eSefarad Noticias del Mundo Sefaradi
Keridos amigos, a la okazyon de tormar de mis vakanzas, vos do el teksto de la proksima emisyon del programa, ke no tiene todavia data de salidura en la radio.
El program se puede sintir por Internet kada djueves, indo al sityo RADIO – la fréquence juive . Kale tener pasensya i asperar un poko, no se oye pishin.
Saludos a todos
Edmond Cohen – Paris, Fransya
RACHEL LA KOMEDYANTE
Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Auguro ke pasatej buenas fyestas de tishri, i me keda de dezear a vozotros todos, mis keridos oyentes una anyada dulse i buena, kon salud i kon paz.
Dos anunsyos por empesar. El primero para dizirvos ke los ateles de konversasyon de la asosyasyon Vidas Largas van a empesar en un mes, el djueves 4 de novyembre, de las 2 asta las 4 i medya sinko, en el Centre Communautaire, 119 rue Lafayette Paris (10°) metro Lafayette o Poissonnière.
Ma deuxième annonce, je vais la dire en français, car elle intéresse tous ceux qui s’intéressent à l’extraordinaire travail accompli dans cette langue au profit, entre autres, des judéo-espagnols de l’ex Empire Ottoman, mais pas seulement eux. Une exposition remarquable et cependant gratuite est en effet consacrée jusqu’au 16 octobre au cent cinquantième anniversaire de cette grande œuvre. Pour beaucoup d’entre nous à commencer par moi, si nous vivons en France c’est parce que la génération de nos parents avait d’abord reçu dans les écoles de l’Alliance le bagage indispensable à une bonne intégration dans leur nouveau pays d’accueil.
Esto dicho i por lo ke es de oy, sigiendo komo munchas vezes una idea ke me dyo mi amigo Jose Molho, vos vo avlar de una koza ke no tyene nada de ver kon las fyestas de tishri, kijo dizir la istorya de la vida de la komedyante Rachel, ke bivyo en Fransya en medyo del siglo dizimueve, i tuvo la misma selebrita ke una otra komedyante ke vino medyo siglo mas despues, Sarah Bernhardt. Djudiyas las dos.
El nasimyento de Rachel ya es por si mizmo una istorya komo se melda en los romansos.
El padre de Rachel se yama Jacques o Jacob Felix, nasido en Metz, en Lorraine, en 1796, ama morando en Alsace, si se puede avlar de morar syendo ke, despues de aver estudyado por ser haham i despues profesor de Alman, se kazo kon Esther Therese Hayer, nasida en Gerstheim, en Alsace, i se topo ovligado, una vez kazado, de deshar el hahamlik para azerse vendedor peregrinante por las kayes, komo ya lo eran su padre i sus antepasados.
Un chingane djudyo, komo lo eskrivyo Jean-Pierre Allali en un artikolo ke eskrivyo sovre Rachel. I komo los chinganes, aze un poko de todo : djuga, kanta, vende antojos, kozas de kuzir, kozas de antikadji, ets. I su mujer Esther uydurea djoyikas para kazalinas.
Despues de una primera ija yamada Sara, Esther se topa de muevo prenyada en 1821 kuando estan en la Suisa.
Kyere irse para parir en Endingen, la sola sivdad ke resiva djudyos, ama se ve demaziya kansada, i ovligada, el 21 de fevrero, de chaptear a la puerta de un albergo, l’Auberge du Soleil (el albergo del sol) ke se topa en la sivdadika de Mumfp, en la montanya suisa.
Afillu ke es proibido de tomar a djudyos, el amo del albergo, ke se yama Walmeyer, vyendo el estado de la mujer, el friyo entezador i la inyeve, acheta de avrir a esta djudiya ke se topa este diya sin su marido, i de yamar a una komadre. Ansina es ke nasyo Elisa Rachel Felix.
