eSefarad Noticias del Mundo Sefaradi
Keridos amigos,
Oy djueves, si mi povereta de boz ronka lo permite, vo azer mi emisyon sovre la ultima rezolusyon del konsejo egzekutivo de la Unesco kondenando Israel (16 oktovre pasado). Netanyahu grito pishin ke esta rezolusyon nyegava el atadijo del puevlo djudyo kon el Bet Amikdash, i adjunto ke era komo si nyegava el atadijo de los kinezos kon la grande pared de Kina o de los ejipsyanos kon las piramidas. I despues de el todos los djudyos disheron la misma koza, i manifestaron, salvo un solo, povereto de mi…yo meldi kon dikat la rezolusyon i no vide la misma koza ke todos los otros djudyos.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
UNESCO DE MUEVO
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 22 de novyembre, a las dos i medya, en el Centre Communautaire.
Vos akodro tambyen ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya…o no se topa. Estas ultimas semanas, no se topo. Ya entenditesh ke esto no depende de mi. http://www.radioj.fr/node/145
Para oy me syento ovligado de avlarvos de muevo de la Unesco, syendo ke su konsejo egzekutivo voto una mueva rezolusyon kontra Israel el 16 de oktobre, i ke desde este diya, kaji todos los djudyos del mundo, ke sea los de Israel komo los del kusur del mundo, no kedaron de protestar i de manifestar kontra esta rezolusyon. Los djudyos fransezes un poko mas ke los otros, syendo ke la Fransya no voto kontra la rezolusyon, solo se abstuvo.
A mi ke, ya lo savesh, keridos oyenyes, me syento a 120 por syen en favor de Israel, no me puede agradar una rezolusyon kontra este pais, i tengo munchas kozas de dizir kontra esta rezolusyon. I por tanto, esto dicho, no me syento de akodro kon los otros djudyos, afillu si me syento muy solo dizyendo esto.
Antes de ayegar a esta rezolusyon, vos akodro ke ize aki mismo, el 26 de mayo pasado, kijo dizir ay unos sesh mezes de esto, una primera emisyon intitolada «Unesco, ONU i Israel», a propozito de la rezolusyon (votada por la Fransya) el 16 de avril pasado, del Consejo egzekutivo de la Unesco kontra Israel..
Los ke kyeren akodrarse de lo ke dishe en esta emisyon lo podran indosen sovre el sityo de eSefarad, bushkando Edmond Cohen Unesco. https://esefarad.com/?p=71407
En pokos byervos, en mi emisyon del 26 de mayo, empesi por kontar lo ke aviyan sido la SDN i despues de eya la ONU, i el rolo ke djugaron para la lejitimidad del nasimyento de un ogar en primero, de un estado despues para los djudyos.
Despues vos avli del silensyo de la ONU komo de la Unesco durante los 19 anyos entre 1948 i 1967 ande el poder okupante sovre la parte este de Yerushalayim, inkluyendo la vyeja sivdad de la kuala los djudyos aviyan sido echados afuera, era la Transjordaniya. Durante estos 19 anyos, dingun djudyo fue otorizado, kual ke sea su nasyonalidad, a entrar en Yerushalayim este para ir a orar delantre del kotel. Ni la Unesco ni la ONU toparon koza de dizir.
I despues vos meldi uno kuantos pedasikos de esta rezolusyon.
Despues vos akodri la rezolusyon de la ONU del 10 de novyembre 1975, dos anyos despues ke Israel fue atakado por les Ejipsyanos i los Syryanos el diya de Kipur, konsiderando ke «el syonismo es una forma de rasismo i de diskriminasyon rasyala». Esta rezolusyon fue baldada el 17 de desyembre 1991, a la kaida de los komunistos.
Despues vine a la rezolusyon del Konsejo egzekutivo de la Unesco del 16 de avril pasado, i eskapi mi emisyon avlando de las protestasyones de los djudyos, i yo dishe:
» Esto dicho, yo no ago la misma meldadura ke la mayoriya de los djudyos. Para mi esta rezolusyon, por siguro, es muy negra, ama no pretende, komo lo meldi a kada vez, ke esta rezolusyon aze de la Pared un lugar santo de los solos muzulmanos, ni pretende ke el templo de Yerushalayim nunka egzistyo, ke dunke el kristo no egzistyo tampoko, i otras kozas ke no son en la rezolusyon, bastante negra tala ke es».
