eSefarad Noticias del Mundo Sefaradi
Keridos amigos,
Amanyana djueves no va ser solo el primo del anyo (i a esta okazyon vos dezeo a todos una anyada sivil buena) va ser tambyen el tanit del 10 de tevet, ke koresponde para mi al 24en aniversaryo de la muerte de mi padre (sovre el kual ya ize una emisyon intitolada Albert Cohen mi padre, el 3 de marso 2011) de tal manera ke vo empesar el diya indome al kal, i despues de mediodiya me ire a la radyo para la primera emisyon del anyo 2015. Va ser una rekapitulasyon de las 30 emisyones ke ize en 2014.
Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
UN ANYO DE RADYO 2014
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora Radio J tyene un sityo internet. Agora mis emisyones se pueden oir en el mundo entero indose sovre Radio J kon internet ( http:// www.radioj.fr/node/145 ) sea en direkto, sea kuando se kyere: mis emisyones (kuando el tekniko lo kyere byen) son enrejistradas a mi nombre.
Vos akodro tambyen ke el proksimo atelye de konversasyon de la asosyasyon Vidas Largas se tendra el lunes 5 de janvier del anyo proksimo, de las tres a las sinko, en el Centre Communautaire, 119 rue Lafayette Paris (9°) Métro Poissonnière o Gare du Nord. Tened tino ke agora es un lunes , i no mas un martes, i ke la ora es tres, i no mas dos i un kuarto.
I antes de empesar la emisyon de oy, vos kyero dizir dos byervos en memorya de una muy estimavle aktrisa ke se muryo aze poko (el 23 de novyembre) i ke era Hélène Duc. Fue sovre todo una aktrisa de teatro, ama es konosida de todos los fransezes por su rolo de Mahaut d’Artois en la televizyon kon Les Rois maudits (los reyes maldichos). No es por esto ke avlo de eya oy, ama por su aksyon durante la gerra. Protestanta nasida en 1917, teniya 25 anyos en 1942, i ayudo komo pudo a varyos djudyos i rezistantes. Eya es ke se okupo de guadrar a la kantadera Juliette Greco kuando fue liberada de prezo en septyembre 1943, i tambyen de eskonder varyos djudyos en Marseille i Bergerac. Por esto obtuvo la medalya de los Djustos en 2005. Bendicha sea su memorya.
Esto dicho, el anyo 2014 ya mos s’eskapo, i komo a mi uzo desde unos kuantos anyos, vino el tyempo de akodrarmos en djuntos de las 30 emisyones ke vos ize durante este anyo 2014.
Deke 30 i no 52? En primero porke no uvo emisyon el 9 de janvier por modo ke este diya se djusgava el echo Dieudonné i la radyo estava muy okupada kon esto. No uvo tampoko emisyon el 16 de janvier, no me akodro deke. El 27 de fevrero, era hazino, asigun mi uzo de invyerno. No pude azer mi emisyon del 24 avril, porke esta vez eran mis inyetizikos ke eran hazinos i ke yo teniya de guadrarlos, i los 1er, 8 i 15 de mayo no era en Fransya syendo ke me fui en Israel. No uvo emisyon el 5 de djunyo por modo de Shavuot, ni en djulyo i agosto ( 9 djueves) por modo de las vakansas de enverano. No uvo emisyon el 25 de septyembre por modo de Rosh Ashana, ni tampoko los 9 i 16 de oktovre por modo de Sukot i Shemini Atseret.
Enfin, no uvo emisyones el 16 i el 25 de desyembre, por modo de la radyo ke tuvo menester de mi tyempo de avla. Esto todo mos aze 22 djueves sin emisyones. De 52, kedan 30.
Los ke son interesados de topar el teksto de mis emisyones pasadas de las kualas vos vo avlar agora las podran topar ( salvo una, la del 12 de djunyo, ke fue aparejada i meldada por mi amigo Renaud Souhami) sovre el sityo Ladinokomunita, ama kale ser myembro (la inskripsyon es de baldes). Una vez en el sityo, kale ir sovre Files, i aya sovre Edmond Cohen. Mis emisyones se topan tambyen sovre el sityo eSefarad.com, aya no es menester de ser myembro. Kale meter mi nombre i klikar sovre Go.
