eSefarad Noticias del Mundo Sefaradi
Keridos amigos
Despues de dos djueves sin irme a la radyo, el 18 de avril porke tanto yo ke mi komputadera eramos hazinos (sovre todo mi komputadera, ke eskapo, despues de una lenta agoniya, por morir kon elektroensefalogramo yano) i el 25 porte la radyo tuvo menester de mi tiempo de avla, por modo de las fyestas de Pesah, esta vez eskapi por aparejar para amanyana, kon la mueva komputadera ke me merki, mi sigunda emisyon sovre la Kabala. Me syento muy averguensado, porte esta emisyon va ser una de mis peores, syendo ke no es koza kolay de aprovar durante 20 minutos de dar a entender a los otros kozas ke yo mismo no entyendo…Me vash a demandar: si no entendites nada, deke azer una emisyon? Es vedra ke durante mas de tredje anyos, muy poko avli de Kabala, ama me senti ovligado de azerlo, porke de una aze parte del djudaismo, i de dos fue una espesyalita de los sefaradim sea de Espanya sea venidos de Espanya en Safed
Saludes a todos
Edmond Cohen
Paris – Fransya
——————————————————————————————
LA KABALA (2)
Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes 7 de mais, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55
Antes de empesar mi emisyon de oy, tengo de dar a entendervos deke no me oyitesh desde el 11 de avril pasado : la razon ke no pude azer emisyon el 18 es porke no solo yo era hazino, ma sovre todo mi komputadera ke eskapo por morir i tuve de merkar otra. Por lo ke es del djueves de despues, es la radyo ke teniya menester de mi tyempo de avla por modo de Pesah.
Ansina ayegamos al mes de mais para mi emisyon de oy, ke va ser la sigunda parte de mi emisyon del 14 de marso sovre la Kabala, ke mos yevo solo astal siglo tredje, en primero en Fransya i despues en Espanya, i por empesar en Catalunya en jeneral i en Gerona en partikolar. A partir del siglo XIII i asta el siglo XVII vash a ver ke la Kabala fue kaji solo el echo de hahamim todos sefardim de Espanya o orijinaryos de Espanya despues de la ekspulsyon.
Yene vamos a ver mas despues ke uvo una eksepsyon en medyo de todos estos sefaradim, es Isaac Luria ke era de padre ashkenazi i de madre sefardiya. Ma Luria nasido en Yerushalayim i muerto en Safed, bivyo su kurta vida en el imperyo osmanli, en medyo de sefaradim ke fueron tan sus maestros komo sus elevos.
Esto akodrado, kale rekonoser ke dinguno de estos todos hahamim eskrivyeron en espanyol. Todos eskrivyeron en ebreo, i mismo, por lo ke es de Moshe de Leon, en arameo. En vedra dainda kaji no vos dishe nada de Moshe de Leon , salvo de una parte ke este haham kasteyano era amigo verso los anyos 1280 kon Joseph Ben Avraham Gikatila, del kual vos avli el 14 de marso pasado, i de otra parte ke yo tuve un bispapu ke yevava el mismo nombre, i ke la djente yamava « el savyo », este sigundo haber syendo sin dingun interes, ama komo es mi emisyon, me puedo permeter de dizir lo ke kyero…
En vedra, el haliz interes de este Moshe de Leon es ke a el es atribuido por los istoryanos el livro del Zohar, afillu si la tradisyon, komo vos dishe en mi primera emisyon, konta ke fue Shimon Bar Yohay ke lo eskrivyo, i ke Moshe de Leon solo se kontento de rekopilarlo.
Komo el livro del Zohar es la ovra maestra de la Kabala, ya entenditesh ke vos tengo de avlar agora de Moshe de Leon i del Zohar.
Kyen fue Moshe Ben Shem Tov de Leon ?
