eSefarad Noticias del Mundo Sefaradi
Keridos amigos
Kon una syerta lokura, me atrivi de avlarvos de la Kabala para mi emisyon de djueves.
Saludes a todos
Edmond Cohen
Paris – Fransya
——————————————————————————————
LA KABALA (1)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 12 de marso, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55
Me apersivi ke si ago emisyones kada semana desde 2005, kijo dizir no leshos de 14 anyos, nunka ize una emisyon sovre la kabala, afillu si ize, el 29 de mais 2014, una emisyon intitolada « Posquières i el nasimyento de la kabala », ke tratava solo de una chika parte de este monumento del djudaismo ke es la kabala.
Lekabel, en ebreo, kyere dizir resivir, i la kabala es lo resivido. Resivido de kyen ? Del Dyo, por siguro. No es la Tora, lo ke resivimos del Dyo ? Si, ama de una parte la Tora, en muestra tradisyon, se divide en Tora eskrita, ma tambyen en Tora orala, dicha en ebreo Tora she beal pe, i de otra parte la Tora puede ser meldada a kuatro niveles de entendimyento, del mas basho al mas alto, al mas mistiko : el pshat, el remez, el drash i el sod. Sod, en ebreo, kyere dizir sekreto. Las inisyalas de estos kuatro niveles : pe, resh, shin i sameh dan el byervo ebreo pardes, ke es una uerta de arvoles, o el Gan Eden. El Talmud (Hagiga 14b, 23 a 34) mos konta ke kuatro hahamim, inkluyendo Rabi Akiva, entraron en el pardes. A la salida del pardes, uno (i no kualsikyer, era Ben Zoma) se izo loko, otro pedrio la fey, otro se muryo. El solo ke salyo sano i rezyo del pardes fue Rabi Akiva. Esto para dizir ke suvir astal sod no es para kualsikyere. Kale ser muy fuerte i kumplido, lo ke, lo digo pishin, yo no so ! Todo lo ke vos puedo dizir, es ke asigun los kabalistos, la kabala es lo resivido del Dyo ke se topa en la Tora, kale solo saver meldarla.
No me syento del todo kapache de darvos a entender las onduras de la kabala, ni so haham ni indimas kabalisto, la sola koza ke puedo aprovar es de arrekojervos unas kuantas kozikas elementaryas ke kale saver sovre la kabala.
Komo vos dishe, mi emisyon de 2014 se intitolava « Posquières i el nasimyento de la kabala », lo ke puediya dar a pensar ke la kabala nasyo en la Edad Medya en Posquières, sivdadika del sur de Fransya ke oy se yama Vauvert.
En vedra las kozas son muncho mas entrafikadas : lo ke fue eskrito en Posquières en el siglo XII, afillu si es importante, komo lo teniya dicho, no es el primer eskrito kabalistiko.
En vedra la kabala no empeso un diya. Ay lo ke konta la tradisyon djudiya, i aylo ke dizen los istoryanos.
Lo ke es siguro, es ke ya se topan, en el Tanah mismo, tekstos mistikos, komo las vizyones de los profetas Yehezkel o Daniel ke pueden ser konsiderados komo las primeras fuentes mistikas a la orijen de la kabala.
En el treser siglo antes de la era kristyana, se eskrive la primera parte de lo ke se va yamar despues el Livro de Henoch. No es dainda la kabala, ama ya empesamos kon una literatura mistika i apokaliptika ke va ser a la fuente de lo ke, a poko a poko, va ser la Kabala.
Del tyempo de las gerras kontra los romanos, ay hahamim famozos komo Shimon Bar Yohay o Rabi Akiva. La tradisyon djudiya mos konta ke Shimon Bar Yohay i su ijo Eleazar tuvyeron de eskonderse de los romanos durante tredje anyos en una grota ande solo pudyeron bever agua i komer aharovas, grasyas a un arvole ke kresiya delantre de la grota. Es durante esta epoka ke, asigun la tradisyon, eskrivyo el livro del Zohar, del kual vos avlaré mas despues. (Kuando yo estudyava en el Talmud Tora kon el haham Botton, de bendicha memorya, el es ke me konto esta istorya, salvo ke no konosiya el byervo franses por aharova, i son munchos anyos despues ke me ambezi ke en franses se dize caroube, i el arvolé caroubier).
