eSefarad Noticias del Mundo Sefaradi
Keridos amigos,
En este kanton vo partajar mis eskritos ke ize por anyos para la emisión de radio Muestra Lingua ke ya no sale mas por la radio djudiya de Fransia.
Saludes a todos
Edmond Cohen
Paris – Fransya
____________________________________________________________
LA SHEHINÁ
Oy pensi de avlarvos de la nosyon djudiya de shehina, la prezensya divina, i puede ser vos estash dizyendo: ke le tomo, ande mos esta yevando? No vos espantesh de maziya, vo aprovar de no enfasyarvos, i a la rovez de mostrarvos todo lo ke ay de muy interesante de saver sovre esta nosyon.
En primer de todo, kale saver ke la rais del byervo shehina es shahan, ke kyere dizir morar. La shehina es ande mora el Dyo i ya mos puedemos demandar por empesijo ke vale esta nosyon, savyendo ke en muestra relijyon, el Dyo kriador del mundo no tyene menester de un lugar para morar: tyene el universo entero, ke el krio, a su dispozisyon, i se puede kedar ande kyere, i, si kyere, kedarse en el mismo tyempo en miles de lugares diferentes. I komo krio tambyen el tyempo i ke el esta ahuera del tyempo, puede ser ayer oy i amanyana en djunto.
Dos personas ke oran, el uno en Paris, i el otro en Amerika, pensan ke el Dyo puede oir en djunto la orasyon de kada uno, porke el Dyo puede pensar a miles de kozas diferentes en djunto. I no komo este djudyo rikinyon ke esta orando delantre del kotel en Yerushalaïm al lado de un otro djudyo, un prove ke ora en gritando, ke roga al dyo, kon boz fuerte, ke le embye syen euros ke tyene muncho menester. El rikinyon le da un bilyete de sien euros i le dize: na toma i agora kayate, desha al Dyo okuparse de mi solo!
Naturalmente, esto es una shaka: muestra relijyon pensa ke el Dyo puede eskuchar i okuparse i del prove i del riko en el mismo tyempo, i mismo si el uno esta aki i el otro aya.
I por tanto, en muestra relijyon ay la nosyon ke el Dyo tyene un lugar en ke el prefyere toparse, un lugar santo ande su prezensya se yama la shehina, la morada.
El tanah, en Bereshit, mos konta la istorya muy interesante de Avraham, kazado kon Sara ke ya es vyeja i ke no le dyo kriatura. I mos konta ke Avraham esta asentado delantre de su tyenda, en la kalor del dya, i ve tres ombres delantre de el. Ke aze Avraham? Pishin se alevanta i korre verso eyos i se echa a tyerra, i dize: «Mis Senyores! Si topi grasyas a tus ojos, no vas a pasar leshos de tu servidor». I les da pan, agua, i leche. Avraham no save dainda ke son embiyados del Dyo, i ke le van a anunsyar ke va tener de Sara un ijo ke sera Itshak.
Agora kale azer un poko de gramatika. Avraham korre verso tres ombres i dize Mis Senyores, lo ke se dize en ebreo Adonaï. Adon, en ebreo, kyere dizir sinyor. Mi Sinyor se dize Adoni, i mis sinyores se dize adonaï. Si avlo al Dyo, lo yamo mis synyores, dunke adonaï, es el plural de majesta, ama despues le digo tu, porke es el Dyo uniko. A la roves, si avlo a tres ombres, les digo mis sinyores, ke se dize tambyen adonaï, porke son tres, i despues les digo vos, por la misma razon ke son tres.
Aki vemos ke Avraham korre verso los tres ombres , dize mis sinyores, adonaï, ama despues dize tu…tus ojos, tu servidor, ets.
De esto los hahamim travaron ke Avraham no estava avlando a los tres ombres, ama al Dyo ke estava kon el; la prezensya divina, la shehina, se kedava ande Avraham. Los hahamim travaron de este teksto ke la ospitalidad es koza tan sagrada, ke mismo si estas asentado al lado de la shehina, deshas a la shehina para azer ospitalidad. I esto es el senso de las palavras de Avraham: «Si topi grasyas a tus ojos, no vas a pasar leshos de tu servidor.» Asigun los hahamim, Avraham no esta avlando a los ombres, esta avlando al Dyo i le demanda de no irse i de asperarlo el tyempo ke se okupe de estos ombres.
