Muestra lingua: PRIMO LEVI por Edmond Cohen

Keridos amigos,
Mi emisyon del djueves a venir va ser sovre Primo Levi (komo ya ize dos emisyones sovre los djudyos de Italya, me pensi ke seriya byen de avlar despues de este grande eskrivano djudyo italyano).

Los ke van a kerer oirme en direkto lo podran indosen a las 4 h 06 PM, ora de Paris, sovre http://www.radioj.fr  Kale klikar arriva a la derecha sovre Ecouter Radio J en direct. I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

PRIMO LEVI

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet. Mi emisyon se puede oir en direkto sovre el sityo de Radyo J. Antes vos diziya ke se puediya oir tambyen kuando se kyere, indose al kavo de la redifuzyon de la emisyon del djueves a la tadre. Ama me parese ke el sityo es agora bozdeado, de tal manera ke agora no ay mas redifuzyon desde el 25 de oktovre pasado. Si trokan las kozas vos diré.

De otra parte, vos akodro tambyen ke el proksimo atelye de konversasyon de Vidas Largas se va tener el martes ke vyene15 de desyembre, de las dos a las kuatro, en el Centre Communautaire. Estos atelyes son avyertos a todos, venid munchos.

I agora, de kualo avlarvos oy? Kuando apareji mis emisyones sovre los djudyos de Italya para las dos semanas pasadas, me vino la gana de aboltar sovre un eskrivano djudyo italyano ke se izo famozo en el mundo entero, kyero avlar de Primo Levi (ke no kale konfundir kon un otro eskrivano djudyo i italyano, famozo el tambyen, Carlo Levi, autor del livro intitolado El Kristo se kedo en Eboli. Kyen save? Pueve ser un otro diya vos avlaré de el, ke lo merese, ama por oy mos vamos a kedar sovre Primo).

Primo Levi  es un djudyo pyemonteze, ke nasyo i se muryo en Torino, ama ke paso onze mezes en Auschwitz, onze largos mezes ke van a  trokar el kusur de su vida i azer de el un eskrivano, kuando se destinava a ser kemiko (komo muestro amigo el profesor Haïm Vidal Sephiha. Munchas son las asemejansas entre los dos destinos).

Esto dicho, empesaremos por el empesijo, el nasimyento, el 31 de djulyo 1919 en Torino, de Primo Levi en una famiya djudiya de burgeziya medyana. En Wikipedia lo dizen sefaradi, ama despues dizen ke su famiya avlava el djudeo-pyemonteze, de tal manera ke no se puede saver si teniya raises espanyolas, para ser un sefaradi. De ke no era ashkenazi, esto no kyere dizir de suyo ke era sefaradi. Era pyemonteze…

Sin ser pratikante i sufu, su famiya aze las fyestas. El chiko entra a la skola, i lavora byen, afillu si se amostra de chika salud i munchas vezes ovligado de kedarse afuera de la eskola, i de azer sus estudyos en kaza. Despues entra en el liseo, ande esta el mas chiko (tyene un anyo de menos ke los otros) el mijor de su klasa, i el solo djudyo, lo ke le vale de ser mal tratado por los kompanyeros de su klasa (esta vez, so yo ke me syento asemejar kon Primo Levi). I komo es djudyo, se apareja dos anyos por su kumplimyento de minyan, ke se va tener en 1932.

Un anyo despues, a los 14, se topa inskrito en el movimyento de las mansevezes fascistas, no por conviksyones suyas o de su famiya, ama para azer komo los otros.

Yene, i afillu si no es mas el solo djudyo del liseo, es mal tratado komo djudyo porsus kompanyeros. Se deskuvre una pasyon para la kimiya por tener meldado el livro Concerning the nature of things (sovre la natura de las kozas) de William Henry Bragg.

