eSefarad Noticias del Mundo Sefaradi
Keridos amigos,
Despues de tener avlado de los djudyos del Yemen, abolto este djueves, para mi emisyon de radyo, a la Etika djudiya.
Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr Kale klikar arriva a la derecha sovre Ecouter Radio J en direct.
I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145
Saludos a todos
Edmond Cohen Paris Fransya
——————————————————————————————
LA ETIKA DJUDIYA (7)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya. http://www.radioj.fr/node/55
De otra parte, tengo de anunsyarvos ke el proksimo atelye de konversasyon de Vidas Largas se va tener el martes 5 de desyemre, en el Centre Communautaire, a las dos i medya (asta las kuatro i medya – sinko). Este diya se tendra tambyen la Asamblea jenerala de Vidas Largas)
l alhad pasado 19 de novyembre, tuvimos el omenaje al Profesor Sephiha ke fue, asigun mi, una seremoniya muy reushida. El Profesor mos izo una konferensya muy interesante sovre el vokabularyo venido del ladino en el diksyonaryo de Nehama. Munchos, inkluyendo yo mismo, vinyeron a felisitar el profesor. Rachel Bortnick, ke fundo Ladinokomunita, avlo por video desde Dallas (Texas), i Karen Gerson Sharon desde Estambol.
Esto dicho, despues de tenervos avlado de los djudyos del Yemen, abolto agora, por la setena vez, a la etika djudiya, tala ke se topa ekspozada en un artikolo ke topi sovre internet del haham liberal François Garaï, ke el mismo traslado i adapto del ingles un artikolo del haham ingles, liberal tambyen, John D. Rayner.
Kuando me kedi la ultima vez, ke fue al empesijo de mi emisyon del 2 de novyembre sovre los djudyos del Yemen, vos estava avlando de la etika legala, i antes de todo sovre el respekto del derecho, de la ley, akodrando ke el establesimyento de kortes de djustisya es una ovligasyon esensyala para toda sosyedad i aze parte de las syete leyes de Noah, leyes fundamentales para toda sosyedad (Sanhedrin 56a).
Los djuzgos deven ser inkoruptivles i imparsyales
Es una mitsva de render la djustisya en toda imparsyalidad i sin arreyevar presyones ajenas, asigun esta eskrito: » Y cohecho (regalo) no tomes, que el cohecho ciega abiertos (asyega los ke ven achik) y atuerce palabras justas» (Shemot, XXIII, 8). (Komo a mi uzo, vos di la traduksyon en ladino de la Biblia de Ferrara, ama no puedo kedar de akodro kon la traduksyon «palabras justas» kuando el teksto ebreo no es devarim tsadikim ama divre tsadikim, ke solo se puede trasladar «palavras de djustos», komo lo traslada, entre otros, el haham Garaï, i no palabras justas.) «No fagades tortura en el juizio, no rescibas (alses) fazes de mendigo, y no honrres fazes de grande; con justedad juzgaras a tu compañero» (Vayikra XIX, 15).
Las prochesuras deven ser djustas
Es una mitsva de render la djustisya de manera repozada, i de renderla djusta para todos, asigun esta eskrito: «De palabra de falsedad te alexa, y quite (inosente) y justo no mates, que no justificaré malo» (Shemot, XXIII, 7). Este teksto sirve de fundamyento a numerosas prochesuras tenyendo por eskopo ke el inosente no sea kondenado (Shevuot, 30b, 31a).
Testimonyos kabules (recevables)
Es una mitsva de no azer falso testimonyo, asigun esta eskrito: «No testigues en tu compañero testigo de falsedad» (Shemot, XX, 13) En syertos prochesos, en partikolar los prochesos kriminales, los testigos eran akavidados kon solenida kontra todo falso testimonyo ke puediya traer la kondenasyon a muerte de alguno (Sanhedrin IV, 5).