En kuanto a Rabi Akiva (ke sostenyo al empesijo a Bar Kohba, pensando ke era el mashiah, i ke, torturado por los romanos, muryo resitando el shema), el eskrivyo, asigun la tradisyon, un livro konosido komo las otiyot (las letras) de R. Akiva, ande kada una de las 22 letras del alfabeto ebreo es mirada kon su natura, su rolo, i lo ke reprezenta.
Despues de la literatura apokaliptika de los empesijos vyene, entre los siglos 3 i 8, lo ke se yamaron los eskritos de los Palasyos, o los eskritos de la Merkava. Los palasyos o la Merkava son los lugares ande mora o se va el Dyo, lugares ande se van los autores en suenyos mistikos ke mos deskriven.
I ayegamos, en la edad Medya, al Sefer Yetsira (livro de la formasyon) atribuido por la tradisyon a Avraham, o por syertos a R. Akiva (yene el…) ke mos da una deskripsyon de la kreasyon del mundo. Fue komentado en el siglo 10 por Saadya Gaon i Dunash Ben Tamim.
Aparesen en el sefer Yetsira las muy famozas diez sefirot. No es kolay de trasladar el byervo sefira del ebreo, porke, si byen entendi, kyere dizir a la vez esfera i numero. Por esto vo guadrar el byervo ebreo tal i kual. Estas dyez sefirot son, en el sefer yetzira, el empesijo o el reflo o espiritu (ruah) del Dyo, el kavo o el ayre, el byen o la agua, el mal o el fuego, el alto, el basho, el oryente, el oksidente, el norte i el sur.
Despues el sefer yetzira estudya kada una de las 22 letras del alfabeto ebreo kon la propiedad de kada una de las 22, kon tres madres : alef (el ayre, de ande vyene la tripa) mem (la agua, de ande vyene la tyerra, i el pecho) i shin (el fuego, de ande vyenen los syelos, i la kavesa).
El sefer yetzira dize munchas otras kozas sovre las kualas no me vo apezgar. Los ke son interesados toparan el teksto kompleto del sefer yetzira en ebreo kon su traduksyon en ingles sovre internet, bushkando en hebrew books (lo ke no es koza kolay) :
http://beta.hebrewbooks.org/reader/reader.aspx?sfid=38753#p=9&fitMode=fitheight&hlts=&ocr=
La traduksyon en fransez se puede tambyen topar sovre internet, i es muncho mas kolay, abasta de demandar el sefer yetzira en fransez : http://soued.chez.com/SY%20texte.html
Dos siglos mas despues del Sefer Yetzira, en el siglo 12, sale de la Yeshiva de Posquières, esta sivdadika del sur de Fransya, de la kuala vos avli en la emisyon ke vos dishe al empesiko, un livro intitolado sefer Sefer habahir (el livro de la claridad).