Agora estamos en el anyo 1938, kuando Levi entra en la Universidad de Torino para estudyar la kimika. 1938, es el anyo de la vijita de Hitler a Roma, i de las leyes antisemitas. Por mazal Levi ya se topa inskrito kuando salen las leyes.  Despues de el, los otros djudyos no tyenen mas el derecho de entrar en la Universidad.

En 1939, Levi empesa dolashes en las montanyas arriva de Torino, lo ke es bueno para su salud.

En 1941, obtyene su diploma de doktor en kimika, i su tezis sovre una inversyon del atomo de karbon tyene la mensyon la mas alta, afillu si sovre su diploma de doktor esta eskrito ke es de «rasa djudiya».

Topa un lavoro en una mina de amyante, konsistyendo a bushkar nickel en los kusures de la mina. Despues, en 1942, topa un lavoro en Milano, en una sosyeta suisa ke por esto no es ovligada por las leyes rasyales italyanas.

En mismo tyempo ke lavora a la kimika, Levi eskrive poezias i desparte su vida entre kimiko i eskrivano.

En septyembre 1943, Mussolini es echado a basho i los Almanes entran en Italya, i lo meten yene al poder. Empesan las halizes negriguras kontra los djudyos. En oktovre 1943, Levi kon unos kuantos amigos entra en un grupo de rezistansya ke tyene un nombre ke no tengo menester de trasladar: Giustizia e Liberta.

Los fascistos lo aferran en desyembre 1943 en el Val d’Aosta, lo meten en el kampo de djudyos de Fossoli, i, el 22 de fevrero 1944, es embiyado a Auschwitz kon 650 kompanyeros. De estos 650, solo unos 20 van a sovrebivir.

Levi se topa en Monowitz (Auschwitz III) para lavorar a la fragua de una fabrika de kauchuk sintetiko (ke nunka vera la luz por modo de los bombardamentos). Kuando ya esta kaji muerto de kanserya i de ambre, los Almanes se apersiven ke tyene savidurya en kimika i ke esto los puede ayudar. Esto va mijorar un poko su suerte, porke en novyembre 1944 le dan un lavoro en el laboratoryo de la fabrika. Resive tambyen de un italyano supa i pan, lo ke va permeterle de ayegar bivo a janvier 1945. Bivo, ama hazino (skarlatina), i kuando todos van a irse para lo ke se yamo la marcha de la muerte, Levi va kedar en la infirmeriya kon los ke son tan hazinos ke no pueden mas kaminar.

Levi konto esto en su livro Se questo e un uomo (Si este es un ombre), i yo topi sovre internet una traduksyon en franses, no del livro entero, ama de lo ke konto sovre estos diyas dal kavo antes de su liberasyon por los rusos. I en la emisyon ke vos ize el 28 de janvier 2010 sovre la marcha de la muerte, vos ize un rezumen de lo ke konto Primo Levi, no de la marcha de la muerte syendo ke no la izo, ama de lo ke le afito kuando lo desharon en la enfirmeriya. I vos konti lo ke sige:

El 17 de janvier 1945, el mediko grego vyene a ver los hazinos i les dize ke todos los hazinos ke pueden kaminar van a resivir kalsados i vestimyenta, i se van a ir el diya de despues por una marcha de 25 kilometros. Los otros van a kedar. Dos Ungarezos ke kaji no son mas  hazinos ama muy flakos se demandan kualo azer. Se espantan de kedar, siguros ke van a ser matados. Topan solo vyejos kalsados burakados. Es lokura de fuyir, en este estado de flakeza, nunka podran kaminar. Ama yene se van kon los otros. Levi no los vido mas, i se ambezo muncho mas despues ke al kavo de pokas oras fueron matados por los SS porke no puediyan kaminar kon los otros.

En kuanto a Levi i sus amigos hazinos, van a empesar para eyos diez diyas afuera del mundo i afuera del tyempo.

