eSefarad Noticias del Mundo Sefaradi
Keridos amigos
Mi emisyon de djueves va ser sovre Moshe Arens ke mos desho la vida a los 93, el 7 de este mes. Ensima de ser un ombre politiko, fue tambyen un istoryano de la ZZW, esta organizasyon de rezistansya djudiya ke lucho en el Ghetto de Varsovia al lado de la organizasyon komandada por el famozo gibor Mordehaï Anielewicz. A la diferensya de lo ke se paso kon la OJC, ande uvo unos kuantos sovrebiyentes, inkluyendo syertos de primer plano, komo Marek Edelman, kapo del Bund i djusto basho Anielewicz, ke pudyeron kontar lo ke se paso, todos los ombres de la ZZW fueron matados en los kombates del ghetto, i por esto no se save muncho sovre eya.
Saludes a todos
Edmond Cohen
Paris – Fransya
——————————————————————————————
MOSHE ARENS – LA ZZW
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 22 de janvier, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55
El 7 de este mes de janvier se muryo en Savyon, sivdadika no muy leshos de Tel Aviv, Moshe Arens. Uvyera tenido de avlar de el en mi emisyon de la semana pasada, 10 de janvier, ma no teniya bastante tyempo para aparejar un teksto sovre este ombre, ke meresiya una syerta atensyon, no solo por el rolo politiko ke tuvo en la istorya del estado de Israel, ma tambyen por sus estudyos istorikos sovre la rebuelta del ghetto de Varsovia en jeneral, i el rolo del grupo dicho ZZW en esta rebuelta en partikolar.
Moshe Arens nase en desyembre 1925 en Kaunas, en Lituaniya, de un padre industriyal i de una madre dyentista. Kuando tyene un anyo, su famiya se va kon el en Riga, kapitala de la Lettoniya. Aya se va a la eskola, ma en 1939, su famiya tyene la muy buena idea de fuir en Amerika, ande su padre teniya interesos. Moran en New York, i Moshe aze sus estudyos en la George Washington High School.
Muy manseviko, Moshe entra en el movimyento Betar, serka de los revizyonistos de Jabotinsky, ke el mismo se muryo en 1940. I muy presto se aze un kapo en este movimyento. Kuando empesa la gerra, Moshe tyene solo 16 anyos. Yene va entrar en la armada amerikana, no se a ke edad, para servir komo serjente (kijo dizir un poko mas alto ke asker, ama mas basho ke zabit) ama en el puerpo de los injenyeros.
En 1948, Moshe Arens, agora un ombre de 22 anyos, aze su aliya i pishin entra en el Irgun de Menahem Begin, ma el estado de Israel ya egziste i el Irgun embiya a Arens en el Maroko i la Aljeriya, ma tambyen en Evropa, a la vez para ayudar la aliya de los ke kyeren irse, i para ayudar a los ke kedan a organizarse en grupos de autodefensa (vyeja idea de Jabotinsky).
En marso 1949, abolta en Israel, ande lavora komo injenyero en una kompaniya amerikana lavorando sovre el aprovizyonamyento en agua de Tel Aviv. En mizmo tyempo, es uno de los fundadores del partido Herut, kontinuasyon politika del Irgun de Menahem Begin. Ma no keda muncho en Israel, syendo ke en 1951, abolta en Amerika para kontinuar sus estydyos de injenyero, al falmozo MIT (Massashusets Institute of Technology) i despues mas presizamente la injenyeriya aeronautika al Instituto de Technolojiya de Californiya, ande tyene komo profesor el kinezo Qian Xuesen (ke va ser el padre de los programas spasyales kinezos). Una vez diplomado, Arens se keda un syerto tyempo en Amerika para lavorar en la industria aeronautika.
Despues Arens abolta en Israel ande va ser de 1957 a 1962 profesor al Technion de Haïfa.
