eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
EL NASIMYENTO DEL SYONISMO
Me vino la idea, meldando un artikolo muy byen eskrito de la gazeta Adama, la revista del Keren Kayemet Leisrael, de avlarvos de una koza ke mos va achilear el korason, kyero avlar del nasimyento del syonismo, al kual devemos la mijor koza ke mos dyo este terrivle venten siglo, el Estado de Israel.
Desharemos a la Unesco asimilar el syonismo a un rasismo, esta Unesco ke deviya ser una organizasyon internasyonala de syensya i de kultura, i ke se izo una mesklatina de bovos inkultos i negrinyados. Kale yorar sovre la Unesco, i no sovre el syonismo, ke biviya antes de la Unesco, ke bive durante la Unesco, i ke va bivir despues de la Unesco.
La vedra es ke si el byervo syonismo lo devemos a Nathan Birnbaum en 1891, la idea ke ay en el mundo un puevlo djudyo ke tyene la esperansa de aboltar a su tyerra pedrida, yamada Erets Israel, esta idea egziste desde la pedrita de la Djudea i del Bet Amikdash, el Templo de Yerushalaïm.
En primero, la idea ke los djudyos non son solo los kreentes de una relijyon, ama tambyen los myembros todos de un solo i mizmo puevlo es al sentro de la relijyon djudiya. Los byervos Am Israel, puevlo de Israel, se topan en todas muestras orasyones, i por empesar el kadish. I este puevlo yora, ma kon la konsolasyon de aboltar un diya a su tyerra.
No tengo menester de akodrarvos komo empesa la Hagada de Pesah : « Este anyo aki syervos, a el anyo el vinyen en tyerra de Israel, ijos forros (liberos) », i komo se eskapa la fyesta : « A el anyo el vinyen en Yerushalaïm ». Estas palavras, los djudyos no kedaron de dizirlas a kada anyo, i vos akodro tambyen ke el djudyo, kuando se kaza, rompe una kupa de vidro en memorya de la estruisyon del Bet Amikdash, resitando en lashon este famozo pasuk 5 del salmo 137 « Im eshkaheh Yerushalaïm, tishkah yemini ! » (Si te olvido Yerushalaïm, ke me olvide mi derecha ! )
Ya vos avli aki mismo, aze poko, de Yehuda Halevy, ke eskrivyo verso los anyos 1130, munchas poeziyas konsagradas a Erets Israel, i ke se yaman Shirei Tsion, en franses les Sionides. Komo ya lo savesh, Tsion es el nombre de una chika montanya en Yerushalaïm, ke simboliza la sivdad entera i mismo el pais entero. El amor de Tsion fue kantado munchos siglos antes del byervo syonismo i de Nathan Birnbaum. I komo vos dishe, Halevy no se kontento de kantar su amor de Tsion, se alevanto, desho en Espanya a su ija kerida i a su inyetiziko para irse en Erets Israel (afillu si no estamos siguros ke ayego asta aya, ama por lo menos savemos ke ayego en Ayifton).
Kuando Binyamin de Tudela se va viyajar de Espanya asta el Reyno Latino de Jerusalem, de los Kruzados kristyanos, no dize ke entra en el Reyno Latino, dize ke entra en Erets Israel. Estamos en los anyos 1170. I mos konta ke kedan djudyos ke biven en Yerushalaïm , afillu las terrivles matansinas de djudyos ke izyeron los Kruzados en esta misma sivdad.
En poko tyempo vos avlaré de Donya Grasya Nasi, ke por lo ke mos interesa oy, el nasimyento del syonismo, aprovo en los anyos 1558 de fraguar en Erets Israel, en Tiberiade, sino un Estado djudyo, a lo manko una sivdad djudiya, i obtuvo del Sultan una konsesyon por el presyo de mil dukados al anyo.
Vos avlaré tambyen de su sovrino i yerno Joseph Nassi, echo Duke de Naxos por el Sultan Selim, ijo de Suleyman el Magnifiko, ke embiyo djudyos en esta sivdad de Tiberiade i syete kazalikos al lado i se okupo de sembrar amoreros para fraguar fabrikas de seda, ets.
