eSefarad Noticias del Mundo Sefaradi
Keridos amigos,
El djueves 20/9 mi emisyon de radyo fue sovre Sebastian Romero Radigales, ke era en 1943 konsul jeneral de Espanya en Atena, i de aya se esforso de salvar de la deportasyon a unos kinyentos djudyos selaniklis de nasyonalidad espanyola. La verguensa es ke los Almanes eran de akodro para deshar los djudyos irse a Espanya, era el governo espanyol ke no los keriya, mijor era de desharlos morir. Radigales ograsheo i los salvo malgrado su yerarkiya. Tendré de azer una otra emisyon para eskapar esta istorya.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
SEBASTIAN ROMERO RADIGALES
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Si el tekniko lo kyere byen, mi emisyon se puede oir sea en direkto, sea kuando se kyere, eya sola, kale klikar en el sityo de Radio J, sovre Emissions, i irse en pajina 5, aya se topa la miya.
http://www.radioj.fr/node/145
Oy me pensi de avlarvos de Sebastian Romero Radigales, ke kuando era konsul de Espanya en Atena, se esforso de salvar de la muerte a syenes de djudyos de nasyonalidad espanyola, malgrado los ordenes kontraryos de su yerarkiya, i reusho.
Ama antes, malorozamente, tengo un muy triste haber de darvos: la muerte de Moïse Rahmani, el alhad pasado 18 de septyembre, ke me ambezi el diya de despues, lunes 19.
A los ke no tuvyeron komo yo el mazal de konoserlo, diré ke fue un sefaradi ke vida entera lucho para muestra lingua i muestra memorya. Era un djudyo edjipsyano nasido en el Cairo de famiya rodesliya, ke se aviya ido en el Congo beljikano, i de aya se fue a morar en Beljika, en Bruxelles. I aya fundo el Instituto Sefaradi Evropeo, i la revista Los Muestros. Era un ombre kumplido, ke syempre kijo alsar el nivel de muestra kultura. Su muerte es una grande pedrita par los Sefaradim. Ke deskanse en paz.
Esto dicho, en varyas reunyones de asosyasyones djudeo-espanyolas veo a mi amigo Isaac Revah, ke konosi la primera vez oyendolo avlar en una konferensya ke izo sovre la istorya de unos sheshentos djudyos de Selanik de los kuales aziya parte, i ke, en los anyos terrivles de 1942-1945, teniyan el mazal de ser de nasyonalidad espanyola, i por esto fueron protejados i salvados grasyas a los esfuersos de un ombre, el konsul de Espanya en Atena, ke se yamava Sebastian Romero Radigales, oy rekonosido komo Djusto entre las Nasyones, esta vez grasyas a los esfuersos de Isaac Revah.
Tuve la gana, kon el ayudo de Isaac Revah, de kontarvos esta istorya ke se eskapa byen, a la kontra malorozamente, komo ya lo savesh, de la istorya de los otros djudyos de Selanik, ke fue una trajediya totala.
Empesaremos por el empesijo, el nasimyento, en 1884 en la sivdadika de Graus, en Aragon, de Sebastian, ijo de Evaristo Romero i de Elena Radigales. A la franka lo yamariyamos Romero ke es la alkunya de su padre, ama va kedar en la Istorya komo Radigales, ke es la alkunya de su madre.
Sus padre i madre son de famiyas burgezas kon vokasyon politika. Sebastian aze estudyos de derecho i despues eskoje la karrera diplomatika. Va ser embiyado en los konsulados de New York, Tanger, Santiago de Cuba, Belgrado, asta ke, en 1924, durante la diktatura del jeneral Miguel Primo de Ribera (ke no kale konfundir kon su ijo Jose Antonio) es embiyado komo konsul en Bulgariya. Tres anyos despues, en 1927 de Bulgariya es yamado komo konsul de Espanya en Galati, en Moldavia, ke en este tyempo aziya parte de la Rumaniya. Es aya ke va konoser a la ke va ser su mujer, Elena Cutavà Anino. Ya es un ombre de 43 anyos. I en 1929 va ser embiyado komo konsul en San Francisco, ande va kedar asta 1933.
