eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
6. La mansevez de Albert
Albert et Adato à la Fac de droit d’Istamboul en 1917
Ir al liseo es tambyen un lukso. Para el ambezamyento segundaryo , ay los establesimyentos privados katolikos, o el liseo franses de Galatasaray, ke son demaziya karos para la famiya. Keda el liseo turko, ke es leshos de ser de baldes ma ke yene es manko karo, i para solo el bohor de los tres ermanos, kijo dizir Albert. No estudyo segundaryo para Victor i Leon. Demaziya karo para tres kriaturas en djuntos.
Ansina es ke Albert entra en el liseo turko de Kabatash (una male d’Estambol sovre la vanda evropea del Bosfor), ande se topa ser el solo djudyo de todo el liseo. Todos sus haverim son muzulmanios, salvo un grego, ke, el, es el solo kristyano del liseo… Por siguro, en este establesimyento, el ambezamyento se aze en turko (ke en esta epoka se eskrive en karakteres arabos), ma aya se ambeza tambyen las linguas klasikas, kijo dizir el adjem i el arabo, i una lingua ajena, aki el bulgaro, lingua de un pais a la frontera.
Aya mi padre deskuvre por el mismo koza ke para los turkos es tan natural ke no es ambezado (o fue ambezado de mas chiko), por egzemplo ke las voyelas se esparten en dos grupos ke no se mesklan entre eyos, la a i la e topandosen en dos grupos diferentes. De tal manera ke sus haverim lo yaman Albart, porke Albert, no les vyene komo natural. Tal Pascal redeskuvriendo solo las leyes de la jeometria, el deskuvre solo syertas reglas non ambezadas, ma fundamentalas, de la gramatika turka.
En el liseo, todas las kriaturas yevan el fez. Estamos en los anyos 1910, aze mas de un siglo. Un diya, el fez de Albert kaye de su kavesa i sus haverim se burlan de el, vyendo ke basho su fez era peynado. Ke menester, syendo ke los kaveyos son eskondidos por el fez ?
Avro aki una paranteza para akodrar ke el fez fue el chapeo de los ombres en uzo en Turkiya entre 1826, kuando fue ovligado por un firman ofisyal del sultan Mahmud II para trokar del turban ke era en uzo antes, i 1925, kuando, kon un eskopo de oksidentalizasyon i de laisizasyon, fue proibido por Mustafa Kemal, ke un anyo despues, en 1926, izo votar una ley asigun la kuala yevar el fez era un atentado kontra el Estado, kastigado de muerte. Ma asta este tyempo, no se pensava yevar un chapeo a la oksidentala, ke tyene un rebodre ke impide de tokarse la frente durante la orasyon. Albert bivyo en Turkiya del tyempo del fez.
Para ayudar a su famiya por el pagamyento del liseo, se mete a dar lisyones partikolares, sovre todo de matematikas. Toma el vaporiko, traversa el Bosfor, i se va en la parte aziatika de Estambol verso las kazas moradas por sus elevos. A su yegada, toda la povlasyon feminina de la kaza va eskonderse. I la lisyon empesa. Es un haliz pedagogo, se tresale para ambezar a los otros, i no solo es klaro, ma ensima tyene un entuzyasmo para lo ke ambeza, ke komunika al otro. Save render interesante lo ke ambeza. Da gana de konoser lo ke ay despues…Guadrara vida entera esta dispozisyon para el ambezamyento.
Es en el tyempo ande esta en el liseo ke empesan las gerras balkanikas, ke apovresen otrun mas una povlasyon turka, djudyos inkluidos, ke ya era mizeravle en jeneral. Es tambyen kuando se topa al liseo ke empesa, en 1908, la revolusyon Joven Turka.
Un rekodro : estamos en Paris en los anyos 1980 i senamos en djuntos. Komo sale kon difikultad de un infarktus, esta prepando una kura ke le ordenaron i ke se yama Adalate. I en mismo tyempo ke esta arasgando la chika envelopa de papel, lo oygo kantar kon boz basha « hürriyet, adalet, müsavat, yashasin millet ! » Por siguro, le demando kualo esta kantando. Me responde ke es el slogan ke oiya skandar i kantar por los rebeldos de 1908… La traduksyon seriya : « libertad, djustisya, igualidad, biva la Nasyon ! » El nombre de su kura, Adalate, le akodrava pishin esta adalet, esta « djustisya » reklamada por los rebeldos de 1908. Era su pasteliko de Prout suyo… I yo me demandava kuantos uzadores de esta kura puediyan en Paris en 1980, meldando su nombre, akodrar no solo el nombre de la djustisya en turko, ma ensima la muzika i los byervos de un slogan kantado en las kayes de Estambol en 1908, mas de setenta anyos antes…
Kuando konti este rekodro a mi madre Betty (nasida en 1915) un slogan del mismo djiz le vino pishin a la memorya : i eya tambyen se metyo a kantar « Yasha, bin yasha, Mustapha Kemal Pasha ! » (Biva, mil vezes biva, el Pasha Mustapha Kemal). Aki, no estamos mas en 1908, ma el 6 de oktobre 1923, diya de la entrada triunfala de Mustapha Kemal ( ke dainda no se teniya dado el nombre de Ataturk) en las kayes de Estambol. Eya teniya ocho anyos.
Ama aboltaremos a Albert, mi padre, ke deshimos en el liseo de Kabatash alderedor de 1908.
En este tyempo yegavan de Evropa oksidentala i de los Estados Unidos las muevas invensyones. La fotografiya ya egzistiya de munchos anyos (el Nadar de Estambol era Sabbagh i Joallier, los fotografos ande la djente iva fotografyarse a lo manko una vez en su vida). Ma na ke aparesiya la fada elektrisita, i kon eya la luz elektrika, ke a poko a poko remplasava la luz por el gaz, ke el mismo teniya remplasado la luz por la benzina o basbaya por la kandela. Mi padre vido ayegar esta sira de progresos. Tambyen aparesiyan las primeras arabas sin kavayo, ansi ke una mueva invensyon, haliz majika : el sinema…
Mi padre i mi tiyo Leon se akodravan, tresalyendosen, de la primera vez ke toda la famiya se fue en djuntos al sinema, para ver pedasikos de filmos kon titolos ke aziyan sonyar : « Una plantasyon de cocotiers (el arvole ke da la muez de koko) en Singapur » … « Un kazamyento en Payacombo, isla de Sumatra »…
Esto todo mos atraza a mas de un siglo. Albert se muryo a los 93, al kavo del anyo 1990. Tuvo el tyempo de konoser, en mas de estas invensyones, la del telefono, del disko, de la radyo, de la televizyon, del avyon, kon chark i despues kon reaksyon, del fishek, del viyaje en el espasyo kon un ombre ke kamina sovre la luna, de la fotokopiya, de la komputadera i de su imprimadera, del minitel, del fax, de los antibyotikos, del scanner, de la ashlama del rinyon i despues del korason… I en medyo de esto todo dos gerras mundyales, el renasimyento del Estado de Israel, la kaida de la pared de Berlin, ke anunsyava el kavo, ke manko de poko, de la URSS ke teniya visto naser. Yene aze muncho en una sola vida ! A la kontra, se muryo antes de konoser internet i el telefono de aldikera…
Ma muestro chiko elevo del liseo no puediya preveder tantos evenimyentos, i mijor deve de ser, porke kale pensar al shasheo ke lo uvyera aharvado si uvyera solo entrevisto el futuro…
A kontinuar…
Edmond Cohen
Paris, Fransya
Fuente: LK/eSefarad
