eSefarad Noticias del Mundo Sefaradi
Keridos amigos, aki toparash el teksto de la emisyon de esta semanada.
Akavido los ke me oyen sovre internet desde paizes ajenos ke aki en Fransya entrimos el alhad pasado en la ora de invyerno, i atrazimos muestras oras de una ora
El program se puede sintir por Internet kada djueves, indo al sityo RADIO – la fréquence juive. Kale tener pasensya i asperar un poko, no se oye pishin.
Saludos a todos
Edmond Cohen
Paris, Fransya
RASHI
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Komo a kada vez, vos akodro ke el proksimo atelye de konversasyon de la Asosyasyon Vidas Largas se tendra el martes 13 de marso (i no 14, komo dishe por yerro el djueves pasado), de las dos i medya asta las sinko, al muevo adereso del 17 rue Pierre Semard Paris (9°), arriva del Square Montholon, métro Cadet. La entrada es la del lokal i no la del han.
En varyas emisyones, ya vos avli aki de grandes karas de la istorya sefaradi, komo Yehuda Halevi, Binyamin de Tudela, Maimonides, Shelomo Ibn Gabirol, Don Isaac Abravanel, Donya Grasya Nasi i su sovrino i yerno el Duke de Naxos, Sir Moses Montefiore, la famiya de Camondo, Albert Cohen, Yehuda Alkalay, el Profesor Sephiha, ets, i mismo Cristobal Colon afillu si no estamos siguros ke sea djudyo. Lo ke es kaji siguro, es ke si djudyo era, era sefaradi. A propozito de Colon, yo ize mi emisyon sovre Cristobal Colon en 2007, dizyendo ke mismo si aviya shupe, nada era siguro en kuanto al djudaismo sekreto de muestro Cristobal. Ama despues, en 2009, salyo un livro de una Senyora Estelle Irizarry, profesora de espanyol en Amerika, ke dainda no meldi, intitolado « El ADN de los escritos de Cristobal Colon », asigun el kual la manera de eskrivir de Colon es manera djudiya, i esta profesora topo en los eskritos de Colon 18 djizes de lo ke yama ladinismos. Komo no meldi el livro i ke de toda manera no vine aki oy para avlar de Colon, me kedare sovre esto.
Lo ke keriya solo dizir es ke avli sovre todo de sefaradim, ama no solo de sefaradim. Avli tambyen de Rachel la komedyante o de David Ben Gurion, i oy pensi de avlarvos de una grande kara del djudaismo ke no fue sefaradi, kyero avlar del grande Rashi, el mas famozo de todos los komentadores del Tanah i del Talmud. En otras emisyones, si kyere el Dyo, vos avlare de otros grandes ashkenazim komo el Gaon de Vilna o el Maharal de Praga.
Ama para oy aboltaremos al grande Rashi, haham ke aze parte de la jenerasyon yamada de los Rishonim.
En 1040 nase en la sivdad de Troyes, en Fransya, o por ser mas presizo, en el territoryo del konde de Champagne, enfeuzyado al rey de Fransya ama ke no es la Fransya haliz, un chiko Shelomo, ijo de un Yitshak ke deviya ser haham, afillu si esto no es koza sigura. Mas siguro parese ser ke su madre , eya, era ermana de Simon el vyejo, haham de Mayence, i elevo de Rabenu Gershom Ben Yeuda, Meor hagola (luz del egzilo). Esto dicho ke parese vedra, se konto muncho despues ke el padre del chiko Shelomo era desendyente de Yohanan asandlar (el sapatero) famozo haham elevo de Rabi Akiva i desendyente del haham Rabi Gamaliel el vyejo, el mismo desendyente del rey David. Parese ke esto es una leyenda, syendo ke nunka Rashi el mismo pretendyo esto.
El nombre Rashi es echo kon las tres letras resh, shin i yod, inisyalas de Rabi SHelomo Itshaki, kijo dizir Rabi Shelomo ijo de Itshak. Ama unos dizen tambyen, un poko por shaka, Raban shel Israel (maestro de Israel) o Rabbenu she Yihie (muestro rabi ke biva).