Vos akodro tambyen ke Yosef Karo, a kyen devemos el Shulhan Aruh, nasido en Espanya en 1488 i echado kriatura de aya por los Reyes Katolikos, empeso a irse en Estambol i de aya se fue a Safed, en Erets Israel, ande se muryo en 1575.
Vos akodro ke Shabetaï Tsvi, en los anyos 1650, topa ayudo por un haham de la sivdad de Gaza, zaten yamado Nathan de Gaza.
Vos akodro tambyen ke vos avli aki mismo de este djudyo del Maroko, Yosef Maman, ke se fue ande los djudyos de Bukhara del tyempo de Napoleon, en los primeros anyos del siglo dizimueve, i ke los travo para ir a bivir en Erets Israel, lo ke izyeron.
Esto todo para akodrarmos ke syempre uvo djudyos ke no solo amaron a Tsion, ama tambyen se fueron aya para bivir, sin avlar de los djudyos ke syempre bivyeron en Erets i nunka kitaron el pais.
Esto todo, Ben Gurion lo disho en pokos byervos, el 14 de mayo 1948, en la Deklarasyon de Independensya del Estado de Israel : « Despues ke fue arrondjado de su tyerra, el puevlo djudyo le guadro su fidelidad afillu todas sus dispersyones, i nunka se kedo de orar por su retorno a eya, i de esperar el renasimyento de su libertad nasyonala.
Empushados por esta atadura istorika i tradisyonala, los djudyos se esforsaron en kada jenerasyon de estableserse de muevo en sus antigua patria. »
Ama en jeneral, si el amor de Tsion fue syempre un amor kolektivo, la aliya, la suvida, kedo koza individuala asta el siglo dizimueve. Las kozas van a trokar en este siglo, ama no de la misma manera en Evropa del oeste i en Evropa del Este.
En la Evropa del oeste (Fransya, Almanya) los djudyos entraron en las ideas de la haskala, las luzes, la modernidad, i, por dizir las kozas, la asimilasyon. La relijyon es koza privada, los djudyos se syenten solo azer parte del puevlo del pais ande biven.
A la kontra, en la Evropa del este (Polonya, Rusiya) ande ay un antisemitismo de kadal diya, akseptado kuando no es mismo entretenido por el poder, los djudyos no se syenten azer parte del puevlo del pais. Se syenten afuera de este puevlo, i dunke azer solo parte del puevlo djudyo.
Los intelektuales, i entre eyos tambyen syertos hahamim, empesan a pensar ke la solusyon para los djudyos puede solo salir de un estado djudyo, i no en kualsikyer lugar, ama en el pais de orijen del puevlo djudyo, Erets Israel.
Afillu si los hahamim en jeneral se meten kontra esta idea, pensando ke solo la venida del Mashiah podria permeter el ritorno a Tsion, los primeros pensadores del sionismo antes ke tenga este nombre son unos kuantos hahamim. En 1840, el haham Yehuda Alkalaï (1798-1878) un sefaradi nasido de Sarajevo, eskrive en djudeo-espanyol un livro intitulado Shelom Yerushalayim, rogando a los djudyos de ganar su libertad sin asperar ke la liberasyon venga del Mashiah. Al kontraryo, solo la alya sera kapache de azerlo venir, asigun el. Para Pilar Romeu, ke muncho lavoro sovre sus ovras, este livro es el primer livro syonisto en el mundo. Yo ke syempre me krei ke la orijen del syonismo se topava en los djudyos ashkenazim no relijyozos, me ambezi en estudyando i meldando ke la orijen del syonismo vyene de un haham sefaradi eskrivyendo en djudeo-espanyol i kontinuando sovre los pasos de Yehuda Halevy, tantos anyos antes. Keridos amigos, el syonismo no empeso kon Thedor Herzl, ama kon djente relijyoza, sefaradim de muestra parte. Kale saverlo !
