eSefarad Noticias del Mundo Sefaradi
Keridos amigos
La semana pasada, empesi de kontarvos mi primer viyaje en Israel en 1955. Este djueves, vo eskapar de kontarvos esta istorya, i kontinuarla por mi sigundo viyaje, esta vez en djulyo 1967, despues de la gerra de los sesh diyas..
Saludos a todos
Edmond Cohen
Paris – Fransya
——————————————————————————————
MI PRIMER I MI SIGUNDO VIYAJES EN ISRAEL
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 29 de mais, a las dos i medya, en el Centre Communautaire. Venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera. http://www.radioj.fr/node/55
La semana pasada, empesi de kontarvos mi primer viyaje en Israel, en agosto 1955, ama no eskapi mi istorya i vo la kyero eskapar oy, i despues kontarvos mi sigundo viyaje, en djulyo i agosto 1967, despues de la gerra de los sesh diyas.
Kuando vos deshi la semana pasada, vos estava kontando ke, en agosto 1955, despues de dos semanas de lavoro, tuvimos un tiyul de tres diyas en el norte del Galil, durmyendo en kibutsim del Hashomer Hatsair. Uno de estos era djustamente el kibuts Bar Am, en el kualo pensava irme al empesijo. Kibuts de tres anyos, entero de fransezes, ke no teniyan dainda produktos de sus tyerras, porke kaliya en primero despiyedrarlas, aparejar, sembrar, ets. El KKL les prestava tyerras leshanas para lavorarlas asta ke las suyas sean prontas para dar a komer.
Despues del tiyul en kamyon, me akodro tambyen ke mos fuimos kon treno a Yerushalayim. Kuando digo Yerushalayim, kale entender Yerushalayim oeste, la parte djudiya de la sivdad, separada por paredes de la parte araba, ke inkluiya la vyeja sivdad i su Kotel. Esta parte araba era okupada por la armada de Jordaniya ke interdiziya la entrada de kualkyer djudyo en su parte, sin ke la UNESCO ni la ONU se preokupen de la koza.
Vos dishe ke mos fuimos en treno a Yerushalayim. Nunka me olvidaré mi emosyon kuando ayegi a la estasyon ande se puediya meldar: Jerusalem. Yerushalayim no es una kualkyera sivdad. Es la sivdad enklavada en el korason de kada djudyo, sonyada, imajinada, i na ke agora era delantre de mi…
Mos suvimos al Migdal David, la Torre de David, para aprovar de ver de leshos – yo no pude ver nada – el Kotel, defendido a los djudyos… El mundo entero topava muy natural ke el Kotel sea defendido a los djudyos, komo las tombas de Hevron…
Despues de estas vijitas, mos separimos i yo me torni a la sivilizasyon, kijo dizir ke me fui a topar mi padre en su otel-palasyo de Haïfa. Tanto yo paresiya a un sedakero, a un sorretero, ke mi padre no se atrivyo a desharme entrar ansina en el palasyo. Suvyo a su kamareta tomar vestidos muevos i limpyos, me los trusho en la uerta del otel, i eskondido en la uerta me troki de vestidos para apareser de benadam al otel…
Despues me fui kon mi padre en Tel Aviv para vijitar a la famiya, djente ke oy tyenen 63 anyos mas… por los ke dainda son en vida. La ke vide bebika agora es vava…
Lo ke se paso en este viyaje, es ke me senti muy fuerte el sentimyento ke me topava en kaza…Komo dizir? Yo kaminava en las kayes de Tel Aviv sintyendome aboltado a kaza despues de dos mil anyos…Antes de ser una idea politika, el syonismo es un sentimyento ondo. Esto es lo ke no entyenden los ke ven en Israel un estado kolonyal, kuando en vedra no es otra koza ke la kaza de los djudyos…
Por lo tanto, empushado por mi padre, yene me abolti en Fransya, i yene i bivi…Dodje anyos se pasaron. El estudyante en derecho ke era se izo avokato a su kuenta, kuando afito en mais 1967, en estos diyas ama 51 anyos antes, la krizis ke se eskapo el 5 de junyo por la gerra de los sesh diyas. Ir a gritar en las manifestasyones es una koza, ama me pensi ke kaliya ir aya ayudar a Israel, no en kombatyendo en su armada ke de toda manera no teniya menester de mi, ama en indo remplasar en sus lavoros los kazalinos idos a la gerra. Kyen puediya pensar ke esta gerra se eskapariya en sesh diyas?