Despues de la gerra de Kipur, Arens dechida de entrar en politika i se prezenta en la lista del partido Likud (ke a remplasado el Herut en alyandose kon otros partidos de la derecha i del sentro) para las eleksyones a la Kneset. Es elijido i entra en la Kneset komo deputado el 21 de janvier 1974. Va ser reelijido en 1977, en mizmo tyempo ke Begin toma el poder, i va kedar deputado del Likud asta 1981, ande va ser reelijido, ma va kedar deputado solo un anyo porke Begin lo aze en 1982 embashador de Israel en Washington.
Esto mos amostra ke Begin teniya konsiderasyon verso Arens, afillu si Arens, ombre de konviksyon, era independyente i, por egzemplo, se teniya opozado, en 1978, a ke Begin firme kon Sadate los akodros de Camp David de paz kon Ayifton. Arens no era kontra la paz por prinsipyo, ma estimava ke render el Sinaï era pagar un presyo demaziya karo para esto. Antes de azerlo embashador en Washington, Begin ya le aviya, en 1980, propozado de azerlo ministro de la defensa, ma Arens refuzo, porke no keriya ser el ombre ke va dirijir el travamyento del Sinaï.
Kale dizir ke Arens fue syempre konsiderado komo un falkon, lo ke era, ama las kozas no son nunka tan klaras. Por egzemplo, una koza ke nunka entendi asta oy, es : deke Arens, ombre a la derecha de la derecha, eskriviya sus artikolos en la gazeta Haaretz, a la syedra de la syedra ? Es un poko komo si Marine Le Pen eskriviya sus artikolos en L’Humanité…I no esto avlando de un artikolo de vez en kuando, no. Si vos vash sovre el sityo de Haaretz i bushkash los artikolos de Moshe Arens, veresh ke solo en 2018, el anyo antes de su muerte, kuando ya teniya 92 anyos, eskrivyo kaji kada semana, su ultimo articolo syendo del 27 de desyembre, a pokos diyas de su muerte. En todo, konti 45 artikolos para el solo anyo 2018 !
https://www.haaretz.com/misc/writers/WRITER-1.4968174
I si vos vash sovre el sityo de Moshe Arens el mismo, toparesh 400 artikolos ke eskrivyo despues de 2001, i esta eskrito abasho, en ingles, ke si no es presizado otra koza, el artikolo paresyo en el Haaretz !
Esto todo era solo para dizirvos mi sorpreza, primo de ver la kualita i la varyedad de tantos artikolos, lo mas politikos, eskritos por un ombre bastante aedado ke no era mas en los echos, i sigundo de verlos eskritos en una gazeta al otro lado de la vanda politika de Arens. Ama es vedra ke en vezes Arens se amostra, en toda libertad, kritiko kontra el governo de su protejado Netanyau, por egzemplo kuando trata de la pared entre syertas males arabas de Yerushalayim i el kusur de la sivdad (yo ni saviya ke egzistiya esta pared, ke Arens kyere ver derrokada).
https://moshearens.com/2018/02/19/take-down-that-wall-in-arab-east-jerusalem/
Esto dicho, akonsejo a mis keridos oyentes ke entyenden el ingles de ir a meldar sino los 400 artikolos, a lo manko uno o dos, no sera tyempo pedrido.
I agora, despues de esta muy larga paranteza, tengo de aboltar a la istorya de la vida de Moshe Arens, ke deshi embashador en Washington, para akodrarvos, si ya lo saviyash, ke Arens se yevo kon el en Washington, komo ayudante, a un syerto Binyamin Netanyau, de 32 anyos en este tyempo, ermano de Yonatan Netanyau, el gibor de la operasyon en Entebbe sesh anyos antes en 1976, ande desho la vida. Astal kavo Arens va kedar el protektor i el « mentor », komo se disho, de Binyamin Netanyau.