Es este mismo anyo 1821 ke, unos kuantos mezes despues, en mayo, en la isla de Ste-Helene, se va morir Napoleon, ke fue emperador de los fransezes. Dainda no lo pueden andevinar, ama los Felix, Jacob i Esther, se van a topar ser kosuegros – kosuegros por la mano syedra, komo diriyan los fransezes – de Napoleon, syendo ke Elisa Rachel, la ijika ke vyene de naser, va tener mas tadre un ijiko kon Alexandre Walewski, ijo de Napoleon i de Marie Walewska. El solo inyeto ke tendra el emperador de los fransezes le vendra de esta djudiya, afillu si el ijiko sera engrandesido por su madre en la relijyon katolika, por respeto por su padre katoliko. (Esto es la diferensya kon el Prezidente de oy Sarkozy, ke tyene una djudiya por ermuera i un djudyo por inyetiziko, de tal manera ke el prezidente de oy de los fransezes es un katoliko ke tuvo un papu djudyo i ke tyene un inyeto djudyo…)
Ama esto todo mos alesha del nasimyento de la chika Elisa Rachel. Unos kuantos diyas despues de este nasimyento, vyene su padre, ke, komo vos dishe, no estava kon su mujer kuando paryo, paga el amo del albergo, toma su mujer i su kriatura i se va kon su araba. De la araba kaye un pakete : es la kriatura. Son los kazalinos ke arrekojen a la kriatura i korren gritando detras de la araba ke s’esta indo verso Zurich…
Ansina es la istorya del nasimyento de Rachel, la ke va ser la mas grande komedyante de Fransya en todo el siglo 19.
Despues de la Suisa los Felix entran en Fransya : Besançon, Saint-Etienne, Lyon, Chalon sur Saône, enfin Paris en 1831. Rachel, ijika de diez anyos, se va kantar por las kayes kon su ermanika bohora Sarah. Akompanyandosen kon gitarra, kantan kantikas en vezes un poko odazyozas, ke eyas mismas no entyenden.
El padre les ovliga de traer paras a kaza kadal diya. Embeza a Sara, la bohora, de kantar, i a Rachel le ambeza komo byen avlar. Rachel empesa de ambezarse a kantar kon el famozo muzikante alexandre-Etienne Choron, i despues se va ambezar el teatro kon un Saint-Aulaire, ke la aze entrar a kinze anyos en el Konservatoryo ande se aze eleva del komedyante Joseph Samson, sosyetaryo de la Comedie Française. Me demandi, kon un tal nombre, si no era djudyo el tambyen, i me fui a meldar sus rekodros, i vide ke dize el mismo, Joseph Samson, ke fue baftizado kuando nasyo en 1793. Dunke no era djudyo…
El 7 de enero 1837, dunke a la edad de 15 anyos, serka de 16, su padre la aze djugar en el teatro del Gymnase, en La Vendéenne, de Duport.
Ama es en marso 1838, a la edad de 17 anyos, ke Samson la prezenta en la Comédie Française. Chika, flakita, tenyendo dainda el aksento alzasyano, esta mansevika ke dainda no saviya ni meldar ni eskrivir – en franses (en yidisch ya saviya) -, seriya arondjada.
Ama Mlle Mars, la grande komedyante de este tyempo, ya endevino su fuego interyor, i insista para azerla entrar, i finalmente es resivida i obtyene, nada no es, el rolo de Camille, en el Horace de Corneille. Para mis oyentes de afuera de Fransya ke no konosen esta ovra, kale saver ke es un rolo trajiko , por siguro, syendo ke Horace es una trajediya, ama mas trajiko ke los otros, porke Camille se topa ser una Romana kazada kon un enemigo de Roma, ke por esto va ser matado por su kunyado romano Horace, ermano de Camille. En su tristeza de aprender ke su marido a sido matado por su ermano, grita kontra su ermano i kontra Roma, i sus imprekasyones kedaron famozas. De la birra Horace mata a Camille su ermana.
A 17 anyos, afillu su chikez, su flakeza i todo lo ke dishe, a la sorpreza jenerala, Rachel da un ayre muevo a la trajediya klasika. En primero, el solo ke se da kuenta de esto es Jules Janin, ke ya la aviya belledeado (i Gérard de Nerval kon el) en el Gymnase. Janin eskrive un artikolo sovre eya en la gazeta Les débats, i despues de el todos se dan kuenta ke el tuvo buen tino.
