eSefarad Noticias del Mundo Sefaradi
Ver todos los artikolos de esta seksion
Saludes a todos
Edmond Cohen
Paris – Fransya
______________________________________________________________
19. El enkontro i el kazamyento de Albert i de Betty
Es a la politika franseza de lucha kontra la imigrasyon ke devo el enkontro de mis padre i madre. Betty, ya lo dishe, es amenasada de ekspulsyon. Kualo azer ? Su kunyado Rodolphe Garé tyene una idea : « Vate a ver mi primo Albert, es konsejero juridiko, puedra darte un konsejo ». I Betty, vente anyos, kuero klaro, kaveyos kastanyados, ojos mavis, se va al büro de Albert, entremyentres establesido kaye del Faubourg Montmartre. Albert no ve otra solusyon para Betty ke el kazamyento, sea kon un fransez, sea…kon un ajeno byen instalado i benefisyando, el, de un titolo para morar, lo ke, na ke koinsidensya, se topa ser su kavzo. Kuryozo konsejo para alguna ke no tyene dinguno de espozar.
Ma Albert aze saver a su madre Sultana ke el mismo puedriya ser un pretendyente interesado. Sultana lo aze saver a su ermana Rachel, ke eya misma trasmete el haber a su ermuera Mina, deshandola avlar kon su ermana Betty. Mina es ekantada i septika : nunka va kerer, se dize, tyene 20 anyos, el 38, la diferensya de edad, 18 anyos, es demaziya grande.
Toma dunke su ermana kon mil akavidos de avlar, azyendole byen entender ke es enteramente libera de su desizyon… ma, a su grande sorpreza, i sin pareser arrepensar, Betty le responde pishin ke esta de akodro…
Lo ke sigyo fue un kazamyento selebrado el 23 de junyo 1935 en los salones del Otel Continental (oy el Westin) kaye de Castiglione. Raymond, ijo bohor de Victor i sovrino de Albert, es pajiko ; tyene tres anyos.
Las sheva berahot son pronunsyadas por el hazan Izak Algazi, de Izmir (sola omonimiya sin dingun atadijo kon el muzikologo i haham Léon Algazi, padre de Jacques Algazi ke se kazo mas despues kon mi prima Liliane Morain).
Durante el viyaje de bodas en Chamonix, Albert acheta, sovre la demanda fuerte de su mujerika, de arapar su chiko mostacho a la Charlot al kualo teniya muncho, lo ke konstituye, kale konvenir, una ermoza prova de amor konjugal.
A la buelta en Paris, Betty se instala kon su marido en el apartamento del 45 kaye del Faubourg Montmartre ande moran tambyen sus suegros Nissim i Sultana, i su kunyado Leon, ke kedara soltero vida entera i morara ande Albert i Betty asta su muerte. Leon, ke entremyentres obtuvo su kapachedad en derecho, lavora kon su ermano Albert ke trusho en su morada del Faubourg Montmartre el echo de konsejero juridiko ke aziya antes kaye de Astorg.
A kontinuar…
Edmond Cohen
Paris, Fransya
Fuente: LK/eSefarad