Esta vez me eskrivi komo mitnadev, veluntaryo, ama kuando tomi el treno para ir al vapor, la gerra ya se teniya eskapado tres semanas antes. Ya eramos al empesijo de djulyo 1967. Esta vez el vapor era un vapor israelyano yamado Dan, ke se iva no de Marseille, ma de Venezia.
Es en Venezia ke konosi a los otros ke aziyan parte de mi grupo, entre los kuales un mansevo trostkisto de 19 anyos. Oy es doktor psikyatro. No sé kualas son sus ideas oy, ama en 1967, teniya de eskojer entre sus ideas trotskistas i sus sentimyentos djudyos. Komo trotskisto, diziya ke son los arabos ke tyenen razon, ama komo djudyo, adjuntava ke el era djudyo, i kapara para los arabos…el aviya eskojido la vanda djudiya!
En muestro grupo eramos todos fransezes, ama en el vapor aviya djudyos de todas partes, i, syendo ke mos ivamos de Venezya, munchos veluntaryos djudyos italyanos. Me akodro de uno ke teniya un chapeo en forma de kova tembel ande estava eskrito: io sono per Israele. Ansina la koza era dicha!
En Haïfa pasimos una noche en un otel, asperando ke vengan a bushkarmos. No un otel de lukso. Era un otel ande la kamareta de durmir era un durmitoryo para munchos. No era un otel de turismo. A la demanyana mos vinyeron a tomar, esta vez no saviyamos ande mos ivamos. Solo saviyamos ke era en un kibuts. Ama ke kibuts i ande? esto no saviyamos.
De fakto, komo dodje anyos antes, me topi yene en el norte del Galil, no leshos de Lehavot Habashan, en el kibuts Dan, ke ya me teniya ido a vijitar en 1955.
Antes de ayegar al kibuts, mos demandavamos, kon mis amigos, en ke hal ivamos a topar el Galil. La buena sorpreza fue de ver ke no aviya munchas destruisyones.
En el kibuts mismo, una sola destruisyon, … la pisina. Los Siryanos no aviyan topado otra koza de bombardar ke la pisina! Kapara por la pisina. Nu pudimos tomar banyos…
Kualo eran las diferensyas kon dodje anyos antes? Eran munchas, ama la ke fue la mas evidente, es la paz. Syerto, el kibuts, komo el pais entero, era yeno de askeres, ama la paz es ke las paredes de ilo de fyerro no eran mas asendidas, se puediya entrar i salir del kibuts komo se keriya, mismo en medyo de la noche, el kibuts era siguro, i arriva los kanones eran israelyanos i no mas syryanos.
Komo mos topavamos a la frontera de la Syrya, tuve la gana de vijitar el Golan, i kon un amigo franses, un shabat ande no teniyamos lavoro, mos alevantimos muy demanyana i mos fuimos los dos a pye en el Golan. La karretera era dainda yena de tankes destruidos. Kaminimos asta ke topar una araba militar ke acheto de tomarmos en autostop, kale dizir ke, en mas de muestros papeles, teniyamos una «kartis mitnadev», karta de veluntaryo, i ansina es ke ayegimos en Kuneitra ke vijitimos, una sivdad vaziya de sus moradores, ke aviyan fuido a la yegada de los Israelyanos, deshando las kazas avyertas. Despues mos topimos otra araba militar ke mos tomo i mos yevo asta serka de muestro kibuts.