Oy me topo en la mizma idea sovre la mueva rezolusyon del 16 de oktobre. Por siguro, no vos diré ke es una buena rezolusyon.
Si keresh meldarla, kale ir sovre el sityo de la Unesco i bushkar la rezolusyon del 16 de okbre 2016, ke se topa (en ingles, en franses, en espanyol) en pajina 33.
http://unesdoc.unesco.org/images/0024/002463/246369f.pdf
Sovre Yerushalayim, empesa, en su paragrafo 3, «afirmando la importansya de la Vieja Sivdad de Yerushalayim para las tres relijyones monoteistas».
En su paragrafo 5, se «kesha kon fuersa» ke el poder okupante no tenga kedado las eskarvaduras (fouilles, excavations) i lavoros echos en Yerushalayim este, i demanda de muevo a Israel de kedar todos estos lavoros.
Despues vyene la kuestyon de la meshkita Al Aqsa/ Al-Haram Al-Sharif i sus alrededores, i por empesar la meshkita Al-Aqsa/Al Haram Al-Sharif
El paragrafo 7 demanda ke Israel, el poder okupante, mantenga el «statu-quo istoriko» de antes de septyembre 2000 ande el Departamento jordanyano del Waqf se okupava de todo lo le tokava a la meshkita.
El paragrafo 8 kondena las mezuras tomadas por Israel kontra el Departamento del Waqf
El paragrafo 9 se kesha de las «irrupsyones» de ekstremistos de la derecha israelyana i de fuersas miltares sovre el sityo de la meshkita.
El paragrafo 10 se kesha de «agresyones» kometidas por los Israelyanos kontra siviles , la entrada por fuersa de varyos empyegados israelyanos , inkluyendo «pretendidos responsavles de las antikedades israelyanas en la meshkita.
Etc, etc, no vos vo meldar todas las keshas, ama, astal paragrafo 15, se trata de la meshkita.
El paragrafo 16 es diferente, porke, afillu si se topa sözde a propozito de la meshkita, trata de kozas ke paresen no tener nada ke ver kon eya: el proyekto de fragua por Israel de un funikular en Yerushalayim-este, de la kaza Liba en la vyeja sivdad de Yerushalayim, la fragua del Sentro Kedem serka de la pared sur de la meshkita, la fragua del han Strauss i el proyekto de asensor Plasa al Buraq («Plasa de la Pared oksidentala «) esto entre parantezas i komiyas. Israel es rogado de kedarse de estos todos lavoros.
Despues la rezolusyon vyene a la suvida de los Mograbim en la meskita Al-Aksa/Al-Haram Al-Sharif
El paragrafo 17 dize ke esta suvida aze parte de la meshkita, i el paragrafo 19 se kesha de los lavoros de Israel sovre esta suvida.
El paragrafo 20 se kesha de las «destruisyones illegales» de kozas omeyadas, osmanliyas i mamelukes.
Los paragrafos 23 a 29 se keshan ke la Unesco no pueda azer su lavoro en la Vieja Sivdad.
Los paragrafos 30 a 34 avlan de Gaza i se keshan del blokus.
Los paragrafos 35 a 40 avlan de «los dos sityos palestinyanos de AL-Haram Al-Ibrahimi/Tomba de los Patriarkos en Al-Khalil/Hebron i de la meshkita Bilal Bin Rabah/Tomba de Rachel en Bethleem».
El paragrafo 35 «reafirma» ke los dos sityos azen parte de la Palestina.
El paragrafo 36 dize ke «estos dos sityos tyenen una importansya relijyoza para el djudezmo, el kristyanismo, i el Islam.
Los paragrafos sigientes se keshan de los lavoros i de las vyolensyas de los «kolones»israelyanos, i , a propozito de la Tomba de Rachel en Bethleem, se kesha ke los kristyanos i muzulmanes palestinyanos no tengan derecho de entrar.
