eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
17. Victor Cohen i los Morhaïm
Aboltaremos agora a Albert ande lo teniyamos deshado, kon su famiya, kaye de Nemours, en 1926, kuando el se establesyo a su kuenta komo konsilyero juridiko en un büro kaye de Astorg.
Tres anyos mas dospues, en 1929, Victor, ermano de Albert, se kaza kon Eleonore (yamada Ele) Morhaïm, su prima ermana, syendo ija de Ventura, ermana de Sultana, la madre de Victor, i se va de la kaza de famiya para ir a morar kon su mujer. En 1932, tyenen un primer ijo, Raymond, segido en 1935 de un sigundo ijo, Lucien (ke dinguno, zaten, yamara Lucien ; chiko, era Lulu, mas grande sera yamado Luc). Victor entra komo haver en un echo de teshidos en groso para mujeres, kon su suegro i sus dos ijos, ermanos de su mujer, Victor, (otro Victor, este Morhaïm) i Rodolphe ( no Rodolphe Garé, ma Rodolphe Morhaïm) ke son dunke a la vez sus primos ermanos i sus kunyados. Los ijos Morhaïm obtendran de la Turkiya de trokar el nombre de Morhaïm en Morain.
No kale enkantarse de topar munchos primos yevando el mismo nombre : desdel momento ande kada bohor yeva el nombre de su papu, es kolay de entender ke todos los primos ermanos bohores yeven el mismo nombre, el de sus papu paternal.
El suegro de Victor Cohen, ke se yamava Isaac Bohor Morhaïm, se muryo a la edad de 66 anyos el 24 de mais 1939, viktima de un atako del meoyo en medyo de la kaye. Na komo mi tiyo Victor konta (en fransez) lo ke se paso, de su delikada eskritura kaligrafika, en su tefter de jenealojiya :
« Akel diya del myerkoles 24 de mais 1939, serka de las sesh de la tadre, se iva de la botika, 53 kaye del Kayro, i se dirijiya a pye verso su kaza 51 Kaye Lafayette. Al medyo del kamino, aharvado en supito por un golpe de sangre, se desho kaer, agonizando, sovre las eskaleras de la Posta al köshe de la kaye Bergère i de la Kaye del konservatoryo. Pasantes, testimonyos del drama, yamaron pishin a la Pulisiya ke lo yevo al ospital Bichat. Ma ya teniya eskapado de bivir. »
Syendo ke yo nasi el primo de desyembre 1936, yo no teniya dainda dos anyos i medyo kuando se muryo. Es dizir ke no lo konosi muncho tyempo. I yene me akodro de el…El shabat a la tadre era en efeto de tradisyon ke Victor venga ande mozotros a dar vijita a su madre, Sultana, akompanyado de su mujer i de sus dos ijos, mis primos, i de su suegra i tiya, Ventura, ke eya veniya ver a su ermana… I Ventura veniya eya misma akompanyada de su marido Isaac-Bohor Morhaïm, ke a kada vez me dava un bonbon. Yevava kon el chikos bonbones, syempre los mismos, chikos bonbones largos i vedres, emburujados en papel transparente. Pare dizir la vedra, es sovre todo de los bonbones ke me akodro, mas ke de sus jenerozo donador…
Ma vengo yene de antisipar, syendo ke por agora dainda no nasi, i por una buena razon : mis paryentes dainda no se konosen.
A kontinuar…
Edmond Cohen
Paris, Fransya
Fuente: LK/eSefarad