Si los istoryanos paresen de akodro ke nasyo en Castilla en 1240, a la kontra ay una shupé sovre la sivdad ande nasyo. Komo se yama de Leon, algunos pensan ke nasyo en la sivdad de Leon, bastante al norte de la Castilla. Otros, fundandose sovre el fakto ke bivyo en Guadalajara, pensan ke aya nasyo, i ke es su padre Shem Tov ke nasyo en Leon. De toda manera, lo ke kale saver es ke ya mos topamos en tyerra kristyana, syendo ke estas dos sivdades, la una komo la otra, ya aviyan sido rekonkistadas sovre los Moros antes de 1240.
Moshe de Leon estudyo vida entera. Mansevo, se interesa a las ovras de Rambam (Maimonides) ke, komo ya lo dishe en las dos emisyones ke le konsagri aze onze anyos, aprovo de meter en akodro, komo antes de el lo aviya echo Philon de Alexandria, la relijyon djudiya kon la filozofiya grega, aki Aristote.
Ma despues, Moshe de Leon va ser mas interesado por las tradisyones kabalistikas de Gerona, en Catalunya, i de manera mas jenerale por los mistikos djudyos. Vos akodro ke el byervo mistika tyene dos sentidos ke van en djuntos, i ke por tanto no tyenen tanto de ver el uno kon el otro :
La mistika, de una parte, es la bushkedad de lo ke ay de sekreto en la Torah, lo ke se yama en ebreo el Sod. I de otra parte, la mistika es una elevasyon de la alma para sentirse mas spirituala i proksima del Dyo.
Esto akodrado, Moshe de Leon eskrivyo un alay de livros ke no vos vo nombrar aki, porke tengo de avlarvos de su mas famozo, el livro del Zohar, la esplendor, ke el mismo disho venir de Shimon Bar Yohay, el , Moshe de Leon, syendo solo su rekopilador. Lo ke es vedra, es ke no es eskrito en el ebreo de la Edad Medya, ma en el arameo del tyempo de Bar Yohay. Salvo ke, asigun lo ke meldi en Wikipedia i ke no pude averiguar, se avla de las kruzadas o de situasyones ke van kon la invazyon araba de la Espanya de la Edad Medya. Vamos a dizir, para eskapar kon esto, ke si Moshe de Leon no eskrivyo todo de si mismo, es posivle, i mismo siguro, ke tomo tekstos i ideas de antes de el, de una tradisyon mistika ke pudo empesar kon Shimon Bar Yohay. Ma una koza keda, es Moshe de Leon ke metyo a la luz a este livro del Zohar ke no era konosido antes de el.
Ya vimos kon mi primera emisyon ke la Kabala, en tanto ke mistika djudiya, ya egzistiya antes del Zohar, ama yene, kuando se avla de Kabala, pishin se avla del Zohar, ke para la djente es el livro de la Kabala.
Kualo mos dize este livro ? Para dizirvos la vedra, afillu si se puede topar, i dunke meldar, en franses sovre internet, no vos diré ke lo meldi. Los ke son interesados pueden bushkar el teksto del Zohar en franses indo sovre internet, se topa kolay. (Kon esta partikularidad ke el livro se dize « trasladado por la primera vez sovre el teksto kaldaïko por Jean de Pauly », kuando, asigun Wikipedia, en vedra es una traduksyon de la traduksyon al latino echa por el italyano Pico della Mirandola, fundador de la kabala kristyana. Esto tambyen me enkanta, de una parte porke meldi ke Pico della Mirandola se aziya trasladar los tekstos ebreos por el djudyo Elie del Medigo, de otra parte porke meldi tambyen ke la traduksyon al latino del Zohar fue echa por Christian Knorr Von Rosenroth).
Esto dicho, una koza es de topar el teksto, otra es de meldarlo i sovre todo de entender lo ke se melda. Por lo ke es de mi, povereto de mi, no tengo la pretensyon de darvos aki a entender lo ke ay en el Zohar. Mi solo eskopo, muncho mas modesto, es de ambezarvos lo poko ke travi de Wikipedia para ke sepash a lo manko ke son los livros de la kabala, kyen los eskrivyo, kualos son los grandes nombres en este dominyo.