Esto dicho, la primera de mis emisyones de 2014, el 2 de janvier, fue para azer, komo oy, la rekapitulasyon de mis 35 emisyones de 2013.
El djueves de despues, 9 de janvier, enrejistri mi ultima emisyon (la muevena) sovre la atadura de Itshak en el Meam Loez, ama komo dishe, paso solo el 23 de janvier.
El djueves de despues, 30 de janvier, avli de konversyon i konvertidos, no de los djudyos konvertidos a otras relijyones, ama de djente venidos al djudezmo de otras relijyones, komo Ruth la Moabita, Onkelos, Rabi Akiva, los reyes Khazares, ets. i avli de lo ke se pasa agora para las konversyones, asigun los movimyentos del djudezmo.
El djueves de despues, 6 de fevrero, despues de tener evokado la memorya de Jacques Lazarus i de Shulamit Aloni, avli de las Philipinas i de Israel, syendo ke en estos diyas era una Philipina, yamada Rose Fostanes (una alkunya ke mos avla), ke teniya ganado en Israel el primer premyo de la emisyon de televizyon X Factor.
El djueves de despues, 13 de fevrero, avli de Djudyos ke trokaron el mundo: Marx, Freud, Hertz, Durckheim, Einstein, Bouthoul, Salk.
I el djueves de despues, 20 de fevrero, avli de kriyaturas djenyos, komo Baratier, ke no solo traslado Binyamin de Tudela del ebreo al franses, ama se permityo de eskrivir una kritika muy savya de su ovra, lo todo a la edad de onze anyos. Avli tambyen de Mozart, del Gaon de Vilna, i de unos kuantos otros.
El djueves 6 de marso, vos avli de los Djudyos de Ukranya, ke tuvyeron una istorya tan trajika, de Bogdan Khmelnystsky asta la shoa por kurshumes, i entremyentres dyeron a la umanidad movimyentos espirituales komo el hasidismo.
El djueves de despues, 13 marso, por la okazyon de la fyesta de Purim, ize la meldadura de un pedaso del Meam Loez eskrito por el Haham Pontremoli sovre Ester la Reyna, ke fue perfijada i edukada por su primo Mordehaï.
El djueves de despues, 20 marso, avli de la kodifikasyon de la alaha, kijo dizir las leyes, un lavoro de munchos siglos, ke empeso verso el anyo 100 kon la Mishna, se kontinuo kon la Gemara verso los anyos 500 a 700, despues kon los Geonim, entre 700 i 1000, despues por Itshak Alfassi, yamado el Rif, verso los anyos 1000, i despues kon el mas famozo de todos los hahamim, El Rambam Moshe Ben Maïmon, ke eskrivyo el Mishne Tora en los anyos 1170, i despues de el Yaakov ben Asher, ke eskrivyo los Arbaa Turim unos syen anyos despues del Rambam, i no se puede avlar de la kodifikasyon de la alaha sin avlar de la ovra de Yosef Karo, El Shulhan Aruh, eskrita en los anyos 1500 i kompletada para los ashkenazim por la Mappa de Moshe Isserles.
El djueves de despues, 27 de marso, vos avli de Los Karaitos, ke fueron muy numerozos en la Edad Medya, ama ke egzisten asta oy, afillu si son pokos (unos 40.000 en el mundo entero, los mas en Israel, unos 35.000).
El djueves de despues, 3 de avril, vos avli De muevo sovre los djudyos i la Crimea, syendo lo ke se estava pasando aya kon los Rusos. De toda manera, no vos avlare mas de la Crimea, kualkyer koza ke afite aya, syendo ke no ay mas djudyos aya, en esta tyerra ke un tyempo deviya ser un pais para los djudyos.
