Muestra lingua: TERRORISMO KONTRA DJUDYOS EN EL MUNDO por Edmond Cohen

Keridos amigos, aki toparash el teksto de la emisyon ke ize el 23/6, i ke no vos pude embiyar mas antes, syendo ke mi ordinador era roto. Para azer la emisyon, fue un suspense a la Hitchcock: aviya eskrito mi teksto, ama dainda no lo aviya imprimado kuando se bozdeo mi ordinador myerkoles a la tadre. Enfin vino uno djueves demanyana para enderecharlo, i lo tomo i se fue kon el. Reusho a salir mi teksto de emisyon i imprimarlo. I vino kon moto a mi kaza para traerlo a 15 y 30h. Tuve djusto el tyempo de tomar el metro para toparme a las 16 a la radyo para azer mi emisyon… i  vyernes vino traerme el ordinador reparado, salvo ke todos mis emails se muryeron. Kapara…

El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.

Saludos a todos
Edmond Cohen
Paris, Fransya

TERRORISMO KONTRA DJUDYOS EN EL MUNDO

Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Me alegro de toparvos de muevo despues de dos mezes sin radyo por modo de vakansas, afillu si penso ke ya pudites oirme kada semana grasyas a las  redifuzyones. Digo ke lo penso porke en vedra no se lo ke se izo, syendo ke de mis keridas montanyas i sin internet no pode oirme i no se kualo oyitesh de mi, ni si oyitesh kuakyer koza…

La emisyon ke vos kije azer para oy 8 de septyembre, es para akodrarmos ke martes 6 de septyembre fue el vente i sinken aniversaryo del atentado ke se paso el 6 de septyembre 1986 en Estambol kontra el kal Neve Shalom.

I yo me akodri, no solo de este atentado, ama tambyen de munchos otros ke tokaron a djudyos en el mundo i ke empesaron antes del de septyembre 1986. I kyero solo avlar de los atentados ke tokaron a djudyos porke eran dirijidos kontra eyos, afillu si kristyanos i mismo muzulmanos  muryeron tambyen en estos atentados, de la misma manera ke munchos djudyos muryeron en los atentados del onze de septyembre. Ama los atentados del onze de septyembre no eran espesyalmente dirijidos kontra djudyos, i esto es la razon porke no avlaré oy del onze de septyembre 2011. Tampoko avlaré oy de atentados kometidos en el mundo afuera de Israel, ama kontra Israelyanos, komo en Munich en septyembre 1972. Ya me abasta una lista de atentados, todos kumplidos afuera de Israel, i dirijidos espesyalmente, no kontra Israel, ama kontra djudyos sin atadijo espesyal kon el estado de Israel. Estos atentados no se pueden dizir antiisraelyanos o antisionistos. Son atentados antisemites, i nada mas.

Kyero avlar de los atentados sigientes :

–          el kal Copernic en Paris el 3 de oktobre 1980

–          el kal de la Ghriba en la isla de Djerba, en Tunisia, el 8 de oktobre1985

–          el kal Neve Shalom en Estambol el 6 de septyembre 1986, komo vos dishe

–          el Sentro AMIA en Buenos Aires el 18 de julyo 1994

–          yene el kal de la Ghriba en Djerba el 11 de avril 2002

–          Casablanca el 16 de Mayo 2002

–          De muevo Neve Shalom en Estambol el 15 de novyembre 2003

–          Bombay el 26 de novyembre 2008

Estos ocho atentados fueron todos kometidos por muzulmanos, i todos kontra djudyos sin atadijo espesyal kon Israel.

I)    Empesaremos por el atentado kontra el kal de la kaye Copernic en Paris, kal de los djudyos liberales, el 3 de oktobre 1980. Este diya, ke es un vyernes a la tadre, al empesijo de Shabath, i tambyen diya de simhat-tora, una bomba patladea, eskondida en una bisikleta deshada en la kaye, serka del kal. Serka del kal, ama no djusto al lado, porke la mansevez djudiya esta delantre del kal para azer dikat.

