eSefarad Noticias del Mundo Sefaradi
Keridos amigos
Mijores dezeos a vozotros todos para esta mueva anyada sivil. Komo a kada anyo, lo empeso por una rekapitulasyon de las 32 emisyones ke ize el anyo ke paso.
Saludes a todos
Edmond Cohen
Paris – Fransya
——————————————————————————————
UN ANYO DE RADYO 2018
Saludes i anyada sivil buena para todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 8 de janvier, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyzere, en klikando sovre las emisyones del djueves despues de mediudiya.
http://radioj.fr/node/55
Ay pokos diyas, resivimos kon muncha pena el triste haber de la pedrita del grande eskrivano Amos Oz, muerto de un kanser a los 79. Vos avlava la semana pasada de Naomi Shemer, muerta eya tambyen de un kanser a los 73. Negra hazinura ke tomo a dos de las mas grandes figuras, no solo de Israel, sino tambyen del puevlo djudyo, i asigun mi de la umanidad en jeneral.
I ay tambyen unos pokos diyas, mos ambezimos de la muerte, a la edad de 108 anyos, de Georges Loinger. Este ombre fue un grande rezistante al seno de la organizasyon de scoutes djudyos yamada la sejena. En la emisyon ke ize el 29 de janvier 2015, kijo dizir ay kaji kuatro anyos, sovre los scouts djudyos, vos diziya lo ke sige : « El lavoro de la Sejena era de aprovar de azer pasar en Suisa lo mas posivle de kriaturas djudiyas. Uno de los ke se okupava de esto era Georges Loinger, nasido en 1910, i ke teniya dunke 34 anyos en 1944. Agora tyene 104 i le dezeamos ke biva asta 120 (ya izo lo mas yuch!). El tambyen kontribuyo a salvar un alay de kriaturas. »
Vos avlaré, si kyere el Dyo, de Amos Oz i de Georges Loinger el djueves ke vyene, porke no se puede avlar de eyos dos en solo unos kuantos byervos, i ke para oy dechidi, komo a mi uzo desde unos kuantos anyos, de akodrarmos en djuntos de las 32 emisyones ke vos ize durante este anyo 2018. Los ke son interesados de topar el teksto de mis emisyones lo podran (salvo dos, la del 15 de marso ande tuve una entrevista en franses kon Maurice Soustiel, i la del 20 de septyembre ande tuve una entrevista en franses kon Evelyne Lagardet) indosen sovre los sityos de Ladinokomonita (por esto kale ser o azerse myembro – es de baldes i vo lo akonsejo muncho – i bushkar los files a mi nombre (Edmond Cohen) o de eSefarad (i tambyen aya bushkar los eskritos a mi nombre).
Ama antes de empesar, komo vine aki a la radyo kon mis inyetizikos bohores, los desho saludarvos, keridos oyentes :
« Saludes a todos. So Lior, ya vos avli aki de kuando era chiko, ama agora tengo onze anyos, tendré dodje en marso proksimo, i si kyere el Dyo, kumpliré minyan el anyo de despues. »
« Saludes a todos. Me yamo Annaelle, tendré mueve anyos en tres semanas. Lior i yo tenemos tambyen una ermanika de dos anyos i medyo, Eden, ama dainda no save avlar aki. »
Esto dicho, i para aboltar a mis emisyones del anyo pasado, la primera de mis emisyones de 2018, el 11 de janvier, fue para azer, komo oy, la rekapitulasyon de mis 32 emisyones de 2017.
El djueves de despues, 18 de janvier, empesi de avlarvos de los djudyos de Irak, akodrandovos ke la istorya del ombre empesa kon Adam ke nasyo en el Gan Eden en Irak, i ke la istorya del puevlo djudyo empesa kon Avraham ke el tambyen nasyo en Ur, kijo dizir en Irak, afillu si al tyempo se yamava Kaldea i no dainda Irak. En esta primera emisyon, tuve de kedarme en 1941.
Dos djueves despues, el 25 de janvier, kontinui kon los djudyos de Irak, del Farhud de 1941 a la dezaparisyon de la mas vyeja komunidad djudiya en el mundo. I kuando eskapi kon los djudyos de Irak, ke agora en mayoriya biven en Israel, vos tuve de avlar del eskrivano israelyano Aaron Appelfeld, ke mos desho el 4 de janvier 1978, avra un anyo amanyana.
El djueves de despues, primo de fevrero, ize una emisyon intitolada « Kozas i otras Varyos haberes ». Vos avli de un papirus topado del siglo syete antes de la era kristyana, avlando de Yerushalem ansi yamada, del tyempo de los reyes de Yeuda ; de un pergamino de la Mar Muerta ke era en pedasikos i ke dos savyos reusheron a rekonstituar, i ke se topo ser un kalendaryo partikolar ; de una dodjena grota topada serka de Qumran, kon tinajas rotas sin manuskritos, deve ser arrovados ; vos avli tambyen de la situasyon de los arabos israelyanos asigun las statistikas. El numero de arabos indo a la Universidad pujo de 78% en syete anyos, i la esperansa de vida de los arabos israelyanos es la mas larga de todo el Medyo Oryente, inkluyendo paizes rikos komo Katar o Bahrein. Vos avli tambyen de la suvida de las aguas en Paris, mezurada sovre el shalvar del zouave del ponte del Alma. I eskapi avlandovos de varyos enemigos de los djudyos i de Israel, i de sus lokuras sovre internet.