Durante su lavoro en San Francisco, parese un livro del jeografo Russel-Smith, de la Universidad de Columbia, ke da, asigun Radigales, una negra i falsa idea de lo ke son en vedra los espanyoles, kon una foto de Jitanos trogloditos, komo si ansina eran todos los espanyoles. Este livro era uzado en munchas eskolas de Amerika. Indignado, Radigales aune todos los diplomatos espanyoles de los Estados Unidos para protestar. I reushe: no solo el estado de California trava el livro de las eskolas, ama mismo roga a los meldadores de demandar al embashador de Espanya de rekompensar a Radigales por tener tanto byen lavorado para su pais. No se si ay una relasyon, ama de fakto, en 1933 es echo komisaryo ofisyal del paviyon de Espanya a la Ekspozisyon Universala de Chicago.
En oktobre 1934, el governo de la Republika espanyola lo aze konsul en Chicago.
Entremyentres, a Radigales le agrada ir en vakansas en Gresya, ande mismo aze konferensyas en Atena, en el kuadro de la Liga ispano-elenika.
I, en 1936, Radigales es embiyado en Atena komo konsul del governo de Franco, myentres en Selanik el konsul Maximo José Khan reprezenta el governo ofisyal de la Republika espanyola. En mismo tyempo ke ay gerra sivil en Espanya, empesa una gerra diplomatika en Gresya entre los dos konsules espanyoles de vandas opozadas. Radigales no keda de akavidar a Franco sovre la salida de vapores gregos yenos de armas a destinasyon de los republikanos, sovre los kuales Metaxas, kapo de la Gresya, serra los ojos. Maximo José Khan, por su parte, se kesha a su governo ke sea un frankisto ke se tope en la kapitala de la Gresya.
Ama, komo ya lo savesh, los Republikanos pyedren la gerra en 1939, i Radigales, esta vez es ofisyalmente konsul del governo frankisto.
De otra parte, en Gresya, vyenen los Almanes en 1941, i Radigales, en 1943, se topa ser Konsul jeneral de Espanya en Atena, la kapitala, dainda okupada por los solos i blandos Italyanos, a la diferensya de Selanik, okupada por los Almanes.
Es en este mismo anyo 1943, el 6 de fevrero, ke ayegan en Selanik dos kapos SS, los terrivles Dieter Wisliceny i Alois Brunner, kargados por Eichmann de organizar la deportasyon de los djudyos. Entre el 15 de marso i el 7 de agosto, 19 trenos embiyan a Auschwitz a 46.000 djudyos. Solo unos 2.000 van a sovrebivir. Selanik, ke aviya sido una de las mas vyejas komunidades del mundo ; ke durante kuatro siglos aviya sido la kapitala de la djuderiya de los Balkanes, la Yerushalaïm de los Balkanes, Selanik era vazyada de sus djudyos.
En medyo de esto, i asta julyo 1943, los djudyos selaniklis de nasyonalidad espanyola – ke son unos 520 – son deshados kyetos por los Almanes, afuera de las leyes kontra los djudyos, la Espanya syendo amiga de la Almanya. Entre eyos Isaac Revah, nasido en Selanik en 1934, en una famiya ande su padre teniya la nasyonalidad espanyola desdel empesijo del siglo vente, dunke antes mismo del dekreto de 1924 de Miguel Primo de Ribera.
Ama, al empesijo de 1943, los Almanes dan un ultimatum a los paizes neutros o alyados de la Almanya: Danimarka, Espanya, Portugal, Finlandya, Hungariya, Italya, Rumania, Sueda, Suisa, i Turkiya:
Kale ke rapatriyen sus nasyonales djudyos en los tres mezes, sino seran tratados komo los otros djudyos de los paizes okupados, i deportados en Polonya. En 1943, todos (salvo los djudyos selaniklis) ya saviyan lo ke keriya dizir deportasyon de djudyos en Polonya.