El djueves de despues, 10 avril , vos avli de Sefarad en un pasuk de Ovadya, el pasuk 20, penultimo del livro de Ovadya. Es en este pasuk ke Ovadya nombra a Sefarad, ke es lo ke se yama un hapax, kijo dizir un byervo ke aparese una sola vez en el Tanah entero. Se disho ke Sefarad es la Espanya, ama en vedra kyen save?
El diya de despues 17 de avril, vos avli de Pesah 2014 i vos meldi el kapitulo 12 de Shemot en la Biblia de Ferrara, lo ke aze un kapitulo entero en ladino, en el kual topamos lo mas ke ay de saver sovre la fyesta de Pesah, i por empesar deke se yama ansina.
Pasaron diyas, i el djueves 22 de mayo, konti Mi viyaje en Israel (Tel Aviv i Yerushalayim) ke veniya de azer kon mi mujer en este pais ke no aviya vijitado desde 42 anyos.
I el djueves de despues, 29 de mayo, avli de Posquières i el nasimyento de la Kabala. Esta sivdadika del sur de Fransya, famoza entre los djudyos durante la Edad Medya por su yeshiva en jeneral i su grande haham Avraham ben David (ke Binyamin de Tudela se fue a ver) no se yama mas Posquières, se yama Vauvert, i es konosida agora por sus toros de kombate…
Despues de la fyesta de Shavuot, el 12 de djunyo, arresivi a muestro amigo Renaud Souhami, ke mos avlo de Franz Kafka i de su ovra tan premonitorya de lo ke iva afitar despues de su muerte.
I el djueves de despues, 19 de djunyo, avli de Tres kantes djudyos de la gerra, eskritos entre 1941 i 1943, ke son el kante del Palmah, eskrito en 1941, el Kante de los Partezanos , eskrito en primero en ruso por Anna Marly, ke por lo ke se no era djudiya, i despues en franses por Kessel i Druon, ke eyos eran djudyos (mas o menos por lo ke es de Druon), i el kante de los partezanos djudyos, eskrito en 1943 por Hirsch Glick. El diya ke ize mi emisyon, estava kon mi inyetiziko Lior , ke disho dos byervos a la radyo. Le aviya dicho ke por siguro el era el uniko ijiko de 7 anyos en el mundo entero ke avle djudeo-espanyol a la radyo. Syendo esto, le vino kuryozo ke no ayga gazeteros venidos de todas partes para ver i kontar tal koza…
El djueves de despues 26 de junyo, avli de Flavius Josephe, este istoryano djudyo muy presyozo porke bivyo de muy serka toda la primera rebuelta de los Djudyos kontra los Romanos en los anyos 70, i lo konto despues. Sin el savriyamos muy poko sovre esta istorya.
Pasaron dos mezes de vakansas de enverano, i el djueves 4 de septyembre, vine a la radyo para kontar mis vakansas en la montanya, komo aviya kontado mis viyaje en Israel. Aprovechi ke estava avlando de Megève para akodrar su istorya durante la gerra.
El djueves de despues, 11 de septyembre, meldi ermozas dichas del Talmud, travadas de la Antolojiya Djudiya de Edmond Fleg, savyendo ke el mismo aviya rekonosido tener tomado sus sitasyones del lavoro del haham Moïse Schuhl. Amostri ke munchas dichas ke se dizen o ke se disheron en Fransya vyenen del Talmud sin ke se sepa.
El djueves de despues, 18 de septyembre, tuve la gana de azer una emisyon sovre el antisyonismo i las repuestas ke se puediyan dar kontra lo ke en vedra es munchas vezes solo antisemitismo, ama se prezenta komo una sozde opinyon politika.
El djueves de despues, 2 de octovre, entre Rosh Ashana i Kipur, avli del tsom de Gedalya, i de la istorya de este governador de Yeuda despues de la estruisyon de Yerushalayim i de su templo, el primer Bet Amikdash, por los Caldeos i sus rey Nebuhadnetsar. Povereto de Governador matado por un djudyo en medyo del pranso de Rosh Ashana.