Se konta ke el padre de Rashi empeso de ambezarle la Tora a la edad de sinko anyos, i kontinuo asta ke se muera kuando Rashi era dainda muy mansevo. A los 17 se kazo, i poko despues se hue a estudyar en la yeshiva de Rabi Yaakov Ben Yakar en Worms, en Almanya, aboltando para ver a su mujer tres vezes al anyo, por los yamim noraim entre Rosh ashana i Kipur, Pesah i Shavuot. Kuando Rabi Yaakov se muryo en 1064, Rashi kontinuo de estudyar un anyo en la yeshiva de su primo Rabi Itshak Ben Eliezer Halevi, ke era tambyen el gran rabino de Worms. Despues se hue en Mayence para estudyar basho otro primo, Rabi Itshak Ben Yeuda, el gran rabino de Mayence, i uno de los savyos mas altos de Lorraine, ke era entera en Almanya en este tyempo.
Los profesores de Rashi eran estudyantes de Rabenu Gershom i Rabi Eliezer hagadol, grandes komentadores , de la jenerasyon de antes. De sus maestros Rashi se ambezo las tradisyones oralas vinyendo del Talmud desde siglos, i en el mismo tyempo la manera de komentar del Talmud. Rashi tomo en nota ltodo lo ke se ambezo en las yeshivot, i esto le va servir despues para sus propyos komentaryos.
A la edad de 25 anyos, Rashi abolta en Troyes. Su madre se muere, i es yamado para azer parte del Bet Din de Troyes, kijo dizir el Tribunal rabiniko. Empesa a responder a kuestyones de Halakha, el derecho djudyo, i kuando se muere el kapo del Bet Din, Rabi Zerah Ben Avraham, es muestro Rashi ke se va topar a la kavesa del Bet Din. Responde a syenes de kuestyones de halakha, i en los anyos 1070, kijo dizir a la edad de solo 30 anyos, funda una yeshiva ke aze vinir munchos elevos. Al lado de esto, se pensa ke ganava su vida kultivando una vinya, esto se trava de la savidurya ke Rashi amostra por todo lo ke es del arte del vino. No kale olvidarmos ke estamos en Champagne, el pais del vino, ama dainda no gazozo: lo ke se yama oy champagne, kijo dizir vino gazozo, vendra solo al kavo del siglo 17, kon el papas Dom Perignon, ke el mismo se ambezo la manera de azer vino gazozo de los papazim de Limoux, sivdadika serka de Carcassone, muy leshos de la Champagne, ke inventaron en el siglo 16 el primer vino gazozo en el mundo, la blanquette de Limoux. Ama esto todo mos alesha un poko de Rashi, mas konosido de toda manera por su savidurya en Tanah i Talmud ke en vino de Champagne.
A poko a poko, Rashi se mete a eskrivir sus komentaryos, en primero del Humash, los sinko livros de la ley, despues del Tanah entero (salvo los dos livros de las Kronikas), i despues del Talmud kaji entero. El mazal de Rashi, es ke la sivdad de Troyes es un merkado internasyonal, i los merkaderes vyenen de todos los paizes, traendo kon eyos los manuskritos de varyas ovras de hahamim, de los kuales Rashi tyene menester para lavorar.
No tengo menester de dizir ke sin avlar de la valor i kalidad de su ovra, sovre la kuala vendre mas despues, kale empesar por alavar la sola kantidad de su lavoro. Del tyempo de Rashi no egziste ni imprimeriya ni komputadera. Mismo el papel dainda no vino en Troyes. Se melda i se eskrive kon la mano sovre pergamino. Kale pensar a kualo asemejan el Tanah i el Talmud del tyempo de Rashi.. Kale pensar de la misma manera a la ovra de Rashi eskrita a la mano sovre pergamino, puede ser no en forma de megila komo la Tora, ama de codex, kijo dizir de livro kon pajinas de pergamino, i despues kopyada a la mano – ke lavoro para kopiar una sola ovra, indimas munchas – i embiyada en las sivdades en arabas de kavayo…Komo uno se aziya konoser de los otros en el mundo djudyo entero, es koza ke es muy yuch de imajinarse. Gazetas no aviya, i por tanto kreo ke Rashi ya era famozo de su tyempo. Un siglo mas despues un Rambam era tan konosido i famozo ke le veniyan las sheelot (kuestyones, demandas de konsultasyon) del mundo djudyo entero. Para mi es un misteryo, komo aziya la djente ke biviya muy leshos para saver ke aviya en tal sivdad un savyo ke puediya responder.