En 1862, un otro haham, ashkenazi esta vez, Zvi Hirsch Kalisher (1795-1874), de Thorn (Posnaniya) pensa la misma koza i lo eskrive en 1862 en un chiko livro en lashon intitulado Drishat Tsion, la egzijensya de Tsion. Dize ke kale krear una sosyeta de kolonizasyon en Erets Israel. Otro haham, ungarezo este, Joseph Natonek (1813-1892) aze planos kon un akodro kon los Osmanlis, una aliya de masa, la praktika de la agrikultura i de la lingua ebrea. Ayuda a la fundasyon de Petah Tikva en 1878 por djudyos relijyozos venidos de Yerushalaïm.
Entremyentres la Alliance Israélite Universelle avre en 1870 la primera eskola de agrikultura serka de Yafo, Mikve Israel.
De su lado, en Almanya Moses Hess (1812-1875) amigo de Marx i Engels, se da kuenta, en los anyos 1860, ke la lucha de las klasas no va rezolver la kuestyon djudiya. Eskrive en 1862 –el mismo anyo ke el Drishat Tsion de Kalisher – un livro intitulado Roma i Yerushalaïm, prekonizando la fundasyon de un estado djudyo en Erets Israel.
Agora kale avlar del rolo de la lingua ebrea en el nasimyento del syonismo. Ya vos dishe ke los livros Goral la Adonaï, del haham Alcalaï, i Drishat Tsion, del haham Kalisher, fueron eskritos en lashon. Ama eran ovras de hahamim, era mas natural ke sean eskritas en lashon. Ama vamos a ver ke eskrivanos ke no son ni hahamim ni, en vezes, relijyozos, se van a meter a eskrivir en ebreo i no en yidisch, la lingua ke todos entyenden en Evropa del este, i esto por manifestasyon de un amor de la lingua otentika del puevlo djudyo.
En 1851 salen los Shire Bat Tsion, del poeta Mica Joseph Lebensohn ke mos azen pensar, komo titolo, a los Shire Tsion de Yehuda Halevy. Aki son kantos de un poeta de 23 anyos, ke va morir un anyo despues, a 24 anyos.
En 1853, el eskrivano ruso Abraham Mapu (1808-1867) eskrive Ahavat Tsion (el amor de Tsion) romanso de amor ke se pasa del tyempo del rey Hizkiyahu. Es eskrito en un ebreo bibliko muy puro. De toda manera no egziste dainda lo ke yamamos oy el ebreo moderno.
Un otro Ruso, Perets Smolenskin, funda en 1868 una gazeta en ebreo, Hashahar (el amaneser).
Otro famozo eskrivano ruso en lashon es Yehuda Leib Gordon. No se puede avlar por el de syonismo, syendo ke el era lo ke se yama un maskil, ombre de la haskala, el djudaismo de las luzes. Ama yene, i mismo si fue sin kererlo, en eskrivyendo en ebreo djugo su rolo en favor del ideal syonisto.
De toda manera, esto todo no seriya nada sin el rolo fundamental del famozo Eliezer Ben Yehuda (1858-1922), padre del ebreo moderno. Komo disho Cecil Roth, « antes de Ben Yehuda, los djudyos pudiyan avlar Ivrit ; despues de el, lo izyeron. » De su haliz alkunya Perelman, nasido serka de Vilna, en Lituaniya, en una famiya de hasidim, Ben-Yehuda se ambeza el ebreo a la eskola relijyoza, ama travado en primero por las ideas de la haskala, desha los estudyos relijyozos, i se va al liseo ruso, sin kedar de estudyar el ebreo, i melda la gazeta Hashahar, de Smolenskin, de la kuala ya vos avli. I despues, a la edad de vente anyos se va en Paris para ambezar la medikeriya. Aya, en 1879, a la edad de 21 anyos, eskrive en la gazeta Hashahar un artikolo, Sheela lohata (una kuestyon kemando) ande dize ke el ebreo va kon una nasyon ke bive en su Pais, Erets Israel. Se va en Erets Israel, en esta epoka provinsya osmanliya, en 1881, a la edad de 23 anyos, i en Yerushalaïm lavora komo gazetero en la gazeta Havatselet, i un anyo despues topa un lavoro de profesor de lashon en una eskola de la Alliance en Yerushalaïm.
