarka: Lo tisa es trasladado no rescibas por la Biblia de Ferrara. La Biblia del rabinato franses dize tambyen «n’accueille point» i Edmond Fleg «Tu n’accepteras point». Esto todo va por el mismo kamino de no resivir las mintiras. Ama Chouraqui, el, traslada lo tisa por «tu ne porteras pas», Second (protestante) por «tu ne répandras point», la Biblia de Jerusalem (katolika) por «tu ne feras pas». Aki la idea no es de no resivir mintira, es de no azerla.
Kualo dize mi diksyonaryo? El verbo es nasa, ke kyere a la vez dizir yevar i arresivir. De ayi las diferensyas de traduksyon. Ama puede ser ke la traduksyon no tyene grande importansya, porke,de toda manera, ke sea resivir o embiyar, a mi me parese ke si no kale resivir, indimas no kale embiyar.
Ama una kuestyon keda: para no resivir una oida de falsedad, kale saver ke es mintira. Kuando se dize una mintira, se save (en jeneral) ke es una mintira. Ama kuando se resive? Komo saver ke es mintira? Lo ke entyendo yo, es ke si lo ke oygo es pejorativo, no lo tengo de achetar. Lo tengo de tomar por falso, i de achetarlo solo si tengo la preva ke es vedra. I ay tambyen ke el byervo shave, munchas vezes trasladado por falso, mintira, kyere tambyen dizir vano. Se puede entender ke toda palavra negativa, al kavo al kavo, es vana. No tyene de ser tomada en konsiderasyon.
Esto dicho, no kale pensar ke la falsura proibida por la Tora, esto es lo ke se yama lashon hara. Vamos a ver ke el lashon ara, es kuando se dize la vedra a la kontra de alguno. Aki estamos avlando de mintira. Esto no se yama lashon hara, se yama motsi shem ra (salir nombre malo). Ya vimos ke es proibido por la Tora, i no es tanto sovre la negrigura por mintira ke lavoraron los hahamim ke kontra la negrigura por vedra.
Ay lashon hara kuando avlas de alguno ke izo por vedra una koza negra, o tyene alguna maka. No tyenes de avlar de alguno por dizir kozas negras sovre el, i por tanto no es ke dizes mintiras. Ama azes danyo a alguno sin ser ovligado (si sos ovligado, vamos a ver ke es otra koza).
Esto es la grande diferensya entre la Tora i la ley franseza. Todos los fransezes konosen la ley ke proibe de dizir negriguras falsas sovre alguno. El ke es akuzado de difamasyon es traido delantre un tribunal penal, ama no va ser kondenado si amostra ke lo ke disho era vedra. Solo es proibido la mintira. En el derecho djudyo, no es ansina: no kale dizir mal sovre alguno, afillu si es la vedra.
Yo me akodro ke una vez, el haham bashi de Fransya, no vos vo dizir el kualo, seriya lashon hara, resivyo del prezidente de una asosyasyon djudiya una letra keshandose ke ande muestra asosyasyon sefaradita la kozina no era kasher (lo ke era vedra, afillu si, por siguro, puerko no entrava en kaza). Al resivir esta letra, el haham bashi mos yamo para demandarmos de azer kozina kasher en kaza. Me vash a dizir ke era su rolo de haham bashi. En este tyempo no saviya lo ke es lashon hara, ama agora ke me lo ambezi, penso ke su rolo de haham bashi no era de yamarmos. Teniya una sola koza de azer, era de echar la letra al chop, o de uzarla para el numero. El grande Rambam insistyo sovre el fakto ke el lashon hara toka a tres personas: la ke lo aze, la ke lo resive, i la ke es viktima. El ke resive lashon ara no deve ni mismo achetar de oirla. Oir lashon hara i kayarse sin protestar ya merese gehinnam, asigun R. Nahman ben Itshak (Shabath, pajina 56B)
Otra forma de silensyo ke es kondenada por muestra relijyon, es el ke no dize de kyen le vyene su savidurya.
En el Pirkei Avoth, kapitulo 6, mishna 6, se dize ke la Tora es mas ke el reyno o ke la keuna, porke para ser cohen kale tener 24 kualidades, para ser rey 30, ama para konoser la Tora kale tener 48 kualidades, i la mishna 6 mos dize kualas son. Entre estas 48 kualidades, la Mishna mos dize kuala es la ultima: veaomer davar be shem omro (dizir kada koza en nombre del ke la disho) i despues la mishna adjusta: «porke el ke dize koza en nombre de kyen lo disho traye rigmisyon al mundo, sigun esta eskrito:Ester disho la koza al rey en nombre de Mordehaï, i kavzo la salvasyon».
Esto es una sitasyon del Livro de Esther, kapitulo 2, pasuk 22: «va tomer Ester lameleh beshem Mordehaï» (y dixo Ester al rey en nombre de Mordohaï). Estamos tratando del komploto de dos ombres para matar al rey, komploto ke oyo Mordehaï.