Rashi no tuvo ijos, ama tuvo tres ijas, Yoheved, Miryam i Rachel, kada una kazada kon un haham. La bohora, Yoheved, se kazo kon Meir Ben Shemuel, i de el tuvo, en mas de una ija Hanna, 4 ijos todos grandes hahamim, entre los kuales Rashbam, Rivam i Rabbenu Tam, el mas konosido de todos.
Es el yerno de Rashi por su sigunda ija, Miriam, Yudah Ben Nathan, ke eskapo el komentaryo del tratado Makkot del Talmud sovre el kual lavorava Rashi kuando se muryo.
Los yernos i inyetos de Rashi se izyeron eyos mismos komentadores del Talmud, i del komentaryo del talmud por Rashi. Se yaman los tosafistos, los ke adjuntaron.
A propozito de las ijas de Rashi, se kuenta ke eran muncho mas embolvidas en la vida relijyoza djudiya ke lo son las mujeres oy, salvo ande los liberales. Meldi sovre internet un artikolo de una senyora Maggie Anton insistyendo sovre este aspekto liberal de Rashi en kuanto al rolo de las mujeres en la vida relijyoza djudiya.
Kale saver tambyen ke, en 1095-1096, kuando Rashi es aedado de 55 anyos, empesa en Fransya i en Almanya la primera kruzada, en la kuala miles de djudyos, puede ser 12.000, van a ser matados por los kruzados, sovre todo en Almanya. No se puede dizir ke fue lo ke se yama agora jenosid, syendo ke no fue una ley de los governos de la epoka, ama matansinas del puevlo i de unos kuantos senyores i syertos papazim, afillu si en jeneral parese ke la mayoriya de los papazim eran kontra las matansinas. Esto dicho, 12.000 matados sovre lo ke puediya ser la povlasyon djudiya de la Edad Medya, es puede ser mas, en proporsyon, ke los 76.000 djudyos de Fransya matados entre 1942 i 1945 por los Almanes. Fue, de este punto de vista, una shoa terrivle.
Rashi, en Champagne, no es tokado por la kruzada. Ama al lado de la Champagne se topa la Lorraine, ke en este tyempo esta en Almanya tal i komo la Rhenaniya, i aya son las matansinas las mas terrivles. En Worms son matados tres ijos de Rabi Itshak ben Eliezer Halevi, maestro de Rashi. No ay diya sin ke Rashi se ambeze negro haber venido de las sivdades ande estudyo. Eskrive munchas selihot por esta okazyon. Syete de eyas mos kedaron, entre eyas Adonay elohei Hatsevaot, ke es resitada en tadre de Rosh Hashana, o Az terem Nimtehu ke es resitado en el tanit de Gedalya.
Rashi se muere el 29 de tamuz 4865 (13 de julyo 1105) a la edad de 65 anyos. En el lugar ande se topava el semetaryo ande fue enterrado, ay agora una plazza en Troyes, i en medyo de esta plazza el eskultor Raymond Moretti izo una eskultura kon la lettra Resh en onor de este ijo de la sivdad.