Esto dicho, el Zohar se prezenta komo un komentaryo del Tanah, kon diskusyones entre hahamim. La idea es ke los maasim, los kuentos de la Tora, son solo los vestidos ke yeva la Tora, la morala ke sale de estos kuentos son el puerpo de la Tora debasho de sus vestidos, ma su alma es su sentido sekreto, eskondido i misteryozo. La alma de la Tora mos yeva al syelo.
El kamino del ombre ke kyere alkansar a la unyon mistika kon el Dyo pasa por el kumplimyento de las mitsvot, kon muncha kavana, i por la elevasyon verso las diez sefirot, ke korresponden al puerpo (simboliko) divino komo los dedos de la mano i del pye. Ay un atadijo entre la kara del ombre i la natura profunda del Dyo.
Otra idea del Zohar : pertenese al ombre, por su kavana i aserkamyento del Dyo, de adovar lo ke ay de rompido en la Unidad del Dyo. El Dyo no puede ser uno tanto ke su puevlo esta en la galut i la umilyasyon.
El Zohar insiste tambyen sovre la idea de la transmigrasyon de las almas, el gilgul nefashot. La alma de alguno ke no izo todas las mitsvot abolta despues de la muerte en un otro puerpo, asta ke aga todas las mitsvot. La idea es de suvir en las sefirot.
Ama se puede tambyen abashar : la alma de uno ke komyo kozas trefa (proibidas) puede toparse despues ande un perro, esto es su kastigo…
Me akodro ke el haham Moshe Cassorla, de bendicha memorya, el ke me aparejo (kon el hazan José Papo) por mi kumplimyento de minyan, me teniya dicho ke si los djudyos dan al bebiko ke nase el nombre de un papu, es para azer arrebivir la alma del papu en el puerpo de su inyetiziko, kon esta partikularidad ke los ashkenazim asperan ke el papu sea muerto, i si no es van a tomar un bispapu muerto, myentres ke los sefaradim dan al inyetiziko el nombre de su papu afillu dainda bivo.
No me vo mas apezgar sovre el Zohar, syendo ke en vedra no lo meldi i lo ke vos esto dizyendo es lo ke travi de Wikipedia, sin ser siguro a syen por syen ke entendi todo lo ke meldi, povereto de mi.
El Zohar es mas i mas estudyado durante el siglo 16, no solo por los sefaradim, ma tambyen por los Ashkenazim komo el Maharal de Praga, i tambyen por los kristyanos, empesando por Pico della Mirandola.
Ma es en Safed, en tyerra de Israel azyendo parte del Imperyo osmanli, ke el estudyo de la Kabala se va mas i mas desvelopar en las yeshivot.
El famozo Yosef Karo, ke eskrivyo el Shulhan Aruh, empeso en Safed el estudyo de la Kabala, eskrivyendo por egzemplo un livro, el Magid Mesharim, ande konta sus eksperyensas mistikas, kon la vijita de un anjel.
Otro haham kompanyero de Karo es el tambyen famozo Shelomo Alkabets, famozo por su kante de Kabalat Shabat intitolado Leha Dodi.
Elevo i kunyado de Alkabets, Moshe Cordovero, nasido en 1522, fue uno de los grandes nombres del kabalismo. Fundo una yeshiva en Safed ande lavoro al lado de Isaac Luria, del kual avlaré un poko mas despues.
Los dos livros los mas famozos de Cordovero son su Pardes Rimonim (la uerta de granadas) i su Or yakar (luz presyoza) el primer una sinteza de la kabala, el sigundo un komentaryo del Zohar.
La idea de Cordovero es ke no kale konfundir la transendensya divina, yamada por la Kabala el En Sof (no fin), ke no se puede konoser, i sus emanasyones, su luz, las Sefirot. Las Sefirot, mos dize Cordovero, son los kelim del Dyo, savyendo ke el byervo kelim, en ebreo, kyere a la vez dizir instrumentos i vazos. El Dyo uza de los kelim para ovrar sovre el mundo.