Agora me tengo de kedar un poko de kontarvos la vida de Ben Yehuda porke entremyentres otras kozas muy importantes se pasan en Rusiya : en estos anyos 1880 ay pogromes terrivles i los djudyos maskilim se dan kuenta, uno detras del otro, ke la asimilasyon es un yerro, i ke la unika solusyon para los djudyos es de fraguar un estado djudyo en su tyerra. En 1882 sale en Berlin un livro famozo, eskrito por un djudyo ruso ke aviya kreido a la haskala, Leon Yehuda Pinsker. Este livro se yama La autoemansipasyon : son los djudyos ke deven eyos mismos salvarse en indo fraguar un estado (sin dainda dizir ande).
Este livro va interesar a un otro djudyo ke esta en las mismas ideas en el mismo tyempo, se yama Moshe Leib Lilienblum, se va azer amigo kon Pinsker i estos dos kon un chiko grupo de partizanes fundan un movimyento para fraguar un estado en Erets Israel, ke yaman en primero Zihron Moshe, en rekodro de Sir Moses Montefiore, ama poko despues se va yamar los Hoveve Tsion, los amantes de Tsion.
Sin pedrer tyempo, este grupo va fundar en 1882 Rishon le Tsion. El movimyento va tener munchas difikultades, syendo ke en este mismo anyo 1882, el 25 de djulyo, diya de Tisha beav, el Sultan osmanli interdize a los djudyos de merkar tyerras a los arabos. Kale saver ke de este diya asta la venida de los Inglezes en 1917, 35 anyos mas tadre, toda la kolonizasyon djudiya se izo dando a komer a los funksionaryos turkos.
Afillu estas difikultades, los mansevos del Bilu, una organizasyon aliyada a los Hoveve Tsion, fundan en 1884 la koloniya agrikola de Gedera.
Al lado de estos mansevos korajozos, kale avlar tambyen, para ser onesto, de los djudyos rikos i filantropikos, komo el ingles Sir Moses Montefiore o el franses Edmond de Rothschild. Montefiore, ke nasyo en 1784 i se muryo en 1885, a la edad de kaji 101 anyos, se fue 7 vezes en Erets israel, la ultima vez a la edad de 91 anyos, i aya kon sus paras fraguo munchas kozas para ayudar a los djudyos ke biviyan aya : un molino ke dainda yeva su nombre en Yemin Moshe, una basmaane, una fabrika de teshidos, i se va esfuersar de merkar tyerras para la agrikultura, afillu las difikultades.
Edmond de Rothschild, por su parte, ayudo muy muncho kon sus paras, ama tambyen kon su alma, indose personalmente en Erets, por la primera vez en 1887, i enkorajando a los halutsim de Rishon le Tsion, Zihron Yaakov, Rosh Pina, Petah Tikva, todas estas muevas koloniyas djudiyas.
Komo ya vos dishe, es solo en 1891 ke por la primera vez un djudyo de Viena, Nathan Birnbaum, a inventado el byervo syonismo. Funda en 1883, a la edad de 19 anyos, el movimyento Kadima, de los estudyantes djudyos no puedo dizir syonistos, porke dainda no invento el byervo, ama estamos avlando de djudyos ke kyeren fraguar un estado djudyo.
No puedo eskapar sovre el nasimyento del syonismo sin avlarvos de Theodor Herzl, ke todos dizen ser el padre del syonismo politiko. No es falso, syendo ke si es vedra ke no invento ni la idea ni el byervo, el es ke despues de aver eskrito en 1896 su famozo livro Der Judenstaat, el estado de los djudyos, va organizar en 1897 el Kongreso de Basel, despues del kual va eskrivir en su tefter personal : « oy fundi el estado djudyo. Si lo digo a boz alta todos se van a reir, ama en sinko anyos puede ser, en sinkuenta por siguro, esto sera una realidad. » Sinkuenta anyos despues de 1897, estamos en 1947, la ONU vota la kreasyon de un estado djudyo en Palestina.
Ansina me vo kedar, no sovre el syonismo ama solo su nasimyento.
Edmond Cohen
Paris, Fransya