La manyana del 18 de janvier, despues de la evakuasyon ke se paso durante la noche, Levi resive su ultima supa. No ay mas kalor. Afuera aze unos 20 basho zero, i los hazinos ke son vestidos tyenen solo una kamiza. Kedan solo unos kuantos SS. A las dodje, un zabit SS vyene para azer una lista separada de los djudyos i de los ke no son. Los djudyos estan siguros ke eyos van a ser matados. Ama no. Al kontraryo resiven pan. Levi se va a bushkar kolchas ande los hazinos ke se fueron. Vyene la noche. Un SS se keda al lado de la baraka. I en supito, en medyo de la noche, todas las luzes se amatan, empesa un bombardamyento. No son matados, ama el vidro de la ventana se rumpyo. El friyo entra, kale pishin topar de kaentar : una soba, i lenya o kimur. I tambyen de bever i de komer.

Al amaneser del 19 de janvier Levi kon dos fransezes non djudyos dechidan de salir de la infirmeriya, afillu ke es proibido, syendo ke no ven mas a los Almanes. Almanes no ven, ama un alay de deportados hazinos, ke bushkan komo eyos, i ke kagan por dizenteriya sovre la inyeve ke es por tanto la sola fuente de agua de bever. Algunos toparon patatas, i las kozen kon el fuego de las lenyas kemadas por el bombardamyento. Levi i sus amigos topan unas kuantas patatas, i tambyen lo ke bushkavan lo mas : una soba.

Ansina va bivir Levi, grasyas a la kalor de la soba i de la lenya de las barakas destruidas por el bombardamyento, komyendo unas kuantas patatas pudridas i bevyendo inyeve fundida i suzya.

Vyendo ke los Almanes se fueron, el 23 de janvier Levi i sus amigos se atriven de salir del kampo bor un burrako de los barbelados, porke oyeron ke ay patatas en un lugar afuera. No es la libertad ke bushkan, son patatas. Las topan, i se aboltan al kampo…ande los deportados, todos hazinos, se mueren por miles sin kalor, sin de komer, sin de bever, sin medikos i sin melezinas.

Ansina van a kedar en el kampo asta la venida de los Rusos el 27 de janvier 1945.

Es solo el 19 de oktobre de este mizmo anyo 1945 ke Levi va pueder aboltar a Torino.  Antes, fue en un kampo sovyetiko de transito en Bielorusiya, i despues, kon prezoneros italyanos de los Rusos, va aboltar en treno, pasando por Polonya, Rumaniya, Hungariya, Almanya, Austriya. Ayega en su kaza de Torino en un tal hal ke no se puede rekonoser, en una vyeja djaketa de la armada korolada, kon una barva de salvaje. Es poko a poko ke le vyene atras kara umana.

A la diferensya de otros deportados ke kedan mudos, inkapaches de avlar de lo ke les afito, Levi lo kyere kontar a la tyerra entera. Empesa de eskrivir su famozo livro Se questo e un uomo, sus rekodros de Auschwitz. En mismo tyempo bushka lavoro en Milano. En 1946, el diya de Rosh Achana, aze la konosensya de Lucia Morpurgo, ke le ambeza a baylar. El kaye en amor de esta mujer i en septyembre 1947 se va kazar kon eya, i de eya va tener en oktobre 1948 una ija, Lisa Levi (i en 1957 un ijo, Renzo). Entremyentres a eskrito su livro i lo a publikado.

El livro empesa por una poeziya eskrita por Primo Levi, en italyano por siguro. Los ke son interesados de meldarla en italiano komo fue eskrita la toparan sovre internet: http://www.riflessioni.it/testi/primo_levi.htm

En kuanto a mi, la trasladi ansina para vozotros:

Si este es un ombre
Vozotros ke bivish kyetos
En vuestras tivyas kazas
Vozotros ke topash aboltando a la tadre
Komida kayente i karas amigas
Konsiderad si es un ombre
Este ke lavora en el lodo,
Ke no konose la paz,
Ke pelea por medyo pan,
Ke muere por un si o por un no.
Konsiderad si es una mujer
Esta sin kaveyos i sin nombre
Sin mas la fuersa de akodrarse
Vaziyos los ojos i yelado el pecho
Komo una rana en invyerno.
Meditad ke esto a sido.
Vos komando estas palavras.
Gravaldas en vuestro korason
Estando en kaza, kaminando por la kaye,
Echandovos, alevantandovos;
Repetaldo a vuestros ijos.
O ke se vos esfonde la kaza
Ke la hazinura vos aharve,
I ke vuestras kriaturas abolten la kara de vos.