En 2014 vos diziya lo ke sige , avlandovos del viyaje ke izo Binyamin de Tudela en 1165 i ke paso por Posquières:
« Kualo mos konta muestro Binyamin? Kale saver ke en este tyempo no ay antisemitismo en el Sur de Fransya i ke los djudyos se topan aya bastante kyetos, de tal manera ke ay munchos hahamim de alto nivel en kada sivdad. Despues de tenermos avlado de Montpellier i de Lunel, i de todos los savyos djudyos ke aya se topan, muestro Binyamin vyene a Posquieres, i le do la palavra, travada de su livro Sefer amasaot, livro de los viajes. Malorozamente, no tengo el orijinal en ebreo, i lo ke vos vo meldar es la traduksyon ke ize yo en djudeo-espanyol de la traduksyon franseza de Jean-Philippe Baratier:
« De Lunel a Posquières ay dos parasangas (aki so ovligado de avrir una paranteza. Binyamin tyene dos maneras de avlar de distansyas: para las grandes distansyas, konta en diyas de viaje, para las chikas distansyas, konta en parasangas, unidad de mezura de mas o menos sinko kilometros; de fakto, Lunel se topa a unos diez kilometros de Posquières. Syerro la paranteza). Es una grande sivdad, ande ay unos kuarenta djudyos. Aya ay tambyen una grande Yeshiva dirijida por Abraham Ben David de bendicha memorya, famozo por sus lavoros i por su grande savidurya en el Talmud, i en la Eskritura o en el Tanah. La djente vyene de paizes leshanos para ambezar la Ley ande el, ande ambeza a sus elevos, ke gozan de un grande repozo en su kaza. I si ay ke no pueden pagar sus menesteres, el les la por sedaka sovre sus propyos byenes lo ke tyenen menester. Porke es muy riko. Ay tambyen aya otros hahamim, tales Rabi Joseph Ben Menahem, Rabi Benbesshat, Rabi Binyamin, Rabi Itshak Ben Moshe de bendicha memorya. »
« Ansina s’eskapa lo ke mos konta Binyamin de Tudela de Posquieres i de su alto haham. Komo lo oitesh, mos dize ke la djente veniya de paizes leshanos para ambezarse kozas de su boka. I dainda oy este grande haham, Avraham Ben David yamado Rabad III, keda famozo, afillu si malorozamente todos sus eskritos no vinyeron asta mozotros.
(…)
« Komo lo dishe, este Rabad fue muy famozo en su tyempo, komo la sivdadika de Posquières ande se topava su Yeshiva.
(…)
« Agora desharemos Rabad para avlar de su ijo konosido komo Itskak el syego, o, a la kontra, Itshak sagi naor (yeno de luz) manera de dizir ke si no teniya ojos, parese desde su nasimyento, teniya una tal elevasyon de alma ke era yeno de luz espirituala.
« Este Itshak (1160 – 1235) fue un grande kabalisto, ke izo un komentaryo del sefer Yetsira. Lavoro sovre las famozas sefirot. Los ombres son manifestasyones materyales de las sefirot en este mundo. La bushkedad mistika permite de suvir los grados para unirse al Dyo.
(…)
« Es en el tyempo de estos mistikos ke aparesyo el Sefer aBahir, komo lo dishe un poko antes. Avlarvos de este livro es koza bastante yuch, afillu si meldi unas pajinas de su traduksyon en franses. Ama es komo meldar el Talmud: uno ke no tyene estudyado i tomado muncho tyempo, no puede entender lo ke melda. A sido mi kavzo ».
Ansina vos avlava en 2014. Vo yene aprovar, ayudandome de Wikipedia, de dizirvos lo ke el Sefer ha bahir trae de muevo despues del Sefer Yetsira.
En las diez sefirot, ke azen parte intima de la esensya divina, ay tres poderes superyores :
La korona (keter), ke es el pensamyento, dicha tambyen Palasyo muy Santo, primer numero i primera letra (alef), va kon la oreja.
La savidurya (hohma) va kon la Tora.
La intelijensya (bina), madre del mundo kriado.
Las syete otras sefirot, yamadas Ijas del Grande Rey, van kon los syete diyas de la Kreasyon.
Una koza ke meldi sovre Wikipedia, es ke asigun Itshak el syego, todas las desgrasyas vyenen de lo ke el Dyo sufriyo de un pgam, un danyo, ke los kabalistos tyenen de adovar
Aki me vo kedar sovre el Sefar Habahir, porke tengo de kontinuar la istorya de los hahamim ke vinyeon despues de este livro.