La bomba mata a kuatro personas, i aze 46 firidos. Sovre las kuatro personas, très son kristyanos ( dos ombres fransezes i un kapidji espanyol) i una es una djudiya israelyana ke pasava por aya. El primo ministro franses, ke era Raymond Barre, va avlar de un atentado ke era kontra los djudyos i ke aharvo fransezes inosentes ke pasavan por aya…komo si los djudyos no eran inosentes tambyen ! Toda la djente pensa ke el atentado vyene de los fasistos i 200.000 personas manifestan. Despues la polisiya topa ke es un atentado arabo, ama entremyentres no ayt mas dinguno para manifestar…

Unos 28 anyos mas despues, en 2008, un palestinyano, Hassan Diab, a sido aferrado en el Canada, i el 6 de junyo de este anyo 2011 la djustisya del Canada acheta la demanda de ekstradisyon de la djustisya franseza. Diab, ke se dize inosente, izo appel i dainda esta en el Canada.

II)  El 8 de oktobre 1985, yene diya de simhat tora, un pulis tunizyano, Hatem Chehibi, kargado de la proteksyon del kal de la Ghriba, en la isla de Djerba en Tunisia, trava kon su mitrayadora i mata a sinko personas, entre eyas kuatro djudyos inkluyendo un bebiko de un anyo.

III) Agora kale avlar del atentado del grupo Abu Nidal kontra el kal Neve Shalom de Estambol el 6 de septyembre 1986, tambyen diya de Shabat. Sinko ombres ke se dizen gazeteros entran en el kal ande ay unos trenta djudyos de los muestros azyendo la tefila de Shabat, i travan kon mitrayadoras. Matan a 24 ombres, les echan benzina ensima i los keman.

Ay algunos gazeteros ke, avlando de estos matadores, dizen ke azen parte de la « rezistansya palestinyana » …Me demando kualo pensan los halizes rezistantes de toparse komparados kon estos matadores ke tyenen la ozadiya de dizirse kombatantes. Kombatantes kontra vyejizikos sin armas, solo asentados orando vestidos de sus taleth…

IV) Tenemos de akodrarmos, despues, del atentado del 18 de julyo 1994 en Buenos Aires kontra un han entero ande se topavan munchas asosyasyones djudiyas, i entre eyas sovre todo la AMIA (Asosyasyon Mutual Israelita Argentina). Una bomba eskondida en una araba izo 85 muertos i 230 firidos. No se si no es el atentado el mas sangryente de todos los ke aharvaron a los djudyos en el mundo afuera de Israel.

Dainda no fueron djuzgados los ke izyeron este atentado. Kale dizir ke la polisiya izo muy mal su lavoro. No tomo dinguna printa dijitala ni ADN. Un pulis yamado Castaneda fue condenado en 2005 a sinko anyos de prezo por tener pedrido 60 kasetas de escucha del telefon del avokato Telleldin, akuzado de tener vendido la araba ke sirvyo para el atentado, ama ke fue inosentado syendo ke no aviya mas probas. En 2005 tambyen el djuzgo Galeano, ke se aviya okupado de este écho i akuzado los servisyos del Iran, fue inkulpado por aver pagado 400.000 dolares a Telleldin para ke avle.

En 2006, el muevo djuzgo Canicoba Corral dyo mandatos internasyonales contra los kapos del Iran, inkluyendo Rafsandjani.

Ama egziste una otra pista, yamada la pista de la Syria, kontra un syerto Kanoore Edul, serkano de Carlos Menem, ke era prezidente de Argentina en estos tyempos. La polisiya no bushko de este lado, asta ke Menem kaiga. Agora el ex-prezidente Menem a sido inkulpado en 2010 por aver detenido la polisiya i la djustisiya en su lavoro de bushkedad.

Lo ke ay de siguro oy, es ke 17 anyos despues del atentado, no se save byen kyen lo ordeno ki kyen lo izo, i ke dinguno a sido kastigado sino los argentinos ke no izyeron su dever.

V) Agora vos avlaré del atentado kontra el kal de la Ghriba, en la Isla de Djerba en Tunisia, el 11 de avril 2002. Este diya, a las 9 i medya de la manyana, un kamyon de gaz kon una bomba patladea delantre del famozo kal de la Ghriba, ande ya uvo en 1985 el atentado ke vos dishe.

21 personas son matadas, entre eyas 14 turistos almanes ke vijitavan el kal, 2 fransezes i 5 tunizyanos.

El matador, un franco-tunizyano de 25 anyos yamado Nizar Naouar, es un kamikaz de Al Kaida, muerto en el atentado. Afillu si eskrivyo en su testamento topado en un eskondijo en Karashi ke lavoro solo, aparese ke fue ayudado a lo manko por su tiyo i por su ermano. El tiyo va ser kondenado a 20 anyos de prezo por un tribunal tunizyano, i el ermano por un tribunal franses a 12 anyos.