Poko despues, en una siduta, los myembros del kibuts dechidaron de avrir una ekstensyon del kibuts en el Golan. Eramos solo en julyo, manko de dos mezes despues de la kaida del Golan. Era klaro ke para los Israelyanos, el Golan aboltava a Erets Israel, i no era kuestyon de darlo atras a los Syryanos.
Vos akodro ke, en Kipur 1973, los Syryanos aprovaron de rekonkistar el Golan, i unos kuantos diyas lo reusheron mas o menos, ama despues la armada israelyana no solo pudo rekonkistar su territoryo, ama kontinuo asta ayegar a 40 kilometros de Damas. Vos akodro tambyen ke, malgrado la opozisyon de la ONU, Israel a aneksado el Golan en 1981. Para Israel, el Golan aze agora parte de Israel i no mas de la Syrya. Ay por esto razones istorikas i de siguridad, ama mi emisyon de oy kyere ser solo una emisyon de rekodros personales, i no me vo apezgar sovre konsiderasyones de politika internasyonala, afillu el grande interes de la koza.
No me kyero tampoko apezgar aki sovre la vida en el kibuts, porke no era diferente de dodje anyos antes, salvo ke dodje anyos antes dormiyamos en la eskola, ama esta vez en la eskola ya durmiyan los veluntaryos inglezes, i mozotros los fransezes, a lo manko los ombres, mos topimos en los abrigos de basho de la tyerra. Ama yo, kon mi asmo, no pude soportarlo, i por razon medikala, me metyeron kon los inglezes. Ansina fue ke me ize amigo kon el inglez de mi kamareta, un mansevo de 19 anyos ke se topava ser un Cohen komo yo, i ke era mas british ke kualkyer ingles.
Me akodro ke teniya, el tambyen, problemas de salud i teniya de tomar una melezina muy amarga. No la keriya tomar por esto, i yo aprovava de enkorajarlo, dizyendole ke vino aki para kombatir komo asker, ke teniya de ser korajozo, i ke, al kavo al kavo, esta melezina no lo iva matar. Me mira i me responde komo un british gentleman: «The taste will kill me…» La savor me va matar…grasyozo, no?
Aviya, dishe, veluntaryos inglezes. Aviya tambyen veluntaryos arjentinos. Yo avlava en inglez kon los unos i en espanyol kon los otros.
Los inglezes lavoravan sovre todo a las mansanas, mozotros los fransezes, lavoravamos sovre todo en los kampos de algodon.
Ama lo ke kyero kontar agora es komo era el pais en 1967, i sovre todo komo eran los territoryos okupados .
Por lo ke es del pais, la primera koza ke se puediya ver, es ke toda la mansevez, mansevos o mansevas, eran askeres, i kaminavan en las kayes, el tufenk al ombro, ma desbragados komo nunka se podriya ver en Fransya.
Aviyan reushido el nes de destruir en solo kuatro diyas las armadas djuntas de los Ejypsyanos de Nasser i de los Jordanyanos de Hussein, i de konkistar en estos kuatro diyas toda la Palestina inkluyendo Yerushalayim i Gaza, i en mas el dezyerto del Sinay, i en dos diyas mas de destruir la armada syryana i de konkistar el Golan, lo todo tan presto ke por una vez los Rusos i los Amerikanos no tuvyeron tyempo de azer kualkyer koza.
Oy no me akodro muy byen komo era Tel Aviv. Me akodro solo ke me fui a morar unos kuantos diyas ande mis primos de Tel Aviv, ke merki livros, pules, diskos…
A parte de Israel, lo ke era interesante de ver, eran los territoryos konkistados, i por siguro i por empesar, la parte este de Yerushalayim, i en eya la vyeja sivdad i el Kotel. Kuando pude ver el Kotel, los hanes ke se topavan djusto delantre ya aviyan sido derrokados, i el Kotel se puediya ver entero. Ke emosyon! Pishin vinyeron a mi hasidim kon tefillin en la mano, i me metyeron los tefillin, i delantre la Pared me izyeron meldar el Shema…Djulyo 1967…Komo olvidar tal momentos istorikos?