Kuando vos ize mi emisyon sovre el viyaje ke izimos en fin de marso 2009, unos kuantos de Vidas Largas, en Champagne i dunke en Troyes, vos konti ke el mayor de Troyes fue durante muncho tyempo el senyor Robert Galley, i fue muy enkantado de ver ke, en kualkyer lugar ke se fuera en el mundo, kuando diziya ke veniya de Troyes, la djente le respondiya: « Ah, si, la sivdad de Rashi! » Kyen es este Rashi ke todos paresen konoser, i yo no…se demandava Robert Galley. Kuando abolto en Fransya, kijo saverlo, i se ambezo ansina kyen era este ombre tan famozo ke la sivdad ande bivyo esta tambyen konosida en el mundo entero. El konosiya a Chrestien de Troyes, a Bernard de Clairvaux, las dos gloryas de Troyes, ama no saviya ke bivyo tambyen en Troyes este djigante de la savidurya djudiya ke fue Rashi, i ke para mozotros no es la tresera ama la primera glorya de Troyes..
Esto dicho, me keda de avlarvos un poko mas de la ovra de komentador de Rashi.
Lo ke kale saver sovre los komentaryos de Rashi, es ke este tan grande haham kijo ke el teksto del tanah komo el teksto del Talmud sean entendidos de todos, afillu de las kriaturas.
Ay en la tradisyon djudiya kuatro niveles de komentaryo, ke azen kon sus inisyales en ebreo el byervo pardes ke es la uerta de arvoles. Estos niveles, del mas serka del teksto al mas leshano, se yaman pshat, remez, derash i sod. El sod, el sekreto, es la manera de komentar la mas leshana del teksto. Es la manera del Zohar i de los kabalistos, komo Moshe de Leon, por egzemplo. A la rovez, Rashi es konosido por tener syempre echo prevaler el pshat, kijo dizir el komentaryo el mas serkano del teksto, de lo ke esta eskrito, de su gramatika, del sentido de sus byervos. Mos aklara kon sus eksplikasyones ke son meoyudas i argumentadas. Por siguro, todo lo ke mos dize Rashi no es syempre suyo. El mismo aze suyo tal komentaryo travado del Midrash, de la misma manera ke Yaakov Khuli, kuando en su Meam Loez mos komenta tal pasuk de Bereshit, no es su komentaryo personal, es el komentaryo ke el mismo a travado de otros hahamim.
Todos los djudyos, todos los hahamim, ke sean sefaradim o ashkenazim, adoptaron los komentaryos de Rashi, mismo si uvo, lo le es natural, djente ke no fue d’akodro kon tal o tal komentaryo en partikolar. El kontraryo uvyera sido kuryozo. Ama esto dicho, en jeneral los komentaryos de Rashi azen autoridad dainda, 900 anyos despues de su muerte.
Para dar a entender a los djudyos de su tyempo kualo keriyan dizir syertos byervos ebreos mal konosidos, dava la traduksyon de este byervo en franses, ke Rashi yama laaz, la lingua ajena – kuando digo el franses kale entender el franses del onzen siglo en Champagne. Kreo ke ay en su ovra unos 1.500 byervos en franses yamados laazim en su komentaryo del tanah, i 3.500 en su komentaryo del Talmud, ke por siguro mos ayudan a mijor entender el ebreo, ama tambyen a mijor konoser el franses de la Edad Medya. Es un linguisto djudyo franses del siglo 19, yamado Arsène Darmesteter, ke arrekojo estos todos byervos. De tal manera ke agora, los linguistos de oy ke kyeren ambezarse estos byervos fransezes se refyeren, sin ser djudyos, a la ovra de Rashi.
Los komentaryos de Rashi son tan menesterozos i aprovechan tanto ke se izo el uzo, en una edisyon del Tanah o del Talmud, de imprimar el teksto en medyo de la pajina, ama de adjuntar al lado , yene en ebreo ama en otros karakteres para no konfundir, el komentaryo de Rashi. Estos otros karakteres fueron yamados por esto karakteres Rashi. I, komo ya lo savesh, son estos karakteres dichos Rashi ke fueron tambyen empleados fina los anyos 1920 para eskrivir el djudeo-espanyol, por egzemplo el Meam Loez. Es por esta razon ke la gazeta El Amaneser mos kombida a kada vez a ambezarmos de muevo a meldar este alfabeto Rashi, sino estariyamos kortados de muestras raises.
Kon esto vos desho i vos digo: astal djueves ke vyene, si kyere el Dyo!
Edmond Cohen