En oktobre del mismo anyo 1838, dunke yene dainda a 17 anyos, tyene el rolo de Hermione en la Andromaque de Racine. Hermione eya tambyen es una mujer de pasyon, ke empusha a Oreste, ke la ama, de matar a Pyrrhus, ke eya ama sin retorno, i una vez ke Oreste a matado a Pyrrhus, en vez de rengrasyarlo komo el aspera, le grita su odyo de aver matado a su amor. Es un triumfo para Rachel (ke se ambeza a meldar i eskrivir) i Rachel se aze la star, la diva, ke todos los kritikos alavan komo un djenyo puro. Obtyene todos los rolos de la trajediya klasika ,i a vente anyos, entra komo sosyetarya en la Comédie Française kon un salaryo muy alto, i eya save azerse pagar muy karo. En 1843, a la edad de 22 anyos, toma el rolo de Phedre, de Racine, otra mujer de pasyon, ke ama al ijo de su marido. Va ser la mas grande komedyante de su siglo, preferyendo djugar los rolos klasikos de dozyentos anyos atras, mas ke los dramas romantikos de su tyempo.
No vos vo kontar todos los rolos ke djugo, ama kale yene ke sepaj ke djugo kaji todos los mijores rolos de las trajediyas de Corneille i de Racine.
Komo la djente reklamava ke djuge en piesas modernas, kijo dizir eskritas de su tyempo i en vezes para eya misma, eskapo por achetar de djugar piesas de Mme de Girardin o de Scribe, komo Judith o Adrienne Lecouvreur. Djugo tambyen en una piesa de Victor Hugo eskrita en 1835, Angelo tyran de Padoue, piesa bastante olvidada oy, el rolo de Tisbe, la amante de Angelo. Tuvo sukseso en estas todas piesas, ama su espesyalidad, ande era la mijor, kedo la trajediya klasika.
Todos los mas grandes eskrivanos de su tyempo la alavan: Chateaubriand, Stendhal, Lamartine, Victor Hugo, Musset, Alexandre Dumas, etc. Mismo el kritiko Sainte-Beuve, muy negro, la alava el tambyen.
Chateaubriand, muy aedado, se kesha : « Ke pekado, senyorita, de ver naser talas kozas en el tyempo ande ya me vo morir ! » Rachel le responde : « Senyor, ay ombres ke no se mueren nunka!»
Eya se aze amiga kon Adolphe Cremieux, avokato djudyo ke la yama su tresera ija, i la ayuda para eskrivir, syendo ke dainda aze yerros. Otro amigo va ser Michel Levy, ke sera editor i ke va kedar su amigo vida entera.
Las botikas venden su retrato en pinturas, estatuas, se venden « bonbones Rachel », o polvos, kremas a su nombre. Mismo una valsa yeva su nombre.
Es tan famoza ke su nombre es konosido afuera de Fransya en todas las kortes. En 1841, a vente anyos, es resivida por la Reina Victoria en Ingletyerra, i en 1850 es resivida en Berlin, i el rey de Prusa aze meter en el parko de su palasyo serka de Potsdam, una estatua de eya ke sera destruida por los nazis en 1935. En 1854 se va en Rusiya, i en 1855 en Amerika.
Aprovecha su selebridad para estableser a toda su famiya. Toma su padre i su ermano komo impresarios, i aze entrar sus ermanas a la Comedie Française kon salaryos muy karos. En kuanto a eya, demanda agora de ser pagada komo una star, ke es en vedra. Los antisemites se keshan.
Las gazetas avlan de su vida muy libera, i de sus amantes numerozos. Kale byen entender ke eya es tan rika ke no tyene menester de amantes por las paras. Tyene amantes por amor, porke a kada vez se kree ke a topado el ombre de su vida, i no es.
El mas famozo de sus amantes va ser, komo ya vos dishe, el konde Walewski, ijo de Napoleon i de Marie Waleswska, i de el va tener un ijo, Alexandre, nasido en 1845.
De un otro amante, Arthur Bertrand, ijo del jeneral Bertrand, jeneral de Napoleon ke se kedo fiel a su emperador asta irse kon el en la isla de Sainte-Hélène, Rachel va tener en 1848 un sigundo ijo, Gabriel-Victor, ke va ser militaryo en las naves.
Rachel, todo en kedandose djudiya, va edukar sus dos ijos en la relijyon katolika por respeto por sus padres.