Despues de esta poeziya puede empesar el livro, ande Levi konta lo ke  sufriyo en Auschwitz, i lo konta kon los ojos de un syentifiko, de un poeta, de un filozofo, de un pintor de solo 25 anyos.

Su livro, ke se alsa al nivel de un Elie Wiesel o de un Samuel Pisar, mete unos diez anyos antes de empesar de ser konosido no solo en Italia, ama en el mundo entero.

Despues de este kapolavoro Levi va eskrivir munchos otros livros. Nos vos vo enfasyar en dandovos la lista de todos los livros i poezias ke eskrivyo, ademas ke devo atorgar ke no los meldi. Ama vos meldi una poeziya suya, i esto me parese abastar para ke entendash ke estamos  avlando de un grande eskrivano.

Por siguro, era djudyo. Relijyozo? No. Konosiya la relijyon, ya vos dishe ke se aviya aparejado dos anyos para kumplir minyan. I la influensa de su savidurya relijyoza se ve en la poeziya ke vos meldi, ande munchos de sus versos no son otra koza ke partes de la orasyon del shema. Ama un shema ande la shoa remplasa las palavras del Dyo.

I ansina mos estamos aserkando del anyo 1987, ke es el anyo de la muerte de Primo Levi. Antes de aparejar la prezente emisyon, me paresiya koza sigura ke Primo Levi se mato el mismo, el 11 de avril 1987, porke esto es lo ke syempre oyi. Agora esto un poko mas shupeli sovre esto, despues de tener meldado un largo artikolo en ingles eskrito por un sosyologo de Oxford, Diego Gambetta, ke topi sovre internet:

http://bostonreview.net/diego-gambetta-primo-levi-last-moments

Kualo savemos de manera sigura? Ke Primo Levi sufriya de depresyon. Elio Toaff, el hahambashi de Roma, deklaro ke resivyo, solo diez minutos antes de su muerte, un telefon de Primo Levi, ke no konosiya i kon el kual nunka teniya avlado antes. Asigun el haham, sin dizirle  ke iva matarse, Levi le disho yene: «No puedo kontinuar kon esta vida. Mi madre tyene un kanser, i a kada vez ke veo su kara me akodro las karas de estos ombres echados sovre las banketas en Auschwitz.»

Ama Levi aviya dicho  el mismo, poko antes, a una amiga ke su depresyon no teniya de ver kon Auschwitz.

Levi fue topado muerto en basho de la eskalera de su kaza, kaido de la tresera tabaka. Kuando vino la Polisiya, pishin konsidero ke esta muerte no era un aksidente, era un suisidyo.

Ama yene ay razones de kedar shupeli. No solo Levi no desho dinguna letra dizyendo ke se iva matar i deke, ama nada, afillu su telefon al haham, permetiya de pensar ke teniya entisyon de matarse. Este diya Levi resive su korreo de la kapidjia, la rengrasya kon una sonriza i syerra su puerta. La kapidjiya abasha a pye las tres tabakas (afillu ke aviya un asensor) i una vez abasho, oye un ruido: es el puerpo de Levi ke kayo sovre el asensor. Deke, si keriya matarse, eskojer este momento i esta manera de matarse?

I si era solo un aksidente?

Komo ya vino el tyempo de eskapar mi emisyon, vos desho sovre esta kuestyon, ke kedara sin repuesta.

Al djueves ke vyene, si kyere el Dyo!

Edmond Cohen
Paris – Fransya