eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
5. La chikez de Albert
Despues del nasimyento de mi padre Albert en 1897, mi vava Sultana tuvo yene dos otros ijos : Victor, nasido en 1900, i Leon, nasido en 1902. En vedra Viktor no se yamava ansina a su nasimyento. Zaten no se komo se yamava, ma lo siguro es ke fue muy hazino, kondenado por los medikos. Echava toda komida, puede ser una alerjiya.Mi vava lo sostuvo inadina i malgrado todo, dandole a chupar pedasikos de pan untados en la supa. Es en esta epoka ke le trokaron su nombre para adoptar el de Haïm (la vida) fransizado en Victor. I sovrebivyo…
Mi padre a los tres anyos en la eskola de la Alyansa en Estambol .(en 1900) asentado en medyo de los de delantre (el kuatren, ke sea de la derecha o de ka syedra)
En la relijyon djudiya, lo ke vale no es la alkunya, ke no es una nosyon de orijen djudiya, ma romana. Para el djudaismo, la alkunya es por sovresalud, a lo mijor utilitarya, ayuda solo a topar mas kolay, , a prechizar de kyen se avla. Indimas kuando la alkunya es Cohen, ke antes de ser una famiya, aki una kasta saserdotala, es en primero, un ofisyo, el saserdosyo. Para los djudyos, lo ke konta, es lo ke a la franka yamamos el prénom, etimolojikamente lo ke vyene antes del nombre, ama para el djudaismo no es un prénom syendo ke ya es el haliz nombre, shem en ebreo. Tambyen utiliytaryo va ser el rekodro del prénom-nombre del padre. Por egzemplo por el djudaïsmo me yamo Nissim ben (ijo de) Avram HaCohen (el saserdote). Ma mi denominasyon fundamentala, mi shem, es Nissim. La importansya de este nombre yamado prénom es ke para el djudaïsmo es, i el solo, determinante sovre la esensya, la natura misma del ke lo yeva.
Por esto ay un uzo asigun el kual una persona muy hazina puede verse trokada de nombre para tomar un nombre de vida komo Haïm (o Raphaël, andjel de la refua) kon la esperansa ke este trokamyento de nombre va enfluir sovre el destino del ke lo yeva. No es muy syentifiko komo prosedimyento, kale atorgarlo, ma dinguno nunka pretendyo ke el poder de la orasyon, si egziste, tyene de ver kon la syensya. En todo kavzo, al pareser, el prosedimyento reusho para el chiko Victor.
Ama despues de sus tres parimyentos, Sultana pedryo enteramente el sentido de oir. Dunke se ambezo, i muy byen, de meldar sovre los mushos. Abastava de avlarle kara kon kara artikulando normalmente, sin alsar la boz syendo ke no serviya de nada, i era totalmente posivle de tener kon eya un moabet normal. Eya mismo, zaten, a la diferensya de todos los sodros ke tuve de konoser, avlava a un nivel de sonido muy ekilibrado, i esto era muy kuryozo, syendo ke no se oiya. Kale yene dar una presizyon esensyala : syerto era posivle de tener un moabet kon eya, ma kon la condisyon de avlar en su lingua. Isu lingua no era el fransez, era el djudeo-espanyol… Kuando vino en Fransya, en 1922, a la edad de 52 anyos, fue muy yuch para eya de ambezarse el fransez. Syerto eskapo por entenderlo mas o menos para meldar la gazeta, ma para avlarlo era otra koza.
Ama de muevo antisipo. Aboltaremos a Estambol, dainda no estamos en 1922, estamos djusto al empesijo del siglo 20, i el chiko Albert Cohen, ke sera mi padre, va a la eskola. La eskola, es le eskola djudiya franseza avyerta por la Alyansa Israelita Universala, ande el ambezamyento es dado por maestros djuyos edukados en Paris por la Ekola Normala Israelita Oryentala.
En esta eskola, ande todos los elevos sin eksepsyon son chikos djudeo-espanyoles, no se avla djudeo-espanyol, no se ambeza el djudeo-espanyol, ni el espanyol, zaten. Ni el turko tampoko. El ambezamyento es en fransez, ama se ambeza tambyen el ebreo, no el ebreo moderno, si se puede avlar de ebreo moderno al empesijo del siglo, ma el ebreo bibliko para el ambezamyento relijyozo : estamos en una eskola djudiya. La ligua ajena es el alman. Mi padre es intelijente, le plaze ambezarse, kyere kontinuar sus estudyos despues de la eskola.
La famiya es prove, malgrado los esfuersos de mi papu para subvenir a los menesteres de una famiya de tres kriaturas. Viyaja, en kompaniya de su kunyado Isaac Levy, i, si no me yerro, de su ermano Joseph, i se va al Yemen, i de aya a las Indias para merkar diamantes en Bombay. Ma en el viyaje para aboltar, va ser atakado i arrovando por bandidos, lo ke lo va deshar , i no mas riko por lo tanto.
Se tambyen ke se fue a la ekspozisyon Universala de 1889, en Paris, i a esta okazyon pudo vijitar la torre Eiffel fraguada para esta manifestasyon (i ke, zaten, teniya de ser desmontada despues…).
De diamantero ke era de djoya, se oryenta verso el dyamante industrial, i avre una chika empreza artezanala de diamantes para djamdjis. Ma la famiya no kamina por lo tanto sovre el oro, indimas sovre el diamante…
Se kome karne solo una vez a la semana. La manteka es un lukso, no se mete manteka sovre el pan, el pan es untado kon azete (de azituna).
A kontinuar…
Edmond Cohen
Paris, Fransya
Fuente: LK/eSefarad