El djueves de despues, 8 de fevrero, vos avli de Ivan Tcherniakhovski, grande jeneral sovyetiko ke komandava el fronte del norte kontra los Almanes en Rusiya durante la sigunda gerra mundyala, ke era djudyo, i ke muryo matado al kombate el 18 de fevrero 1945 despues de aver sido el primer Ruso a entrar en territoryo alman (en Prusa Oryentala).
El djueves de despues, 15 de fevrero, vos avli de israelitos azyatikos o afrikanos, en primero los Shinlungs o Kukis, ke biven en Indya, a la frontera de la Birmaniya, i ke dizen desender del trivo de Menashe. 7.000 entre eyos izyeron sus aliya i biven en Israel, en los territoryos. En Afrika, avli de los Danitos de la Côte d’Ivoire, de los Ibos o Igbos del Biafra, de los Lemba del Zimbabwe ; no avli de los Etyopyanos, porke ya avli de eyos en otra emisyon de 2010.
Dos djueves mas despues, primo de marso, mi emisyon fue en fransez porke arresivi el Doktor Maurice Soustiel ke konto, en un livro intitolado 146 Boulevard Haussmann, la istorya de su padre, djudyo selanikli, ke era antikadji i ke tuvo munchos dertes durante la okupasyon almana. Lo kuryozo es ke yo, kuando empesi komo avokato, lavori ande un avokato ke morava al 144 Bd Haussmann, djusto al lado de Soustiel kon kyen el era amigo !
Los dos djueves de despues, 8 i 15 de marso, ize una meldadura del komentaryo del Meam Loez sovre un kapitulo de la Megila de Ester, eskrito por el haham Rafael Hiya Pontremoli en 1864. Trata del deskuvrimyento por Mordehay de una konspirasyon kontra el rey Ahashverosh, i komo la izo saver a Ester ke lo disho al rey de parte de Mordehay.
El djueves de despues, 22 de marso, empesi de avlarvos de los djudyos de Rusiya, de la antikidad asta 1903, la kontinui el djueves 12 de avril por la istorya trajika de los pogromes tsaristos, del proseso de Kiev en 1913, despues de la revolusyon bolchevika , de la gerra sivil i de sus muevos pogromes por todas vandas, i despues de la shoa, sovre todo por los einsatzgruppen.
I el djueves 26 de avril, eskapi mi istorya de los djudyos de Rusiya avlandovos de la epoka despues de la gerra antes i despues de la muerte de Stalin, de los refusnikes, komo Eduard Kuztetsov (sovrino de la famoza Elena Bonner, mujer djudiya de Andreï Sakharov), Ida Nudel i Natan Sharansky, i de lo ke se paso despues de la kaida del komunismo, la aliya de masa de los djudyos rusos.
El djueves de despues, 3 de mais, avli del grupo Manouchian, un grupo de rezistantes komunistos de Paris kaji todos ajenos, ma no todos, inkluyendo munchos djudyos lehlis, ma tambyen espanyoles, ermenis komo el kapo Manouchian, ets. 22 ombres fueron fuziyados el 21 de fevrero 1944, i una mujer dekapitada poko despues. El eskrivano komunisto fransez Louis Aragon eskrivyo en 1955 una muy ezmovyente poeziya kontando la koza, i el kantador Leo Ferré la metyo en muzika kon el titolo L’affiche rouge (el avizo korolado).
El djueves de despues, 10 de mais, konti mi primer viyaje en Israel, en agosto 1955, kuando yo teniya 18 anyos i el estado de Israel 7. Konti mi viyaje kon vapor, i despues mi vida en un kibuts marksisto del Hashomer Hatsaïr, ke se yama Lehavot Habashan.
El djueves de despues 17 de mais, eskapi kon mi primer viyaje, i konti mi sigundo, esta vez en djulyo 1967, poko semanas despues de la gerra de los sesh diyas. Esta vez yo teniya 30 anyos, i el estado, ke veniya de obtener una viktorya total i inkreivle sovre Ayifton, Jordaniya i Syriya, teniya 19 anyos. Me topi yene en el Galil a la frontera de Syrya, no mas en Lehavot Habashan, ama no muy leshos, en el kibuts Dan, de la misma obedensya Hashomer Hatsair.
El djueves de despues 24 de mais, empesi la istorya de los sultanes osmanlis i los djudyos, sultanes ke, afillu si eran kalifes, kijo sizir kapos del Islam, se amostraron en mayoriya tolerantes i mismo amistozos kon los djudyos, i esto mismo antes de los osmanlis, kon los sultanes seldjukis. Esta amistad i proteksyon empeso muncho antes de 1492, ama todos konosemos aki la devda ke tenemos verso el sultan Beyazit II ke salvo a munchos de los djudyos espanyoles arondjados por los Reyes Katolikos, akojendolos en Turkiya ande se kedaron kyetos siglo despues de siglo.