Aparese tambyen ke un alman yamado Christian Ganczarski, de orijen polaka i konvertido al islam, fue el ke organizo la koza. Es kondenado a 18 anyos de prezo por el mismo tribunal franses, myentres el otro kapo de Al kaida, Cheikh Mohamed, no puede ser djusgado dainda porke se topa en prezo en Guantanamo por su rolo en los atentados del 11 de septyembre 2001.

VI) Despues de esto, es tambyen en Africa del norte, ama esta vez en el Maroco, en Casablanca,  ke tenemos el 16 de mayo 2003 sinko  atentados en el mismo tyempo. Por dizir la vedra, sovre estos sinko atentados, solo tres son kontra djudyos. Los dos otros son kontra un otel – el otel Farah – i el club Casa Espana.

Mohamed Mhanni i dos otros kamikazes se azen patladear delantre la Alliansa Djudiya. Eyos se mueren, ama la Alliansa era vaziya. No me vo muncho yorar para los poveretos matadores ke se muryeron sin pueder matar komo keriyan.

Tres otros terroristos bushkan el semetaryo djudyo, se yerran, no lo topan, i se azen patladear i ansina matan a tres mansevikos ke se topavan aya. Otros se azen patladear delantre la pizzeria Positano, ke tyene un amo djudyo. Esta pizzeriya se topa en frente del Consolado de Belgika.

En sima de estos tres atentados, un otro grupo se ataka a la Casa Espana, ande la djente senava i djugava Bingo. En este solo atentado  matan a vente personas. I el ultimo grupo ataka el otel Farah, i aya tambyen se azen patladear.

Sovre los 14 matadores, onze se mueren, 3 sovrebiven i son aferrados. En todo, an matado 33 personas. Los matadores kamikazes son mansevos marrokis lavorando por Al Kaida.

La polisiya marroki va aferrar a 2.000 personas en su lucha kontra el terrorismo.

VII) Yene mos tenemos de ir en Estambol el shabath 15 de novyembre 2003, porke a la demanyana dos bombas patladean delantre los kales de Bet Israel i –de muevo – el kal de Neve Shalom. Matan a 27 personas, entre eyas 6 djudyos, kuatro syendo los ke guadravan los kales. Los otros matados son turkos muzulmanos ke teniyan sus botikas al lado. En mas de los muertos ay mas de 300 firidos.

Kale adjustar ke, sinko diyas despues de esto, el 20 de novyembre, muevas bombas patladean en Estambol, ama esta vez no kontra kales, ama kontra una banka, la HSBC, i el Konsolado de Ingletyerra, matando a trenta muevas personas, entre eyas el konsolo el mismo.

La polisiya turka aferro o bushko 72sospechados, ke fueron djusgados i kondenados, lo unos a prezo a vida, otros a manko, i 26 liberados. Pertenesiyan a movimyentos serka de Al Kaida.

VIII) Agora mos vamos en Indya, en Bombay. El 26 de novyembre 2008, unos diez terroristos venidos del Pakistan atakan a munchos sityos, entre los kuales dos oteles palasyos, ama tambyen la estasyon sentrala, i el sentro Lubavitch kon su haham Gabriel Holtzberg , su mujer Rivki i su bebiko.

Van a matar 173 personas, lo mas en la estasyon sentrala, ama tambyen en los oteles. En kuanto a los djudyos Lubavitch, eyos van a ser torturados antes de ser matados. Sesh, entre eyos el haham i su mujer , son israelyanos. Un djudyo kon su mujer van a pueder fuyirse por la ventana, i de esta manera sovrebivir, afillu si la djente, tomando el ombre por un terroristo, va aharvar al povereto de djudyo i romper sus uesos !

Ama sovre todo el ke va pueder sovrebivir es el bebiko de los Holtzberg, Moshe, dos anyos, deshado soliko yorando sovre los puerpos de sus padre i madre. Es su kriadera, indyana katolika eskondida en el han kon el kozinero muzulmano, ke oyendolo yorar va tener el koraje de suvir i de tomarlo i eskonderlo kon eya, salvando ansina su vida .

Agora el chiko bive en Israel ande sus papu i vava, i kon Sandra la kriadera ke lo salvo.

Aki me vo kedar de mi lista, dezeando ke no ayga mas otros atentados en el mundo kontra djudyos ni kontra otros. Lo dezeo, ama malorozamente no so siguro ke mi lista sea eskapada.

Es yene kon este auguro ke vos desho, dizyendovos al djueves ke vyene, si kyere el Dyo!