Tengo de avlarvos de Azriel de Gerona, haham espanyol elevo de Itshak el syego. En su livro Shaar hashoel (la puerta del peshkuzador), Azriel da a entender las diez sefirot en un arvole yamado « Ets Haïm » (arvolé de vidas) komo el del Gan Eden.
Puedesh ver este arvolé indovos sovre el artikolo de Wikipedia sovre La Kabbale :
https://fr.wikipedia.org/wiki/Kabbale#/media/File:Tree_of_life_bahir_Hebrew.svg
Arriva ay Keter, la korona. Abasho a la syedra : Bina, la intelijensya. Abasho a la derecha, Hohma la savidurya. Abasho de Bina, Gevura la fuersa, abasho de Hohma, Hesed, la buendad. Abasho de Keter, Tiferet la ermozura. Abasho de Gevura, od la esplendor, i abasho de Hesed, Netsah la victorya. Abasho de Tiferet, Yesod, el fundamento, i, enfin, abasho de Yesod, Malkut, el reyno.
I entre las sefirot, ay 22 kaminos indo de una a otra, i kada uno de estos kaminos korresponde a una de las 22 letras del alfabeto ebreo.
Azriel tuvo un elevo muy famozo, Nahmanides (R. Moshe Ben Nahman o Ramban) . I porke era un haham muy famozo i respektado, el fakto ke este haham tenga konsiderasyon por esta forma de mistika bastante opozada a las ideas rasyonalistas de un Maimonides, le dyo, komo diriyamos en franses, ses lettres de noblesse (sus papeles de nobilita).
Yene en Espanya, otro haham del siglo 13, Itshak Ibn Latif, eskrive entre 1230 i 1270 un livro intitolado Shar Hashamayim (la puerta de los syelos) ande mos dize klaramente ke la divinidad puede solo ser kontemplada kon una ekstaza mistika, i no kon bushkedad filozofika. Estamos en puro mistisismo.
En mismo tyempo ke Ibn Latif, aparese en Toledo otro haham, Abraham Aboulafia, ke eskrive munchos livros para ambezar a dezatar los inyudos ke mos impiden de topar la unyon kon el divino. Por esto inventa la hohmat hatseruf, syensya de la kombinasyon de las letras, i tambyen, lo ke me aze muncho pensar al yoga, akonseja, durante la meditasyon, de azer egzersisyos de respirasyon i de meterse en pozisyones espesyalas.
En Segovia, otro haham, Itshak Ben Yaakov HaCohen, eskrive el Sefer aOra, el livro de la luz, ande mos da a entender ke el mal vyene de la vanda syedra de la divinidad.
Tengo de avlarvos tambyen de un otro haham de Segovia, Yosef Ben Avraham Gikatila, ke eskrive el Ginat Egoz (uerta de muezes) i dos otros livros : Shaare Tsedek (puertas de Djustisya) i Shaare Ora (puertas de luz). El puerpo del ombre korresponde al puerpo de la Divinidad. Por esto kada organo del kabalisto tyene ke kedar santo i puro.
Este Gikatila se izo amigo kon otro haham kasteyano, verso los anyos 1280, i este haham se yamava Moshe de Leon (i yo tuve un bispapu ke se yamava ansina, i ke la djente yamava « el savyo ». I kon este haber sin dingun interes, ya me do kuenta, syerro la paranteza).
Vos esto avlando de Moshe de Leon porke todos los istoryanos pensan ke el es ke eskrivyo en vedra el livro del Zohar, el mas famozo livro de la Kabala, i no Shimon Bar Yohay, komo lo konta la tradisyon. Ma por siguro no tengo agora el tyempo de yevarvos asta el Zohar, lo ke kyere dizir ke tendré de azervos una sigunda emisyon , syendo ke tengo dainda muncho de dizirvos sovre la Kabala i sus grandes hahamim.
Dunke si kyere el Dyo, al djueves ke vyene i ke sera Purim !
Edmond Cohen
Paris, Fransya