El djueves de despues 31 de mais, kontinui esta istorya ke teniya deshado kon Beyazit II, i me fui asta el ultimo sultan osmanli, Mehmet VI, ke va pedrer el poder en 1922, i es Mustapha Kemal ke va tomar el poder en su lugar, i va empesar en 1923 la repuvlika turka. Es una otra istorya.
Tres djueves de despues 21 de djunyo, ize una emisyon sovre el ke fue prezidente de onor de Vidas Largas, Jacques Aelion, ke ya era amigo i mushteri de mi padre i de mi despues, i meldi una konsejika ke teniya eskrito, intitolada Shalom el Chiplak (el prove). Kuando eskapi mi meldadura, aprovi de dar a entender la rikeza del stilo selanikli de Jacques.
El djueves de despues 28 de djunyo, ke era el ultimo antes de las vakansas de enverano, despues de tener avlado de la muerte de Gena Turgel, sovrebivyente de Auschwitz, liberada en avril 1945 del kampo de Bergen Belsen por la armada ingleza, entre los kuales un syerto Norman Turgel, djudyo, ke va kazarse kon eya. Despues meldi el diskorso ke Robert Cohen, djudyo de orijen selanikliya ke biviya en Nice, izo por la medaya de Djusto a Albert Bonnet, el Djusto ke salvo a su nono Efraim . Yo topi este « diskorsiko de un inyeto » en la gazeta El Amaneser.
Dos mezes de vakansas pasaron, i el djueves 6 de septyembre ize una emisyon sovre los ke mos aviyan deshado durante el enverano : Claude Lanzmann, fransez, Moshe Mizrahi i Uri Avnery, israelyanos.
Dos djueves mas despues, mi emisyon fue en franses porke arresivi a la eskrivana Evelyne Lagardet, ke eskrivyo un muy ermozo livro intitolado La Maison Rozenbaum, ke konta la istorya de una mujer metida por su ijo en una kaza de vyejos.
El 27 de septyembre, la klinika ande me teniya ido para kurar syertos problemas ke tengo para respirar (maldicha vejes !) me desho salir un poko demaziya tadre i no alkansi a la radyo a la ora de mi emisyon. Ama pude enrejistrarla i paso el djueves de despues 5 de oktovre. Despues de tener avlado de Marceline Loridan Ivens i de Ida Grinspan, dos otras sovrebivyentes de la shoa ke veniyamos de pedrer, avli de tres byervos ebreos ke se asemejan ma no son la misma koza : kadosh, tsadik, i hasid.
El djueves de despues 11 de oktovre, ize mi emisyon sovre Charles Aznavour, el kantador franses de orijen ermeniya, muerto a los 94, grande amigo del puevlo djudyo i del estado de Israel, ke entre otras kozas kompozo i kanto una muy ermoza kantika sovre Yerushalayim. Su famiya (padre i madre) eskondyeron djudyos durante la gerra, i eskondyeron tambyen a Melinée Manouchian, la bivda de Missek Manouchian, bushkada por la Gestapo komo rezistante eya tambyen.
Despues, los djueves 25 de oktovre, primo, 8 i 15 de novyembre, konti la tan trajika istorya de los djudyos de Polonya, o komo una komunidad de tres milyones i medyo de djudyos, ke fue la mas grande de Evropa i un tyempo del mundo, dezaparesyo enteramente entre la shoa i los komunistos despues.
El djueves de despues 22 de novyembre, para salir un poko de este apretamyento de korason, avli de Djoha, en vedra muzulmano ama ke los djudyos de los Balkanes tomaron para eyos asta azerlo djudyo, i konti unas kuantas de sus mas famozas istoryas, para reir un poko.
El djueves de despues 29 de novyembre, avli de Max Nordau, amigo i kompanyero de lucha de Theodor Herzl, i ke fue por esto uno de los padres fundadores del syonismo politiko.
I ansina ayegimos al mes pasado de desyembre, ande, el djueves 6, vos avli de mis pensamyentos sovre la vida i la muerte, en vedra sin darvos dinguna repuesta, solo kuestyones…
El djueves de despues 13 de desyembre, ize, kon muncha ozadiya porke no tengo la kompetensya para esto, una emisyon sovre el ladino, el haliz, ke no kale konfundir kon la lingua avlada.
I eskapi el anyo 2018 el djueves pasado 27 de desyembre kon una emisyon sovre la maraviyoza Naomi Shemer, ke eskrivyo tan ermozas kantikas ke me esforsi de trasladar al djudeo-espanyol, lo ke no era koza kolay para uno ke, komo yo, kaji no entyende al ebreo…
Agora ya vino el tyempo de eskapar mi emisyon, syendo ke eskapi a la vez el anyo 2018 i los 20 minutos de mi emisyon de oy. Me keda de desharvos dezeandovos de muevo anyada sivil buena i dizyendovos al djueves ke vyene si kyere el Dyo !
Edmond Cohen
Paris, Fransya