La luz divina salyendo de las sefirot abasha i suve, en un movimyento sirkular. Los pensamyentos los mas altos, ayegan a las primeras sefirot, las mas altas, Keter i Hohma, ma son demaziya altos para pueder ser entendidos por los umanos, i por esto abashan a la tresera sefira, la Bina (intelijensya) i ansina asta la mas basha, la dyezena, Malhut. Ma la luz direkta (or yashar), ke abasha, despues suve (or yosher) komo reflektada de sefira en sefira asta la mas alta.
Despues de estos sefaradim, kale agora avlar de uno de los mas famozos kabalistos, i puede ser el mas famozo, kyero avlar de Isaac Luria, tambyen yamado el Ari : el R i el I por Rabi Itshak, en kuanto a el A del empesijo, puede ser Eloi (el divino), Ashkenazi (el padre de Luria era ashkenazi, i pokos eran en el Imperyo osmanli), o Adonenu (muestro senyor).
Nasido en Yerushalayim en 1534, bivyo en Safed ande fue elevo de Cordovero. Se muryo bastante mansevo, a la edad de 38, en 1572, dos anyos solo despues de Cordovero, sin tener nada eskrito, komo antes de el Socrate o Jesus, ama komo para eyos, fueron sus elevos ke eskrivyeron sus ideas.
Kon muncha modestiya, ayudandome de Wikipedia ke, eya misma, se ayuda de dos espesyalistos modernos de la mistika djudiya i de la kabala, oy los dos defuntos, Gershom Sholem i Charles Mopsik , vo aprovar de darvos a entender lo ke yo mismo no esto siguro de tener byen entendido, lo ke son las ideas de Luria.
Luria se interesa a lo ke aviya antes de la kreasyon, antes de Bereshit. La idea de Luria es ke, el Dyo syendo infinido, para krear kualkyer koza afuera de el mismo se deve de travarse de lo ke esta kreando. De tal manera ke la kreasyon, asigun Luria, no es para el Dyo un echo de avyertura, ma al kontraryo un echo de restriksyon.
Luria mos desho tres ideas ke azen agora parte integrante de la Kabala para todos : el tsimtsum, la shevirat akelim, i el tikun.
El tsimtsum es la travada o la kontraksyon del Dyo para deshar un lugar vaziyo ande el En Sof, grasyas a una emanasyon de luz, va pueder krear el mundo en inchendo los diez kelim, vazos, yamados sefirot, ke son a la orijen de la vida i de la kreasyon.
La shevirat akelim, el rompimyento de los vazos. La luz abashada para inchir los vazos aze patladear syete sovre los diez, i esta luz se espande en el mundo komo senteyas.
El tikun, el adovamyento, es el lavoro ke keda al ombre : el de adovar los vazos rompidos para travar de si mismo las senteyas de luz divina ke se topan emprezadas en kada koza : fuentes, arvoles, pasharos, almas de djustos.
Komo vos dishe, son los elevos de Luria, Haïm Vital i Yosef Ibn Tabul ke van a espandir las ideas de Luria, en livros eskritos por eyos mismos.
La Kabala lurianika va inspirar a todos los kabalistos ke vendran despues de Luria, komo Joseph Delmedigo, Naftali Bacharach, Nathan de Gaza (el konsejero de Shabetay Tsevi) o el Gaon de Vilna, ke el mismo no era lo ke se yama un kabalisto, ama ke yene va ser influensado por las ideas de Luria.
Muncho se puedriya dizir dainda sovre la Kabala, ke oy en diya tyene un sukseso un poko shupeli en Amerika kon djente komo Madonna, ama esto mos alesha de la haliz Kabala, i ya vino el tyempo de eskapar esta emisyon.
Astal djueves ke vyene, si kyere el Dyo !
Edmond Cohen
Paris, Fransya