El kastigo deve ser kon umanidad
Afillu si asigun la Tora kondenasyones a muerte puediyan ser pronunsyadas i egzekutadas, komo esta eskrito: «Y no tomedes precio por alma de matador, que el condenado para morir, salvo matar sera matado» (Bamidbar, XXXV, 31), las prochesuras establesidas por los hahamim rendiyan kaji imposivle una kondenasyon a muerte. «Asigun Rabi Eliezer ben Azarya, un tribunal ke pronunsya una kondenasyon a muerte kada 70 anyos es yamado sanginaryo. Rabi Tarfon ansi ke Rabi Akiba disheron ke si aviyan estado en el Sanhedrin, este nunka pudyera pronunsyar una kondenasyon a muerte (Makot I, 10). Oy la mas grande parte de muestras leyes no tyenen kondenasyon a muerte, porke de una parte afita ke un inosente sea kondenado a muerte i matado por yerro, i de otra parte el karakter de egzemplo de la pena es leshos de ser prevado. En la misma idea, todo kastigo korporal deve ser proibido. La Tora eya misma aviya metido un limito a tales kastigos, asigun esta eskrito: «Quarenta lo fara herir, no añadira, porque no añada por herirlo sobre estos herida grande, y sera abiltado (ensuzyado) tu hermano a tus ojos» (Devarim, XXV, 3). Los hahamim limitaron este kastigo a 39, i dechidaron ke el kastigo deviya skedar si el kondenado no puediya mas soportar la aharvada. La ley del talyon eya misma (Shemot XXI,24; Vayikra XXIV, 20; Devarim XIX, 21) por siguro nunka fue aplikada tal i kual (salvo en kavzo de matansa). Los hahamim, para djuzgar estos echos, tomaron reglas de pagamyento. Ensima el el akuzado es prezumado inosente i es a la akuzasyon de yevar la preva de su kulpabilidad.
El kastigo tyene kuatro razones: la reparasyon de los danyos, la proteksyon de la sosyedad, la prevensyon i la reabilitasyon del kulpavle. Estas kuatro razones deven ser tomadas en kuenta por toda korte de djustisya.
Governos i sivdadanos
Los kapos deven governar kon djustedad
Los kapos de un pais deven servir a sus sivdadanos i azer para el byen de todos, porke «justedad enaltecera gente» (Mishle, XIV, 34). Lo ke dize la Tora avlando del rey ideal puede valer para el mundo de oy. «No mochigüe a el caballos, y no haga tornar al pueblo a Egypto por mochiguar caballos (…) Y no mochigüe a el mugeres, y no se tirara su corazon, i plata y oro no mochiguara a el mucho» (Devarim, XVII, 16 – 17) «No a vista de sus ojos juzgara, y no a oida de sus orejas reprehendera. Y juzgara con justedad mendigos, y reprehendera con derechedad por humildes de tierra (…) Y sera justedad cintero de sus lomos, y la verdad cintero de sus riñones» (Yeshayau, XI, 3 – 5) Juzgo juizio de pobre y desseoso» (Yirmiyau, XXII, 16) Oy, todo governo demokratikamente elijido puede inspirarse de estas palabras para governar kon djustedad.
La demokrasiya es la sola forma djusta de governo
Syertos egzemplos biblikos amostran ke el solo governo posivle es el ke es achetado por toda la povlasyon o por su mayoriya. Gideon ya teniya dicho: «No podestaré yo en vos, y no podestara mi hijo en vos; Adonay podestara en vos» (Shofetim, VIII, 23). Estas palavras amostran ke syertos redaktores biblikos eran kontra el sistema de la monarkiya ereditarya i se espantavan de los abuzos de poder ke esta forma de governo yevava munchas vezes. La Tora insiste sovre la importansya del Konsejo de los Vyejos (Shemot, III, 16, XXIV, 1) i es el Dyo el mismo ke institue este Konsejo de setenta personas ke tyene por misyon de governar el puevlo en ayudando a Moshe (Bamidbar, XI, 16 – 17, ver tambyen Ezra, X, 8). La alaha ordena ke en toda organizasyon de poder la mayoriya deve ser respektada, i este prinsipyo deve aplikarse en todas kozas. De aya puedemos travar ke toda organizasyon de poder deve ser reprezentativa i deve dunke ser elijida de manera demokratika. La istorya a dado razon a esta konsepsyon i malgrado sus imperfeksyones, la demokrasiya es el sistema politiko ke kale promover.