I para ke no ayga konfuzyon, los hahamim de la Masora, kyere dizir los ke metyeron karakteres yamados nekudot, i ke son voyelas, sovre las letras del ebreo, ke son solo konsonas, dechidaron ke kuando el byervo Adonaï es para el Dyo, el a sigundo de Adonaï se eskrive de una manera, ke es el kamets, ke se melda a ande los sefaradim i o ande los ashkenazim, i kuando el byervo adonaï es para munchos ombres el a de adonaï se eskrive de otra manera, ke es el patah, ke se melda syempre a, ke sea por los sefaradim o los ashkenazim.
Un ashkenazi, si avla al Dyo, dize adonoï, i si avla a munchos ombres , dize adonaï.
En este pasuk de Bereshit, pensando ke Avraham avlava al Dyo i no a los ombres, los hahamim de la masora eskrivyeron adonaï kon un kamets.
Esto todo era para dizirvos ke el Dyo, naturalmente, se puede kedar ande kyere, ama se topava mijor al lado de Avraham, ke teniya dunke la shehina en su tyenda.
Kale ver tambyen ke en esta istorya el Dyo estava detras de Avraham en su tyenda, i en el mismo tyempo delantre de el, basho la forma de los tres ombres ke eran sus malahim, sus andjeles.
Despues kuando los ebreos fueron syervos en Ayfton, Moshe Rabenu enkontro la Shehina en un espino ardyente.
Mas despues, kuando los ebreos kaminavan en el dezyerto detras de Moshe i Aaron, tenyan delantre de eyos la kolona ke les dava el kamino, kolona de nuve el diya, kolona de fuego la noche. En esta kolona se topava la shehina.
Despues, kuando uvo la allyansa kon las dyez palavras, delantre del monte Sinaï, la prezensya del Dyo aparesyo kon fuego, umo, turuelos i ruido.
I mas despues, el Dyo avlo a Moshe para dizirle ke keriya estar en un mishkan, ke tyene la misma rais ke shehina, un lugar para morar. Yo diriya la morada, ama en ladino se yama el Tabernakulo, ke es una tyenda echa kon munchos tapetes.
I en este mishkan, el Dyo enkomenda a Moshe de fraguar lo ke se yama en ebreo aron, ke es un kuti de madera yamado en ladino arka. Arka del testimonyo o arka del firmamyento, en franses l’Arche d’Alliance. En este kuti se topavan las pyedras de la ley, el ramo enfloresido de Aaron i un poko de mana en un vazo.
Este kuti de madera estava kuvyerto de una kaplama de oro, kon estatuas de sheruvim de oro, i aniyos tambyen de oro para azer pasar dos palos de madera kuvyerta de oro, de tal manera ke ombres del trivo de Levi, yamados los Kerasim, puedan kaminar yevandola a pye tres diyas de kamino delantre de los otros. A propozito de kerasim, yo saviya ke los de Carasso son konsiderados komo Levy i son yamados en sigundo despues del Cohen para meldar la perasha. Un Carasso, Jean, ke era direktor de La lettre sepharade, me disho ke la razon de esto es ke el nombre Carasso vyene de estos kerasim, ke eran de Levi.
Los ebreos se yevaron esta arka kon eyos asta la tyerra de Canaan, i kon eya Yoshua les izo traversar el ryo Yarden. El livro de Yoshua mos konta ke kuando los Cohanim ke yevavan la arka (esta vez los Leviim eran Cohanim) metyeron pye sovre la agua, la agua se kedo de korrer i todo el puevlo pudo pasar a pye seko.
La arka del firmamyento era tambyen a la kavesa de la armada ebrea kuando tornaron siete vezes al deredor de Yeriho sonando chofar. I ya se save lo ke se paso despues.
Una vez en Kenaan, la arka se kedo en primero en Gilgal, i despues en Shilo.
Para ganar una bataya kontra los Pelishtim, los ebreos izyeron vinir la arka de Shilo, kon los dos ijos del Cohen Eli. Ama esto no sirvyo. No solamente peryeron la bataya kon 30.000 muertos inkluyendo los dos ijos de Eli el Cohen, ama tambyen peryeron la arka ke fue tomada por los Pelishtim ke la metyeron en el templo de Dagon, el Dyo de los Pilishtim. Ama la statua de Dagon se rompiya kadal diya mas i los Pilishtim pishin salyeron la arka de aya i la yevaron de sivdad en sivadad. Ama en kada sivdad los Pilishtim se muriyan de hazinura, a tanto ke los Pilishtim, de si para si, dyeron atras la Arka a los Ebreos tresalidos.