Mos dize el Meam Loez, aki Rafael Hiya Pontremoli, lo ke sige ( me ayudi del lavoro del Profesor Pascual Pascual Recuero, ke traslitero Pontremoli en karakteres latinos): » (Mordehaï) denunsyo la koza a Ester, i no kijo denunsyar a Ahashverosh, syendo ke Mordehaï amava a Ester i kijo ke se lo deskuvra Ester a el rey i topara grasya en sus ojos. I enkomendo Mordehay a Ester ke no lo diga por nombrado de Mordehaï, sino en seradamente ke eya lo supo, ke kon esto la amara el rey muncho. I Ester, siendo ke mirava el provecho de Mordehaï, lo disho de nombrado de Mordehaï. I por esto no sospecho Ester kisas no toparan berur (senyal)en la koza, ke Bigtan i Teresh kitaran el tosigo del vazo i diran ke Mordehaï intento tala falsiya para matarlos. Ma siendo Ester teniya resivido de Mordehaï ke todo el ke dize koza de nombrado de su desidor trae regmisyon al mundo, por esto disho:» Vaddaï (por siguro) ke el Shem Yitbarah tiene kargo a estabilar la verdad», sigun disho Mordehaï.»
Asigun los hahamim, si Esther no teniya dicho al rey ke la denunsyasyon veniya en nombre de Mordehaï, nunka lo uvyera savido, i las kozas se seriyan pasado de otra manera, i el puevlo djudiyo no egzisteriya mas. Kon una palavra, Esther salvo a muestro puevlo.
En muestra relijyon, ay tres pekados ke yevan en gehinnam: matar, adulteryo, i avoda zara (idolatriya). I disheron los hahamim ke el lashon hara es una meskla de estos tres pekados i ke dunke, eya tambyen yeva en gehinnam. Malorozamente los evenimyentos de la gerra mos amostraron en ke punto los hahamim teniyan razon: kon una palavra a la polisiya, sin dizir mintira, solo en dizyendo la vedra: tal Fulano es djudyo, uno puediya embiyar alguno en Drancy i de aya en Auschwitz.
Muncho antes de esta trajediya, los hahamim vyeron el lashon hara en todas las desgrasyas de la Istorya. Empeso por la avla de la serpiente, ke estamos dainda pagando oy.
El lashon hara de Doeg, de la kaza de Shaul, dizyendole ke aviya visto a David ande Ahimeleh el Cohen, en Nov, izo ke Shaul mato no solo a Ahimelec, ama tambyen a todos los Cohanim de Nov, i por esto fue ke no fraguo el primer Beth amikdash.
De manera mas jeneral, los hahamim pensan ke todas las desgrasyas ke aharvaron al puevlo djudyo empesaron por lashon hara.
Ama mismo sin avlar de las denunsyasyones ke kostaron la vida a tantos de los muestros durante la Okupasyon almana, los hahamim lavoraron muncho sovre el lashon hara de kadal diya, el lashon hara ke plaze tanto a mi mujer, al punto ke dize ke sin el lashon hara, la vida no tyene mas dinguna savor!
Los hahamim pyedren todo umor a propozito de rehilut i de lashon hara.
El rehilut es solo avlar de una persona, I es proibido porke todo lo ke saves de otro deve ser ser konsiderado komo sekreto. Por esto es ke el Dyo diziya a Moshe Rabenu: Avla a los ijos de Israel i dize les…» Porke si el Dyo no le dava esta permisyon, Moshe no teniya derecho de repetar lo ke el Dyo le aviya dicho a el.
La avla es komo una filecha. Una vez ke fue travada, va su kamino i dinguno, ni el ke la embiyo ni un otro, la puede detener.
Esto todo me kuadra mas ke a otro, porke fui avokato, i ke el sekreto es una koza vital para un avokato. Lo ke me disho un mushteri, no tengo de dizirlo nunka a dinguno, asta mi muerte. En vezes es pesgado de kayarse, Es muncho mas kolay, munchas vezes, de avlar ke de kayarse. Ama ansina es.
Por tanto, a la diferensya del motsi shem ra, ke no sufre dinguna eksepsyon, el lashon hara es permetido en syertos kavzos:
Kuando uno es yamado komo testigo delantre de un tribunal djudyo, porke es una mitsva de dar su testimonyo, i esta mitsva prevale sovre la proibisyon jenerala de azer lashon hara.
Tambyen se deve la persona de avlar para protejar a alguno de una sekana grave i ke no puede asperar. Por egzemplo, si alguno oye ke otros estan komplotando para matar a otro, kale ke lo diga (lo ke djustamente izo Mordehaï, ke lo disho a Esther i Esther lo disho al rey de su nombre).
Ay tambyen, in syertos kavzos, permisyon de avlar a alguno ke se va meter kon otro sin saver una koza ke, si la saviya, no se meteriya kon el…o no se kazariya. Ama si puedes travar a tu amigo de su atadijo sin tener menester de avlarle de lo ke saves, no kale avlarle.
La konkluzyon, ya la konosesh: la palavra es de plata, ama el silensyo es de oro. I yo tambyen me vo kayar dos mezes entero, julyo i agosto.
Si kyere el Dyo, vos avlaré de muevo en septyembre, ama solo el djueves 12, entre Rosh hashana i Kipur, syendo ke el djueves 5 va ser Rosh hashana, el 19 Sukot, i el 26 Shemini Atseret. No es mi kulpa…
Entremyentres vos dezeo buenas vakansas, kon repozo i kon vida, i al 5774, si kyere el Dyo!
Edmond Cohen