Esto dicho, Arens no va kedar muncho tyempo embashador, lo va kedar un anyo solo, porke, kon la gerra del Levanon i la matansina de Sabra i Shatila, Ariel Sharon, ministro de la Defensa, deve deshar el ministeryo, i es Moshe Arens ke es yamado por Begin en 1983 para ser ministro de la Defensa en su lugar. Despues de tener sido deputado i embashador, Arens entra agora en el Governo. Aya va kedar de fevrero 1983 astal 13 septyembre 1984. Sera solo deputado entre 1984 i 1992, i entremyentres ministro sin portofolyo de 1984 a 1987, i tambyen de avril a desyembre 1988. Despues va ser dos vezes ministro de los echos ajenos, una primera vez de 1990 a 1992, i la sigunda de janvier a julyo 1999. I despues va kedar deputado asta fevrero 2003, i, a la edad de 78, deshar la vida politika, asta un syerto punto, porke, komo lo dishe mas antes, no va kedarse de azer konoser su opinyon en sus artikolos…en Haaretz.
Si Moshe Arens uvyera sido solo un ombre politiko, o solo un injenyero, yo uvyera eskapado aki de avlarvos de el, ama tengo, kon el tyempo ke me keda, de avlarvos tambyen de Moshe Arens istoryano. En vedra, el grande lavoro al kual se konsagro Moshe Arens kuando desho sözde la politika, ensima de todos sus artikolos ke vos dishe i ke en vedra no kedavan de ser politikos, fue el estudyo del rolo de la Asosyasyon militar Djudiya (ZZW en polako) en la rebuelta del Ghetto de Varsovia, i, mas presizamente, al seno de esta organizasyon ke kombatyo al lado de la organizasyon de syedra komandada por el famozo Mordehaï Anielewicz, el rolo de los del Betar.
Antes de ayegar a los eskritos de Arens sovre esta kuestyon, vos akodro ke los djudyos de Polonya, ke sean sufus o laikos, eran muy politizados (a la diferensya, me parese, de los djudyos sefaradim de Estambol, por egzemplo). Aviya en Polonya, se puede dizir, kuatro vandas : los sufus, los syonistos de syedra, los djudyos de syedra non syonistos (sosyalistos del Bund o komunistos), i los syonistos de derecha, de la vanda de Jabotinsky. I malorozamente, entre los syonistos de syedra i los syonistos de derecha, aviya un odyo, los de la syedra konsiderando los revizyonistos de Jabotinsky komo fasistos, i los revizyonistos konsiderando los de syedra komo demaziya blandos.
Kuando se aparejo la rebuelta del Ghetto de Varsovia, todas estas vandas eran prezentes i determinadas a morir en kombatyendo a los Almanes. Los de syedra (syonistos sosyalistos de todos partidos, ama tambyen djudyos del Bund i komunistos) se aunaron basho el komando de Mordehaï Anielewicz, mansevo de 23 anyos, el mismo syonisto sosyalisto del Hashomer Hatsaïr.
De la otra vanda, ke para azer kurto vamos a yamar la derecha, se aunaron tambyen militares djudyos de la armada poloneza, komandados por David Moris Apfelbaum, ke era zabit en la armada poloneza, ama tambyen unos kuantos militares katolikos komandados por Henryk Iwanski, i al lado de estos militares los mansevos del Betar komandados por Pavel Frenkel i Leon Rodal, famozo gazetero orijinaryo de Kielce.
De esto todo ya vos tengo avlado aki, syendo ke ize una emisyon sovre la rebuelta del Ghetto de Varsovia, la primera vez el 26 de avril 2007, i la sigunda vez el 4 de mais 2017. Ama me teniya sovre todo fundado, para azer mi emisyon, sovre el livro eskrito en franses por Michel Borwicz, intitolado « L’insurrection du ghetto de Varsovie » (el solevantamyento del ghetto de Varsovia). Michel Borwicz el mismo fue komandante de rejyon en la rezistansya poloneza. Su livro, editado en 1966 ande Julliard en la koleksyon Archives, es muy riko de fuentes, ma es vedra ke sovre la Asosyasion Militara Djudiya ZZW las arshivas syendo pokas i los aktores todos matados, el livro no dize muncho, de tal manera ke, si el nombre de Pavel Frenkel es una sola vez mensyonado, yo no dishe en mi emisyon ni un byervo sovre el, un ombre del kual no egziste mismo una sola foto.