El paragrafo 40 se kesha ke Israel mantenga estos dos sityos komo azyendo parte del patrimonyo nasyonal israelyano, kuando son palestinyanos.
Por siguro no vos meldi todo, ama kon esto ya vos puedesh azer una idea.
En kuanto a Binyamin Netanyahu, antes mismo ke el teksto sea votado, vino a dizir ke este teksto nyega todo atadijo entre Israel i el Monte del Templo, adjuntando: » Dizir ke Israel no tyene atadijo kon el Monte del Templo i el Kotel es komo dizir ke los Kinezos no tyenen atadijo kon la pared de Kina o los Ejipsyanos kon las pyramidas».
(Aki yo, Edmond Cohen, no puedo detenerme de akodrarvos una shaka del tyempo ande Sharon, en 1973, estava entrado en Ayifton i se aserkava del Kairo. La shaka era: «Venid a vijitar Israel: su Sphynx, sus pyramidas…» Syerro la paranteza.)
Kale dizir ke si la derecha israelyana se solevanto kontra este teksto, la syedra lo izo tambyen. Itshak Herzog, kapo de la opozisyon, eskrivyo kontra «los ke kyeren reeskrivir la Istorya, torser a la realidad i enventar una konseja asigun la kuala el Monte del Templo i la Pared oksidentala no son atados al puevlo djudyo».
En Fransya tambyen, las reaksyones de las institusyones djudiyas fueron unanimas.
Francis Kalifat, prezidente del CRIF, eskrivyo: «El Kotel, un lugar djudyo? No! Estas rezolusyones avlan de la Pared oksidentala komo la pared oksidentala de la meshkita Al-Aqsa/ Al-Haram Al-Sharif, lo ke aze del Kotel una parte integrante de la meshkita Al-Aqsa».
En kuanto a los gazeteros, van mas leshos i eskriven, komo Dreuz info, ke «la Unesco a deklarado ke el puevlo djudyo no tyene dingun atadijo kon el Monte del Templo».
Yo no so de akodro, afillu si so el solo, porke no es lo ke meldi. Por esto es ke no me fui a la manifestasyon organizada en Paris. Me uvyera ido si las kozas eran prezentadas komo son.
Kale saver ke, en junyo 1967, kuando los Israelyanos konkistaron la Vieja Sivdad de Yerushalayim, es Moshe Dayan, ministro de la defensa, ke pishin desho al Waqf, ke dependiya de la Jordaniya, la administrasyon de los Lugares santos muzulmanos, inkluyendo lo ke los djudyos yaman el Monte del Templo i los muzulmanes Haram al Sharif. Este akodro fue konfirmado en junyo 1994 en el tratado de paz entre Israel i la Jordaniya.
Savyendo ke lo ke keda del Templo de Yerushalayim es su pared basha, ke sosteniya la plasa ande era fraguado el Templo. Agora, sovre esta plasa, se topan lo ke yamamos la meshkita de Omar, ke en vedra no es una meshkita, i no leshos al lado la haliz meshkita yamada Al Aqsa. Los muzulmanos yaman a la plasa entera Haram al sharif. Los muzulmanos, a traves el waqf, administran la plasa de las meshkitas, i los israelyanos administran la pared, el kotel. Ansina era, ansina es, i por lo ke veo yo, dinguno pretendyo ke kaliya trokar este modus vivendi.
Es siguro ke, komo a kada vez ke ay dos administrasyones mas o menos enemigas sovre un monumento uniko, es la fuente de pletos. Por egzemplo, son varyas iglezyas ke se okupan kada una de una parte de lo ke los kristyanos yaman el Santo Sepulkro. El diya de las Paskuas de 1846, uvo un pleto entre los katolikos i los ortodoksos para saver kyen de las dos vandas selebreriya en primero la misa. El pleto se eskapo kon kuarenta muertos! Fue tan fuerte entre la iglezya katolika, sostenida por la Fransya, i la iglesya ortodoksa, sostenida por los Rusos, ke por esto uvo la gerra entre fransezes i rusos, yamada la gerra de Crimea.