El djueves 23 de oktovre, despues de Sukot i Shemini Atseret, avli de los Grandes projektos de Israel, kijo dizir el TGV israelyano, projekto ke empeso por un tunel Shaar Hagaï – Mevaseret Tsion, una kura kontra el virus Ebola, una kura kontra el kanser, i un pipepeline entre la Mar Kolorada i la Mar Muerta. Veremos lo ke va salir de estos todos projektos. Por las oras, es mas kolay de fraguar un treno ke de kurar el kanser.
El djueves de despues, 30 de oktovre, avli de los Luchadores para muestra lingua. A la ora ande vemos muestra lingua agonizando, un alay de sefaradim en el mundo entero, i yo ago parte de estos, se alevantaron para luchar para la vida de esta lingua. Di unos kuantos nombres de estos luchadores grasyas a los kuales la lingua yene bive dainda.
El djueves de despues, 6 de novyembre, ize Tres meldaduras: dos travadas de la gazeta El Amaneser : un artikolo de Karen Gerson Sarhon intitolado La teknolojiya ya no mos desha mas bivir, i un dyalogo travado de un skech de Shelomo Reuven, intitolado Bulisa la refrandjiya. La tresera meldadura era travada del Meam Loez, sovre la mitsva de alegrar al novyo i la novya en la boda, i mismo ir asta dizir a la novya ke es ermoza afillu si no es! Khuli no va asta dizir ke se puede mintir, has veshalom, dize ke se deve de «demudar la avla»…
El djueves de despues, 13 de novyembre, ize una emisyon intitolada Fany Ben Ami, konvoyadera de 13 anyos. Travi esta istorya, vedradera, ke se paso durante la gerra, de un artikolo de la revista israelyana Mémoire Vive. Kon esta okazyon, tuve tambyen de akodrar la memorya de Marianne Cohn, torturada i matada por los Almanes kuando aprovava de azer traversar a kriaturas la frontera separando la Fransya de la Suisa.
El djueves de despues, 20 de novyembre, vos avli de un amigo miyo, Salomon Franco, ke eskrivyo varyos livros en franses sovre sus eksperyensas de vida.
I el djueves de despues, 27 de novyembre, vos avli de Varian Fry, gazetero amerikano ke, al empesijo de la gerra, reusho de azer salir de Fransya okupada a munchos intelektuales i artistos, no todos djudyos ama munchos de entre eyos, i ke resivyo despues de su muerte la medaya de los Djustos. Fue el primer amerikano ke resivyo tala medaya.
El djueves de despues, 4 de desyembre, vos avli de mis amigos de Ladinokomunita, lo mas de entre eyos amigos virtuales ke nunka tengo visto, i syertos entre eyos ke no saven ke son mis amigos, porke los meldo ama nunka mos eskrivimos.
Enfin, el 11 de desyembre 2014 empesi una emisyon intitolada Para ke no se olvide. Keriya este diya azer la meldadura de varyos artikolos travados de un livriko eskrito entero en djudeo-espanyol por 18 djudyos bulgaros luchando eyos tambyen para muestra lingua. Malorozamente yo era muy abashamyentado (dainda no me sani – es vedra tambyen ke no me kuri), tan abashamyentado ke en medyo de mi meldadura me empeso una tos tan fuerte ke no pude eskapar la emisyon ke sureo solo diez minutos en vez de vente.
Yo pensava eskaparla el djueves de despues, ama el 11 de desyembre fue el ultimo djueves ande pude azer una emisyon, porke despues, komo lo dishe al empesijo, la radyo tuvo menester de mi tyempo de avla. Kon bueno, la kontinuasyon de la emisyon Para ke no se olvide sera para el djueves venidero.
Entonses, despues de dezearvos, keridos oyentes, una buena anyada sivil ke empesa oy, vos digo al djueves ke vyene, si kyere el Dyo!
Edmond Cohen
Paris – Fransya