La Espanya no tyene dinguna entisyon de akojer en su pais djente ke portanto tyenen su nasyonalidad. En fevrero 1943, aze a los Almanes la propozisyon de otorizar la ida de los djudyos espanyoles en Turkiya, i no en Espanya. El governo alman refuza el 27 de fevrero. Yene, el 13 de marso 1943, el governo espanyol, sin eskrivirlo, ama por la boz de su ministro de los echos ajenos, aze saver a los Almanes ke podria akojer a unos kuantos djudyos espanyoles, menos de syen. Kale akodrar ke, el 2 de fevrero 1943, uvo para los Almanes la desfecha de Stalingrad: despues de Midway i El Alamein, las kozas estan trokando…la viktorya de los Almanes i Japonezes no es mas koza sigura komo lo paresiya antes.
Deke la Espanya abandonava a una muerte kaji sigura a unos kuantos espanyoles ke era posivle i mismo bastante kolay de salvar? Ay una sola repuesta: no eran espanyoles katolikos, eran espanyoles djudyos. No pesgavan lo mismo.
Frente a un governo antisemit i indiferente a la sufriensa djudiya, uvo en los paizes okupados por los almanes diplomatos espanyoles ke, vyendo las sufriensas de los djudyos, sea aprovaron de si para si de salvar a los djudyos espanyoles, sea mismo aprovaron de salvar tambyen a djudyos mismo si no eran espanyoles. Ama para esto tuvyeron de afrentar la opozisyon de sus kapos, i tomar rizikos para sus karreras.
Esto fue el kavzo de Radigales. Konsul Jeneral de Espanya a Atena en avril 1943, se topa en medyo de la deportasyon de los djudyos selaniklis ke a empesado, komo lo dishe mas antes, el 15 de marso. Ya save ke ay djudyos espanyoles en Selanik i lavora, primo para obtener de los Almanes ke no deporten a estos djudyos, i sigundo para obtener de su governo espanyol ke le permite de rapatriar estos mismos djudyos en Espanya. No es posivle de akojer tanta djente, le responde su governo. Ke asko, avlando de djente ke son todos espanyoles, ombres, mujeres, vyejos, kriaturas, menasados de muerte i ke no son muncho mas de kinyentos.
Ya se konosiya por los istoryanos unos kuantos telegramas embiyados entre el ministro de los echos ajenos del governo de Franco, Francisco Gomez Jordana, i el embashador de Espanya en Berlin, Gines Vidal. Para azer obtener a Radigales la medaya de los Djustos, Isaac Revah bushko i topo otros telegramas, embiyados a o por Radigales.
Komo ya vos dishe, el governo espanyol ke antes refuzava de akojer ni un solo djudyo espanyol, acheta el 13 marso 1943 de akojer menos de 100 personas. El ministro Jordana embiya dos mezes despues, el 13 de mayo, a Vidal en Berlin i a Radigales en Atena un telegrama demandando una lista de estos djudyos. Dos mezes…kuando los trenos de 3.000 djudyos a kada vez se van kada dos diyas…El tyempo no es el mismo para todos…
El 20 de mayo, Radigales aze saver ke los Almanes son de akodro para la salida de Gresya de los djudyos espanyoles. Radigales adjunta ke el es pronto a dar pasaportes kon su responsabilidad personala, i ke los Almanes lo an akavidado ke asperan solo asta el 15 de junyo: despues los djudyos seran deportados.
El 3 de junyo, Vidal, el embashador en Berlin, eskrive al ministro ke asigun Radigales, lo mijor para ir a Espanya seriya un vapor espanyol, i demanda instruksyones. El 4 de junyo, el ministro responde ke el viyaje es imposivle ni por tyerra ni por mar. I adjunta ke el konsul no deve azer mas nada. Ke responda a los djudyos ke la Espanya «aprova de rezolver las difikultades» i ke aspere las instruksyones. En pokos byervos, kale deshar morir todos los espanyoles djudyos (mismo los menos de syen otorizados en marso).
El 10 de junyo, el embashador Vidal eskrive a su ministro ke asigun Radigales, un diplomato suedano le a dicho ke los djudyos espanyoles de Selanik podrian ser yevados en Espanya por un vapor suedano de la cruz kolorada yevando komida en Gresya.
El 11 de junyo, el ministro eskrive al embashador ke el konsul deve obedeser a sus ordenes i kedarse de azer kualkyer koza.