Es indimas siguro ke, por lo ke es de Yerushalayim en jeneral i de lo ke keda del Bet Amikdash en partikolar, el pleto es grande si kada parte kyere obtener todo. Los djudyos tyenen el espanto ke los muzulmanos, fuertes de sus mayoriya otomatika en la ONU i la Unesco, agan votar, a poko a poko, ke la Pared aze parte de un sityo sino muzulmano, o a lo manko arabo.
Los muzulmanes arabos, por sus parte, tyenen el espanto ke los djudyos, empushados por fanatikos, tomen la administrasyon de los sityos muzulmanes (las meshkitas de Omar i de Al Aqsa) ke se topan en el sityo del Bet Amikdash.
Yo me akodro muy byen el diya del 21 de agosto 1969, kuando uvo un fuego de orijen kriminala en la meshkita Al Aqsa. Este diya yo me topava en un otel arabo de la parte este de Yerushalayim, i djustamente yo, sin saver nada de esto, me topava averguensado de tener kemado un poko mi savana kon la lampa de mi kama. Abasho para dizirlo i veo todos los empyegados oyendo a la radyo un ombre gritando en arabo. En komparazon kon el fuego de la meshkita, mi kemadura de savana fue koza chika…No se saviya dainda ke era un turisto australyano kristyano bastante atavanado, Michael Rohan, ke aviya metido el fuego para permeter a los djudyos de fraguar el treser Templo. Orozamente ke fue topado i aferrado, sino puediya naser una mueva gerra.
Esto dicho, aki vyene la kuestyon ande yo no so de akodro kon los otros djudyos: es ke la rezolusyon nyega el atadijo de los djudyos kon Yerushalayim? La repuesta es no: la rezolusyon asyerta, komo lo meldi, la importansya de la Vyeja Sivdad de Yerushalayim para las tres relijyones monoteistas.
Es ke la rezolusyon nyega el atadijo del puevlo djudyo kon el Monte del Templo o el Bet Amikdash? Es vedra ke no avla de este atadijo. Ama de ke no avla de este atadijo no kyere dizir ke lo nyega. No avla tampoko del atadijo de los kristyanos kon el Santo Sepulkro. Esto no kyere dizir ke lo nyega. Si yo te avlo de tu djaketa, i no avlo de tu pantalon, es ke nyego tu pantalon?
Los muzulmanos ke prezentaron esta rezolusyon al voto se okupan de los sityos sagrados para los muzulmanos, no de los otros. I de otra parte, vos akodro ke es el estado de Israel el mismo, a traves su ministro Moshe Dayan, ke a dado la administrasyon del Monte del Templo a los muzulmanes. I no kale olvidar tampoko ke son los hahamim bashis de Israel ke no permiten a un djudyo sufu de pizar la plasa del Monte del Templo, porke no se save el lugar presizo ande estava el Santo de los Santos, ke no kale pizar.
En vez de aharvar kulo ke no pedo, uvyera mijor sido, asigun mi, ke los kapos israelyanos komo Netanyahu o Rivlin nyegen las akuzasyones de los arabos, dizyendo ke es falso. En vez de esto, la repuesta de Netanyahu a sido: «Kualo va ser despues? Una desizyon de la Unesco nyegando el atadijo entre la manteka de fustuk i el dulse ? Batman i Robin? Rock i Roll?» Ya savemos ke Netanyahu tyene umor, ama aki me parese ke no kijo entrar en una repuesta punto por punto kon los arabos i la Unesco. Penso personalmente ke es un yerro, i ke el voto uvyera sido mijor, por egzemplo el de la Fransya ke se abstuvo.
Esto es mi manera de ver. Kale saver ke la rezolusyon a sido votada por 24 bozes, inkluyendo todos los paizes muzulmanes, unos kuantos paizes de Afrika i Mexico ke despues kijo trokar su boz.
Kontra uvo solo sesh votos: Amerika, Almanya, Ingletyerra, Holanda, Estonia i Lituania.
24 paizes se abstuvyeron, inkluyendo Fransya, Italya, Gresya i Espanya.
Al djueves ke vyene, si kyere el Dyo!
Edmond Cohen
Paris Fransya
