eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
____________________________________________________________
8. Los estudyos superyores de Albert en Fransya
I nalo ke ayega en 1919, djusto despues de una gerra tan matadera, en la male latina, ande se topa una kamareta. Para ser doktor en derecho, kale (en esta epoka) empesar por obtener dos diplomos de estudyos superyores, i despues sostener una tezis. Si uno kyere konsagrarse al derecho privado, el eskojimyento es estrecho : ay un diplomo de derecho romano, i uno de derecho privado. In utroque jure, se diziya antes, ma kon el derecho kanoniko. El dezavantaje kon el derecho romano, es ke kale byen konoser el latino, lo ke no es una grande difikultad para los djovenes bugezes fransezes de 1919, ke ya tyenen estudyado el latino en el liseo durante sesh a syete anyos. A la kontra, para un ajeno ke tyene estudyado el turko, el adjem i el arabo, atakarse al latino i al derecho romano es muy otra koza. Ma kaliya mas para espantar a mi padre, ke se daldea en los tekstos, en las gramatikas, en los tratados, ke eskucha kon respekto en anfiteatro a alturas romanistas komo eran Girard i Cuq, i obtyene este primer diplomo.
Entremyentres, se aze unos kuantos amigos : en mas de Adato, se toma de amistad kon un protestante del sud ke se yama Alfred Légal, alkunya predestinada para un juristo ke eskapara doyen (mayor) de la Eskola de derecho de Montpellier despues de tener ayudado a mi padre durante la gerra… Mi padre konose tambyen a Mathieu Muller, djudyo muy pratikante ke no tranzija kon el shabath, i ke sera avokato. Kuando yo mismo fui avokato, el no lo era mas, kreo mismo ke ya era muerto, de todo modo no lo konosi. Ama konosi uno de sus kolegas ke lo teniya afrentado en el Tribunal. ;; i me atorgo el mismo ke aziya maksus de azer venir el pleito un diya de shabath, impidyendo ansina a Mathieu Muller de venir pleytear… no muy bravo ni muy konfraternal komo prosedimyento !
Ma aboltaremos a Albert, ke para pagar sus estudyos, topa un lavoro ande Marcilhacy, avokato a la Korte de Kasasyon, i puede atakar su sigundo diplomo sin mas asperar, i lo obtyene en unos kuantos mezes. Agora konose byen el derecho fransez, ke se ambezo kon los mas grandes : Marcel Planiol, Josserand, en derecho sivil, Lyon-Caen en derecho komersyal. Estamos en 1920, le keda dainda de prezentar su tezis.
I aki…no eskapo de enkantarmos. Nalo ke eskoje por su tezis una kuestyon de derecho komparado. El, ke vyene de le Universita de Estambol, se puede pensar ke va eskojer una koza de komparar kon el derecho osmanli. Ama no. Toma, basho la direksyon de Lévy-Ullmann, una kustyon – los kontratos por korespondansya – en derecho franses komparado a los derechos inglez i amarikano…Halbuki, para tratar de derecho komparado, kale estudyar las leyes, la doktrina, la jurisprudensya, de los paizes de los kuales se trata… i en sus lingua, por siguro. Portanto, el el grande numero de idiomas ke se ambezo no ay el ingles. Ma un detalye tan chiko no es para espantarlo ! Kuando se metyo al latino para azer derecho romano, no puediya eskojer. Ama aki ? No tengo la repuesta. Kale pensar ke, parafrazando Edmond Rostand, pensavake « es tanto mas ermozo kuando es yuch »…
Se daldeo en los livros inglezes i amerikanos, empeso una larga korespondansya kon profesores de Oxford i de Yale, i reusho a sostener su tezis en la primavera 1921, delantre un tres profesores : Lévy-Ullmann, prezidente, i a su lado personalidades komo Wahl i Percerou. No solo su tezis fue byen resivida, lo ke le permetyo de reushir la ultima de su doktorato, ma ensima fue dekorado por la Eskola, lo ke muncho tyempo metyo sovre su papel de letras.
La kuestyon ya era yuch en derecho franses entre fransezes, en vedra lo kedo asta poko. En dos byervos, de kualo se trata ? Munchas vezes, la solusyon de un pleto relativo a un kontrato depende del lugar i del tyempo ande fue pasado. « Locus regit actum », diziyan los romanos, kijo dizir ke las kondisyones de validita, a lo manko en la forma, de un kontrato son rejidas por la ley del lugar ande fue pasado. En la mayoriya de los kavzos, es kolay de saver kualos son el lugar i el tyempo, porke los kontratos son en jeneral firmados entre personas prezentes, i el kontrato se eskapa por la mensyon tradisyonala : « echo a … el… » i sigen las firmas. Ama se puede ke el akodro de veluntades se tenga entre personas leshos las unas de las otras. Tomaremos komo egzemplo un kontrato entre dos personas, el kontrato de vendita.
A kontinuar…
Edmond Cohen
Paris, Fransya
Fuente: LK/eSefarad