Ama no aviya solo Yerushalayim de ir a mirar. Kale dizir ke, en djulyo 1967, afillu si el Fatah de Yasser Arafat ya egzistiya en sekreto, no aviya dinguna sekana de kaminar en las kayes de la sivdades de los territoryos. Me fui en Naplouse, Betlehem, Hevron, Jericho, la parte este de Yerushalayim, Gaza, sin dinguna proteksyon. Por siguro, los arabos no eran muestros amigos. En sus botikas, se puediyan ver los retratos de Nasser, ke dingun asker israelyano le demandava de kitar. Ama en mismo tyempo, las botikas arabas de livros o de gazetas vendiyan livros kontando las viktoryas de Israel, kon la foto de Moshe Dayan. El komersyo antes de todo!
En Hevron, pude abashar en la grota de Mahpela ande Avraham aviya merkado el lugar para enterrar a su famiya. Oy, para la UNESCO, es un monumento palestinyano, i nada mas…
Dodje anyos antes, mi padre aviya venido serka de mi en Israel, esta vez fue mi tiyo Leon, i kon el es ke me fui en Gaza, merkimos fruta en el charshi. En este tyempo, no aviya ni Hamas ni este modo de koza, i un djudyo puediya kaminar en las kayes de Gaza komo si se topava en medyo de Tel Aviv…Las kozas trokan…
Tambyen kon mi tiyo, entrimos kon otokar en el Sinaï, i mos fuimos asra El Arish, ande no pudimos entrar, por razones militares. Me akodro ke empesimos, mi tiyo i yo, a komer muestro dezayuno, asentados sovre la safra, i por esto mundi un pepino, metyendo las kashkaras al lado de mi. I veo kriaturas ejipsyanas aserkandosen de mi a poko a poko…Solo saven avlar arabo, i no ay dinguna komunikasyon entre mozotros. Tomando mas koraje, vyene una kriatura i toma las kashkaras de pepino para komerlas. Ma todos sus amigos aprovan de tomarselas para komerlas eyos tambyen. Una bataya jenerala para kashkaras de pepino…
Deke esta ambre en El Arish en julyo 1967? No lo supe, ama lo vide. Mi tiyo i yo no puediyamos nada para estas kriaturas. Aviyamos eskapado muestra komida, i no mos kedava nada…
Es tambyen kon mi tiyo ke izimos una vijita por avyon del dezyerto de Sinaï, asta el Golfo de Suez.
En estos tyempos de 1967, me akodro ke la politika del governo de Levi Eshkol era muy avyerta. Israel asperava azer la paz kon los arabos, i esto siguro ke no uvyeramos la situasyon de oy si los arabos no aviyan dechizado, el primo de septyembre en Khartoum, los tres «no»: No a la paz, no a la rekonosensya de Israel, no a kualkyer negosyasyon kon Israel.
Son estos tres «no» ke yevaron Israel a mantener la okupasyon de los territoryos, ke fue al empesijo koza flaka. Politika de los puentes avyertos, libertad para los palestinyanos de entrar en Israel, sea para vijitar, sea para lavorar. Son la suvida del Fatah i del terrorismo ke rendyeron la okupasyon mas dura…ama de muevo esto empesando a avlar politika en vez de kontar mis rekodros, los kuales, en vedra, ya s’eskaparon: Mi tiyo abolto kon avyon, yo kon el mizmo vapor Dan, i el treno de Venezia a Paris, i kon esto se eskapa mi emisyon de oy.
Al djueves ke vyene, si kyere el Dyo!
Edmond Cohen
Paris, Fransya