(Esto es lo ke esta eskrito en el artikolo ke vos esto meldando, artikolo de los hahamim Rayner i Garaï. Yo personalmente, Edmond Cohen, so mas shupeli sovre las vertudes de la demokrasiya, por una razon terrivle; es ke la mayoriya de la djente se puede yerrar en djuntos. I ke yerros…Nunka kale olvidar ke Hitler vino al poder de manera demokratika, elijido por djente ke pensava ke si Hitler diziya ke kaliya matar a todos los djudyos, es ke deviya tener razon. Nunka kale olvidar ke Petain obtuvo sus yenos poderes por un voto del Parlamento franses, i ke despues, una vez obtenidos sus poderes, aferro para entregar a los almanes los djudyos, ke sean kriaturas, mujeres o vyejos, ama tambyen los djudyos ajenos ke aviyan kombatido komo veluntaryos en la armada franseza. La demokrasiya, diziya Churchill, es un negro sistema, ama lo menos negro de todos los otros. Montesquieu pensava ke la demokrasiya vale solo kon la vertud komo kondisyon. Syerro mi paranteza personala).
Los sivdadanos deven ser respektuozos de la ley
El governo demokratikamente elijido deve ser konsiderado kon respekto por el sivdadano, i kada uno deve «requirir a paz de la ciudad que fize captivar a vos alli, y orad por ella a Adonay, que en su paz sera a vos paz» (Yirmiyau, XXIX, 7) i la Mishna mos dize ke kale «rogar a Dyo por el byen del governo, porke sin su temor los ombres se destruyen mutualmente» (Avot, III, 2). En los paizes demokratikos, la ley i el orden ke vyene de eya son las kondisyones de desvelopamyento de la sosyedad. Por esto es ke Shemuel en el 3en siglo diziya ke «la ley del pais es la ley» (Baba Kama 113a). Esta regla vale para todos lugares i todos tyempos, salvo kuando las leyes van kontra la morala. La rezistansya pasiva i mismo aktiva es en este kavzo akonsejada.
Los sivdadanos deven ser aktivos al seno de la sosyedad
El teksto de Yirmiyau sitado djusto antes («requirid a paz de la ciudad que fize captivar a vos alli, y orad por ella a Adonay, que en su paz sera a vos paz»), este teksto amostra ke kada uno tyene de djugar un rolo aktivo al seno de la sosyedad sivil i politika. El byenestar de todos deve giar kada sivdadano en sus desizyones politikas i en partikolar kuando esta yamado a dar su avizo en tyempo de eleksyones. Por esto es una mitsva de dizir su opozisyon kuando leyes o reglas meten en sekana el karakter demokratiko del pais o aharvan de manera endjusta una parte de la povlasyon, asigun esta eskrito: «Castigar castigaras a tu compañero (i el haham Garaï adjunta «i tus dirijantes»), y no llevaras sobre él peccado)» (Vayikra, XIX, 17). Es dunke un rolo aktivo ke es demandado a kada sivdadano. Esto vale tambyen para la vida sosyala, ekonomika i kulturala.