Kuando David se izo rey, i tomo la sivdad de Yerushalaïm, se tomo la arka i se la yevo a su palasyo en Yerushalaïm, kantando i baylando. Su mujer Mikal, ija del rey Shaul, se burlo de el de verlo ansina baylar. Su kastigo de tenerse burlado de David fue ke nunka tuvo kriatura.
Es el rey Shelomo, ijo de David por una otra mujer, Bat Sheva, ke izo fraguar al lugar ande Avraham ato a su ijo Itshak, i ande Yaakov izo su suenyo de la eskalera, el monte Moria, una morada fiksa, yamada el Bet amikdash, el Templo de Yerushalaïm, para resivir la arka. Es de este tyempo ke la shehina moro en Yerushalaïm, en el Templo, en la parte la mas santa del templo yamada kodesh a kodashim, el santo de los santos.
La arka se kedo en el templo de Yerushalaïm asta ke venga Nabuchodonosor, rey de los Babylonyanos, i ke destruyga el templo.
A partir de este tyempo dinguno save en vedra lo ke se izo de esta Arka. Por esto es ke Steven Spielberg pudo azer un filmo sovre la arka pedrida.
Los Etyopyanos dizen ke son eyos ke la tyenen, byen guadrada en una iglesya, ama komo nunka la amostraron, no se puede verifyar.
Lo ke es siguro es ke los djudyos fraguaron un sigundo Bet amikdash despues ke el rey perso Cyrus, ke gano la gerra kontra los Babilonyanos, dyo a los djudyos libertad para aboltar de deportasyon en Yerushalaïm. I el rey Herodes izo grandes lavoros a este sigundo templo, lo enfortesyo i lo engrandesyo. Ama el kodesh a kodashim, el santo de los santos, esta vez, era vaziyo.
Flavius Joseph mos konta ke kuando los soldados de Titus estavan tomando i kemando el Templo, entraron en el kodesh a kodashim, siguros de topar el tresoro de los Djudyos, i fueron muy enkantados de toparlo vaziyo entero.
Destruido por Titus i mas despues yene por Hadriano, mos keda solo del templo la pared de las fundasyones, lo ke yamamos el kotel maaravi, la pared oeste. Ama kale saver ke asta oy, para los djudyos, la shehina esta dainda ayi. El Dyo mora dainda sovre las ruinas del Bet Amikdash, afillu ke se fraguaron enriva dos meshkitas. I por esto es ke esta pared, este kotel maaravi, es el lugar el mas santo del mundo.
En este templo aviya una grande menora de oro. I kuando, en 70, los Romanos destruyeron el Templo, se yevaron kon eyos esta menora, lo ke se puede ver gravado sovre el arko de triumfo de Titus, en Roma. Esta menora tambyen se peryo.
Se dize ke el rey de los Vandalos de Afrika, ke se yamava Genseric, kuando tomo a Roma en 455, topo en el tresoro de los Romanos la menora del bet amikdash i se la yevo kon el asta la Tuniziya, i ke aya, munchos anyos despues, Belisaire, el kapo de las armadas romanas del imperador Justinyano, topo la menora i se la yevo a Estambol, kapitala de los Romanos de Oriente. I aya la leyenda mos dize ke los Romanos byzantinos aboltaron la menora al lugar de ande veniya, kijo dizir en Yerushalaïm. I mas dospues dinguno save lo ke le afito.
Dinguno save, ama puedemos sonyarmos. .. Lo ke savemos, es ke los arabos tomaron Yerushalaïm i fraguaron en 691, al lugar mismo del Bet Amikdash lo ke yamamos la meshkita de Umar, afillu si no es una haliz meshkita, il el tejado de esta meshkita tyene una grande i muy ermoza kaplama de oro ke se puede dainda ver oy. I yo seriya kuryozo de saver de ande veniya el oro ke sirvyo para esta kaplama. No sea ke seriya el oro de la menora topada por los arabos en este lugar? si esto seriya, puedemos dizir ke asta oy la menora del Bet Amikdash mos da, basho el sol de Yerushalaïm, dainda su luz santa…
Sovre esta shupe me vo kedar, dizyendovos : saludes buenas ke tengash !
Edmond Cohen
Paris, Fransya