Rachel empeso desde su mansevez kon una hazinura muy negra, la tuberkuloz, la ftiziya, komo se diziya, hazinura ke no se saviya kurar en este tyempo, i ke la destruyo a poko a poko. El viaje en Amerika, en 1855, la kanso muncho, se kijo arreposar en primero, en 1856, al sol de Ayifton, kombidada por Soliman Pasha, ama vyendo ke no se kurava, torno en Fransya en 1857.
En septyembre se va en la Côte d’Azur, en la villa del tio de Victorien Sardou, en la sivdadika del Cannet, i aya se muere de su hazinura el 3 de janvier 1838, a la edad de solo 36 anyos.
Agora kyero uzar del tyempo ke me keda antes de la fin de esta emisyon para avlarvos del djudaismo de Rachel, porke el djudaismo tuvo una grande importansya en su vida. Ya vos dishe ke su padre kuando era mansevo se kijo azer haham, i se deve de pensar ke dyo a sus kriaturas una edukasyon djudiya. Lo ke es siguro, es ke nunka Rachel nyego ser djudiya, i kuando se izo rika ayudo a las ovras djudiyas. De vez en kuando se iva al kal de la rue Notre-Dame de Nazareth en Paris, i dyo paras para adornarla . Partisipava tambyen, al lado de los Rothschild, a las ovras de karidad de su komunidad, i el haham bashi de Fransya Lazare Isidor aseguro ke le plaziya a eya de avlar munchas vezes kon el de kozas relijyozas. Si es vedra ke dyo en 1840 una reprezentasyon diya de Kipur (teniya solo 19 anyos i empesava su karrera) no izo reprezentasyon el kipur de 1843.
Los katolikos eran bolados por ke se konvertisa al kristyanismo, ama eya nunka acheto. Un dia Chateaubriand demanda a Rachel de djugar en el salon de Mme Récamier un pedaso de Polyeucte, una trajediya de Corneille ande Pauline, la mujer de Polyeucte, de pagana se aze kristyana, dizyendo el muy famozo verso « Je vois, je sais, je crois, je suis désabusée… » (Veo, se, kredo, so dezenganyada). La idea era de azer entrar el arkiovispo de Paris djusto kuando va dizir esto, pensando ke Rachel va ser impresyonada i se va konvertir. Ama el arkiovispo viene mas tadre, i kada uno demanda a Rachel de empesar por de muevo. Eya entyende la konspirasyon, i responde : « Si plaze a su Eminensya, le vo resitar la orasyon de Esther » (de Racine) ande Esther dize al Dyo, avlando de los paganos, ama en la boka de Rachel puede ser de los kristyanos, « Tu sais combien je hais leurs profanations, leur fêtes, leurs festins et leur libations » (Saves kuanto aboresko sus profanasyones, sus fyestas, sus pransos i sus libasyones).
En desyembre 1846, la gazeta Le Siècle anunsya la konversyon de Rachel, ke pishin embiya un desmentido muy fuerte, ke malorozamente no pude topar i meldar. Un diya, puede ser…
Al empesijo de 1858, kuando se ve serka de su muerte, , su ultimo amante aprova yene de konvertirla. Vyendo esto, eya demanda a su ermana Sarah , ke esta a su lado kurandola, de yamar pishin al haham bashi Lazare Isidor, ke korre de Paris ama ayega en el Cannet despues de la muerte. Ama Rachel a demandado a 10 ombres de azer minyan al lado de eya, i se muere en la noche del 2 al 3 de janvier 1858 en resitando el shema.
El puerpo de la komedyante es yevado en grande pompa asta Paris, i aya es enterrada el onze de janvier en el kuadro djudyo del semetaryo del Père Lachaise, delantre de unos syen mil personas, kon el haham Isidor. El serkolyo es yevado por kuatro ombres de teatro, entre eyos Alexandre Dumas.
Syen mil personas, el shifro es puede ser un poko egzajerado, ama yene kale pensar ke no aviya ni sinema ni televizyon, ke solo djugava teatro, esto da la altura de su nombradiya.
Ansina mos vamos a kedar, i vos digo al djueves ke vyene, si kyere el Dyo !