Pasa el 15 de junyo, ultimo diya del ultimatum alman: agora los djudyos espanyoles pueden ser deportados.
El 29 de junyo, el embashador en Berlin akavida su ministro ke los Almanes son de akodro para la salida de 510 djudyos espanyoles. Ama el ultimo diya es amanyana, i el embashador demanda una repuesta urjente.
Dinguna repuesta del ministro, lo ke kyere dizir: deshadlos morir.
Yene Radigales ograshea kon los Almanes para pueder rapatriar a los desmazalados. Le toma la birra al ministro Jordana, i eskrive el primo de julyo al embashador: «Es indispensavle de neutralizar el zelo eksesivo del konsul jeneral de Atena i de neutralizar sus intervensyones (sino esto podriya krear difikultades graves para la Espanya)».
El 14 de julyo, el embashador akavida a su ministro ke el ministro alman de los echos ajenos «insista sovre el menester de dar a los djudyos espanyoles de Selanik un pasaporte kolektivo i aspera de resivir de mozotros una demanda de treno espesyal para el viyaje verso Espanya. Le arrespondo ke el ministeryo espanyol de los echos ajenos no tyene entisyon de azer un pasaporte kolektivo…No ize dinguna aluzyon a la propozisyon para un treno espesyal.»
Ke verguensa. Vos estash rendyendo kuenta, keridos oyentes: son los Almanes ke son prontos a salvar los espanyoles de la muerte, ama es el governo espanyol ke no acheta…Los papeles kedan, es bastante de meldarlos.
El mismo diya, el ministro responde al embashador: «el governo espanyol nunka tuvo la entisyon de rapatriar una muchedumbre de djudyos espanyoles».
El 24 de djulyo, el governo italyano otoriza su konsul jeneral en Selanik de embiyar a Atena, okupada por los Italyanos, los 550 djudyos espanyoles de Selanik. Los Almanes refuzan, i yene Radigales i el konsul italyano en Selanik, Giuseppe Castruccio, reushen de azer fuir de Selanik, por un treno militar italyano, 155 djudyos espanyoles. Kedan en Selanik 367 personas, entre los kuales el chiko Isaac Revah, ke tyene 9 anyos, i su famiya.
Vyendo esto, los Almanes dechidan de deportarlos a Bergen Belsen i no a Auschwitz, para deshar a los Espanyoles tyempo para pensar. Despues son destinados a ser embiyados en un otro kampo, este de eksterminasyon. Los Almanes lo eskriven a los Espanyoles los 20 i 22 de julyo 1943. No vide estos mesajes, ama esto siguro ke los Almanos no eskrivyeron el byervo eksterminasyon, ama yene deviya ser klaro.
El 2 de agosto, los 367 desmazalados son metidos en treno en vagones para behemot, kon tambyen 74 djudyos gregos, sin de bever ni de komer. Todos sus valores yevadas kon eyos les son arrovadas por los Almanes.
El 4 de agosto, kuando ya se fueron los djudyos, la Espanya eskrive ke esta de akodro para tomar los djudyos 25 por 25, kada grupo una vez ke el de antes se fue de Espanya. Los almanes ven ke esto va tomar mas de un anyo, i refuzan; de toda manera, los djudyos ya se fueron. Radigales embiya a Espanya un telegrama demandando ke Madrid a lo manko tome los vyejos, las kriaturas i los hazinos.
El 9 de agosto, kuando el treno esta en Nuremberg, los Almanes se ambezan ke la Espanya acheta de tomar los djudyos en transit por 3 mezes. El American Joint Distribution Coommittee pagara todos los gastes. Ama el haber ayega demazyado tadre, i despues de un viaje de 12 diyas, los djudyos ayegan a Bergen Belsen. Espanya demanda a los Almanes de «byen tratar» a los djudyos.
Los espanyoles son separados de los gregos i metidos en una parte espesyala del kampo de Bergen Belsen, menos dura ke ande va estar Anna Frank.
Kualo va afitar a estos poveretos espanyoles abandonados por sus pais? Komo ya vino el tyempo de eskapar esta emisyon, vo lo kontaré el djueves ke vyene, si kyere el Dyo!
Edmond Cohen
Paris Fransya