Lo ke solo saviya por el livro de Borwicz, es ke al empesijo, en desyembre 1939, eran 39 myembros de una asosyasyon djudiya militar kompozada de zabites i askeres de la armada poloneza vensida. El grupo se yamava Swit (amaneser en polonez) i despues troko su nombre en Asosyasyon Djudiya de Kombate, dicha ZZW. En fin de 1942, unos kombatantes del Betar se aunaron kon la ZZW de Apfelbaum (ke el mismo era revizyonisto) ke esta vez de muevo troko su nombre para yamarse Asosyasyon Militar Djudiya, lo ke no trokava a las inisyalas ZZW.
Asigun Borwicz, el kapo de la ZZW era Apfelbaum, i Pavel Frenkel esra basho el.
Moshe Arens se intereso a esta ZZW, manko konosida ke la OJC (Organizasyon djudiya de kombate) de Anielewicz, syendo ke, komo lo dishe, kaji todos sus myembros fueron matados, sin ke ayga alguno para kontar lo se teniya pasado, a la diferensya de lo ke se paso por la OJC, ande varyos sovrebivyentes, inkluyendo Marek Edelman, kapo del Bund, pudyeron kontar lo ke izyeron. El rolo i la kara de Mordehaï Anielewiecz son konosidos agora, ama por los ke es del kapo de laZZW, vamos a ver ke, en vedra, muy poko se save.
Arens lavoro munchos anyos sovre esta kuestyon, i puvliko en 2011 un livro ke, por lo ke se, no fue trasladado en franses. Egziste en ingles kon el titolo « Flags over the Warsaw ghetto ; the untold stoty of the Warsaw ghetto uprising » (Banderas sovre el ghetto de Varsovia ; la istorya ke no fue kontada del solevantamyento del Ghetto de Varsovia).
Yo no meldi este livro, ama topi sovre internet un artikolo eskrito en ingles en 2003 por Moshe Arens, esta vez no en Haaretz, ma en el Jerusalem Post, intitolado « The changing face of Memory : Who defended the Warsaw ghetto ? » (La kara kambyando de la memorya ; kyen defendiya el ghetto de Varsovia ?)
Asigun Moshe Arens, no era Apfelbaum el kapo. El kapo era Pavel Frankel, i Apfelbaum era basho el. Esto es kuryozo, porke Apfelbaum era un zabit de la armada poloneza kom amistades en esta armada ke le valyeron el ayudo de Henryk Iwanski i de sus ombres, kuando Pavel Frankel, afillu si era kapo de los del Betar, era un mansevo de 23 anyos. Esto dicho, 23 anyos era tambyen la edad de Anilewiecz, kapo de la OJC.
Lo ke mos konta tambyen Moshe Arens, es ke en los primeros diyas de la bataya del Ghetto, la ZZW mantuvo, sovre el mas alto tejado de la plasa Muranosvki ke defendiya, dos banderas, las ke dan su titolo a su livro, Flags over the Warsaw ghetto, la bandera djudiya i la bandera poloneza, ke se puediyan ver en la parte kristyana de la sivdad i ke enyervavan muncho a los Almanes..
Muncho kedariya de kontar sovre el livro de Moshe Arens, ma el tyempo me falta, i no kyero eskapar mi emisyon sin avlar de dos istoryanos, un kristyano, Dariusz Libionka, i una djudiya, Laurence Weinbaum, ke lavoraron sovre la misma kuestyon de la ZWW, i eskrivyeron en djuntos un livro en 2011, dizyendo ke uvo mentiras en lo ke se konto sovre la ZWW, i ke Apfelbaum no era tan importante ke se disho . Esto dicho, keda siguro ke la ZZW, i en eya Pavel Frenkel i Leon Rodal, djugo un rolo importante ke merese de ser akodrado en la Rebuelta del Ghetto de Varsovia.
Al djueves ke vyene, si kyere el Dyo !
Edmond Cohen
Paris, Fransya