(De muevo tengo de avrir una paranteza, para dizir ke yo, Edmond Cohen, me syento enteramente de akodro kon el haham Garaï kuando dize ke kale opozarse a las leyes endjustas; lo ke no entyendo byen, es ke se funde sovre Yirmiyau, kuando este mos da la palavra del Dyo dizyendo de orar por Bavel, ke portanto no era el mijor egzemplo de demokrasiya. El teksto de Yirmiyau me parese ir mas de la vanda de Baba Kama («la ley del pais es la ley») ke de la vanda del psalmo 137, menos tyerno verso Bavel («Ija de Bavel la destruida, orozo kyen te pagara el mal ke mos izites)…Yirmiyau i Baba Kama no me paresen konvenir kuando el pais es la Almanya de Hitler. En los kales fransezes, tenemos el uzo de orar para la Republika franseza, dizyendo, entre otras kozas, ke keremos ke «guadre» su sityo gloryozo entre las nasyones. Ama kuando de Gaulle, en 1967, metyo el embargo sovre las armas para Israel, i disho despues ke el pueblo djudyo fue syempre «dominador», en mi kal Berith Shalom, el haham Moshe Cassorla, de bendicha memorya, troko un byervo de la orasyon i demando ke la Fransya «tope de muevo» su sityo gloryozo…manera de dizir ke lo teniya pedrido. Syerro la paranteza).
De Estado a Estado
La gerra deve ser evitada
Es una mitsva de bushkar todos los modos para topar la paz i de azer una ultima tentativa antes de deklarar la gerra, asigun esta eskrito: «Quando llegares a villa por pelear sobre ella, y llamaras a ella a paz» (Devarim, XX, 10). Esta mitsva ovliga los sivdadanos a egzijir de sus governo ke todo sea aprovado para evitar una gerra, i los governos deven bushkar todas las solusyones para evitar una gerra.
(De muevo una paranteza personala, de muevo a propozito de Hitler: kualo kaliya azer en 1938, kuando Hitler se atako a la Chekoslovakiya? La Fransya i la Ingletyerra bushkaron la paz en Munich i la obtuvyeron, olvidando sus alyansa kon los Chekos i abandonandolos, ama komo no akodrarse de lo ke disho Churchill a esta okazyon- sigunda vez ke lo sito -: «entre la gerra i la verguensa, eskojitesh la verguensa; tendresh la verguensa, i tendresh yene la gerra». Aprovar la paz, si. Ama al kualkier presyo? Puede ser no. Vamos a ver ke esto es lo ke mos dize el haham Garaï un poko mas leshos. Syerro la paranteza).
Es una mitsva de limitar las destruksyones i de no destruir lo ke produse i es nesesaryo a la vida umana, asigun esta eskrito: «Quando encastillares a villa (…) no dañes a su arbol» (Devarim, XX, 19). Toda gerra karrea destruksyones, ama la alaha insiste sovre la ovligasyon de limitarlas al maksimum, sovre todo por lo ke es de la salud i de los modos de produksyon de la komida. Esta mitsva mos ambeza tambyen ke los militares deven respektar la dinyidad umana de todos, inkluyendo la de los enemigos.
Las tensyones internasyonalas deven ser kuradas pasifikamente
El ideal de los profetas es ke «no alçara gente contra gente espada, i no deprendaran mas pelea» (Yeshayau, II, 4). Este ideal puede solo ser alkansado si kada uno aprova de rezolver los konfliktos de manera pasifika. A este propozito el Psalmista deklara: «Busca paz y siguela» (Teilim, XXXIV, 15). Esto kyere dizir ke en la solusyon de los konfliktos, la negosyasyon sea preferida a todo otro modo, i ke los paizes ke lo pueden sean kombidados a venir ayudar. El enemigo no deve ser dyabolizado, i kale desfiyarse de toda egzaltasyon del nasyonalismo. Esto no kyere dizir ke para evitar un konflikto devemos achetar la vyolasyon de los derechos de la persona o el establesimyento de rejimenes totalitares. Muestro dever es de opozarmos a esto por todos modos politikos, ekonomokos o militares (Sanhedrin VIII, 7).
(Esto vyene a konfortar lo ke yo dishe un poko antes: es siguro ke la paz es mijor ke la gerra, i ke todo lo ke se puede azer merese de ser echo en favor de la paz. Malorozamente, en vezes ay kozas ke no se deven de azer, afillu para salvar la paz, si por esto kale traisar i abandonar un alyado en favor de un asasino komo era Hitler).
Sovre esto tengo de kedarme para oy, i vos digo: astal djuves ke vyene, si kyere el Dyo!
Edmond Cohen
Paris Fransya
